الأربعاء، 8 فبراير 2012

رحلة القاهرة الدافئة (مراسم حفل توقيع كتابي) + تحديث


اول ما طلعت من البيت مش عارف ايه اللي فكرني  بفيلم كلاشينكوف لما (غادة عادل ) قالت القلم ده عزيز عليا اوي كتبت بيه اول حلقات برنامجي هو بألف جنيه بس قيمته المعنوية اكبر بكتير
اللي لفت انتباهي قلم بألف جنيه ؟ ليه بقى ؟ ما هي ممكن تجيب كيبورد بعشرين جنيه و اكيد هيبقى خطها احسن من قلمها بكتير على العموم الحكاية دي لفتت انتباهي وانا في طريقي لحفل التوقيع لاول كتاباتي و قلت لازم اجيب قلم اسطوري و رحت و اشتريت قلم  اسطوري عارفين بكام ؟ لا اكتر من الالف بكتير  .. اشتريت قلم بتلاتة .. جنيه  (بس قيمته المعنوية اكبر بكتير ربنا يستر و ميعملهاش في جيب القميص :)
قلمك في جيبك موبايلك في جرابه  تذاكرك في ايدك اتوكل على الله يا عم
القطر جه في ميعاده بالظبط الساعة اتناشر و تلت ؟ خير اللهم اجعله خير مش متعود يعني ييجي في ميعاده
الحمد لله التذكرتين بتوعي انا و اخويا جنب الشباك هيييييه مش هنتخانق  ايه ده في حد قاعد على كرسي منهم اتخانق انت بقى يا ايهاب انا هاقعد على الكرسي ده و اكتشف بقى المصيبة الست اللي قاعدة على الكرسي طلبت من اخويا  ياخد تذكرتها اللي في الدرجة الاولى علشان هي تفضل جنب صاحبتها <<<<< ايه الحظ ده ... طبعا الواد باعني  و فضلت انا طول الليل احاول انام لكن بسم الله ما شاء الله ربنا كرمني بعربية قطر زي الفل فيها بتاع سبعتاشر ست كل ست  معاها عيل صغير والعيال ربنا يبارك فيهم واحد يسكت التاني يستلم الوردية عياط و صراخ يا دي النيلة .. ايه الليلة اللي زي بعضها انا عايز انام بقى  معايا يوم طويل لكن العيال مش بتتفاهم , طيب هي الستات تخلف ليه لما عايزة تسافر حاجة تفرس , و عليه فضلت احقد على اخويا الليل كله واقول طبعا البيه نايم و لا هامه
حقد بقى شوية و غل شويتين الليل كله , القطر كان ماشي زي الفل و زي السكينة في الحلاوة ووصلنا بني سويف على سبعة و نص الصبح و قلنا اشطة اذا و فجأة بدا العك كل شوية يقف و يمشي خوتين و يقف كانه مقدم على مغامرة خايف منها و فضلنا على الحال ده لحد ما وصلنا القاهرة على 11 الصبح آه 11 الصبح يخرب بيت كده تلات ساعات و نص بين بني سويف و القاهرة في قطر اسباني .. ده شيء فوق الخيال  و الاحتمال . جه طبعا اخويا بقى من الدرجة الاولى و انا عمال اقوله ايوة طبعا مانت نايم الليل كله لقيته بيقولي ابدا ربنا كرمني باتنين مش عارف فليبنيين و لا صينيين المهم انت رغايين فضلوا عاملين صداع وهيصة الليل كله ومنامش وقتها قلت الحمد لله عملت اللي عليا و الحقد جاب نتيجة ههههههه

انطلقنا بقى من رمسيس أخدنا تاكسي كده السواق بسم الله ما شاء الله شاكله يا ضارب يا مبلبع بس مش ده المهم الاهم انه كان بيقرب من كل ميكروباص و يقف جنبه و يقوله : انت من بورسعيد ؟  لما السواق يقوله لا يقوله خلاص  , قلناله يعني لو من بور سعيد هتعمل ايه راح مطلعلنا مطواة من جيبه قال اخلص عليه قلاله لا فيك الخير و فضل بقى يكلمنا عن الامن الضايع في البلد و الحال البايظ وقالنا انه شايل المطواة علشان يحمي نفسه وفضل بقى يحكيلنا في حكايات و لا الف ليلة و ليلة لأننا حسينا ان الديك بيدن و هنعوض نومة القطر في التاكسي
وصلنا المعرض بحمد الله سالمين و طبعا نسينا كالعادة ناخد خريطة ماجد القاضي .. دورنا شوية على الخيمة رقم اتنين و دورنا جوة خيمة اتنين شوية اكتر عن جناح الدار لحد ما لقيناه
لقيت الاستاذ محمد سامي والاستاذ حسام سليمان و كانت دي اول مرة يشوفوني فيها طبعا انا اللي عرفتهم من الصور  سلمت عليهم سألت الاستاذ محمد سامي عن اخبار المعرض قاللي مش اد كده انت شايف احوال البلد ؟ قلتله ان شاء الله خير و استئذنته اني هالف لفة كده في المعرض و اجي
طلعت برة جنب البانوراما اخدنا شوية صور و بعدين رجعت تاني للجناح علشان الاقي المفاجأة السعيدة الدكتور نبيل فاروق بنفسه موجود في الجناح  رحت جريت جبت نسخة من رواية الثورة و جريت أخدت توقيعه و بعدين رحت جبت نسخة من كتابي و اهديتهاله و اتكلمت معاه قلتله على فكرة انا من قفط
قاللي ياااااااه  دي لي فيها ذكريات كتير ايام ماكنت باجري ورا قطر القصب :)
قلتله اه حضرتك انا عارف الحكاية دي بس للاسف قطر القصب اتلغى بيعدي جنب مدرسة و بعدين اغلب الاهالي بطلت تزرع قصب
المهم اتصورت معاه  واتكلم مع الاستاذ محمد سامي عن مشروع النشر لمن يستحق بعد ما شاف كتابي


بعدها بدأ حفل توقيع كوميكس عاصفة الرعد للدكتور محمد فؤاد و الدكتور محمد فؤاد و اخوه المهندس احمد فؤاد كده ناس تدخل قلبك من غير استئذان ابتسامتهم الهادية جواز مرور لعبور اصعب القلوب قسوة  قعدنا اتكلمنا كتير لحد ما جات رغدة رمزي صاحبة كتاب(عادة الدبوس )  و رامي يوسف (شاءت الاقدار) و بعدهم امل زيادة (الكهف) بجد سعدت جدا بمعرفتهم فعلا ساعات تقابل ناس تحس انك تعرفهم من زمان اوي و يدخلوا قلبك علطول
بعد كده قلت يعني اديها بصة على المعرض تاني و لفة ميدانية شوية كده وقلت ارجع لقيت الاستاذ محمد سامي و رغدة جنب الخيمة اتكلمنا كتير عن احوال البلد و احداث وزارة الداخلية و عن مجلس الشعب و استفدت كتير من اراؤه ووجهة نظره و رؤيته للاحداث يعني اللي يتابع من التلفزيون والنت زيي اكيد رؤيته تبقى مختلفة عن اللي يتابع الاحداث و هو من نفس البلد و المكان
رجعت تاني الجناح لقيت زميلة الكفاح في الصيدلة و النضال في المعطف شيرين سامي وصلت
و كمان حورية محمد و هدير عرفة اللتين سعدت بلقائهما فشرف لأي أحد أن يلقى أقلاما تتناثر الرومانسية و الاحساس منها لتبلل جفاف الأوراق
  ثم توالت المفاجآت 
لقيت واحد بيطبطب على ضهري و يقولي مصطفى سيف بصيتله قالي انا محمد السعيد (انا أعرفه باسم محمد السيد فاستغربت ) قالي انسان في عتمة نور
- يا راجل  ؟
وقتها اخدته بحضن جامد كان واحشني اوي بالرغم ان دي اول مرة اشوفه بس كنت باشوفه من داخل قصصه القليلة اوي  قلتله فينك يا راجل  حرام عليك  انت بتظهر في السنة مرة و لا ايه؟ قلتله ان في قصتين له مش بمل من قرايتهم (صياد و مختلف ) قلتله كمان انه اكتر حد يستحق انه يتنشرله  قعدت ارغي معاه كتير  قلتلكم كان واحشني اوي كمان جه تامر نبيل الطيب اللطيف وبعده لبنى احمد نور
و الفلسطينية الرائعة علا عنان  و آية محمد و آية عبد الكريم و   مها ميهو , داليا رحاب ,غادة محسن , احمد غازي, رضوى الشامي , رضوى طارق ,انجي ابراهيم, الشاذلي و كانت حفلة توقيع غير تقليدية كل منا يوقع للآخر الكل يوقع على تدوينته منتهى الروح الجميلة و البسمة اللطيفة التي تغرق المكان بهجة
كنت باسأل لبنى عن ايثار تقولي اكيد موجودة  بس هنا او هنا و بعدين شوية و ترجع نفس الحكاية و فضلت اسال لحد ما لقيتها ماسكة ايثار قالتلي اهيه بقى
اديتها تكتبلي اهداء .. بصراحة كتبت احلى اهداء :)
أتى الحضور تباعا


ماما زيزي ذات القلب الحنون الذي لا يعرف شيئا غير الحب للجميع ام المدونين كلهم
بهاء طلعت ببهاء وجهه  قال لي انني لم اعرفه فاذا به هو الذي لا يعرفني  ثم اتى خالد (سواح في ملك الله )و ظللنا نتحادث و نتحاور عن البلد
ثم اتى  نجم الحفلة الساطع الاستاذ فاروق فهمي و ابنتيه الرائعيتين كارولين و هبة  ليعطوا جو العائلة فوق جوها الاصلي  المتواجد مع الاحساس بالدفء
فاتيما و ازهري و عمرو يسري  وصلا ايضا ليوزعوا الابتسامات و التهاني و يسعدني تواجدهم  هكذا توالى الحضور
ثم محمد متولي صديقي الصدوق و اخي الحبيب ربما كنت سأحزن جدا لو لم أره في ذلك اليوم
واتى الجيزاوي  ليضيف جو من البهجة و تحدثني منى ابو السعود هاتفيا على موبايل شيرين سامي لتبلغني اعتذارها عن الحضور
ثم اتت نجمة الحفلة ليتولد بيني و بينها قصة حب من نظرة واحدة انها ساليناز ابنة ابراهيم رزق الذي ايضا اسعدني تواجده قلت له لولا اصرارك على اتمام ذلك الحفل لربما كنت الغيته و أبلغني تهنئة عزيزة من ريماس  (نافذة الحلم لكل المدونين) تلك التهنئة التي كان لها مردود السعادة عندي
و تبدأ حفل توقيعي بعد نهاية حفل هدير عرفة و الدكتور احمد عماد الدين
كان حفلي وحدي بعد اعتذار الرائعة نهى جادو نظرا لاحداث بورسعيد  حيث انها بورسعيدية 
جلست وحيدا لأبدء بالتوقيع  فيطلب مني استاذي فاروق فهمي ان يلقي قصيدة
سأقتبس من تدوينته وصفه بالكامل




انت ياسيف نعم الفتى الطامح
طموحا لاعلى فى تصاعد صاعد
انت منا ونحن المدونون منك
نعم الاخ الصديق الوفى الواعد
سلام على الدنيا اذا لم يكن لها
صديق صدوق صادق الوعد واعد
قلبى تراقص من بشاشة فـــــوزك
وفوزنا بكتاب رائد هادى راشـــــد
جمعتنا يا سيف فجئناك ها هنا 
وزغردت أحبّاتك الحاضرات بسؤدد
(وهنا زعردت حبيبة القلوب حبيبة قلب ماما فاتيما )
انت المطيع بقلب ابيض طاهر
بوركت مرضيا بعز ماجـــــــد
كل القصائد والقوافى والابيات 
ترقص معنا فرحة بلحظة لقائك 
سكنت وسط الجفون بقلبك الحنون
يا مالك نور العيون باركك المحبون
قصيدة تحمل الكثير من الحب و الدفء ذلك الجو الذي أضاف سحرا على سحر تلك الليلة كنت أود نشر الفيديو الخاص بتلك القصيدة لكن للاسف الكاميرا فصلت الشحن في نصفها لكن اظن ان هناك من صورها 

ثم انتهى حفل التوقيع و الكل غادر ليتبق معي فاتيما و ازهري و عمرو يسري و ماما زيزي و بالطبع ساليناز و ابيها (اصبح ابراهيم رزق يُعرف بابو ساليناز  ولا تعرف ساليناز بانها ابنة ابراهيم رزق )
هكذا ذهبنا جميعا لنقضي امسيتنا على قهوة البورصة حتى اقتربت ساعة الرحيل فعدنا ادراجنا انا و اخي لمحطة القطار و معنا  ساليناز و ابيها :)
حتى وصلنا لمحطة القطار  ثم غادرنا القاهرة بعد رحلة سعيدة
مليئة بالدفء
لم تكن القاهرة دافئة ابدا بالنسبة لي مثل ذلك اليوم
اشكر كل من حضر و كل من اعتذر و كل من لم يستطع الحضور
انتم نعم الاهل و الاسرة احبكم جميعا
و آسف ان كنت نسيت أحدا في ظل توهاني فما زلت غير مستوعب ذلك اليوم الاستثنائي في حياتي

----------------
تحديث
اضافة فيديو شعر الاستاذ فاروق فهمي في حفل التوقيع




55 التعليقات:

ابراهيم رزق يقول...

اخى العزيز مصطفى

سعدت بلقائك
كانت صحبة ممتعة و كنت انت عريسها
كان نفسى تقعد فى القاهرة اكبر فترة معنا
مبروك الكتاب و عقبال الكتاب رقم الف
بس نسيت تهنئة عزيزة قلتها ليك فى حفل التوقيع لانها كانت امانة
هههههههههههههه

تحياتى و تقديرى و سلامى لاخيك ايهاب

سواح في ملك اللــــــــــــــــــه- يقول...

الاخ العزيز والموهبة الجميلة

مصطفي سيف

شكرا لك ايها الصعيدي العبقري الرائع

فقد كان يومك حافلا جميلا

سعادتي برؤيتك اخي لاتوصف

اتمني من الله عز وجل ان اراك في مصاف

الادباء فانت تستحقها بجدارة

مبروك اخي وصديقي

مصطفى سيف الدين يقول...

ابراهيم رزق
انا الاسعد بلقائك
الله يخليك يا هيما
معلش و الله منمتش كويس لسه فنسيت بس دلوقت اتداركت الموقف و اضفتها هي بالفعل امانة انت قمت بتبليغها و امانة اسعدتني كثيرا
سلامك يوصل ان شاء الله

مصطفى سيف الدين يقول...

خالد (سواح في ملك الله)
اشكرك يا صديقي تواجدك انار حفلي
سعادتي بك اكبر يا صديقي
ربنا يخليك و الله يبارك فيك

حنين محمد يقول...

صباح الغاردينيا أستاذ مصطفى
الف الف الف مبرووووووووووووك
انا لسى فاتحه صفحتك وللامانة لسى ماقريت حرف عشان حضرتي مستعجله اوووي وقال يعني عاوزة ترد اول وحدة بس استاذ ابراهيم سبقني ربنا يسامحه <<< متغاضة منه :(
اممم والله والله والله كنت بستنى البوست دا من ساعة ماعرفت بسفرك وفرحانة بجد ليك ربنا عالم قد ايه بعزك وبفتخر فيك اممم انا رغيت اوي ولسى حرجع أقرأ البوست بس اول حاجة عاوزة اديك بوكيه الورد دا ..

http://www.nsaayat.com/up/uploads/nsaayat0408f5af03.jpg

ويارب أشوفك دايماً سعيد
ودايماً من نجاح لنجاح
:)
؛؛
؛
لروحك عبق الغاردينيا
كانت هنا
reemaas

مصطفى سيف الدين يقول...

الله يبارك فيكي يا ريماس
الاستاذ ابراهيم وصل تهنئتك و فرحت اوي بيها و فرحان اوي و حاسس انك كنتي معانا
ربنا يخليكي و عقبالك كده لما تنشري كتابك و نجيلك لحد عندك كمان شكرا على الورد يا غاردينيا

حنين محمد يقول...

صباح الغاردينيا أستاذ مصطفى
ياصباح الجمال والإبداع والفرح والسعادة احمدك يارب اخيراً شفت مدونات حبايبي المصريين بتبتسم بس اقول ايه وربنا بعيط مانا غاوية عياط ههههههه تصدق بالله غصب عني ححس بحسد أنكم أجتمعتوا وشفتوا بعض بس انا عارفه اني كنت معاكم وعشت لحظة بلحظة الحفلة دي ..شفت ابتسامة ماما زيزي وضحكة أستاذ ابراهيم واجمل اميرة بحلم أشوفها بجد ساليناز ابنة الغالي أستاذي ابراهيم يالله قد ايه ابتسمت للأميرة الجميلة الي دايما مع باباها عارف ليه بتفكرني بنفسي لما كنت بسافر مع بابا لكل مكان اممم ههههه انا حخرج برا الموضوع ..على فكرة ضحكت اوي على حقدك لاخوك هههههههه المسكين درجة اولى وماعرفش ينام وتخيلت منظرك وانت بتسمع عياط العيال ياسلام بقى لو كانت جات ست من دول وقالت لك ممكن يابني تمسك الواد ههههههههه كان حيبقى يوم عمرك ماحتنساه <<< البت بتغلس عليه
بجد والله فرحت لك اووي ويارب ايامك كلها فرح وسعادة ودايما اسمع عنك وعن كل المدونين احلى أخبار ويارب من قلبي في الصباح الحلو دا اشوف مصر سعيدة من جديد بيكم وبشكر استاذ ابراهيم الي وصل لك تحيتي لاني كنت عاوزة اكون معاكم في اليوم دا وبشكرك لان تحيتي البسيطة او مباركتي كان ليها مردود سعادة ليك "
؛؛
؛
دا بوكيه ورد بسيط
http://www.nsaayat.com/up/uploads/nsaayat0408f5af03.jpg
الف
الف
الف
الف
مبرووووووووووووووك"
؛؛
؛
لروحك عبق الغاردينيا
كانت هنا
reemaas

محمد الجرايحى يقول...

أخى الفاضل: مصطفى سيف الدين
مبروك ....
وأقدم لك اجمل التهانى وكل الأمانى الطيبة لك بالتوفيق النجاح الدائم.
واعذرنى أصل أخوك بورسعيدى مطلوب حياً أو ميتاً..................

Unknown يقول...

السلام عليكم..
ألف ألف مبروك :)
سعدت كثيرا بالتعرف عليك شخصيا، كانت لحظات رائعة، وتشرفت كثيرا بالتعرف على عدد من إخواني المدونين الذين قابلتهم في حفلتك.
عقبال ما نبارك لك على الكتاب المليون، وأنت فعلا تستاهل.
تقبل خالص تحياتي..

هبة فاروق يقول...

مبروك يا مصطفى الف مليون مبروك ومن نجاح الى نجاح وموهبتك تستحق ان توضع فى صفوف المبدعين
ونشكر الحدث الذى جمعنا لنتعرف عن قرب سعيده بتلك الصحبه الطيبه والوجوه المصريه الجميله
ومش حتنازل انك تشرفنى انا وبابا فى حفله توقيع الكتاب انت حر بقى
تهنئه من القلب لصاحب القلم الرائع
مبروك

مدونة رحلة حياه يقول...

السلام عليكم
الف مبروك يا صاحبى انت تستاهل كل خير ومكانش ينفع ما اجيش انا كنت مستنى الوقت دا ع الاقل شان اتشرف برؤيتك
وبعتذر عن تقصيرى
نجاحات متواصلة ان شاء الله

faroukfahmy يقول...

اين صورى وصورك يابن النــاس
اللى اتقال مش كلام بس وحمـاس
دا زمان محتاج منا رقة الاحساس
والحب والود الخالص لكل الناس
طلعتك ياسيف اوقدت كل الانفاس
نورت ساعتها قاهرتك ورب الناس

faroukfahmy يقول...

اين صورى وصورك يابن النــاس
اللى اتقال مش كلام بس وحمـاس
دا زمان محتاج منا رقة الاحساس
والحب والود الخالص لكل الناس
طلعتك ياسيف اوقدت كل الانفاس
نورت ساعتها قاهرتك ورب الناس

شهرزاد المصرية يقول...

ألف مبروك يا دكتور و عقبال الكتاب الألف
أنت تستحق أفضل فرص النشر و أجمل الحفلات و أثق أن كل هذا قادم اليك فى الطريق
تحياتى

ツSmiLeY AnGeLツ يقول...

الف الف مبروك على اصدار الكتاب وحفل توقيعه
وعقبال اصدار كتب ثانيه بعده
شكل حفل التوقيع كان جميل

تقبل مروري ^_^

reemaas يقول...

الف الف مبروك يا درش وكنت اتمنى ابقى موجودة جدا الحقيقة

فاتيما يقول...

pحمدلله ع السلامة يا مصطفى
انتا وايهاب

انتوا اللى جبتوا معاكو الدفا من جنا يا جدع ...
وخليتوا لليوم طعم مميز

وحبايبك اللى جم
وحّلوا اليوم
انتا السبب ف مجييهم
وبالتالى الفضل يرجع ليك

قضينا كام ساعة ف منتهى الجمال
واذا كانت امى الحاجة ام فاتيما
بتقول الستات قٍرف واقٍدام واعتاب
فنا بدورى بقوووول
الناس قرف واقدام واعتاب
وانتا قرفتك حلوة
وقدمك سعد
وعتبتك خضرا يا فندم


عموما انتا كان لازم تاخد ختم البورصة
لأن المدون ميبقاش مدون على حق
لو مقعدش ع القهوة النحس دى
:)


حلوة المراسم ووصفها
وحلوة صحبة صاحب المراسم
والف مبروك يا صديقنا الغالى
وعقبال الزيارة الجاية
وعقبال الكتاب الجاى

Casper يقول...

الف مبروك يا مصطفى
وعقبال الكتاب رقم ألف
فين بقى الحاجة الساقعة ^_^

نيسآان يقول...

مبروك استاذ مصطفى وان شاء الله المزيد من التوفيق والنجاح مع كتب جديده.

دعاء يقول...

آآآآآآآآآه !!!

أصبتُ بالاكتئاب !
و أكاد أبكي !

مع كلِّ اسمٍ أقرؤه من أسماء المدوِّنين الأحبة ، حتى الذين لا أعرفهم ، كنت في زحمة من المشاعر المختلطة !
كنت مكتئبة ، سعيدة ، يائسة ، و بالفعل ساخطة إلأى أقصى حدْ !

في البداية " متُّ من الضحك ! " في الفقرات الأولى ،
و كثيرًا أغبطكَ على لقائكَ بالدكتور نبيل فاروق !
قرأت له الكثير من السلاسل ! ، حتى أن أسلوبي يتأثر به غالبًا !
إذا رأيته يومًا ، أوصل له سلامًا من طفلة فلسطينية ، تحب قصصه ...

أتمنى فيما لو كان عمري يسمح لي بالمجيء ،
أتمنى فقط أن تمهلني السنين القادمة الوقت و أشياءً أخرى للمجيء ، لأرى ذات الجو الذي عشتموه ...

أرثي لنفسي ذلـــكْ ...

صحيح !
نسيت أهم شيء !
مباركْ حفل التوقيع ، سعيدة من أجلكْ ...
و أتساءل هل يوجد من الكتاب نسخة إلكترونية أو متواجد في مكتبات غزة ؟

دمتَ بخير ...

تحيآاتي لكْ ...

faroukfahmy يقول...

مهما تقول يا مصطفى ليلة دافيه ليلة حارة ههههههههههههه
انا زعلان لانك لم تنشر صورتك معى ومع الناس يا ابن الناس وخاصة صورتى وانا اهنئ وابارك
اشمعنى صورك مع الآخرين
نزل بوست حالا يضم الصور المتاحة ههههههههههههه

هيفاء عبده يقول...

الف الف مبروك استاذ مصطفى ..
تستاهل كل خير والله
عقبال الكتاب الألف ..
اطيب الامنيات واصدقها ارجوها لك

رؤى عليوة يقول...

مبروووووووووووووووووووووك الف الف مبروك ويارب عقبال الكتاب المية

بصراحة حاجة تخلى الواحد يغير
الجمع الرائع اللى جمع ناس جمعتهم الكلمات من وراء الشاشات

تهانينا لك د مصطفى ويارب بالتوفيق دايما

موناليزا يقول...

مبرووووووووووووك
سعيدة بسعادة الجميع وتمنياتى القلبية بأن تتجمعوا دائماً على خير :)

ray يقول...

يالله..
كنت اتمني اكون موجوده وقت توقيع الكتاب..خسارة
فاتني فرصه توقيعك لكتاب..وفرصه اشوف باقي المدونين..للاسف

علي العموم..
مبروك علي توقيع الكتاب..
وابقي ابعتلي بقي احد متوقع..هههههه
ولا تقلق .. مصاريف الشحن عليك..ههههه
..
كان جو رائع بجد..اتمني اكون موجوده انشاء الله في توقيع كتابك الثاني

كريمة سندي يقول...

ألف مليار مبروك .. والله سعدت لك من كل قلبي أخي في الله مصطفى سيف انت تستحق هذا الاحتفال عن جدارة والله وقبال المليون كتاب أتمنى لك التوفيق من كل قلبي

سندباد يقول...

مبروك يامصطفي الف مبروك - اكيد احساس جميل ورائع وان شاء الله من نجاح لنجاح
تحياتي ليك يامصطفي

zizi يقول...

هصطفى الغالي انا سعيدة جداً بالليلة دي ولكم جميعاً معايا قعدة لما النت عمدي يتصلح عشان انا دلوقتي في النت كافيه وكل الحروف على الكيبورد ممسوحة
وعمالة اطبش معلش تحياتي للجميع

غير معرف يقول...

ثقافة الهزيمة .. عصابة البقرة الضاحكة 6‏

و فى حوار مع القيادى الأخوانى إبراهيم صلاح المقيم فى سويسرا منذ عام 1957 و نشرته جريدة المصرى اليوم فى 23 إبريل 2011 جاء فيه:

وما صحة ما نشرته بعض المواقع من أخبار عن رفض سويسرا عرضاً مصرياً لشراء بنادق قناصة وقت الثورة؟
- حدث بالفعل وحكاها لى أحد رجال المخابرات السويسريين فى حضور عدد من الشخصيات العامة، وقال أنه بعد أندلاع الثورة بيومين تقدم السفير المصرى فى سويسرا مجدى شعراوى، وهو صديق مقرب من «مبارك»، بطلب للحكومة السويسرية لشراء عدة آلاف من بنادق القناصة سويسرية الصنع بها تليسكوب يقرب لمسافة 1000 - 1500 متر، وجهاز يحدد المنطقة المطلوب أصابتها، وجهاز رؤية ليلية ويتم التصويب بدقة الليزر، وذخيرة مخصوصة وهى لا تُحمل باليد، ولكن لابد من تثبيتها على قاعدة ويُقدر سعر البندقية الواحدة بنحو 4000 دولار، ولكن الحكومة السويسرية رفضت الطلب.

الحكومة السويسرية أدركت كيف سيتم أستخدام تلك البنادق، وبالتالى رفضت أن يكون لها أى دور فى تلك العملية. و تحت عنوان " لواء شرطة : مبارك كان يتسلى بالشرائط الجنسية للفنانات" ...

باقى المقال فى الرابط التالى www.ouregypt.us

و المقال به معلومات هامة عن عمر سليمان.

ستيتة يقول...

والله يا مصطفى انت تستحق هذا اليوم الرائع واكثر
عظيم غيرتي لعدم وجودي
عادة مش بجيب كتب المدونين "اعتراف سخيف ولكنه حقيقي" لأني خدت مقلب في كذا كتاب
لكن بحق اطوق لشراء كتابك وانا واثقة انه مكسب لمكتبتي
واجيب الكتاب ان شاء الله وانتظر توقيعك عليه
تحياتي

ظلالي البيضاء يقول...

دكتور مصطفى ..
أكثر ما أستطيع أن أعبر به عن مشاعري وأنا أقرأ كلماتك ووصف هذا الاجتماع الرائع بين الأحبة .. أكثر ما أستطيع أن أعبر عنه هو كلمات دعاء محيسن الابتة الطيبة ...
تصدق يا مصطفى ..
أنا كنت باتمنى أكون معاكم ..
لازم في يوم من الأيام أروح مصر وأشوفكم وأحضنكم .. علشان فعلاً زي ما قلت حضرتك ..
فيه ناس تدخل القلب من غير استئذان كده .. وإنتم وماما زيزي وعمنا الفاروق والأستاذ ماجد والأستاذ أبو ساليناز .. وفاتيما وخالد وهبة وكل الحضور ..

طيب لزوم المرة القادمة تعمللي بطاقة دعوة .. مع تذكرة سفر طبعاً من سوريانا .. لمصرانا ..

كلا م كتيييير روحي بتفيض قيه بس مش هطول عليك ..
ألف ألف مبروك .. والحقيقة باشكؤ ؤاد ليلي لأنها اعتنت بهذه المواهب ..
وعقبال الكتب المقبلة ..

تحيتي لحضرتك ولكل الحضور ..

Emtiaz Zourob يقول...

الف مبارك اخي مصطفى .. حفل ناجح ان شاء الله وعقبال الكتاب المليون ..

شكرا لأنك شاركتنا لحظاتك السعيدة ..

لــــ زهــــــراء ــــولا يقول...

استاذ مصطفى

بسم الله ما شاء الله صحبه اكتر من رائعه ولا ازكى اى انسان فيكم على الله ربنا يجعلكم متجمعين فى الخير على الدوام

الف مليون مبروك وربنا يجعل الفرح والخير فى طريقك على الدوام ومن نجاح الى نجاح ومن فرح الى فرح يارب


كنت اتمنى اكون معاكم بس المره الجايه ان شاء الله اتشرف بالتواجد معاكم

كل الدعوات بالتوفيق يارب


زهــــراء

الاحلام يقول...

تخطيت اميالا واميالا وكلى لهفه وسعاده وفرح حتى اشارك فرحتك ولو حتى بالكتابه كنت اشعر اننى لابد لى من تواجد ولو حتى بتعليق بسيط
الف الف الف مبروك اخى العزيز والى الامام دائما بامر الله
سعيد جدا وكان الكتاب كتابى فهذا شرف لكل مدون
تحياتى وتقديرى دائما ابوداود

ليلى الصباحى.. lolocat يقول...

السلام عليكم

الف مبروك سيف المدونين
سعيدة جدا بسعادتك والفرحة واضحة من كلماتك
ربى يزيدك سعادة وفرح وده نجاحك يامصطفى
قلمك يستحق كل تقدير
انت انسان خلوق ومهذب ومبدع بفضل الله وكل الاصدقاء والمدونين يحبوك ويتمنوا لك الخير

الف الف مليون مبروك
وسامحنى اخى ظروفى لاتسمح ابدا بالخروج
لكن كنت اتمنى اكون متواجدة مع كل هذا الصحب الطيب والناس الجميلة
لك و لهم ارق تحية


هديتى المتواضعة لك :)


http://img837.imageshack.us/img837/1121/83055595.png

لك تحياتى وتقديرى
مبروووووووووووووووك

.. Asmhan .. يقول...

ألف ألف مبروووك
وعقبال الكتب إلي حتألفها
ي رب

حياتي يقول...

الحقيقه اول مره ادخل ع مدونه حضرتك بس بصراحه انا قرات شويه صغيرين من الكلام بس اللي حسيته من الكلام القليل اللي مكتوم ان في فرحه وسعاده في الكتابه وفي توقيع لكتاب ........ الف مبرووووووووووووك بتمني قبولك لمروري للمدونه

رشيد أمديون يقول...

هنيئا لك أخي مصطفى.
فرحت لك جدا، ولولا المسافات التي تعلمها لكنت من الحاضرين، والحقيقة أني أغبط الجميع. هنيئا لكم بهذه الصحبة والمحبة وأدامها الله عليكم.
تحية ود

أمال يقول...

ألف ألف مبروك مرة أخرى أخي مصطفى
سعيدة لسعادتك أخي ويا رب يجعل كل أيامك فرح وسعادة

قلمك يستحق التنويه

تحياتي لك

;كارولين فاروق يقول...

كان يوم جميل فعلا
يا مصطفي
سعدت بلقائك وبلقاء الجميع
الف مبرووووووك يا درش
تحياتي وتقديري

Bent Men ElZman Da !! يقول...

سعيده ليك جدااا يا مصطفى
وحزينه انى ماقدرتش احضر
واقدر اشوف جمع المدونين الرائعين ده:(
وانول شرف الحصول على توقيعاتكم
ان شاء الله فى حفله الكتاب الجاى اكون من الحاضرين :)
الف الف مبروك وبالتوفيق دايماً يارب

Tamer Nabil Moussa يقول...

الف مبروك يامصطفى كان يوم جميل وكلنا انبسطنا فية

ربنا يزيد ايامنا الحلوة

مع خالص تحياتى

دعاء العطار يقول...

انا زعلااااااااااااااااانه :((

بجد كان نفسى احضر اوووووى واشوف كل حبايبى المدونين بس يالا مليش نصيب

الف مبروووووووووك يادكتور مصطفى وبجد انت تستاهل ده واكتر :)

Days and Nights يقول...

الأخ الغالى / مصطفى

ألف مليون مبروك على الكتاب

كنت أتمنى أن أكون ضمن الحضور

ولكن لظروف الغربة لم أتمكن من ذلك

تحياتى لك ولكن من شارك معكم من

الأخوة والأخوات أصحاب القلوب البيضاء

تحياتى لروحكم الطيبة

خالص مودتى

تامر

غير معرف يقول...

بسم الله وبعد
مبارك عليك أخانا في الله
نسأل الله عز وجل أن يوفقك دائما وأبدا ويجعل النجاح والتقدم والرقي والابداع من حلفاؤك

سعدنا كثيرا بهذه المراسم الطيبة
تحياتنا واحترامنا وتقديرنا لك

مـ أحلام ـازن

richardCatheart يقول...

واااااااااااااااااااااااااااااو
صبببببببببببببباحو عسسسسسسسسسسل

والله عيطنى يا واد يا استاذ دكتور درش


حاسة بقليل من الغيرة انى ماكنتش معاكم فوق ماتتخيل

كنت حزينه بس كل ما اقراء بوست واشوف فرحتك فى كلام اخواتك بفرحلك اوى يا درش

يلا بقى الحمد لله انى ماجتش كنت فضحتك انت عارف انا مابسترش هههههههههههه

اخص عليك يادرش تروح تقعد على البورصه من غير رشدى وطبعا ضربت شيشه ماشى ياعم الله يسهلك بس البرصه دى مش مرات البرص يععععععععععع

انا سعيده بيك اوى اخى الاصغر بس مش اصغر اوى ياعنى :) وصديقى العزيز الغالى ومش هاقولك عقبال فرحك لاء هاقولك عقبال مصنع الادويه هههههههه


صباحك ابيض لون قلبك وقلب كل حبايبك

ولاء يقول...

لسلام عليكم

بالتأكيد ..أحساس لا يمكنك وصفه ..مبارك لك أخي ..وإلى مزيداً ومزيداً من النجاحات..

وأود أن أعرف أخي ما اسم الدار التي نشرت بها ...وموقعها الإلكتروني ..لأانني أود شراء نسخه منها .

حَنيّـن نِضال يقول...

الف الف الف الف مبروك ( مش مبارك :) )) و عقبال حفل توقيع الكتاب رقم ترليون بحضور الصحبه الكريمه الجميله التي عانقتهم ارواحنا فَـ ألفتهم قبل ان تسعد العين بلقياهم

انا عمال اشوف الصور و اتوقع اصحابها و حاسه اني ناس دي كلها انا عمري شفتها و قابلتها و عشت معاهم مش اغراب عني رغم اني م اعرف منهم الا احرفهم الكيبورديه و بالمناسبه عقبال ما يصر قلبك بتاع التلاته جنيه و كيبوردك بيوم ثروه قوميه :D

ربنا يديم اسباب السعد و يديم المحبه في قلوب الجميع و يجمع على طوووول

و كمان مره الف الف مبروك
البوست خلاني اشتهي اكون في مصر او مصريه في هذه اللحظه و ان اكون جزء من هذه اللحمه و الجمعه المجتمع :)

:

بالتوفيق دايما ^_^

Unknown يقول...

الف مبروك يا مصطفى
بالتوفيق دايما ان شاء الله
للاسف انا خارج مصر , فصعب حضوري على كل حال تتعوض الكتاب الجاي ان شاء الله


ملحوظة على جنب كده :)
صورتك غير الصورة الذهنية اللي كنت متخيلها ليك تماما .

Lobna Ahmed Nour يقول...

كان يوم جميل يا مصطفى
يا رب دايمًا بالنجاح والتوفيق

Unknown يقول...

مبرووووووووووووووووووووووووووووووووووووووووووووووووووووووووووووووووووووووووووووووووووك

كان نفسي أحضر جداً ،
وكنت مبسووووطة جداً طول اليوم ..

ربنا يسعدك يارب ويفرحك بنجاحه ،
ونشوفلك كُتب كتيييير تاني ..

في انتظار نزول الكتاب بالإسماعيلية..
ويارب عن قريب لأني صُبرت كتير =))

دمت بخير وموفق يااارب ..

eng_semsem يقول...

الف الف الف مليون مبروك
وان شاء الله اكون حاضر معاك في حفل توقيع الكتاب التاني وربنا يوفقك يا دكتور انت تستحق كل الاحترام والتقدير وكاتب مبدع ربنا يوفقك ان شاء الله
تحياتي لك ولكل من حضر الاحتفال

eng_semsem يقول...

الف الف الف مليون مبروك
وان شاء الله اكون حاضر معاك في حفل توقيع الكتاب التاني وربنا يوفقك يا دكتور انت تستحق كل الاحترام والتقدير وكاتب مبدع ربنا يوفقك ان شاء الله
تحياتي لك ولكل من حضر الاحتفال

Noha Saleh يقول...

الف الف الف مليون مبروك
ربنا يوفقك دايما

هدير عرفة يقول...

انا دايما متأخرة :)
كان اجمل حاجة في اليوم دا انى شفتك و اتشرفت بمعرفتك ,,, يعنى بني سويف اللى زعلتك الصبح صالحتك اخر النهار "شفت بني سويف بلد طيبة ازاي " :))
ربنا يكرمك و يوفقك دايما يا مصطفى !