48 ساعة في الغردقة

السلام عليكم اخباركم ايه؟

اولا اشكركم على تعليقاتك الجميلة البوست اللي فات والحمد لله رجعت بالسلامة من الغردقة

كانت رحلة جميلة اوي

استنوا احكيلكم

في حاجات كتير لفتت نظري الرحلة دي

اولا لاول مرة نقط التفتيش في الطريق من قنا للغردقة بدون اي مضايقات كان زمان اخر طموحاتك توصل لنقطة تفتيش الكيلو 85 وهناك يسألوك عن بطاقتك لو لقيوها مش البحر الاحمر ومش معاك تصريح عمل هناك علطول ترجع بس المرة دي العربية موقفتش في اي نقطة تفتيش ولا حد سالنا رايحين فين وليه وازاي

ثانيا الاماكن السياحية في الغردقة حاليا اشبه بمدينة اشباح مفيش اي سياحة وتكاد تكون نسبة الاشغالات في المناطق دي حوالي 10% عن اي فترة مماثلة في الاعوام اللي فاتت وحال السياحة هناك ميسرش

ثالثا  العاملين بالمناطق دي انبسطوا اوي بينا على عكس زمان كان الاهتمام الاكبر بالسياح والمصريين محدش يسال فيهم بس الاهتمام ده اكيد بسبب ان مفيش سياحة

رابعا اكيد كان حد باصصلي في الاجازة دي الجو كان بارد اوي ومعرفتش انزل المية

دي صورة للكومباوند اللي نزلت فيه وواضح ان مفيش حد هناك خالص

دي صورة للبيسين  هناك

صورة  للشقة من الداخل

صورة لاحد اكبر الكافيهات وهي شبه خالية مكنش فيها غير اتنين غيرنا

اختم بقى بصور حلوة للبحر اللي في اي وقت قبل الثورة او بعد الثورة هو الاروع

في النهاية احب اقولكم ان الرحلة بالرغم من الجو البرد جدا وبالرغم اني منزلتش المية للسبب ده الا انها كانت قمة في الروعة واستمتعت بيها

وصلت يوم الخميس الساعة 11 الصبح بعد ساعتين ونص سفر و خرجت من هناك الساعة 12 الضهر يوم السبت كانت حوالي 48 ساعة بس كانت ممتعة جدا والغردقة مدينة ساحرة بجد