الثلاثاء، 25 يناير 2011

لو كنت مسئول ( واجب مدونة المدينة الفاضلة )



بصوا بقى بما اني شطور ومبحبش اخلي اي واجب عليا وعلشان عارف نفسي  مادام مطالب اعمل حاجة هافضل قلقان وافكر فيها قلت اتكل على الله واحل واجب اختي الفاضلة / ام هريرة
استعنا على الشقا بالله
لا استنوا لو هابقى مسئول في البلد دي ليا مطالب
اولا انا مش باطيق عيشة القاهرة يعني لو وافقتوا ابقى مسئول عن وزارة او رئاسة مجلس وزراء هيبقى مقرها الصيدلية بتاعتي مانا مش هاسيب الصيدلية واقفلها علشان وزارة اخرها تغيير وزاري بعد ربع ساعة
ثانيا مش عاجبني العلم مش قصدي الالوان لكن قصدي الطائر العجيب اللي فيه اللي بيسموه نسر  النسر يا اخوانا بيدل على الجبن في رايي بياكل الجيف ومش بيقدر ياكل غير بعد ما الاسود تخلص اكل  زمان اول الثورة كان الرمز هلال ونجوم وفعلا كان نجمنا ساطع في البداية بعدين بقى رمزنا صقر والصقر جريء وقوي وتحت شعار الصقر بجرؤته انتصرنا في حرب اكتوبر لكن النسر ده من سنة 1984 علمنا الجبن زيه اعتقد كل بلد بتاخد من رمزها هتقولولي سعادتك (ايوة طبعا سعادتك انا مسئول) تحب ايه على العلم مش هاقولكم تويتي زي احمد عيد ولا هاقول رجعوا الصقر (بصراحة صعب رسمه) اختاروا حاجة سهلة وتكون رمز لينا زي الاهرامات او نخلة او غصن زيتون


لكن نسر ايه بس ده انا فضلت من اولى ابتدائي لحد تالتة اعدادي مبعرفش ارسم العلم بسبب النسر
هتقولولي طلباتك كترت هاقولكم يا كده يا يفتح الله
على العموم علشان مطولش هادخل في الواجب الاول هتبقى في حاجات ثابتة في كل مسئول هاكتبها مجمعة علشان مكررهاش دايما
اول حاجة  هاخلي كل مكاتب الوزارة من غير ادراج وأجبر كل موظف ييجي الشغل ببدلة من غير جيوب والسيدات لو لازم ييجو بشنطة يسيبوا شنطتهم على البوابة علشان اللي حابب ياخد رشوة ياخدها عيني عينك قدام الناس كلها لانهم اولا هيجيلهم يوم يتخانقوا مع بعض ويفتنوا على بعض
 ثانيا لو اكتشفت ان في رشوة اجازي المصلحة بالكامل
ثانيا : مسابقات التعيين لازم يكون اي وزير عضو في لجنة الاختيار ويشرف على الاختبارات وطريقة الاختيار بنفسه ولو اكتشف اي تلاعب انتو عارفين طبعا يعمل ايه
ده بقى الحاجات المشتركة
نفصل بقى
رئيس مجلس الوزراء
خلاص يا اخوانا بقيت رئيس مجلس وزراء (الف مبروك يا درش) قراراتي بقي اول حاجة  عدم اختيار اي وزير رجل اعمال الا اذا باع كل شركاته مش اجيبه النهارده يخليلي كل تاكسيات العاصمة شيفروليه ويشغل نفسه بنفسه
ثانيا اي اتفاقيات مع اسرائيل حصل قبلي اعتبرها ملغية لو مقدرتش على الاقل مجددهاش واحاول اعيد النظر في الاتفاقيات القديمة اللي فيها ضرر على مصر زي اتفاقية الغاز
ثالثا شعبي الحبيب المهاود يا سلام وانا ليا مين غيركم عمو نظيف كان هيخلي الحد الادني للاجور كام ؟ 400 جنيه مش كده؟ خلاص ولا يكونش عندكم خبر هازودكم هاخليها 500 جنيه مرضيين؟ اهو اكتر من 1000 دولار سنويا عايزين ايه تاني ؟ بتقولو ايه؟ لا مالكمش دعوة بقناة السويس دي يدوب تطلع مرتبي انا والبارتيتة بتاعتي وبعدين لو فكرتم تعملوا اعتصام علشان الخمسمية جنيه دي معتقل الوادي الجديد فيه متسع للجميع يشيل 80 مليون واكتر وبعدين اصلا مش هتعرفوا تعملوا اعتصام مانا واعي وخليت مقري في بلدي واهلي الصعايدة هيحموني قبل الحكومة
رابعا هاطلب من الجهاز المركزي للمحاسبات يفتش شهريا على كل الوزارات مش سنويا بعد تظبيط الدفاتر

وزير الدفاع والانتاج الحربي
انتي ضمتيهم في وزارة واحدة؟ مش مشكلة اصلا بتاع الانتاج الحربي مش فاهمله فايدة غير تصنيع البوتاجازات ونادي الانتاج الحربي اللي بيلعب في الدوري خلينا في بتاع الدفاع كنت عايز اقول كلام كتير عنه بس للاسف مش هينفع كنت عايز اتكلم عن فترة تجنيدي بالتفصيل وافضفض بس مينفعش
خلينا في العموم اول حاجة الغي سلاح الشرطة العسكرية ما يليقش بعسكري مجند المفروض له قيمته واحترامه في البلد اللي بيحميها لما يشوف عسكري شرطة عسكرية يفضل يجري لحد ما الست بتاعت الجرجير تقوله ادخل البيت ده استخبى (بيصعب على بتاعت الجرجير) وبعدين لما يمسكه بتاع الشرطة العسكرية يقوله : انا كويس ولابس تمام وماخطئتش  بتاع الشرطة العسكرية يقوله : معلش يا بيلدي (بيلدي كلمة ماسمعتهاش غير في الجيش بمعنى بلدياتي) بس انت عارف اجازتنا بعدد الاورنيكات
طيب ما بلاها شرطة عسكرية واللي في الشرطة العسكرية نحولهم للمخابرات العسكرية والامن الحربي على الاقل بتاع المخابرات بيلبس ملكي ومش هيفضل العسكري يجري ويهين كرامة الجندي
ثانيا : هادرس ملف ابو غزالة كويس اوي وايه اللي كان بيعمله واحاول ابدا اللي عمله تاني من اعادة هيبة للعسكري ومحاولة تطوير للجيش باسلحة جديدة
كفاية كده كان نفسي اقول كلام كتيييييييييييييييييييييييييييييييييييير في النقطة دي بس صدقوني مش هينفع
وزير المالية
هالغي ضرايب العقارات وضرايب المرتبات للموظفين وضرايب المبيعات (ايه انواع الضرايب دي كلها )
هالغي قرار الاعفاء الضريبي العشر سنوات عن اي مشروع استثماري ولو  مقدرتش لازم اخد ضمان من صاحب المشروع انه هيفضل شغال بعد العشر سنين دول شغال لان اغلب المشاريع دي بتشتغل العشر سنين بتوع الاعفاء وبعدين كل سنة وانت طيب واعتبر اكتر من 300 اسرة كانت في المشروع اتشردت
كفاية على وزير المالية كده
وزير الدولة للشئون القانونية والمجالس النيابية
هو بيشتغل ايه بالظبط يعني؟ بيدرس القوانين مش كده؟
لا مش حابب الشغلانة دي الغوها من الوزارة

وزير الداخلية
والله بقيت وزير داخلية يا ابو درش (هانيمك  من المغرب يا صين )
هاشيل يافطة الشرطة والشعب في خدمة الحكومة هههههههه
واخليها الشرطة شغالة عند الشعب بفلوسه اللي بيدفعها في الضرايب
هاطلب الغاء قانون الطوارىء 
الظابط اللي ييجي فيه شكوى من مواطن لو ثبتت صحتها هانقله حلايب
اه في حاجة مهمة دي علشاني هاعمل تامين اكبر لطريق الغردقة الاقصر علشان الافواج السياحية تمشي فيه بدل ما بتعدي في وسط بلادنا ويوقفولنا المرور فترات طويلة (عملوا الطريق الجديد بس بيقولو مش امان علشان كده بقى الطريق الرسمي لتجار السلاح والمخدرات )
لما يتم القبض على مهرب اثار هيتم تسليمها للمتحف مش يبيعها الظابط ويقسم مع المهرب ونكفي على الخبر ماجور

وزير البترول
هاوصل الغاز لكل بيت مصري وامنع تصديره لاسرائيل
هاحاول توفير وظايف عمل
توفير انابيب بوتاجاز

وزير الطيران المدني
اهتم اكتر حاجة بصيانة الطيارات لان اغلبها قديم

وزير البيئة
بص بقى معايا اقتراح جامد اي  مصنع يخالف ارشادات حماية البيئة في اسلوب الصرف او خلافه مش هاقولك يتقفل المصنع لان الناس اللي شغالة مالهاش ذنب كل اللي يحصل اننا نصادر المصنع لحساب الدولة
ثانيا توفير سلة زبالة على كل عمود نور ولو ورقة اترمت في الشارع يبقى تتوقع غرامة جامدة (الله يمسيك بالخير يا عادل لبيب كان فيها 100 جنيه غرامة على ايامه )
بالنسبة للسحابة السودة وقش الرز اكيد هالاقيلها حل

وزير الشباب
هو ايه فايدته اصلا  الراجل ده؟ يا عم شغلوا الشباب بدل ما تعملولهم وزارة

وزير الاستثمار
اهم حاجة عند انشاء مصانع او مشاريع جديدة متابعة تعثر صاحب المشروع ولو اتعثر مرتين ماتديهوش قروض تاني بياخد الفلوس ويهرب ويا ريت تتسهل اجراءات انشاء مشاريع جديدة

وزير التجارة والصناعة
هاعمل حاجة واحدة بس هابعت بعثات للصين يتعلموا ازاي الصينيين بيبيعو المنتجات دي بالجودة دي اللي ممكن تكون احسن من المصري باقل من نص سعر تكلفة المصري
مصانع كتير بيتها اتخرب بسبب الصيني

وزير التربية والتعليم
شغلانة خطيرة مكنتش احب اشتغلها علشان مصير جيل كامل متعلق برقبتي
هاحاول ازود من تفكير الطالب وبحثه عن المعلومة بتغيير المناهج واخلي الطالب نفسه يحب المادة  علشان التشويق اللي فيها وازود مجالات الابداع علشان يقدر يواجه الحياة بعقلية متجددة معرفش طريقة حاليا تعمل كده بس اكيد لو كنت وزير كنت هالاقي طريقة

وزير الزراعة والاستصلاح الزراعي
هاقدم مشروعات لزيادة رقعة المساحة الزراعية الافقية والرأسية
مش  هستورد اي كيماويات او اسمدة من اسرائيل
هاعمل لجان تشرف على التقاوي دايما وتختار احسن السلالات

وزير القوى العاملة
هاحاول على قد ما اقدر اشغل المؤهل المناسب في المكان المناسب

وزير الموارد المائية
اول حاجة هاشوف صرفة مع اثيوبيا ودول منابع النيل دي اهم حاجة حاليا ثانيا هاحاول شق ترع لاستصلاح الصحراء

وزير الاوقاف
اولا هابطل ادي ائمة المساجد مواضيع الخطبة اللي هتتقال الاسبوع ده وكل واحد يختار الموضوع اللي على مزاجه
ثانيا  هاسيب المساجد مفتوحة اربعة وعشرين ساعة ده بيت ربنا ازاي اقفله
ثالثا عند اختيار ائمة المساجد هاراعي الناس اللي فاهمة في الدين كويس لان امام المسجد يعتبر المرجع الاسلامي في منطقته
رابعا هاعمل كتاتيب في المساجد لتحفيظ القران

وزير الكهربا
هاحاول باي شكل ابدا في مشروع مفاعل الضبعة لان واضح ان النيل هتبقى فيه مشكلة والسد مش هيقدر يولد كمية كهربا تكفي يعني لو الضبعة ماتعملش لا هنلاقي لا مية ولا نور في البلد لازم اتصرف ان شالله اشحت علشان مفاعل الضبعة يبدا
ثانيا كل شهر بيزيد تمن الكيلو وات بطريقة غريبة منتهى الجشع

وزير الاعلام
هاقفل كده كام قناة من نفسي 
في كلمات قبيحة كتير بدات تظهر في القنوات هاعمل جزاءات جامدة لمحاولة الانضباط

وزير الخارجية
هاطلب عمل سفارة في فلسطين وابقى اول دولة في العالم اعترفت بفلسطين كدولة
هاطرد السفير الاسرائيلي من مصر وهاجيب سفيرنا من هناك
بالنسبة للمصريين المغتربين هاحاول اساندهم علشان يحسوا ان لهم بلد بتسال عنهم مش ناس رمياهم في بلاد غريبة تتهان كرامتهم ويسكتوا

وزير الاتصالات
هاخلي اقل سرعة للانترنت في مصر 2 ميجا وهتبقى بسعر ال 512
هالغي حكاية الانترنت المحدود دي للابد
واحتمال اقفل تي داتا (لسه في طور الدراسة )

وزير الاسكان والمرافق
المشاريع الجديدة والشقق الجديدة هاحاول اراعي ظروف المتقدمين قبل ماختار النتيجة واسلمهم الشقق
هاحاول اعمل مدن جديدة

وزارة التعليم العالي والبحث العلمي
تقدر حضارة الدول بالبحث العلمي علشان كده بتوصل ميزانية البحث العلمي في بعض الدول الي 25%
طبعا في مصر مفيش بحث عملي
لو كنت وزير البحث العلمي كنت عملت مجمع بحوث في كل محافظة وبعتت بعثات برة يتعلموا ويرجعوا يطبقوا اللي اتعلموه

وزير التضامن الاجتماعي
مش ده برضه بتاع التموين؟
هارجع الشاي تاني للتموين (قال الشاي قال سلعة كمالية)
هاضيف اي مولود لبطاقة التموين
بالنسبة للاسعار لازم اشوفلي حل مع اللحمة اللي كل يوم في الطالع


وزير النقل
هاحاول بشتى الطرق زيادة عدد القطارات حتى لو كان عن طريق زيادة الخطوط
بالنسبة للصعيد بالذات القطار هو وسيلة المواصلات الاهم اللي بتربط الصعيد ببحري
هاحاول تامين السكك الحديدية علشان متجيش بقرة تاني تقلب القطر
بالنسبة للطرق العادية هاحاول ائمنها واتاكد من وجود اللافتات الصحيحة في المكان الصح (علشان دي مهزلة)

وزير السياحة
هافهم الناس كلها ان للبلد دي ابناء  وان السياح دول مجرد ضيوف على عيننا وراسنا بس ماهينش ابن البلد علشانهم


وزير العدل
كلنا بنثق في القضاء المصري بس نتمنى احترام القضاة للمحامين اكتر ده مهما ان كان زميل كلية الفرق بينه وبين القاضي ده ابوه قاضي وده ابوه فلاح
ثانيا بالنسبة للشهر العقاري عايزالها قعدة  اي حد بيحاول يخلص اي حاجة في الشهر العقاري مبتخلصش من الزحمة وضيق صدر الموظفين

وزير الصحة
كويس سايبهولي في الاخر علشان احلي بيه
اول حاجة هالغي كل القوانين اللي عملها اللي اسمه حاتم الجبلي هارجع كل حاجة زي ما كانت واعتبر فترته كأن لم تكن
ثانيا هاحاول اعمل عدالة بين الصيادلة والاطباء اللي بيشتغلوا في وزارة الصحة
ثالثا قانون التامين الصحي محتاج دراسة واعية جدا جدا علشان يحقق المرجو منه
رابعا العلاج على نفقة الدولة هاعمله شروط جديدة واشيل يد اعضاء مجلس الشعب منه هاخليه من الجمهور ليا علطول
خامسا شركات تصنيع الدواء هابعتلهم تفتيش اسبوعي علي التشغيلات
سادسا  تفتيش اسبوعي علي المستشفيات الحكومية


كفاية كده تعبت
شكلي رغيت كتير يلا بقى فوتكو بعافية
اتمنى انني كنت ضيف خفيف



31 التعليقات:

faroukfahmy يقول...

رئيس جمهوريتنا مصطفى سيــــــف مبروك جمهوريتك الجديدة والنبى قيد اسمى اول مواطنيك انااسمى فاروق ابن فهمى وساقط ابتدائية واعرف انكت حلو وروش يعنى انفع فى اى وزارة تحجزهالى ماهيةدى مؤهلات الوزرا والا انت هتخليها زى تاس بالوراثة والنبى تخلليلى وزارة المالية التهليب فيها حلو ايشى جمارك وايشى ضرائب وايشى بتوك ادى قروض للناس اللى تدفع كويس وانا قريت الضوابط اللى انت عاملها اهو المنخل الجديد له شده وكلهم فى الاول بيقولوا كده وبعدين يرجعوا فى كلا مهم

ツSmiLeY AnGeLツ يقول...

ههههههههههههههههههه
ده لو عيونك واحد من دول الله يعين الدولة عليك
ههههههههههههه
بمزح
حبيت طموحك وانك توفر لدولتك كل الاشياء على قد ماتقدر
تقبل مروري
سلامي ليك اخي.

ولاء يقول...

السلام عليكم

عقبال لما نشوفك فعلاً ماسك احدى الوزرات دي
واحسن شيء ان الواحد بيسعى لتطوير بلده ..

اما حكاية العلم هذي كلها في حد ذاتها حكايه انا عمري ما انتبهت للنسر ...انا كنت أفتكره صقر ..
انا أشوف الإهرام اكثر حاجه ترمز لمصر ..
ونشوفها في كل مكان ..يعني فعلاً هي أكثر حاجه تدل على مصر .

ولاء يقول...

السلام عليكم

عقبال لما نشوفك فعلاً ماسك احدى الوزرات دي
واحسن شيء ان الواحد بيسعى لتطوير بلده ..

اما حكاية العلم هذي كلها في حد ذاتها حكايه انا عمري ما انتبهت للنسر ...انا كنت أفتكره صقر ..
انا أشوف الإهرام اكثر حاجه ترمز لمصر ..
ونشوفها في كل مكان ..يعني فعلاً هي أكثر حاجه تدل على مصر .

bent masrya يقول...

هههههههههههههههه الف مبروووك على الرئاسه والله تنفع احسن من جيمى ولو سمحت انا عايزه وزاره السياحه عشان بحب الف ههههههههه

Unknown يقول...

يااااه ده انت شايل في نفسك أوي تعرف أنا جيلي الواجب ده بس مش هعرف أجاوبه ازاي انت و لولو عملتم الواجب و قلتم كل اللي فنفسي
عايزه أعتذرلك ان مقصره معاك انت ماشاء الله بتنزل بوستات كتير و أنا مش بقدر أقعد على النت كتير و حبايبي المدونين اللي عايزه أتابعهم كتيييير بس انت بجد مميز جداً سامحني و ربنا يقدرني أقرى كل اللي بتكتبه
تحياتي ليك

سندباد يقول...

ليس كل ما يتمناه المرء يدركه انما ربنا يولي فينا ما يصلح
احسنت ياصديقي

ليلى الصباحى.. lolocat يقول...

السلام عليكم

ماشاء الله سيف المدونين
احسنت اخى
واشكرك واحييك لمبادرتك الجميلة جدا :)

حقيقى عجبنى كلامك فى وزارات كتير
اهمها وزارة الكهرباء

ايضا وزارة الداخلية والخارجية ردك رائع اوى

بس انت باين عليك اتبهدلت فى الجيش هههههههه

اما العلم النسر اللى اعرفه انه ما يأكل جيف ابدا بالعكس ما يأكل الا الشىء النظيف ولا ينزل للارض ابدا الا علشان يأكل...بس انا معاك فى تغيير العلم و احب اغيره لراية الرسول المكتوب عليها لا اله الا الله مفيش اتنين يختلفوا عليها :)

احييك مصطفى حقيقى استمتعت بردودك وامنياتك وحلو اوى مكاتب من غير درج ههههه
ومعاك ايضا فى موضوع وزير الصحة بالله عليك عايزين شوية تظبيط فيها لما تمسك الوزارة


جزاك الله خيرا اخى على تلبيتك للدعوة
بس انت ما وجهت الدعوة لحد من الاصدقاء ليه عايزين شوية تدبس نشوف فكر الاصدقاء ايه فى الامر ده

اشكرك مرة تانية ولك ارق تحيوةوتقدير

amira miro يقول...

حلوة الاحلام

بس ليا ملاحظات علي بعض الوزارات

منها التربيه والتعليم الاهم من اننا نخلي المناهج مشوقة نخليها مؤهله للمستقبل بمعني اني استفيد بالي هدرسه مش ادرسه عشان انجح وبس
كمان نخلي التربيه فعاله نعمل حصص للتربيه في المدارس ويبقي عليها درجات سلوك بجد مش ظاهريه نعلمهم فيها الضمير والاتقان والاحترام والحريه والراي



بالنسبه للصحة نخلي لكل مستشفي خاص يوم خيري في الشهر تستقبل فيه حالات مجانيه للشعب الكادح وتتعالج فيها
كمان نحدث ونطور المستشفيات العامة ونلغي الصيدليات الخاصة الي تحت المستشفيات لانها بتشجع علي ان صيدليه المستشفي تبقي فاضية ويضطر المواطن يدفع قد كده في طلبات العمليات والادويه

في وزارة النقل لازم نعمل دورات تدريبيه للسائقين عشان يواكبوا التطور
لان القطارات الجديدة الي جبناها بوظوها


في البحث العلمي
مش معاك لان في بحوث رائعه والمركز القومي للبحوث بيقوم بدور فعال بجد
المشكله في التطبيق
ان الابحاث دي مقفول عليها لازم تطلع ونطبق الدراسات

وزاةالاعلام بقي دي عايزة انسف حمامك القديم

هقفل قنوات
واغير الاسلوب الحواري الا راقي

واشيل برامج الهيافات

يلا كفايه كده
حلو ان الواحد يخرج من واقعه لاحلامه

هبة فاروق يقول...

والله انت مية مية ياريت بقى تمسك الحكم وترشح نفسك للانتخابات الرئاسية القادمة وانا اول واحدة حرشحك
بجد اقترحاتك عجبتنى يا ريس
تحياتى لك وربنا يعينى انا كمان واعرف احل الواجب

موناليزا يقول...

عجبتنى قراراتك وخصوصا تغيير النسر من على العلم
لأنى برضه مستغربه ليه نختار طائر زى ده وخصوصا ان الصقر اقوى وبياكل اللى بيصطاده

مدونة رحلة حياه يقول...

السلام عليكم
درش عامل ايه
ايه يا دكتور الحلاوة دى اعتبر حلك دا حل للواجب اللى مطلوب منى ونبقا ضربنا واجبين فى واحد
عندك شوية افكار لذيذة
انا معاك فى شوية الوزارات اللى لغيتهم
انا عن نفسى احتمال اخليها وزارة واحدة عشان الاقى كلام اكتبه

Carmen يقول...

اجابات مافيش بعدها كلام ^_* تحياتي لك

افروديت يقول...

أكتر قرارين عجبوني جدآ أنك هتلغي قانون الطواريء
وهتوقف تصديرالغاز " علي بركة الله "


مش خسارة فيك الكرسي

مصطفى سيف الدين يقول...

استاذ فاروق
انا يدوب رئيس وزارة يا عم ومتقلقش المالية متغلاش عليك
بس كله النص بالنص

مصطفى سيف الدين يقول...

خواطري مع الحياة
اشكرك اختي الفاضلة على تعليقك وربنا يعينني انا والدولة على بعض
هههههههه

مصطفى سيف الدين يقول...

ولاء
انتي مسمعتيش خالص عن ختم النسر؟
غريبة الحكاية دي
وفعلا مصر فيهارموز كتير احسن من النسر
وبلاش دعوة تشوفيني ماسك وزارة دي انتي كده بتدعي عليا
تحياتي

مصطفى سيف الدين يقول...

بنت مصرية
اشكرك على تعليقك واهلا ومرحبا بكي في اول زيارة لمدونتي
ويا ستي السياحة متغلاش عليكي

مصطفى سيف الدين يقول...

الزميلة العزيزية شيرين سامي
مفيش حاجة تستاهل الاعتذار قلتلك قبل كده دي مدونتك وتيجي في اي وقت
وبالنسبة اني شايل في نفسي ايوة شايل ومعبي اوي
ربنا يقدرك وتحلي الواجب واكيد هتحليه احسن من كده
تحياتي

مصطفى سيف الدين يقول...

سندباد
اللهم امين ربنا يولي علينا من يصلح ويتقي الله فينا
تحياتي

مصطفى سيف الدين يقول...

ام هريرة
اشكرك اولا على سماحك لي ان اكتب ذلك الواجب واعبر عن جزء من افكاري تجاه هذا البلد
ثانيا من ناحية الجيش متبهدلتش فيه ولا حاجة بس شفت سلبيات كتيييييييييييير اوي علشان كان تجنيدي في قيادة منطقة وكان بييجو ناس من كل مكان في المنطقة وكنت بعرف منهم ايه اللي بيحصل
ثالثا بالنسبة للنسر فهو آكل جيفة لا يجيد الصيد وينتظر ما يصطاده الاسود كي ياكل ما تبقى منهم
رابعا راية الرسول صلى الله ليها وسلم اقتراح رائع ولكنه صعب التحقيق في مصر لانها قد تزيد اتساع المساحة والهوة بين المسلمين والاقباط
خامسا لولا اجابتك انتي الاول فانتي الرائدة اختي الفاضلة ما جاوبت جيدا
سادسا اشكرك لاطرائك اما عن توجيه الواجب فانا اوجهه لكل من قرأ الواجب دون تحديد اسماء
تحياتي وتقديري

مصطفى سيف الدين يقول...

اميرة
اقترحاتك جميلة ومميزة واجابتك عن كل الاسئلة رائعة
تحياتي على تعليقك الرائع

مصطفى سيف الدين يقول...

هبة فاروق
لمصلحة الشعب مش هاعمل كده
شكرا ليكي على تعليقك الجميل واكيد هتعملي الواجب واكتر واحسن مني

مصطفى سيف الدين يقول...

موناليزا
والله انا زيك مش فاهم ليه خلاها البيه نسر بدل الصقر؟
يمكن علشان كان في القوات الجوية ودايما بيقولوا نسور عن القوات الجوية
جايز

شكرا ليكي ومنوراني

مصطفى سيف الدين يقول...

مدونة رحلة حياة
بقولك ايه يا باشا ايه رايك تلغي الوزارة كلها ويعيش الشعب مع نفسه
وبكده تكون خلصت الواجب كله قبل ما تكتبه
هههههه
تحياتي وشكرا ليك

مصطفى سيف الدين يقول...

Carmen
اشكرك اختي العزيزة ونورتيني بتعليقك

مصطفى سيف الدين يقول...

افروديت
لا انا اللي خسارة في الكرسي
انا متنازل عنه

نورتيني بتعلييقك الجميل
اشكرك

محطات ثقافية يقول...

الجميل جدا ان مقر وزارتك في الصيدلية دي لوحدها استراتيجية مهمة جدا واي واحد يدخل يشتكي يشرب مهدئ وبعدها حيشوف الدنيا حلوة
مبروك الرئاسة فعلا تستحق
وتحية لاهل الصعيد

Hagar Elshimy يقول...

انت كده هيقولولك مع السلامه من قبل ما تبدأ هههههههه
اه حكايه العلم دى فعلا من وانا صغيره كنت ارسم العلم واعمل شخبطه فى النص مش باينها ملامح على انها نسر هههه
افكار جميله استاذ مصطفى
واتمنى يكون ليك يد فى التغيير للافضل ان شاء الله
دمت بود

مصطفى سيف الدين يقول...

حلم
اه يبقى منفعة من ناحيتين
منها اخدت تهليبة الوزارة ومنها شغلت صيدليتي
ههههههههههههه
هي دي الافكار
تحية ليكي اختي حلم ومنوراني

مصطفى سيف الدين يقول...

انثى استثنائية
يا ستي ويقولولي مع السلامة ليه؟
انا اصلا مش عايزها سيبهالهم
بالنسبة للعلم كان برضه مطلع عيني تسع سنين من اولى ابتدائي لتالتة اعدادي لغاية ماطفشت ههههههههه
اشكرك اختي العزيزة ومنوراني بتعليقك الجميل