الخميس، 19 أغسطس 2010

الرجل الذي قال تشييز

كان في واحد راح يتصور دار الحوار ده بينه وبين المصوراتي


المصوراتي: قول تشيز


الراجل : يا تري ليه ؟ انا مش عايز ااكل


المصوراتي : لا مش للاكل انا عايزك تقول تشيز علشان تبقى مبتسم والصورة تطلع حلوة


الراجل: يعني لو ابتسمت الصورة هتطلع حلوة بالرغم ان انا جوايا متضايق يعني بس اقول تشيز الصورة هتطلع حلوة


المصوراتي : ايوة طبعا


الراجل : اجرب بس اعتقد ان الصورة هتظهر اللي جوايا مش الكلمة اللي هاقولها


تشييييييز
كلك


المصوراتي: ثواني يا استاذ وخد الصورة معاك


الراجل اخد الصورة وبص فيها مصدقش نفسه الصورة حلوة فعلا وهو مبتسم ومفيش اثر لهمومه الداخلية على الصورة حس انها مش صورته حس انها صورة واحد احسن منه


فقرر انه يبقى الشخص اللي في الصورة يفضل دايما مبتسم فعلا بقي لما يقابل حد يقول تشيييز بدون صوت علشان تظهر الابتسامة اهل البلد الطيبين المطحونين بضغوط الحياة لاحظوه دايما مبتسم سموه الاستاذ بسام


وفي يوم نزل حرامي البلد دي قعد يدور على حد يسرقه كان كل اللي في البلد ظاهر عليهم الفقر والضغوط كل ده كان بيظهر على وشوشهم الا صاحبنا المبتسم
الحرامي قال في سره : ده اكيد راجل مبسوط واغنى واحد في البلد
المهم الحرامي راقبه وعرف بيته


وبالليل راح يسرقه نط من الشباك ودخل فوجيء ببيت مفيهوش اللضى راجل مفلس وكحيان ماحيلتهوش حاجة


الحرامي طلع المطواة القرن غزال من جيبه وصحى صاحبنا ده


الحرامي: اصحى يااااااااض فين الفلوس اللي مخبيها


الراجل : فلوس ايه انا مفلس وماحلتيش حاجة


الحرامي : انا مراقبك ليا فترة طويلة دايما فيها مبتسم لو مفلس فعلا ايه اللي يخليك تبتسم؟


الراجل : اقولك الحكاية انا بابتسم علشان صورتي في نظر الناس تكون حلوة في الاول كان الموضوع رياء مكنش من جوايا كنت حاسس بضغط عليا وانا بعمله كنت باتضايق لما ابتسم وانا من جوة متغاظ شوية شوية بدات اتعود على الابتسامة بقيت ابتسم علشان ده طبيعتي شوية تاني اكتشفت اني بافرح لما ابتسم واشوف غيري يردلي الابتسامة كنت باحس اني شلت هم عنه


الحرامي: يعني مفيش فلوس يا خسارة تعبي معاك


الراجل : على فكرة انت ممكن تعمل زيي ممكن تعمل نفسك طيب تبدا تحسس اللي حواليك انك طيب مع الوقت هتبدا تحس انك شخص احسن اكيد انت من جواك بتحس بتانيب الضمير ونفسك تكون احسن تخيل نفسك طيب ابدا اعمل اعمال خير حتى لو مش مقتنع شوية شوية هيبقى تعود وهتبقى دي طبيعتك وشوية تاني هتحصد كل الخير اللي عملته وهتعرف الفرق

0 التعليقات: