السبت، 8 فبراير 2014

التيه



لا تدع شيئا يرحل منك 
انحت فيك كل شيء
 مآقيها 
مدامعها 
لفتاتها عند ومضة الريح تحسبه فارسها
ثغرها الباسم 
قطعة الشيكولاتة الذائبة في الشفاه
الشفاه "حبة الكرز المبللة بالعسل"
عناق ضلوعها لقلبك
ارتعاشة راحتها وهي تصهر ثلوج كفك
تلويحة الوداع الأخيرة
راحلة هي 
كنسمة باردة في صيف قائظ 
سمانة ضلت طريقها في غير موسمها 
انحتها فيك 
فلن يبق منك  إلا ماتنحته 
لأنك لم تكن أبدا إلا بها




اللوحة للفنانة أمل العاتم من هنا 

الثلاثاء، 4 فبراير 2014

في رثاء عمي



لما تلاقي الراجل بيسعى انه يحج بأي شكل قبل ما يتجوز اعرف انه مش ناوي يتجوز 
طيب يتجوز ليه ؟
اللي بيتجوز بيتجوز بيتجوز علشان يعمل كل الموبقات ويعيش في الحرام بعد ما يحلف ملايين الطلاقات الواقعة ده غير الشتايم والكفر اللي هيشوفه من الجواز وبعدها يحج ويرجع كما ولدته أمه 
لكن لو الحج الأول ينفع يعمل كده ؟ لا طبعا 
ودي النقطة اللي مكناش فاهمينها لما قرر يحج وهو متجوزش دفع كل اللي محوشه في حج سياحي وبس
أتاريه مكنش ناوي يتجوز 
ده عمي الحاج (يوسف) ضحكة آل سيف الدين وجامع شملهم 
آخر عنقود الاتناشر ابن  ، أصغرهم في السن وأكبرهم في القلب 
لو كان الرضا رجلا كان أكيد هيبقى عمي ده 
اللي شافه كتير اوي رغم انه مدخلش دنيا 
بعد ما رجع من الحج حياته اتقلبت ، مشكلة في الشغل سببها سوى معاشه وهو لسه في اوائل الاربعينات 
شاف عشر سنين سواد رغم ان وشه مفارقتهوش الابتسامة ولا السؤال علينا نفر نفر 
كان عايش عازب بس طبيخه أحسن من ست بيت شاطرة ، بيربي طيور على السطح 
عمي يوسف كان راضي بكل اللي حصله حتى المرض وصل معاه لحالة رضا 
من ست سنين جتله جلطة واثرت على الكلام خرج منها بقلب ضعيف ولسان بيتهته ومع ذلك تعايش معاهم بطريقة غريبة ميبطلش ضحك وهزار والبيت الكبير مفتوح بحسه لاخواته اللي تايهين في الدنيا وبيتلموا عنده وولاد اخواته ال46 اللي ممكن ميسألوش عن بعض غير عنده 
عمي كان راضي عن كل حاجة إلا السيسي ، كان يحطلنا صورته تحت الموكيت واحنا داخلين ندوس عليها ويفضل يضحك  لما يعملها في اخوه "السيساوي"، كان معلق رابعة على كل حيطان البيت حتى فوق المنور لدرجة بعد وفاته عمتي قالتلي شيل الصور دي ؟ قلتلها انا مش مجنون يعني علشان اعملها انا معرفش ازاي اتعلى ووصل للحتة دي فوق المنور ومخفش يقع ، قلتلها سيبيها تفضل من ريحته وبركته 
هو مكنش اخوان يمكن ميعرفش حد فيهم او منهم بس كان دايما يقول بحرقة " السيسي قتل الشباب"   
كانت نقطة الخلاف الكبيرة اللي مع عمي هو انه اهلاوي متعصب فيوم السبت اللي فات بعد ما خرج من الانعاش قلتله علشان تعرف احنا الزملكاوية بنتغلب عادي جدا لكن انتو الاهلاوية بسكويت يدوب المقاولون غلبكم رحت واقع وداخل انعاش :)
قاللي ياخي ما البلنتي ظلم .
وبعدين يوم الاحد قعد يهزر معانا ويقول " أنا بكرة طالع متقلقوش" 
مش عارف ازاي مخدتش بالي منها ، ازاي مرجعتش بالزمن سبع سنين كان يوم خميس يوم ما ابويا المرض شد عليه فقلناله هناخدك للدكتور قال "لا هاطلع السبت "وفضل يكررها هاطلع السبت ويرفض باصرار يروح المستشفى فرحت شايله  فأغمى عليه وحسيته تعب فرجعته واتوفى السبت 
اللي اتعلمته من عمي وابويا انك لازم تخاف لما تلاقي حد مريض مرض شديد يقولك ( هاطلع او انا طالع ) لازم تخاف 
أكتر كلمة وجعتني قالها احد ابناء عمومتي بعد وفاته على البيت الكبير ( خلاص البيت اتطفى ) اللي واجعني انه صادق لابعد الحدود


الله يرحمك يا عمي مت قبل ما تقولنا الديك الرومي اللي انت مربيه وكنت ناوي تدبحه وتعزمنا عليه لما مرسي يرجع نعمل فيه إيه ؟ طيب المالطية اللي مرضت بعد مارحت المستشفى وقالولك هناك وحزنت عليها مصيرها إيه ؟ طيب احنا يا عمي ال46 اللي انت عمهم وخالهم هيتجمعوا فين ؟ البيت الكبير اللي كان شوية قهوتنا وشوية نادينا وشوية مكتبتنا كنت بتعمل اي حاجة علشان نتلم حواليك، البيت اللي اتطفى مصيره ايه؟

السبت، 1 فبراير 2014

أنا جااااااااااااي



ايوة ايوة اتأخرت 
عادي براحتي يعني 
كنت بتأكد بس اني هاعرف آجي 
أصلا انا عيل برنس مادام بروح وأرجع في نفس اليوم يبقى لازم انام في الطريق
يعني قطر 
سيادة الفريق قصدي المشير وقفلنا القطورات 
المشكلة لما القناوية  قطعوا السكة الحديد في 2011 اتقال عليهم بهايم
طيب آدي سيادة الفريق المشير وقفها على الصعيد اسبوع مسمعناش حسكم لا محدش يقول خوف عيب كده 
طيب آهي  رجعت يا فالح 
بس مش بقوتها دول قطرين يتامى تذاكرهم اتباعت قبل ما تنزل 
المهم حجزنا في اتوبيس ولله الحمد 
آه اتوبيس 
ودي مجازفة لو تعلمون عظيمة
آه أنا والاتوبيس لا نجتمع في مكان 
اكتر وسيلة مواصلات بكرهها في العالم حتى اكتر من التلفريك وانا عندي فوبيا المرتفعات 
لكن خلاص قدر الله وماشاء فعل واتدبست واللي كان كان 


بس لو نجيت من ده مسمعش صوت واحد فيكم 

سيبكم من الكلام ده كله أنا جاي ادعيكم على  حفلة توقيع معطف من القيود 
آه إن شاء الله يوم التلات 4 فبراير الساعة 2 في غرزة  ابداع  اللي في المعرض 
كلكم لازم تيجو نفررررررررر نفرررررر 
واللي مش هييجي ذنبو على جنبو 
دانا جاي باتوبيس يا جدعان 
وبعدين عملنالكم الغلاف أحمريكا  علشان (يجذب) الستات #السيسي_ستايل 
وكمان علشان يعقبه حفل توقيع (قيد الفراشة)الرواية النص لبة :P بتاعت شيرين سامي حتى من غير دكتورة  :P
مش مهم يعني تكونوا موجودين الساعة 4 في دار نون علشان سيادة الضاكتورة هتكون موجودة وهتوقعلكم 
إن شاء الله هيكون يوم سعيد ونتلم فيه كلنا