الجمعة، 20 أغسطس 2010

القلم






في قلم ربنا يدينا ويديك

تلاقيه طول النهار بيكتب شيك

وقلم الله لا يورينا ولا يوريك

يودي صاحبه في بيضة الديك

قصدي يعني يوديه الليمان

يخليه هناك يقزقز بتنجان

وانت ياحلو قلمك فين

قوللي قول يا نور العين

انا فاكر من يومين رحت الكافيه

جاللي الجرسون ومعاه المينيه

قاللي تؤمر بايه يا بيه

قلتله سلاطات وفراخ بانيه

ولما جيت احاسب قال البقشيش

قلت ماتلاقيش

قال ازاي؟ قلت ماتبكيش

خد القلم ده اهو احسن من مفيش

وروح يا واد يا حسين

اجري اشتريلي قلمين

قاللي يا عمو منين؟

من الجزار حسنين

ولا البقال محمدين

ولا عوضين بتاع الخضار

بس ده بيلعب في الاسعار

بيكتب على القوطة خمسين

ويبيعها بتمانين

ولما تساله

يقول مش عارف اصلح الكتابة

مش معايا قلم

شوفوا الحكم

ده لو عنده قلم

ما كانش ظلم

تسيب قلمك بقشيش

دي حاجة ما تساويش

ضحكتني على عبطك

روح الله يشفيك

القلم هو اللي بيفضلك

لما اللسان يسكت

لما الحق يصمت

بتفرغ فيه شحناتك

بتدون بيه حياتك

القلم يا سيدي

هو اللي بياخد بايدي

لما الصديق يخون

لما الكرامة تهون

لما الطريق يصعب

لما الرجل تتعب

القلم هو ضميرك

القلم هو كبيرك


واللي مالوش كبير

يشتريله قلم بس منين؟؟؟؟؟؟؟؟

ربنا اكرم من فوق السموات القلم

اقسم بيه وحق بيه القسم

تيجي يا ابن ادم تديه للجرسون بقشيش

اما صحيح زمن مهاويش

كله داهن وشه بورنيش

ولو دورت جواهم قلوب ماتلاقيش

وايمان مفيش

انت سمعت اللي قاله القلم للورقة

انت يا ورقة من غيري ما تساويش

من غيري يستعملوكي ورنيش

يمسحوا بيكي المرايا

يرموكي في الزبالة

وانا اللي عاملك قيمة

بقيتي بيا شهادة

بقيتي بيا ضمان

بقيتي كمبيالة

بقيتي جرنال

بقيتي بيا حياة

انا القلم
اناالحياة


0 التعليقات: