الاثنين، 24 يناير 2011

باعوكي يا قدس




نمت ومش عارف الخبر ده صحيت عليه
واضح انه يوم باين من اوله
مكنتش احب اعلق على الاخبار في المدونة بس لما يبقى خبر زي ده وناس أقل ما يتقال عنها انهم خونة
والله حتي كلمة خونة قليلة
تخيل 2 مليار مسلم حاطين املهم ومعلقين املهم بشوية خونة
1600 وثيقة سرية تثبت خيانة اولي الامر المسئولين عن منظمة التحرير
صائب عريقات بيعرض على اسرائيل اكبر يورشاليم في التاريخ
تنازلات وتنازلات
مش عارف اقول ايه
ويا ريت على التنازلات بس كمان دعوة لاسرائيل بتشديد الحصار على غزة
والبيه احمد قريع بيضحك ضحكة مستهترة مع ليفني

مش هي دي اسرائيل اللي قالولنا زمان دي كوخة وعيب  مش هي دي اسرائيل اللي غنى عنها شعبان عبد الرحيم وقال انا باكره اسرائيل  واعتبرناه بطل قومي في وقتها مش هي دي اسرائيل اللي عملت مذبحة قانا ومذبحة بحر البقر وقتلت اطفالنا وشبابنا وبينا وبينهم حروب من زمان؟
هو احنا عشنا  كل السنين اللي فاتت دي وهم كبير وطلعت اسرائيل دي حليف  اكبر من ابن بلدك لما ييجي ابو مازن يكون عارف ان اسرائيل هتضرب غزة و احمد قريع يطلب من الاسرائيليين التشديد في الحصار على القطاع
مش عارف اقول ايه والله
الواحد مابقاش عارف صاحي ولا نايم
معقول بعد الذل اللي شفناه ده كله نديهم القدس بسهولة كده
مش كده وبس كمان نعترف باسرائيل كدولة ودولة يهودية كمان  يعني دولة مبنية على الدين ويضيع حق عرب 48 اشمعنا بقى العالم كله معادي ايران غلشان بيقولو عنها دولة دينية
معرفش بقى انا بكتب ايه سامحوني لحد دلوقت مش مستوعب الخبر اللي فكرني باللي حصل زمان ايام الدولة الايوبية  بعد ما صلاح الدين حرر القدس  وصل الحكم لابناء الملك العادل (اخو صلاح الدين)  وهم الكامل والمعظم عيسى والاشرف موسى ودب الخلاف بسبب المعظم عيسى الذي يريد توسيع حصته على حساب اخويه  فما كان من الكامل الا انه استنجد بفريدريك الثاني ملك صقلية  علشان يساعده في حربه ضد اخوه وطبعا ده مش ببلاش الثمن بقى كان تسليم القدس لفريدريك
و بعد ما اتفقوا مات المعظم عيسى وعاد الاستقرار في البيت الايوبي لكن فريدريك طالب بالقدس  وببعت رسالة للكامل قال فيها أنا مملوكك وعتيقك وليس لي عما تأمره خروج، وأنت تعلم أني أكبر ملوك البحر، وقد علم البابا والملوك باهتمامي وطلوعي، فإن رجعت خائبًا انكسرت حرمتي بينهم!… فإن رأى السلطان أن ينعم عليّ بقبضة البلد والزيارة، فيكون صدقة منه، ويرتفع رأسي بين ملوك البحر".
طبعا الملك الكامل اداهاله عن طيب خاطر بعد ما اتثبت بالكلمتين دول واعتبرها صدقة  وببلاش ومكنش محتاج ييجي بجيوش جرارة زي اللي جه بيها ريتشارد  ببلاش الكامل ضيع القدس
فهل صائب عريقات وابومازن وقريع كانوا زي الكامل وباعوها ببلاش؟ ولا حسابات سويسرا فيها كلام تاني؟
انا مصدوم يا اخوانا سامحوني
اكتشفت اني عايش في دنيا مش فاهمها
انا ايه بس اللي صحاني من النوم كنت نايم ومرتاح
بس انا صحيت من النوم يا ترى الشعب الفلسطيني هيصحى من النوم وهيعمل ايه مع الخونة دول؟

25 التعليقات:

خواطر شابة يقول...

تعرف انا لم يفاجئني الامر ابدا فقط الفرق ان ما كان من باب التخمين اصبح حقيقة واقعة بفعل هذه الوثائق المسربة
على رأي العزيزة نوارة نجم الفلسطينين لابد لهم من ثورثين ثورة على الخونة وبعدها الثورة على اسرائيل
دمت بود وان شاء الله نتمنى ان القادم سيكون أفضل

مصطفى سيف الدين يقول...

خواطر شابة
انا برضه كنت متوقع انهم ناس خونة بس مكنتش متوقع ان الخيانة توصل بيهم انهم يبيعوا القدس
الانظمة العربية كلها تتداعى
تونس اتحررت
واللي كان مستحيل بقى ممكن يحصل

Tears يقول...

ما الجولان نفس الشىء متباعه و مقبوض تمنها عشان كده سوريا عمرها ما ضربت عليهم رصاصه واحدة من اراضيها

على فكرة مش العرب بس الخونة و الخيانة مش بس التفريط فى الارض لكن ممكن تكون تفريط فى موارد الارض او نقل معلومات او تخريب دولة و اضعافها لصالح العدو

خلينا نشوف الخاين اللى عندنا الاول و بعدين نشوف خونه العرب

إنسان || Human يقول...

لا حول ولا قوة الا بالله
على العرب والشعب الفلسطيني
بس انا فعلا ما تفجأتش كل مافي الأمر ان منظمة التحرير معروف للكثير فسادها من ابو مازن وعريات وهذا القريع
المهم الشعب الفلسطيني يفهم ان الناس دي خونة

Unknown يقول...

السلام عليكم ورحمة الله وبركاته
قتلوا ياسر عرفات .. وجاءوا بهؤلاء لأن سهل شراؤهم والثمن بخس...
واعلم أن تسريب هذه الوثائق عمل اسرائيلى هى كشفتهم بعد أن أصبحوا كروت محروقة وأرادت أن تصدمنا وتزيد من يأسنا...
حسبنا الله ونعم الوكيل

سندباد يقول...

صدقني ياصديقي القادم اسوء بكثير

مسلمة حرة يقول...

ياأخى هذا القريع وأمثاله حتى الخائن عباس لم نكن فى حاجة إلى هذه الوثائق لنتأكد من خيانتهم للقضية ..هذه المقابلات الحميمة مع زعماء الكيان الغاصب والمليئة بالأحضان والقبلات تدل على الخيانة قبل الوثائق .. ولا نعفى حكومتنا من التآمر بإحكام الحصار على إخواننا فى غزة وإهانة قادتهم بالمنع من دخول مصر أو بالقبض على بعضهم أثناء الدخول إلى أراضينا وإهانة من يدافع عن القضية أكثر منا مثل النائب الإنجليزى جورج جالاوى ومنعه من دخول مصر فى الوقت الذى نستقبل فيه المجرمين الصهاينة بكل الود والإحترام والترحاب ...أليست كل هذه الأفعال خيانة عظمى؟؟؟؟

مصطفى سيف الدين يقول...

Tears
معاكي حق اللي عندنا خيانته كبرى بس كلنا في مركب واحد نفسي كل الشعب اللي عندها نظام فاسد تقوم مرة واحدة على حكامها في لحظة واحدة وتطرد الحكام دول من بلادهم وميلاقوش حتة تلمهم

مصطفى سيف الدين يقول...

Hu-man
انا متفجاتش بس مكنتش متوقع انها وصلت لبيع القدس واتمنى الشعب الفلسطيني بقى يفوق ويشوف هيعمل ايه معاهم
تحياتي

مصطفى سيف الدين يقول...

استاذ محمد
حضرتك بتقول ان الاسرائيليين هم من سربوا تلك الوثائق لانهم كروت محروقة بس حتى لو كانوا كروت محروقة هم موجودن في السلطة ومسئولين عن البلد يعني في خدمة الاسرائيليين هم والبلد ايه اللي يضمن الاسرائيليين ان اللي هييجي بعد كده هيكونو نسخة من ابو مازن ورفاقه؟
معتقدش ان الشعب هيثق في منظمة التحرير تاني وغالبا اللي هييجي هيبقى حماس يعني لو سمحت لي اخالفك الراي اسرائيل مصلحتها مع شلة ابومازن لانهم كسائر الحكام العرب بيحكموا لحد ما يموتوا حتى لو كانوا كروت محروقة
تحياتي

مصطفى سيف الدين يقول...

سندباد
ربنا يستر يا صديقي

مصطفى سيف الدين يقول...

انا حرة
ايوة طبعا النظام المصري خائن بس الخيانة توصل لبيع القضية ؟
الخيانة توصل لتهويد القدس؟
ده اللي مكنتش متخيله
2 مليار مسلم سواء كان سني او شيعي كانوا بيدعموا قضية فلسطين وفجأة يكتشفوا ان اللي بيدعموهم باعو القضية

تحياتي

faroukfahmy يقول...

عزيزى مصطفى والله يامصطفى الواحد مش عارف يشتم مين والامين يحارب مين والا مين بالزمة يامصطفى شفت مثل ه1هذه الاحوال فى بلاد الفرنجة حتى اضعف الايمان الاتحاد الاقتصادى العربى مش قادرين ننفذه زى الاتحاد الاوربى الى وصل بيهم الى توحيد العملة الى اليورو مفيش انتماء عربى ولا انتماء وطنى الذى اوصلهم الى بيع القدس ولمين الاعداء العرب جميعا وهذا تحد صارخ ليس للغلسطينيين فقط بل للامة العربيةجمعاء

هبة فاروق يقول...

الظاهر ان الليل مش عايز ينجلى ابدا
وداعا للشعوب العربية ووداعا لارض فلسطين الحبيبة والقدس التى بيعت للاعداء
تحياتى لك اخى مصطفى فالكوارث تاتى تباعا

افروديت يقول...

مش غريبه يامصطفي ...مستغربة انك متفاجيء وزعلان
لماتضيع اي بلدتعرف ان السمسارمن جوه ...

عندك مصرمثلا...لماهتضيع السماسرة من الداخل برضه
ماهي معروفة اصلا يايبيع يايجري يايضحوابيه في العيدزي صدام

تحياتي

;كارولين فاروق يقول...

انا اضم رأيي لكل من قال
لم اتفاجأ فللاسف يا مصطفي
الوطن العربي فقد هويته وقوته
فوداعا للشعوب ووداعا للنخوه
تحياتي واسفي

مصطفى سيف الدين يقول...

استاذ فاروق
اتفق العرب على الا يتفقوا
تحياتي وشكرا لتعليقك

مصطفى سيف الدين يقول...

هبة فاروق
اوعى تياسي ان شاء الله النهار هييجي
يا رب
شكرا لتعليقك الجميل تحياتي

مصطفى سيف الدين يقول...

افروديت
يا ستي انا مش متفاجىء من خيانتهم علشان عارفهم خونة انا متفاجىء من البجاحة اللي وصلت بيهم انهم يبيعوا القدس
كل الانظمة العربية سواء في الخيانة والخنوع
شكرا لتعليقك الجميل

مصطفى سيف الدين يقول...

كارولين
معاكي حق
اتمنى في المستقبل يتثبت ان وجهة نظرنا غلط
شكرا ليكي وتحياتي

ツSmiLeY AnGeLツ يقول...

والله يتوقع كل شي من العرب دول
حتى لو قمت يوم من النوم وسمعت ان مافي ولا فلسطيني في بلاده خلاص
كلها يهود جردوها من اهلها
مابستغرب لان العرب ساكتين حكام زي الزفت
وزي مايقولوا عرب جرب
رينا ياخذهم
خلاص ماعادي في بالحكام شي اسمه عروبة كرامه
دي بلدي لازم ادافع عنها بدمي ولحمي
يلا نفسي
استغفر الله
تقبل مروري
سلامي ليك.

مصطفى سيف الدين يقول...

خواطري
صح كلامك العرب عندهم لا مبالاة جامدة وسلبية مالهاش حدود
تحياتي

ليلى الصباحى.. lolocat يقول...

السلام عليكم ورحمة الله

لو قرأت التاريخ يا مصطفى تلاقى انه بيعيد نفسه
فلسطين من زمان وهى متباعه من العرب لليهود للاسف

وقد اختارها الله للأبتلاء وقدر هو يعلمه
اما الخيانة حدث ولا حرج ...بس الوظن العرب فقد هويته كما قال بعض الاصدقاء بس بين الحكام فقط
انا على يقيقن انه هيجى اليوم تحصل فيه حاجة كبيرة اوى
لان ربنا قال

" وتلك الايام نداولها بين الناس"
وايام الظلم زادت اوى اوى والخيانات اصبحت فى كل درب وطريق
وعندى امل ان يوم الخلاص يكون قريب ان شاء الله هيجى طفل صعير لكن قلبه كبير بالأيمان يخلصن فلسطين ويحررها

اشكرك اخى العزيز على مواضيعك الهادفة الجميلة
كم نستفيد دائما بكل خير هنا فى رحاب مدونتك الرائعة

تحياتى وتقديرى

مصطفى سيف الدين يقول...

ام هريرة
وعليكم السلام ورحمة الله
فعلا التاريخ بيعيد نفسه وما اشبه الليلة بالبارحة
انا جبت مثل ايام الملك الكامل
وحضرتك جبتي مثل معاصر ان الفلسطنين هم اللي باعو بيوتهم
اتمنى ان ياتي ذلك الطفل قريبا الذي يستطيع ان يوحد كلمتنا ويعيد القدس الحبيبة
اشكرك على كلماتك الرقيقة واتمنى دائما ان اكون عند حسن ظنك
تحياتي وتقديري

ولاء يقول...

السلام عليكم ورحمة الله وبركاته

شيء متوقع ...

ولا أدري ما أقول سوى أن ادعوا لأهل فلسطين بأن تعود القدس حرة أبيه .
جزاك الله خيرا أخي الكريم .