الثلاثاء، 22 فبراير 2011

عيد ميلاد سعيد يا مدونتي


اكتشفت بالصدفة البحتة وبدون سابق انذار ان النهاردة عيد ميلاد مدونة طير الرماد عيدها التالت (من غير ما اقصد وانا باقلب فيها لقيت اول خاطرة نزلتها فيها بالتاريخ ده)
انا كنت عايز اقول ان عيد ميلادها السنة دي غير
لكن اصلا انا محتفلتش بيه قبل كده  ودي اول مرة
احكيلكو الحكاية  <<<< بس قولها من البداية
بدأت حكايتي مع التدوين وان كنتو تقصدوا التدوين بمعنى كتابة الافكار فبدأت حكايته كده من المرحلة الثانوية
وقتها كنت باكتب كلام مقفى وكنت باقول عليه شعر بس طبعا مش موزون استنى اديلكم امثلة عن حاجات كنت باكتبها
مثلا في السيول قلت
قالوا الحيا يحيي الفلا فما باله اليوم بلاء
وكتبت برضه وصف عن لفظة التوحيد فقلت
دلائل القدرة لكل الانظار كوميض يبرق في الاسحار
فشهادة التوحيد اسمى معالمه تبدأ بطهر وتختم بالانوار
وكتبت برضه كلام تاني قلت فيه
كل شيء بالدنا محتمل كذا رؤيتي للحبيب الامل
رايته ليلا في منام بدر خلفه النجوم تسدل
طبعا مفيش وزن هو كلام مقفى
ده كانت تجربة الثانوية لحد ما في مرة جه مدرس اللغة العربية قال النهاردة مش هافرض عليكم موضوع تعبير كل واحد يكتب عن اي حاجة تيجي في دماغكم ومعادنا الاسبوع الجاي
قعدت اسبوع كامل كل يوم اكتب موضوع او قصة وصلوا كده مش عارف كده كام موضوع سلمت واحد منهم بس دي كانت البداية الحقيقية لكتابتي لان وقتها اكتشفت ان في حاجات عايز اتكلم عنها واكتبها علشان كده نفسي تتكرر حكاية اننا نخلي الطالب يكتب عن حاجة بيفكر فيها في التعبير ثابتة مش مجرد حصة بالصدفة  وجت كده من المدرس
بعدين بقى جت ايام الكلية كتبت في الكلية الخمس سنين كلهم قصة واحدة بس اسمها نداء الحرية وهي موجوة في المدونة وهي اول حاجة تم تدوينها ونزلت في مجلة لاسرة في الكلية كان اسم المجلة يوتوبيا
بعد التخرج انقطعت تماما عن الكتابة فترة كبيرة لحد ما وصلنا انترنت في البيت وقتها اشتركت في منتدى
المنتدى ده كان حافز ليا اطلع افكاري واكتب فكتبت قصص وخواطر بعدين قلت اعمل مدونة احفظ فيها الحاجات اللي باكتبها
وفعلا ونزلت 3 خواطر بس في المدونة بعدين انقطعت عن المدونة وبقيت باكتب في المنتدى ده وبس  يعني المنتدى كان هو الاساس
لحد الصيف اللي فات حصلت مشكلة تقنية في المنتدى اتقفل فيها المنتدى فترة بصراحة خفت على الحاجات اللي كتبتها خصوصا اني اكتشفت ان في ناس كتير سرقتلي حاجات ونسبتها لنفسها فنقلت اغلب اللي كتبته للمدونة ولسه على فكرة في حاجات تانية ليا منقلتهاش من المنتدى هابقى انقلها تباعا
المهم علشان شكلي صدعتكم
ده عيد ميلاد طير الرماد والاسم ده طبعا اسم اوبريت لبناني بيصف بيه الشعب اللبناني اللي قدر ينفض الرماد ويرجع تاني بعد حربه مع اسرائيل انفعلت مع الاسم وقتها وعلى فكرة انا بحب الاغاني الوطنية اللبنانية جدا معرفش ليه
مثلا يا بيروت يا ست الدنيا بتاعت ماجدة الرومي لها معزة خاصة
وكمان بيروت بتاعت فيروز اللي اقتبست منها مقطع قبل كده في خاطرة ليا اسمها (اطفأت مدينتي قنديلها )
وكنت باتمنى يكون عندنا اغاني وطنية في قوة الاغاني اللبنانية بس اكتشفت ان انفعالي بالاغاني الوطنية اللبنانية  كان سببه في الاساس انفعالي بالحرب اللبنانية الاسرائيلية في 2006 والدليل اني بقيت بانفعل مع الاغاني الوطنية المصرية بعد الثورة ومش بعيد تلاقوني غيرت اسم مدونتي من طير الرماد ل (ازاي)
على العموم احنا بنعيش فترة مهمة وخطيرة في التاريخ المصري والعربي واي اغنية حتي لو كان حد بيقول (معسلة يا بطاطا) هنفهمها وهننفعل معاها وهنحورها لحد ما تبقى اغنية وطنية  علشان تفكيرنا حاليا كله في وطننا وبس
كل سنة وانتي طيبة يا مدونتي بقى عندك 3 سنين وبكرة تقوليلي عايزة اروح كي جي  وان  بس ده بعدك احنا صعايدة ومعندناش بنات تتعلم :))
كل سنة وانتو طيبين ومبروك رياح الحرية التي تتنسم على وطننا
وان شاء الله لن يمر هذا اليوم الا بعد اخذ القصاص الكامل من سفاح ليبيا المعتوه
دعواتي لاخواني الليبيين خاصة بالنصر وللامة العربية كافة باستنشاق الحرية
و لكم اطيب تحياتي

66 التعليقات:

غير معرف يقول...

بصراحه صدعتنا اه فعلا :P
كل سنه وهي طيبه يا سيدي وعقبال الالفيه والمليونيه وكل المظاهرات اللي تحبها..

مش هقعد اعلق على كل حته بس ازاي اغنيه جميله فعلا و اكتر واحده بتعجبني من اللي طلعوا و المدونه لو عايزه تتعلم انا هاهربها واعلمها فامريكا لو حاولت تمنعها :P بس ماتنساش تسلملي على استاذ العربي بتاعك بقى
سلالالام لك
سلالالالام لمصر
سلالالام للدنيا

موناليزا يقول...

كل سنة وأنت ومدونتك بخير

وتمنياتنا بمزيد من الكتابات الراقية

بس ليه مفيش شموع ولا بالونات ولا ده خاص برضه بكونك صعيدى:)

الــحــــنـــــــــــــــــــين يقول...

كل سنة والمدون بخير وعلى فكره بتكتب شعر جميل بجد وموضوعك يلفت الانتباه

faroukfahmy يقول...

كل سنة ومدونتك طيبة ياسيف ، وعقبال متدخلها الجامعة ، وبعدين تجوزها ، بالمناسبة انا عندى ليها عريس حلو قوى زيها وغلباوى باين عليه هيطلع كاتب مثلها وعاوز اخطبله ودها فى عزها والحق اشترى شيكة الماظ مش ذهب بس اعرف الاول المهر كام وانت هتوافق والا كله كلام فى كلام ، والله انت دمك خفيف قوى ياسيف وكما قلت مسبقاربنا يقدرك علينا ويكثر عروضك ومدوناتك وتجيب لنا اخت لمدونتك واحنا ياسيدى عندنا العرسان بس شد حيلك زى مابتشد قلمك الهيمان الولهان الريحان الفنان

mrmr يقول...

كل سنه وهى طيبه
وكل سنه وانت وسطينا
وعقبال اليوبيل الذهبى
تحياتى

شهر زاد يقول...

اخي مصطفى
كل عام وانت مبدع
كل عام وانت حامل سيف الكلمة الهادفة
كل عام وانت شمعة مضيئة في سما التدوين
كل سنة وانت طيب
يارب يخليك داايما وسطينا ونبقا دايما اسرة واحدة
بالتوفيق دائما
تحياتي

هبة فاروق يقول...

كل سنة ومدونتك بخير ويارب ما يحرمنا من افكارك ولا ابداعك فقد اضفت للتدوين لون خاص ومميز
تحياتى لمدونتك الجميلة

مدونة رحلة حياه يقول...

السلام عليكم
كان نفسى اكون بدرى شوية عن كدا بس اهو فى ناس كتير سبقتنى
كل سنة ومدونتك متألقة ومتميزة وبتعلمنا بقلمك الجميل كمان وكمان كل نبضة قلب وانت انسان جميل بقلب طيب بملامح مصرية بتفيض بمشاعر وانسانية توهب للدنيا الحرية
كل سنة وطير الرماد بينكشف عن امل وحلم جديد
طير الرماد لازم يفضلها اسمها طير الرماد عشان فى حاجات كتير محتاجين ننفض غبارها عنا وطول ما هى موجودة طير الرماد موجود دا مجرد رأى يا باشا
كل سنة وانت جميل ومدونتك جميلة ومتألقة

حرّة من البلاد..! يقول...

أله مبروك أخي مصطفى
وشرف لنا انك تكون بيننا ونحن نعتز ونفتخر بك وبوطنيتك
تحياتي

غير معرف يقول...

صباح الخير
كل سنة ومدونتك طيبه ودايما مبدع فيها بأجمل الكلام
ودايما محتفل بعيد ميلادها معانا ووسطنا
ربنا يبارك لك يارب

سندباد يقول...

ازيك يا صديقي
كل سنة انت ومدونتك بخير ومزيد من الكتابة والافكار التي تبهرنا
ربنا يزيدك من نعمه
تقديري واحترامي

Tears يقول...

كل سنة و انت و المدونة طيبيين

عيد ميلادها فى شهر التحرير :)

Unknown يقول...

مبروك و كل سنه و أنت طيب و سعيد و مدونتك منوره البلوجر تعرف أنا كمان بكتب قصص من و أنا عندي 12 سنه و لما بقراها دلوقتي بضحك أوي الناس كلها طيبه:) و كنت بكتب شعر بس مش حلو و قوي زي الأبيات اللي انت كتبتها يعني أحاسيس بنانيتي كده
يا ريت فعلاً لو المدارس و الأهل يصقلوا المواهب و يهتموا بيها بدل ما تتوه في الزحمه...أنا بقى مدونتي أصغر منك بكتير عندها 7 شهور بس:)
بس بجد انت موهوب جداً ما شاء الله بتمنى لك التوفيق دائماً و في انتظار جديدك

ray يقول...

كل سنه وانت طيب..وان شاء الله من احسن الي احسن..
وعن محاولاتك بتاعت الثانويه..دي مش بس من غير وزن..
انا مش فهمت حااااجه..^_^

بس انت لقيت نفسك في القصه القصيرة..وصراحه ابدعت فيه
تعرف مفروض تعمل القصص دي في كتاب..هيكون احلي..
ولو عملتوا هكون انا اول من يشتري الكتاب..

صحيح مبروك علي اللبس الجديد..

كل سنه وانت طيب..

تحياتي

رشيد أمديون يقول...

السلام عليكم

مدونتك جميلة وأفكارك تعجبني بكل صدق أخي مصطفى ولست أجامل..
بالنسبة لنشرك في المنتديات فالسرقة تطال كل ما تنشر، وهذه في حد ذاتها آفة من آفات التدوين العربي، هناك من لا ضمير له يأخذ تعب الأخرين وينسبه لنفسه، مازال المحتوى العربي لم يرقى إلى مستوى المسؤولية ومازالت فئة منه لم ترقى إلى مستوى احترام ملكية الأخر، أتمنى أن يكرس المدونون الفضلاء هذا المفهوم حتى يستوعب من يفعل ذلك عن جهل، ويأخذ العبرة من يفعله عن علم.

إن تمرة التدوين كانت تنمو بداخلك في كل مراحل حياتك وهذا ما جعل الأيام تهبك هذه المدونة التي هي فضاء جميل لطرح كل ما يهيم به خاطرك من فكر وابداع.

وهنا أتقدم لك بكامل الشكر لدعمك لمدنتي في مسابقة آربيسك، فجزاك الله خيرا أخي، وكل سنة ومدنتك في بهاء ورونق.

ツSmiLeY AnGeLツ يقول...

يوووووووووووووة جيت متأخرة بعد الحفله
فاتتتني الحفله
هههههههه
كل سنه وهي طيبة ويارب تكمل السنه الجاية وتخليها تروح كي جي ون
حرام عليك ماتخليها تروح
انا بشتكيك لوزير حقوق الانسان
هههههههههه
ده اصل لو كان انسان
هههههههه
لكن بصراحة كتاباتك روووووووووووووووعة
من خواطر ومواضيع بجد بحب اقرائها
عقبال ماتمر عليها طولت العمر ولاتفارقنا
ربنا يوففقك تقبل مروري ^_^
سلامي ليك اخي مصطفى.

elsha3er يقول...

كل سنة ومدونتك وأنت بألف خير

أمال الصالحي يقول...

كل عام ومدونتك بخير، ومزيدا من التقدم والعطاء

مصطفى سيف الدين يقول...

قطر الندى
فعلا ازاي من احلى الاغاني ومنير من اجمل الاصوات
ومتقدريش تهربي مدونتي لامريكا
هي يعني مالهاش اهل يجبوها من شعرها؟
ههههههههههه
سلامك هيوصل لاستاذ العربي
شكرا ليكي ومنوراني

مصطفى سيف الدين يقول...

موناليزا
اشكرك اختي على كلماتك الجميلة
بالنسبة للشموع والبلالين فيه سببين الاول ان اكتشفت عيد الميلاد فجاة مالحقتش اجهز حفلة
ثانيا ان كرم الصعيدي مات ومش بندفع فلوس في الحاجات دي هههههههههههه

مصطفى سيف الدين يقول...

الحنين
اشكرك اخي الكريم
بس انا على فكرة مكتبتش شعر من زمان
تحياتي

مصطفى سيف الدين يقول...

استاذ فاروق
لا يا عم يفتح الله الجوازة دي البنت عينها من براد بيت و هتعمله عمل لحد ما يطلق انجلينا جولي ويتجوزها
ههههههههههههه
شكرا يا باشا على كلامك الجميل
منورني

مصطفى سيف الدين يقول...

مرمر
ربنا يخليكي
وشكرا ليكي وان شاء الله نفضل دايما مع بعض

مصطفى سيف الدين يقول...

شهرزاد
كل عاك وانتي بخير
واشكر لكي دعواتك وكلماتك الرقيقة
نورتيني
اوعي تمشي الجاتوه هييجي

مصطفى سيف الدين يقول...

هبة فاروق
بل انا من استفدت وتعلمت منكم
اشكرك اختي الرائعة المبدعة
تحياتي لكي

مصطفى سيف الدين يقول...

مدونة رحلة حياة (استاذ محمد)
متقلقش مش هاغير الاسم
هي اتشهرت بالاسم ده ولازم تفضل بيه
اشكرك على كلماتك الجميلة
بس فين الهدية؟

مصطفى سيف الدين يقول...

حرة من البلاد
بل انا من اعتز بكم واعتز بابداعكم ووطنيتكم
ولاقلامكم الرائعة
الف شكر لكي

مصطفى سيف الدين يقول...

الحب الجميل
مساء الخير
وانتي طيبة واشكرك على شعورك الجميل
منوراني

مصطفى سيف الدين يقول...

سندباد
اشكرك يا صديقي
ربنا يبارك فيك واشكرك على كلماتك الجميلة

مصطفى سيف الدين يقول...

Tears
وانتي طيبة يا تيرز
وفعلا عيد ميلادها في شهر التحرير وده شرف ليها

مصطفى سيف الدين يقول...

شيرين سامي
زميلتي العزيزة في رحلة التدوين الطويلة ومهنة الصيدلة اشكرك على شعورك الطيب
بالنسبة للاهل والمدارس والتعليم نفسي كل ده يتغير ونبدا نستفيد من ثورة التحرير اللي كانت فكر شبابي 100% ونسيب مساحات كبيرة للشباب يتكلموا فيها عن اللي جواهم
وبالنسبة لمدونتك اللي عندها سبع شهور متنسيش تطعميها ضد الحصبة لما يبقى عندها تسع شهور
التطعيم مهم هههههههه
وابقي هاتيها لطير الرماد تلعب بيها قصدي تلعب معاها شوية :))

مصطفى سيف الدين يقول...

ray
ههههههه
معلش يا ستي بس انا لما كنت في الثانوي كنت باحب اللغة العربية جدا وده كان بيخلي كلامي ميتفهمش شوية هههههه
على العموم فترة وراحت ودلوقت معرفش اكتب كلام زي ده تاني
اشكرك على كلامك الجميل في حق قصصي
والله يبارك فيكي اعتقد القالب كده احسن
اشكرك ومنوراني

مصطفى سيف الدين يقول...

ابوحسام
على ايديكم تعلمت يا اساتذتي الافاضل الكثير والكثير جدا
وبالنسبة للسرقات في الانترنت فهي آفة كيف يسمح احد لنفسه ان يسرق افكار ومشاعر وخواطر لانسان غيره بل كيف يفهم ماذا كان يريد كاتبها ان يبذره في ارض كتابته
وبالنسبة لمسابقة ارابيسك فتصويتي لك اخي الكريم ليس مجاملة بل هو اقل تقدير مما رأيته في مدونتك ومدونة هوس الحلم من جمال لذلك صوتت للمدونتين

مصطفى سيف الدين يقول...

خواطري مع الحياة
لا تتعلم ايه؟
دول كانوا يطخوني في البلد هههههههههه
اشتكيني لحقوق الانسان اهون من اللي هيحصل لما انزلها تتعلم
اشكرك اختي على كلماتك الجميلة منوراني
والحفلة اصلا مافاتتكيش لو جايبة هدية كنتي لقيتي جاتوه
ههههههههه

مصطفى سيف الدين يقول...

الشاعر
وانت بالف خير يا صديقي
بارك الله فيك
واهلا بك في مدونتي

مصطفى سيف الدين يقول...

آمال الصالحي
وانتي بالف خير اختي الفاضلة
اشكرك
واهلا بكي في مدونتي

مازن الرنتيسي يقول...

بسم الله وبعد
نتمنى لك التوفيق ومزيدا من التقدم والنجاح وإلى الأمام

تقبل مرور إخوانك في الله
أبو مجاهد الرنتيسي
أحلام الرنتيسي

سواح في ملك اللــــــــــــــــــه- يقول...

كل سنة وانت طيب يامصطفي
وتثرينا دائما بمدونتك الجميلة
وافكارك
تحيتي

Carmen يقول...

كل سنة وانت طيب استاذ مصطفي وباذن الله في تقدم وتوفيق دائم

;كارولين فاروق يقول...

كل سنه ومدونتك بخير وانت بخير وسعاده
وعقبال 100 سنه كمان
تحياتي لك ولمدونتك

♥نبع الغرام♥♪≈ يقول...

ازيك يا مصطفى

كل سنه وانت طيب ومدونتك طيبه ومصر فى حريه دائمة

مزيد من التوفيق والرقى والتميز لشخصك ولمدونتك الاكتر من رائعه

د.هند الفخراني(ساجده لله) يقول...

كل سنه وحضرتك مدون
والمدونه مفتوحه وغنيه بالافكار الجميله

افروديت يقول...

عارف يامصطفي أجمل حاجة ممكن الأنسان يكتبهافيحياته هي اول كتاباته بجد حتي لومش متظبطة اوي بس هي الأحلي اكيييييييد happy birth day

سكن الليل يقول...

كل عام وأبجدية حروفك تشق طريقا للنور

كل عام وأنغام مشاعرك تعزف على أوتار قلوبنا

كل عام وقلمك الحر يكتب عنك بكل مصداقية

كل عام وطير الرماد ينفض عنه الرماد

أتمنى أن تنفض الرماد عن عاتقك وتحلق في أجواء

النقاء والحرية

Unknown يقول...

السلام عليكم ورحمة الله وبركاته
أخى الفاضل: د/ مصطفى سيف
كل عام ومدونتك بخير وفى مزيد من النجاح والتألق
وكل عام وأنت بخير ودائماً مبدعاً راقياً نرتقى معك آفاق الإبداع.....

تقبل أخى خالص مودتى وتقديرى واحترامى
بارك الله فيك وأعزك

Hagar Elshimy يقول...

كل عام ومدونتك متألقه أستاذ مصطفى ..

BNT ELISLAM يقول...

عقبال سنين وسنين جايه تكتب احلام وتعبر عن الى جواك وتكون متحققه

كل سنه وافكارك بخير كل سنهوهى رضا من ربنا
عقبال ماتكون اديب كبير او كاتب هظيم
او الاتنين سوى


تحياتى وفائق احترامى لك

سكرتيرة جديدة يقول...

هو انا تاخرت قوى كده؟

طيب برضه كل سنه وانت بالف خير
ويارب من كلمه لكلمه توصل لسنتها ال100

بس عندي سؤال

ازاى تحمى افكارك فى المدونة ؟

مصطفى سيف الدين يقول...

المنشد ابومجاهد الرنتيسي
بارك الله فيك اخي الكريم واشكرك على كلماتك الرائعة
تحياتي

مصطفى سيف الدين يقول...

سواح
وانت طيب يا غالي
اشكرك على كلماتك الجميلة

مصطفى سيف الدين يقول...

كارمن
وانتي طيبة وبارك الله فيكي

مصطفى سيف الدين يقول...

كارولين فاروق
اشكرك اختي الفاضلة
وبارك الله فيكي

مصطفى سيف الدين يقول...

نبع الغرام
وانتي طيبة وبخير ومصر دايما في رقي واتقدم
تحياتي

مصطفى سيف الدين يقول...

د/هند الفخراني
اشكرك اختي الرائعة على تعليقك الجميل
وبارك الله فيكي

مصطفى سيف الدين يقول...

افروديت
متفق معاكي تماما
الكتابات الاولى بتفضل دايما في الذكريات
ميرسي على تعليقك

مصطفى سيف الدين يقول...

سكن الليل
دايما بتبهريني بتعليقاتك
اشكرك اختي العزيزة على تعليقك الرائع
وكل سنة وانتي طيبة

مصطفى سيف الدين يقول...

استاذ محمد الجرايحي
تعليقك وسام على صدري فانا الذي ارتقي بكم لافاق الابداع
بارك الله فيك
واشكرك

مصطفى سيف الدين يقول...

انثى استثنائية
وانتي بخير وصحة جيدة
بارك الله فيكي

مصطفى سيف الدين يقول...

بنت الاسلام
اشكرك اختى الفاضلة وبارك الله فيكي
وربنا يحقق امنياتك
تحياتي تقديري لكي

مصطفى سيف الدين يقول...

سكرتيرة جديدة
اه شفتي بقى اتاخرتي قد ايه لو قدمتي من شوية كنتي لحقتي شوية جاتوه
وانتي طيبة وبخير
بس حكاية حماية الافكار من السرقة دي حاجة شبه مستحيلة بس بتبقى موثقة بالتاريخ في المدونة يعني اللي هيسرقها هيتفضح لان التاريخ الاولاني في المدونة الاصلية دليل دامغ لصاحب الحق
تحياتي وتقديري ليكي

hend anwar يقول...

كل سنة ومدونتك اجمل وافضل

عيد ميلادها فى وقت جميييل

Casper يقول...

كل سنة وهي طيبة وكل سنة وانت طيب يا مصطفى
ويارب تفضل المدونة منورة دايما بكلماتك الجميلة وأفكارك المتميزة

خالص تقديري

Casper

مصطفى سيف الدين يقول...

sun of freedom
وانتي طيبة اختي الفاضلة
وبالفعل هذه الايام من افضل الايام التي تمر علينا كمصريين
تحياتي لكي واشكرك

مصطفى سيف الدين يقول...

Casper
وانت طيب يا صديقي ومنورني دايما بتعليقاتك المميزة
اشكرك وربنا يبارك فيك

د.آيه يقول...

كل سنة و حضرتك طيب
و يا رب تفضل تكتب الموضوعات الجميلة دي في المدونة 100 سنة جاية كمان

تحياتى

مصطفى سيف الدين يقول...

د/آية
وانتي طيبة وبصحة وسلام
اشكرك على كلماتك اللطيفة
تحياتي