اعتقد انه وضح للجميع ان الرئيس السابق حسني مبارك معندوش ريحة الدم
قاعد ومتبت فيها بايديه وسنانه بالرغم انه شايف ان مفيش حد طايقه
امبارح بيقول انه عايز البرلمان يعدل الدستور؟
ايه الاستهبال ده لما احنا صوتنا ضاع واحنا بنقول ان البرلمان ده باطل والله باطل يا حسحس
ازاي برلمان باطل يعدل الدستور هو احنا هنسلم القط مفتاح الكرار؟
والبيه جاي بيقول انه مش طالب سلطة ولا عمره كان طالب سلطة؟ هو انت ناوي تاكل الكباب من غير سلطة؟
يا راجل حل بقى عن سمانا كفاية عليك تلاتين سنة
سيبنا بقى نجرب نعيش حياة من غيرك انت مش فيها ريس يمكن نفشل او ننجح بس على الاقل مش هنحس اننا بنتسرق اننا بنستعبد
هنحس اننا احرار
مجبش سيرة حبيب العادلي ومعاقبة السبب في الفوضى والسلب والنهب
بالعكس قال اختاروا بين الفوضى والاستقرار
اعتقد هو اللي ادان نفسه وان الفوضى دي حصلت في عهده هو مش حبيب العادلي ده وزيره؟
مش هو سبب الفوضى اللي احنا فيها دلوقت؟
الاستقرار مش هيحصل في مصر غير لما طيارتك تغادر البلاد لاي داهية واحنا لاول مرة نختار بعدها ريسنا بعد ما كان فرض علينا
عجبتني كلمة اردوغان لما قال ان الانتخابات اللي معروفة نتيجتها مسبقا مش انتخابات وده فعلا اللي كان بيحصل في البلد دي على طول فترتك الرئاسية
تزوير الانتخابات تكميم الافواه اعتقال منافسيك في انتخابات الرئاسة اللي لحد دلوقت بتذلنا علشان خليتها انتخابات بدل استفتاء على اساس انك بتتفضل علينا باقل حقوقنا
وبعدين انت جاي تقولنا انك مكنتش ناوي تترشح تاني بطل كدب بقى حتى لو مكنتش هتترشح فكان جمال هيترشح
احترم عقولنا ياخي
احنا مش شوية ناس عبيطة زي زمان كنت هتضحك عليهم بكلمتين
خلاص احنا عرفا وفهمنا وقرينا وشفنا
مبقيناش زي زمان
انت لو عندك ريحة الدم تحس ان في ناس ضحت بكل ملذاتها و عرضت حياتها للخطر والموت ورضيت انها تقعد في ميدان التحرير تبات في عز البرد تسع ايام بس علشان انت تمشي
معتقدش ان في حاجة ممكن ترجعهم بيوتهم غير رحيلك عن البلاد
نفسنا بقى نختار
عايزين نختار
عايزين نقول ده كويس عايزينه وده وحش مش عايزينه
نفسي احس ان صوتي مهم وان ليا اهمية في البلد دي
واني مخير فيها مش مسير
ارحل بقى
ماهو يا انت يا احنا في البلد دي
ومعتقدش ان 80 مليون ممكن يرحلوا علشان واحد بس يفضل فيها
يامن لعرضي هتك فقدت شرعيتك
من ربع قرن كئيب لعنتها طلعتك
اموالنا لك حل فملا بها جعبتك
خلف الحراسة دايما مستعرضا قوتك
تبدي مظاهر عزا تخفي بها ذلتك
سلاح جيشك درع تحمي به عصبتك
مع العدو كليل لكن بشعبي فتك
سواد قلبك باد فاصبغ به شيبتك
ياتيك دعم عدوي فاصلب به قامتك
سجدت للغرب دوما مستبدلا قبلتك
بادمعي ودمائي كتبتها قصتك
خذلت كل شريف حتي غدت لذتك
وكل ابناء شعبي قد شاهدت قسوتك
وكم منحت لصوصا يا قاسيا رحمتك
تعطي لنسلك ارضي ممارسا سلطتك
كان ارض جدودي قد اصبحت ضيعتك
لا شك موتك ياتي مستاصلا شافتك
يوم الحساب قريبا تري به خيبتك
يوم المنصة حقا فخذ به عبرتك
هذه الجموع يقينا ما جددت بيعتك ما جددت بيعتك
المشاركات
20 التعليقات:
المصيبة انى كنت فاهمه مبارك ديكتاتور لكن بجد اكتشفت بعد المذبحة و اطلاق رصاص حى على المتظاهرين و قتل 300 شخص كما اعلنت مفوضية الامم المتحدة بينهم 19 طفل ان ده نظام اجرامى
ياريت تقرأ مستند الداخلية المنشور عندى و اللى وزعوه على بعض قيل جمعه الغضب عشان تفهم مدى الاجرام بتاعهم
خلاص ....
متهيألي أنهاخلصت كده
بصراحة أناخايفة علي مصر أوووي
اسرائيل انتهازيه وبتتصيدالفرص
لازم نفكر صح وأكيد هواللي هيمشي وقريب جدآ
ده مش بلا دم
لا ده بلا كرامة وكلب
حتى الكلب بيفهم لما تقول له روح
بس ده ايه يمكن عامل للكرسي غراء عشان مايتركة
لازق فيه
ربنا ياخذه
ان نصر الله لقريب
ربنا اكيد بينصركم على عدوكم
وبيحقق مطالبكم
افيقوا يا شباب مصر ان مايحدث
من شباب المعارضه هو محاوله واضحه
لقلب نظام الحكم في مصر
كارولين فاروق
هي محاولة للفوز بالحرية المفقودة وليس قلب نظام الحكم بالمعنى اللي فهمتيه
حسني مبارك ماشفناش رئيس غيره تلاتين سنةوهو ريس
مفيش مرة كان في انتخابات نزيهة في ايامه سواء كانت رئاسية او برلمانية
بالعكس اعتقل كل منافسيه وهيحصل نفس الحكاية مع معارضيه
حسني بيحكم مصر بالعين الحمرا مش بمحاولات الاصلاح
البلد بتتنهب والناس بتشحت وصدقيني لو وقفت المظاهرات دلوقت هنبقى رجعنا لما قبل 25 يناير
وبعدين ده حتى في خطابه مقالش انه هيعمل اشراف قضائي على الانتخابات
مقالش ان جمال مش هيترشح
لو انتي شايفة ان النظام كويس دي وجهة نظرك بس عن نفسي شايف ان النظام مقلوب وعايز يتعدل
واتمنى تنتج من الحركة دي اعتدال نظام الحكم مش قلبه
انا معنديش مانع ان عمر سليمان او احمد شفيق يحكم مصر بس حسني ميكملش على الاقل علشان ال 300 شهيد اللي لازم يتحاسب ويتحاكم عليهم
ده رايي
خواطري مع الحياة
يا رب خلصنا منه على الاقل يمكن نعرف طريق للحرية
تحياتي
افروديت
خوفك في محله
انا برضه خايف على مصر بس خطاب مبارك مطمنيش
واعتقد وضح ملامح كلامه النهارده بالبلطجية بتوعه
يا رب خلصنا منه
تحياتي
Tears
قريت المستند وكنت شفته علي البي بي سي العربية من يومين
وده شيء متوقع من نظام العصابات
ودي اقل حاجة من رئيس البلطجية
تحياتي ليكي
السلام عليكم مصطفى
اخى وابى فى التحرير الان للمساعدة فى اسعاف الناس
الحال صعب كتير اوى اوى
فيه اوامر بضرب المتظاهرين بالنار والرصاص الحى ومات العشرات واصيب اكثر من الف حتى الان الضرب بالنار شغال من ساعات ولنا اصدقاء كثرين فى التحرير لم نتمكن من الاتصال بهم الى الان ومنهم واحد اصيب
الحال لا يطمئن على الاطلاق
خطاب امس من مبارك كان عبارة عن خدعة كبيرة وخيانة كان يخطط لها هو وعصابته حسبنا الله ونعم الوكيل
ربنا يستر
ام هريرة
لا ادري ماذا اقول فما حدث اليوم هو جريمة اتمنى ان تعاقبه الانسانية في حياته كما سيعاقبه عليها ربه
كيف لمن تخطى الثمانين لا يحاول ان يستعد للقاء ربه ويتمادى في طغيانه وساديته
دماء هؤلاء الشباب الطاهرة في عنق هذا النظام
اما عن خطابه امبارح مكنش له اي قيمة بالنسبة لاي حد يعرفه كويس
واحنا حافظينه تلاتين سنة وعارفين كويس كلامه اللي بيعرف يحط السم وسط العسل
اول ما خلص الخطاب بدا البلطجية مهاجمة المتظاهرين في اسكندرية
والنهاردة مذبحة التحرير و تحرشات في بورسعيد
وحسبي الله ونعم الوكيل
وربنا يستر
تحياتي
ارجوكم كفاية كلام كفاية حاجات لا هتقدم ولا هتأخر
ادعو ربنا يسترها ويعديها علي خير
يارب
احنا محتاجين تهدئه للوضع الحالي
لان مصر بتضيع بين تنازع الاطراف
كارمن
دكتورة هند
انا خايف على مصر برضه بس في نفس الوقت انا صعيدي ومش هاين عليا اللي انقتلوا وماتوا شهداء علشان احنا نفوق يروح دمهم هدر
tears
حكاية كنيسة القديسيين دي واسعة اوي وميصدقهاش حد
لكن الوثيقة بتاعت الخطة مصدقها جدا
مصر تحتاج للدعاء
أرجوكم ادعوا لها
اللهم لك الحمد كله كما ينبغي لجلال وجهك وعظيم سلطانك
اللهم صل على محمد وعلى آل محمد كما صليت على إبراهيم وعلى آل إبراهيم وبارك على محمد وعلى آل محمد كما باركت على إبراهيم وعلى آل إبراهيم
اللهم الطف بأهل مصر
اللهم احفظهم بحفظك واكلأهم برعايتك و احفظ بلادنا يا رب العالمين
اللهم انصر المصريين في أرض الكنانة وحكم فيهم شرعك واكفهم شر كل طاغية جبار
ربِ انصر إخواننا وأهلنا في مصر و لا تنصر عليهم، ربِ ثبت أقدامهم وارحمهم
ربِ رد كيد كل من أراد بهم السوء يا عزيز يا جبار
اللهم احفظ مصر واهلها وكل ما فيها
يا الله يا رحيم يا حي يا قيوم برحمتك استغيث
اللهم انت ثقتي في كل كربة ورجائي في كل شدة وانت لي في كل امر
اللهم يا قادراً على كل شيء .. اغفر لنا كل شيء وارحمنا برحمتك الواسعة التي رحمت بها كل شيء وإذا وقفنا بين يديك لا تسألنا عن أي شيء فإنك أهل التقوى وأهل المغفرة .
اللهم عجل الفرج وأرح العباد والبلاد ممن خربوها وأذلوا أهلها
اللهم كن لأهلنا في مصر ناصراً ومعيناً
اللهم ارزقهم الأمن والأمان والسلامة والإيمان
اللهم اعصم دماء المسلمين و أعراضهم و أموالهم
اللهم أمين
يارب العالمين
استغفر الله العظيم الذي لا إله إلا هو الحي القيوم وأتوب إليه.
نسألكم الدعاء
الحب الجميل
اللهم امين
اللهم امين
اللهم احفظ مصرنا
شكرا اختي نورتيني
سلامي لكل حر
كلامك أخ مصطفى أثر فيّ كثيرا، أنت تكلمت بلسان هذا الشباب، وأنا أحس بكثير بمعاناتكم والله..
أكثر شيء زعزع خاطري قولك:
"احترم عقولنا ياخي
احنا مش شوية ناس عبيطة زي زمان كنت هتضحك عليهم بكلمتين
خلاص احنا عرفا وفهمنا وقرينا وشفنا
مبقيناش زي زمان "
"نفسي احس ان صوتي مهم وان ليا اهمية في البلد دي"
والله شيء مؤسف حقا، أسأل الله لكم التوفيق، وأن يصلح الأحوال.
شكرا اخي رشيد
اشكرك على شعورك الطيب تجاهنا
نورتني وشرفتني
موضوع جميل أخي فعلا نعتز بالشعب المصري المحب لوطنه المعتز بكرامته
قلوبنا معكم أخي مصطفى
اشكرك اختي حلم
ونحن نعتز بعروبتنا ونعتز بكل من يحبنا
تحياتي
إرسال تعليق