الخميس، 27 يناير 2011

فخور بشعبك يا مصر



بصراحة مش عارف اقول ايه
من زمان اوي محستش بالفخر اني مصري زي اليومين دول
كنت فاكر ان الشعب ده ميئوس منه وانه انتهى لكن بالعكس النهاردة عرفت ان المصري ممكن يصبر ويستحمل لكن وقت ما يغضب ينفجر بركان
انا سعيد جدا ان وجهة نظري كانت غلط واني كنت باصص لنص الكوباية الفاضي
صدق الرسول عليه الصلاة والسلام لما قال ( اذا فتحتم مصر فاتخذوا منهم جندا كثيفا فانهم خير اجناد الارض) خير اجناد الارض لانهم صبورين خير اجناد الارض لانهم صمودين بيستحملوا لكنهم وقت ما يغضبوا بيبقوا في شجاعة الاسود
رغم الذل والهوان رغم ان اغلب الناس اللي اتظاهرت مشفتش اي نظام تاني غير الحالي
رغم تلاتين سنة عايشين زي الاعمياء حياتنا كلها ضلمة
الا انه حصل ان في 100 الف واحد وسط الضلمة شايلين شعلة نور وبيقولوا لسه في امل
هنستنى ايه تاني؟
يا رب ما تطفي شعلتنا دي ابدا
يا رب قويها وبدل ما تكون 100 الف شعلة يا رب خليها 80 مليون شعلة
انا بقولها وكلي اعتزاز انا مصري
يا رب نكمل اللي بدأناه
ويا رب قوينا علشان نكلل مجهودنا بالنجاح
يا رب اعنا
يا رب اعنا
يا رب اعنا
ومش لاقي حاجة ممكن تتقال غير قصيدة هشام الجخ ( كان يوم مطر) يمكن تقوي عزيمتنا وتحسسنا انه مهما كانت النتيجة مادام بنعمل الصح اكيد ربنا هيوفقنا
وبغض النظر عن اي نتيجة ممكن تكون انا فخور و سعيد ان شعبنا اثبت لكل الطغاة والفاسدين انه مامتش وانه في اي وقت هيطلع المارد اللي جواه وان كراسيكم مش دايمة
اتمنى نكمل المشوار بنفس الروح لحد ما الغمة تنزاح
اسيبكم مع القصيدة


كان يوم مَطَر .
.
البغبغان جُوَّا القَفَص طَلَّع لِسانُه لعصفورين فوق الشجر .
.
خَلِّيكو سايقين العناد ..

العِشّ قاد ..

وخسِرتُو ويَّاه الولاد .. لَـمَّا انفَجَر ..

هو انتو حِمْل السِيل ؟؟ ولا حِمْل المطر ؟؟

كان فيها إيه لو تِعْمِلُوا زيِّي وتقولوا زَيّ ما يقول البَشَر ؟؟

ردُّوا علِيه العصفورين : لَوْ عَ الوِلاَد .. البَطْن ولاَّدة .
.
والعِشّ مَهْمَا يقِيد ..

صخر الجبل عَنَاقِيد ..

نِفْرِشْهَا سِجَّادة ..

وانتَ اللي فرحان بالقَفَـص ..

أصْلَـك ( قَفَص ) !!..

كَتَمُوا الهوا جُوَّاك و نَسُّوك ان ما بين الحياة والموت .. نَفَس ....

16 التعليقات:

إنسان || Human يقول...

الله القصيدة عجبتني قوي ,
أتمنى من ربنا أن الشعب ده يكون نفسه طويل
ويستحمل
......
أه انا قريت البوست اللي فات , انت مش عايز ليه تقول الكلام الكتييييييييير خايف من ايه
؟؟؟

Unknown يقول...

أشكرك على القصيده من أجمل ما قرأت
ربنا يستر و يقوينا و ينصرنا

افروديت يقول...

الأعتراف بالحق من سمو الأخلاق ...
لكن كتي رأوي من الناس كانوامنتظرين الفشل عشان اللي حصل لم تعتاده أعينناولاأذهاننامنذ سنوات
لذا أصدرالقرار مسبقآ

روعة من روائع هشام الجخ أحييييييييييييك

مصطفى سيف الدين يقول...

Hu-man
مش خايف ولا حاجة بس اغلب الناس حاطين امل كبير على الجيش ومش عايز احطمهم
يعني اقولك ايه بس؟
اقولك ان جيشنا عبارة عن تهريج منظم
كل هم الجيش هو عمل عرض عسكري قدام الوزير ولا الريس وانه مش بيهتم باقل حاجة؟
اقولك اني ضربت نار في الجيش مرة واحدة بس
اقولك ان اللي اتعلمته من جيشي هو ان اهم حاجة ان ورقك يكون مظبوط وعهدتك تمام وصهين على اي حاجة؟
اقولك اتعلمت الكذب والخيانة وانك تبيع اخوك
اقولك ان السلاح الوحيد اللي شفته كان بندقية كلاشينكوف عمرها اكتر من ستين سنة وبتسخن بعد اول رصاصة؟
يمكن انا علشان كنت في خدمات طبية وكنت في وحدة مالهاش علاقة بالعسكرية هو مستودع طبي لتوزيع الادوية و مكنتش على الجبهة مشفتش غير الحاجات دي جايز يكون في الوحدات التانية جيش غير اللي شفته
بس اللي اعرفه على الاقل في المنطقة اللي كنت فيها ان الاهمية الكبرى ليها هو الاقتصاد اكتر من العسكرية قصدي استصلاح اراضي
يعني بيجيبوا العساكر من صباحية ربنا لاخر النهار يخلوهم يلموا الزلط اللي في الجبل علشان استصلاح الاراضي وعمل صوب ويخلوها منطقة زراعية
كل ده كويس لو الحاجات دي بيستفاد من مواردها الجيش او البلد تعرف ان المحاصيل دي كلها بتتصدر بس فلوسها بتروح لانهي جيب ؟
والله لو شافو عسكري جاع واكل فلفلايه واحدة مثلا ممكن يتحاكم بالرغم انه بيبقى شقيان طول النهار
سيدي الفاضل الجيش المصري تهريج منظم فكر في الجملة دي كويس
على فكرة طلعت السادات قال كلام اقل من ده بكتير عن الجيش واتحبس سنة بمحاكمة عسكرية
اكلمك عن هاني سلامة؟
اه هاني سلامة الممثل
كان مظبط نفسه ومقضيها رشوة وكان جيشه في بيتهم وفي سهرة من اياهم واحد بيساله هو انت عملت ايه في الجيش يا هاني؟ قاله انا مرحتش الجيش بفلوسي
وصلت الجملة دي للمشير
جابه من قفاه ودخله الجيش ورماه في وحدة صاعقة على الحدود مع السودان
كل ده كويس وجميل حصل ايه بعدين
راح هاني ظبط نفسه مع المسئول عن التنظيم في المنطقة وجابه في السكرتارية بتاعته علي فكرة جنب وحدتنا وكنت بشوفه علشان هو من نفس سني وكنا دفعة واحدة المفروض
طبعا الراجل ظبطه لحد ما قضى جيشه معزز مكرم
وغيره وغيره وغيره
وغيره اللي دخل معايا مركز التدريب نزل اجازة في اول يوم ومشفتوش غير في اخر يوم
ازاي معرفش
كفاية كده يا هيومان صدقني كل ما افتكر ان جيشنا كده باكتئب لان اي حتة فيها ظلم بتبقى اخرها ندامة
والمكان اللي بيحلق فيه الظلم عمره ما بيعمر
شكرا لتعليقك ومنورني

مصطفى سيف الدين يقول...

شيرين سامي
اشكرك على تعليقك الجميل وفعلا القصيدة روعة
واقل حاجة توصف روعة الشعب اللي كان زي العصفورين اللي ماستسلموش للمطر
وربنا يقوينا ان شاء الله
تحياتي

مصطفى سيف الدين يقول...

افروديت
عن نفسي كنت متوقع الفشل لكن ده مخلنيش اقول منطلعش لازم نعبر عن راينا بغض النظر عن النتيجة
بالعكس الموت في ساحة المعركة افضل مليون مرة من الانتحار
اشكرك على تعليقك وفعلا القصيدة جميلة

faroukfahmy يقول...

بصراحة يامصطفى كلامك اشمل واعم واعمق من قصيدة هشام الجخ فكلامك ضم ما ضم مضامين تعدت سواهامقصدا وهدفا وبصيرة

ray يقول...

كل الناس فخورة..بمصر دلوقتي..

الكل عنده امل نتغير..
نتحول من اشخاص بأنصاف احلام..الي اشخاص يقدر يحقق حلمه
نخرج من دوائر الروتين..ونقدر نبقي بلد متطور
امركا وصلت لرأيسها 45 واحنا لسه يمكن في ال 5
الناس كلها ببتطور..واحنا محلك سر..

لازم..يتغير..

لازم نتغير..

يا احنا يا هم في البلد..

مسلمة حرة يقول...

جميلة القصيدة قوى
وجميل الكلام اللى فى ردك
ياريت الناس تكون شايفة القبح ونفسها تغيره
أكتر كلمة أكرهها كلمة (اللى نعرفه أحسن من اللى مانعرفوش) وكلمة (إحنا أحسن من غيرنا)
ده مش رضا بالقضاء والقدر
ده عجز وخيبة وقلة حيلة إستسلام
على فكرة ممكن نكون إحنا عايشين كويس ومستورين ومش محتاجين حاجة ... لكن ألم يقل رسولنا الكريم (لا يؤمن أحدكم حتى يحب لأخيه ما يحب لنفسه)
أيه معنى إنى أكون مبسوطة وولادى فرحانين وغيرى مش كده؟
أيه معنى إن تكون كرامتى مصانة وأقدر آخد حقى لأن عندى واسطة ولى ظهر وغير بينضرب على قفاه وأنا واقفة أتفرج وأقول مش مهم طالما أنا بخير والظلم مش طايلنى؟
ديه أنانية وعدم إنسانية ولا مبالاة
أنا سعادتى تكمل لما كل الأولاد يلبسوا كويس ويأكلوا كويس ويعيشوا بكرامة .. ومحدش أنكر الفروق بين البشر لأن ديه سنة
لكن الفروق الرهيبة ديه ؟؟ ناس بتلعب بالملايين وناس بتأكل من الزبالة؟؟ أنا شفت ده بعيونى؟
تفتكر ح أرجع البيت سعيدة وآكل وأشرب
طظ فى الحياة ديه ومليون طظ

سندباد يقول...

احست ياصديقي فعلا كلنا فخورين اننا قدرنا نكسر حاجز الخوف اخيرا رسالة لكل الجبارين لا تستهينوا بالشعوب
تحياتي

Hagar Elshimy يقول...
أزال المؤلف هذا التعليق.
Hagar Elshimy يقول...

قصيده رائعه أستاذ مصطفى..
وثوره الغضب أشعلت الأمل فى قلوبنا
أن الجاى ممكن يكون أحسن ..
دمت بود

admin يقول...

كان الله في وعونكم..

ومنصورون إن شاء الله..

كنت هنا..

ツSmiLeY AnGeLツ يقول...

لازم تكونوا فخورين
لانكم قدرتوا تخرجوا وان شاءالله بتحققوا المطلوب
وتخلعوا رئيسكم ويطلع رئيس جديد ويكون من الشعب ويكون احسن من مبارك
ماضاقت الاوفرجت وان شاءالله بيفرجها عليكم ربنا
لانكم مظلومين من حكومة فاسده

مدونة رحلة حياه يقول...

السلام عليكم
حقيقى مش عارف اقول ايه يا مصطفى
مشاعر كتير قوى مختلطة خوف وقلق وترقب لمصير البلد
لو بتحبوا البلد دى خلوا عيونكم عليها خلوا ايديكوا فى ايديها يا مصر تعيشى لينا
بلدى الود ودى احضن ترابك بيدى وأشيلك جوا عينى أصل انتى غاليه عندى

رشيد أمديون يقول...

السلام عليكم

لك الحق أن تفتخر بشعبك أخي مصطفى لك الحق أن تعتز بهم، فهذا موقف سيسجله التاريخ..

أريد أن أعرف هل النت رجع عندكم؟