خلف كل قيصر يموت

هذه القصة خيالية  و ابطالها خياليين و اي تشابه بينها و بين الواقع هو من قبيل الصدفة البحتة ( البحتة جدا , البحتة خالص )

- انتي يا بت يا كليو  مش قايلك  تغيري مية الشيشة دي

- حاضر يا سيد الناس

كان يوليوس قيصر يرتدي الصديري  الذي يظهر قوته البنيانية و العضلية  بينما كليوباترا المسكينة تغير ماء الشيشة مغلوبة على أمرها  بعد أن أحضرت التفاح الأمريكاني (ايوة هو الاحمر ده ) الذي زرع خصيصا في الولايات الرومانية الامريكية ( هتقولي امريكا لسه مكتشفوهاش هاقولك يعني يوليوس كان بيلبس صديري فوت يا حاج )

هنا دخل رجلا وقورا في زيه العسكري

- ايه اللي جابك ياض يا بروتس هنا و ايه اللي يدخلك على الجماعة بتاعتنا كده من غير استئذان

- معلش يا كبير بس عايزك في موضوع مهم

- مهم ازاي يعني

- الواد كاسيوس ..

قاطعته شرقة من يوليوس فقد كان يلتهم التفاحة مع اخذ انفاس الشيشة معا في نفس الوقت  , فلم يستطع بروتس ان يكمل جملته و وقف يشاهد يوليوس في صمت و هو يحاول ان يلتقط انفاسه  حينها فعلت كليوباترا ما تعلمته من السيدات المصريات خلعت قبقابها من قدمها و بكل قوة  هوت على ظهر يوليوس الذي استعاد قوته و لكنها لم تتوقف عن الضرب بينما بروتس يشاهد في صمت

- كفاية يا بت انتي صدقتي لما لقتيها غوري من قدامي

هنا تحدث بروتس :

- ما تسيبك من الشيشة يا حاج معايا ليك حاجة كده بيسموها سيجارة اشيك و تمشي مع ملك احسن

حط يوليوس السيجارة في بوئه و بدأ ياخد اول نفس منها

- عارف يا بروتس السيجارة دي شبه كليوباترا اول ما تولع فيها تمزجك  ( و من هنا بقت الكليوباترا سجاير)

- بصراحة يا كبير روما كلها بتحسدك على كليوباترا  , البت مزة و روشة و بعدين بطلمية يعني يونان و ادب اليونان

- انت جاي تعاكس مراتي غور من قدامي ياض

غار بروتس  و ماقالش على الموضوع المهم و سبحان الله برضه قيصر معرفش الموضوع المهم

و على سطوح القصر كانت كليو مع انطونيو قاعدين

- شايفة القمر يا كليو

- قمر ايه الله يخيبك , ياض استرجل انا جايباك هنا علشان قمر

- اوامرك يا ست الستات

- الراجل الله يخيبه ولع في مكتبة الاسكندرية و دي الحاجة اللي كانت بتأكلني عيش و انا بالم تبرعات من العالم كله على حسها و احط في حسابي  في سويسرا

- يبقى يوليوس  دبور و زن على خراب عشه و اللي ييجي على الجميل لازم يولع

- متكسفنيش بقى يا سي ماركو  بص هاقولك انا لفيتله سيجارة من اياهم صنف اسمه كده (صباحك اسود  زي وشك) , هاشربهاله مش هيستحمل الدماغ بتاعها نقوم سارقين ختم القيصر  ومدينه للواد قيصرون ابنه و نطالب بروما بقى معانا الختم

-فكرة مفترية زيك

نياهاهاها تعالت الضحكات الشريرة المتقطعة على سطوح القصر

يوليوس كان في حالة يرثى لها و هو يدخن السجاير الكليوباترا كان يهرش في جسده كله

- انتي يا بت يا كليو  هاتي قبقابك  و اضربيني ضربتين على ضهري

- انت ادمنت يا راجل ؟ طيب من عينيا

و بكل قوتها هالت عليه كليوباترا بضربات القبقاب حتى هدأ روعه

- بقولك ايه ما تسيبك من السجاير اللي ادمنتها دي انا جايبالك  اصطباحة صنف اصلي اصلي متلاقيهوش غير عندي لفتهولك برموش عيوني هو اللي هيظبط

اخد يوليوس( صباحك اسود زي وشك ) و مع اول نفس فقد وعيه

- و عامللي فيها قيصر و مكسر الدنيا و انت دماغك خفيفة كده

خلعت كليو عنه خاتم الملك  و  نادت على الحراس و رميته في اول سفينة رايحة روما

و في روما كان كاسيوس  شغال في ودن بروتس :

- يا عم انت ده قالك غور

- و ايه يعني اهو زي ابويا برضه

- ابوك ؟ ايوة صح ابوك , سرفليا امك كانت دايرة على حل شعرها معاه  و اكيد هو ابوك

- انت بتقول ايه ؟

- البلد كلها بتتكلم بصراحة و انا مش عايز اخوض في الاعراض

- هو ابن اللذينا ده مش سايب ست في حالها ابدا حتى امي

و قعد بروتس يبكي

- شفت بقى علشان تعرف انه راجل دون  و انت راجل الفضيلة يبقى لازم نخلص العالم منه

- يعني هو ابويا و لا مش ابويا؟ طيب لو هو ابويا يبقى ازاي اقتله و لو مش ابويا يبقى ليه اقتله؟

و في ظل ذلك السؤال المعقد و لأننا نفعل اشياء دون ان نعلم لها سببا قرر بروتس ان يشارك في قتل يوليوس , و تم اشاعة الخبر في مجلس الشيوخ ان يوليوس يريد اسقاط النظام

- يا حاج ده هو النظام

- قصدنا يعني النظام الجمهوري هيخليها ملكية او امبراطوية و احتمال سلطانية

- ايوة السلطانية دي حلوة  و نلبسهاله

و تعالت الضحكات المتقطعة الشريرة داخل المجلس

-------------

- انت جيت يا سبع البرمبة , شحنتك زي شوال البطاطس , ادي اخرة مشيك ورا الحريم

كان ذلك الاستقبال الحافل لزوجة يوليوس الاولى له بعد ان وصل لروما

- اخرسي يا ولية و عدي ليلتك

- مش قادر على الحمار جاي تتشطر على البردعة

- مش فاضيلك معايا  مجلس شيوخ بكرة

كانت الاشاعة وصلتلها و مع ذلك قالت لنفسها : تستاهل اللي يجرالك روح اتخمد  و بليز يا جوبيتر (اله الرومان) خليهاله اخر خمدة

 في الصباح ارتدى يوليوس اللي على الحبل و  راح لمجلس الشيوخ  بعد ما عد الحاضرين و مكنش انطونيو موجود  قال فين اومال البيه ؟ راح فين؟

- انت سيبته في مصر يا عم انت بقيت بتنسى و لا ايه ثم غمغم يكلم نفسه : اهوه يخلص شوية  من اللي بتعمله في حريمنا

تعالى صوت واحد من آخر المجلس

- سمعنا انك بقيت مدمن  قباقيب  على سجاير و لن نسمح..

- انت مين ياض علشان تسمح و لا متسمحش انا الحاكم

- ده ضد الدستور احنا في دولة جمهورية

- على نفسك ياض , جمهورية دي تبقى خالتك

و هنا لم يستطع كاسيوس و برتوس  وغيرهم من المتآمرين ان يمنعوا نفسه انقضوا انقضاضة رجل واحد اللي معاه سنجة و اللي معاه رقبة ازازة و اللي معاه  قرن غزال

- حتى انت يا بروتوس و انا اللي بعاملك زي ابني روح انت مش ابني قيصرون بس هو اللي ابني  , اكتلني يا سليم قصدي اكتلني يا بروتس 

- يا عم انت  هتمثلي كل الافلام ,  موت بقى خنقتني

و سالت دماء يوليوس لتنتهي حياة رجل و يبقى النظام الجمهوري هكذا كانوا يظنون  و لكن ليست كل الظنون حقائق  لأن النظام الجمهوري مات مع يوليوس و في ذلك قصة أخرى