الثلاثاء، 17 يوليو، 2012

.... قيصر جديد (2)

يعني لو حابب تعرف يوليوس اتقتل ازاي و ليه شوف البوست ده خلف كل قيصر يموت

- يوليوس اتقتل و لازم نسلم نفسنا
يوليوس اتقتل و لازم نسلم نفسنا
ظل يكررها بروتس  و هو يهرول بعيدا في الجبال
انطونيو سمع الخبر سافر لروما و قال اصيد في المية العكرة و التقى باوكتافيوس (اللي يوليوس يبقى خال امه يعني يوليوس يقول لابوه يا انا علشان اتبناه و اعتبره زي ابنه )
- قتلوا ابوك يا اوكتا
- يا عم في ستين داهية , كده كده بعد ما خلف قيصرون كان هيئلشني
انطونيو قال لنفسه : الظاهر انه ميعرفش علاقتي  بكليوباترا ام قيصرون , اكمل خطتي بقى
- بس برضه افتكرله حاجة عدلة , بقولك ايه ولاد اللذينا دول ميبيتوش في ديارهم تعالى نصحى بدري و نحكم روما
- تصدق فكرة , ايدك في ايدي يا شقيق
و مدوا ايديهم لبعض و اتصافحوا و همه بيقولو ماركو و اوكتا ايد واحدة  و بعدين لعبوا كيلو بامية
جهز الرفيقين جيوشهم  و انطلقوا للقضاء على قتلة يوليوس  ليبق سؤال اذهل كل من علموا بالقصة , كيف خرج الجنود الذين هم ابناء الشعب في القضاء على قتلة قيصر الذين كانوا يدافعوا عن النظام الجمهوري , لا ادري ربما هو الولاء لدرجة العبادة
و بقي انطونيو في روما مع رفيقه الجديد بينما ظلت كليوباترا على نار في مصر
- بت يا تاح  انتي يا بت , روحي لبرمبتاح بتاع البقالة اللي تحتينا و قوليله هات ربع حشيش
- لا يا ستي متعمليش في نفسك كده
- اسمعي الكلام اللي بقولهولك و يلا بسرعة
و اتسطلت  كليوباترا و هي حاطة ختم قيصر قدامها و بتبص على قيصرون و عنيها نص مفتوحة و هي مسطولة بتقوله
- الظاهر النطع اللي اسمه انطونيو ده كان بيلعب بينا ميبقاش شنبي ده ( يقال ان كليوباترا كان ليها شنب  ) على مرة لو سكتتله
تحالف انطونيو اوكتا حقق العديد من الانتصارات و غزا كل اوربا  و مع كل تحالف يكون تقاسم  , بدأ الرفيقين في قسمة الغنائم
- بص يا شقيق روما بتاعتي
- لا يا اوكتا انا الكبير انا اللي آخد روما
- ياخي افهم مش هيقبلوك هنا انا ولي العهد و الوريث الشرعي
- اممممممممم
- بص اثينا  و شرقها ليك , و غربها و روما ليا
- اثينا يعني الاغريق و ادب الاغريق و مزز الاغريق  استبينا يا اوكتا
- مزز؟ استنى استنى شكلنا هنخسر بعض  ده بنات الاغريق من ماركة كليوباترا و بنات روما من ماركة الحيزبون اللي كان متجوزها يوليوس لا يا عم انا عايز اثينا
- لا بص خلينا متفقين اثينا بتاعتي و ابقى تعالى صيف عندنا
- ان كان كده اوكشن يا معلم
انطلق انطونيو الى  مملكته الجديدة  و بدأ يمارس مهامه الجديدة مع مزز اثينا حتى وصتله رسالة من كليوباترا
- حبيبي انطونيو , انت الحتة اللي في قلبي من جوة فاكر ايامنا زمان لما كنا بنستغفل المغفل اللي اسمه يوليوس و نقعد نزغط البط انا و انت , دي كانت احلى ايام حياتي , نفسي ترجع , سمعت انك مسكت اثينا و دي اصلا ارض جدي بطليموس و صاحبه الاسكندر بس متغلاش عليك انا اديتك قلبي من جوة هاستغلى عليك حتة ارض , بس الحقني اللي اسمه اوكتا ده بيبعتلي رسايل غرام و عايزني ابعتله   قمح مصر , مصر يا انطونيو عارف يعني ايه مصر  لما ابعتله القمح المصريين هياكلوا ايه , ايوة هياكلو في بعضهم عادي يعني بيعملوا كده دايما بس انا مش هاكل باتون ساليه يرضيك  ده  تعالى و الحقني ارجوك
فزع انطونيو و القى المزة اللي في ايده و جرى على مصر ليعقد تحالف مع كليو و يفسخ تحالفه مع اوكتا
- جيتلك من آخر اثينا على ملا وشي محلاها عيونك يا سمرة
- اختشي يا راجل تاح واقفة
- طيب هاتيلي علبة سجاير مارلبورو يا تاح وسيبينا مع بعض
رمقته كليو بنظرة نارية : مارلبورو يا راجل؟ انت بطلت تشربني؟
- انتي جواية يا كلاكيلو  بس صحتي مش مستحملة القطران بتاعك علشان كده بقيت اشرب سجاير نضيفة
- ان كان كده معلش خصوصا انك بقيت عضمة كبيرة
- هنحارب اوكتا ازاي
- جيشك على جيشي , المصريين معايا
- و المصريين ليه معاكي و انتي اصلا بطلمية
- بيحبوني ياخي
- و مين ميحبكيش ؟ و انتي قلبك كبير يساع  من الحبايب الف ماتيجي نلعب عروسة و عريس
- بعد ما نخلص  على اوكتا
وقف اوكتا في الشعب الروماني يخطب فيهم و يبدا حربه الشعواء الدعائية على مصر و المصريين
- هناك بيعبدوا إله اسمه رع و واحد تاني اسمه آمون و دول ييجوا ايه في جوبيتر العظيم , جوبيتر بيناديكم  بيحث فيكم انك تفوقوا من غفلتكم , مصر ماليها السحر الأسود و بيحولوا الناس لضفادع و قطط , الناس في مصر بيلبسوا جلد معيز تقبلوا تعيشوا في عالم فيه ناس بتلبس جلد المعيز  , الناس في مصر ميستحقوش حضارتهم و لا معابدهم و لا ثوراتهم , احنا لازم نرجع لمصر رونقها القديم و ناخد قمحها طبعا ده بديهي  , انتو معايا يا رجالة
- معاك يا كابتن
و في اوكتيوم بدأت الحرب انطونيو بجيشه و المصريين  ضد اوكتا و جيشه , في بداية الحرب المصريين كانوا واقفين بيتفرجوا و عمالين يقولوا
- يلا يا ماركو هات الجول
- بيب بيب  كليو
- انطونيو عمهم و حابس دمهم
و اوكتا مكنش راحم جيش انطونيو  اللي زعق في المصريين :
- انتو بتعملوا ايه
- الجوستيك بايظ قلنا  نشجعك مادام مش عارفين نلعب
- الجوستيك بايظ؟ يا للمهزلة  ازاي الكلام ده , يا برمبتاح انا مش قايلك تشيك على الجوستيكات قبل الماتش
- معلش يا كبير خيرها في غيرها يعني ماتش يفوت و لا حد يموت
انطونيو مقدرش يعيش في عالم  قاسي جوستيكاته بايظة علشان كده انتحر
 في تلك الاثناء واحد غريب راح لكليوباترا و قالها :
- خالتي بتسلم عليكي  وبتقولك انطونيو مات و بعتالك ده
- يلا في داهية
فتحت السلة لقيته حية
- ياااااي هدية تحفة من زمان نفسي العب بحية
و مسكت راس الحية بايد و ديلها بالايد التانية و فضلت تلفها حوالين جسمها و تنط من عليها و من هنا الناس اتعلمت نط الحبل  بينما المصريين  أملوا نفسهم ان اوكتا هيطبق النظام الجمهوري اللي عمرهم ما شافوه في مصر و اخيرا الشعب هيبقى مصدر السلطات و يحكم نفسه بنفسه
الا ان اول خطاب لاوكتا بعد القضاء على كل اعدائه
- طبعا انتو شفتوا الخيانة اللي عملوها النبلاء اللي مسميين نفسهم مجلس الشيوخ , كام واحد مات بسببهم؟ كام واحد اتشرد بسببهم كم دم طاهر سال على الارض كام شهيد راح , و في الآخر يقولوا عن نفسهم ممثلين الشعب من هنا و رايح مفيش مجلس شيوخ تاني و لا حتى مجلس غفر  , من النهاردة انا روما و روما انا  , انا اوجست العظيم , شهر حر شمسه قوية جافة علشان كده انا اللي هاوصلكم للشمس مين معايا  مين معايا
- كلنا فدا اوجست العظيم كلنا فدا اوجست العظيم
اما اول قراراته في مصر فانه رسم على العملة المصرية تمساح يمكن علشان التمساح ميخليش من العملة و لا الثورة حاجة

فات على الحكاية دي الفين و اربعين سنة و لسه كليوباترا بتنط الحبل و لسه المصريين بيحلموا بالنظام الجمهوري و لسه اغسطس حَر موت , و لسه التماسيح بتاكل فلوس  مصر
تفتكروا ممكن كل ده يتغير؟

21 التعليقات:

مصطفى سيف الدين يقول...

الحقائق التاريخية :
1- طبعا يوليوس كان متجوز كليوباترا و مخلفين قيصرون
2- يوليوس هو اللي حرق مكتبة الاسكندرية
3- كان في اشاعة فعلا ان بروتس ابن زنا من يوليوس رغم قوة نسب بروتس اللي بينتسب لبروتس العظيم اللي قضى على الملكية
4- اعضاء في مجلس الشيوخ قتلوا يوليوس لاحساسهم انه عايز يقضي على النظام الجمهوري
5- اوكتافيوس و انطونيو اتحدوا فعلا للقصاص
6-انطونيو اتحد بعد كده مع كليوباترا ضد اوكتافيوس
7- اوكتافيوس فعلا شن حملة دعائية شعواء ضد مصر علشان يحشد الجنود
8- اوكتافيوس كسب في موقعة اكتيوم
9- اوكتافيوس لغى النظام الجمهوري
10- اوكتافيوس رسم تمساح على عملة مصر

mohamed يقول...

انا رأيى نوقف حملة التدوين لحد كده , لأن اكتر من كده ربنا يجيب العواقب سليمه ههههههههههه
لا بجد رائعه يا دكتور
لكن افتكر ان كل ده يتغير وانه اتغير بالفعل على فترات فى التاريخ المصرى ( وخاصة فى فترة الفتح الاسلامى لمصر )
وطبعا كلامى مش معناه خالص ولا يوجد تشابه بينه وبين فترة حكم الاخوان الآن اى صله بتاتا هه بتاتا هههههههه
ولكن حقا سيأتى اليوم الذى سيتحقق فيه النظام الديموقراطى ولن تأكل التماسيح فلوس مصر وطبعا كليو مش هتنط الحبل أما اغسطس فدا بقى هوا ونصيبك يعنى فى قنا مثلا هيبقى حر موووووووت انما فى اسكندريه , وخصوصا فى المنتزه يبقى ايوووووووووه - هههههههههههههه

تحياتى لابداعك - دمت متألقا

هبة فاروق يقول...

سؤال وجيه فى اخر البوست هل ممكن ده يتغير
اعتقد يا عزيزى هذا السؤال لن اجيب عليه الان بعد مرور سنه على الاقل فمازال هناك امل ولوبسيط فى الاصلاح
طبعا التدوين اليومى اظهر اشياء لم اعهدها هنا من قبل هههههههههه
طب والله التدوين اظهر مدى خفه دمك انت شربات يا دكتور ضحكت من قلبى وخصوصا على الحدايه

;كارولين فاروق يقول...

ده كلام عالي اوي
انا بقول كفايه تدوين لحد كده
علشان الاعصاب ماتتعبش :)
ضحكت لما قولت يا بس
بس ده لا يمنع انك تكتب كوميدي
علشان بصراحه البوست تحفه
تحياتي

richardCatheart يقول...

هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه يخربييييييييييييييت دماااااااااااااااغ ههههههههههههههههههههههههههههههههههههههههههههههههههه انت هتجبلى ساكتة قلبية والله


مش عارفة اعلق على اية ولا اية على المعلومات وطرقتك اللى قتلتنى ولا دمك الشربات ولا ايييييييييييييية

قيصرون دا فكرنى بالفيلم الواد اسمة سيزرون ترجموها قيصرون ههههههههههههه كله تحفة من اجمل ما قرات البوستين دووووووووووول احييييييييييييية يا ابو سوسو احييييييييييييييية

ريبال بيهس يقول...

مساء الورد مصطفى

في البداية أعتذر عن تأخري على جمال الحرف هنا وهذا مرده لعدم قدرتي على دخول مدونتك رغم محاولاتي المتكررة ...

ثانياً صياغتك التاريخية الرائعة بأسلوب عامي محبب للجميع خلق مكس جميل وجميعنا نعرف ثقل قراءة التاريخ على قلوب الكثير ولكن بأسلوبك كان جميل جداً ومميز ...

بالنسبة للسؤال أعتقد ان مصر دخلت مرحلة جديدة كلياً ومن السابق لأوانه الحكم فالدلائل تشير لمرحلة جيدة مقبلة عليها مصر ولكن لا نستعجل الحكم فالسنين كفيلة بالرد عليه ...

كل عام وانت بخير ورمضان كريم عليك وعلى العائلة جميعها ...

تحياتي وإحترامي

زينة زيدان يقول...

اسكتش رائع لخص حقائق حقيقية واقعية 100% بشكل ساخر ناقد ممتع في نفس الوقت
في كل حرف لمست الابداع
ورغم أن كل حرف يحمل ابتسامة إلا أنه في نفس الوقت يحمل دمعة جارحة بسبب واقع مخجل...
لمحة ابداعية هي ربطك لحادثة تاريخية كبيرة ب واقعنا السياسي الحالي بهذا الشكل القريب من نفس القاريء و من مزاج الكثيرين

تحيتي لك أستاذي العزيز

Bent Men ElZman Da !! يقول...

اهو احنا من ساعه كليوباترا ويوليوس واحنا بنٍسأل نفس السؤال
ومع كل اللى بيحصل ده
لسه فى امل ان الوضع ممكن يتغير ويكون احسن

عجبنى صراحه تعليقك انك كتبت الحقائق التاريخيه دى

مصطفى سيف الدين يقول...

و انا باعيد قرايتها دلوقت اكتشفت اني كتبت ثورة مرتين
و في المرتين كنت اقصد ثروة

بس تصدقوا هي تمشي

ريـــمـــاس يقول...

صباح الغاردينيا أستاذ مصطفى
لو كان التاريخ بيبقى دمع خفيف زي سردك كنا بخير ههههههههههههه
بجد أسلوبك رائع وروحك حلوة ويارب يكتب لمصر الخير ويكون عهد بـ الخير والسعادة "
؛؛
؛
لروحك عبق الغاردينيا
كانت هنا
reemaas

الازهرى يقول...

تصجق بالله
لولا محبتك فى قلبى
كان زمانى ولعت فى سوهاج بالكامل

أنا من عشاق التاريخ وخاصة الفترة البطلمية ففى تاريخ مصر
وقريبت عنها وعندى كتب عنها فوق ما تتخيل

بس بجد
أنا وقعت من على االكنبة مرتين من الضحك

روووووووووووووووووووووووووعة

Aya Mohamed يقول...

تفتكر بعد كل العمر ده لسه هنقدر نغير
اسلوبك تحفة فى اى حاجة تكتبها
ياريت لو كان التاريخ لذيذ كدا كنا حفظناه صم وجايز كنا قدرنا نستفاد منه
مش نفضل نكرر فى نفس الاخطاء ونرجع لنفس النقطة كل كام سنة
دايما مبدع يا مصطفى :)

reemaas يقول...

هههههههههههههههههههههه
تحفة يا درش انا قريت الجزئين وبما انى بحب اقرا التاريخ فعاوزة اقولك انك صغت الشبه صح جدااااااااااااااااااااااا

عجبنى الاسلوب اوى اوى

بالنوسبة للتغيير فانا مش متفائلة نوهئيا يعنى

أحمد أحمد صالح يقول...

هو صحيح وضع الشعب العقلي و الثقافي و الوعيي بيجعل نسبة الأمل ضعيفة..بس في أمل ان يكون بكرة أحسن..
..
مش هأعيد تعليقي في الجزء الأول،لكن فعلا روعة دكتور مصطفى..
ثروة ما بعدتش كتير عن ثورة،بينهم ارتباط كبير..بس مش دايما ينفع يحلوا محل بعض.
تحياتي..

زينة زيدان يقول...

مررت هنا لأقول لمبدعنا

كل عام وأنت بخير
ورمضان كريم
وكل حملة تدوين ونحن على الخير نلتقي

محمد الجرايحى يقول...

د/ مصطفى سيف الدين
طرح جديد وأسلوب شيق وممتع واسقاطات رمزية تحمل الضحكة مع الدمعة .....
ولكن يظل الأمل موجوداً

اندروميدا يقول...

كل عام وانتم بخير بمناسبة حلول شهر رمضان المعظم .

تقبل الله منكم صالح الاعمال والدعاء .

شمس النهار يقول...

ممكن يحصل ده
لو كانت كيلوبترا عملة عملية تجميل في انفها

:)))

ضحكتني ضحك مع اني متنكد عليا النهاردة
:))))

الأسرة المسلمة يقول...

بسم الله وبعد
تتقدم الأسرة المسلمة ( مازن وأحلام ) بالتهنئة بمناسبة حلول شهر رمضان المبارك سائلين المولى عز وجل أن يتقبل منا الصيام والقيام وتلاوة القرآن وأن يرحمنا ويغفر لنا ويعتق رقابنا من النار وأن يدخلنا الجنة من باب الريان إنه سميع قريب مجيب
مبارك عليكم الشهر وكل عام وأنتم إلى الله أقرب

donkejota يقول...

عك السنين

مصطفى سيف الدين يقول...

donkejota
يا راجل
و عرفته ان عك لوحدك؟
ده كويس اوي على فكرة معلومة جديدة مكنتش اعرفها
شكرا لحضرتك انك نبهتني
و ان شاء الله هاعك كتير تاني فيا ريت متعذبش نفسك و تقرالي