الأحد، 16 أكتوبر 2011

ان اكتسح الفلول .. انا مش مسئول (تحديث)



حد واخد باله ان باب الترشيح لعضوية مجلس الشعب فاضل عليه كام يوم ويتقفل ؟
وان المجلس ده اهم مجلس عدى وهيعدي على مصر علشان هيحدد دستور واستراتيجة البلد كل الاعوام الجاية
اعتقد اننا انغمسنا في احداث ماسبيرو  كتير اوي و وصل بينا الذهول للحد ان الوقت فيه بيجري بينا ومش شايف تحرك على الارض من رجال الثورة لمواجهة  الفلول في المجلس القادم
طبعا حادث ماسبيرو حادث مأساوي  وحادث تشيب له الولدان من بشاعة اللي حصل انا مش مع اي حد يسبق اي جهة تحقيق ويقول كلام عن استنتاجات المفروض منحكمش بالاشتباه الا لما نكون متأكدين تماما 
الاعلام فشل في نقل الحقيقة ووزير الاعلام وتلفزيونه تفنن في استثارة الشعب على الشعب
الحصيلة ضحايا بالجملة وشرخ كبير وفجوة اكبر 
اللهم ارزق اهالي الضحايا الصبر  والسلوان
الحل ان لازم تتولى لجنة تحقيق محايدة  مش تابعة للدولة التحقيق في الاحداث  لجنة يثق في حكمها جميع الاطراف والكل يرتضي بما تحكم
وعلى الشعب بكل طوائفه ان يضع في يد تلك اللجنة مصير التحقيق ونلتفت نحن لما هو مطلوب مننا كواجبنا الوطني تجاه تلك البلد
الانتخابات البرلمانية

اه الانتخابات اوعى حد ينسى
من اسامي الناس اللي انا عرفت انها نازلة اتأكدت ان يوم 25 يناير ده كان حلم  و لسه متحققش يوم 25 يناير لسه ماجاش
نفس الاشكال اللي كانوا بينزلوا على قوائم الحزب الوطني او الحزب الوطني مرضيش ينزلهم على قوائمه ينزلوا على مبادئه لحد ما ينجحو وينضموا للحزب  هم نفسهم اللي نازلين النهاردة
اعضاء ليها باع طويل في الفساد  ناس كان بيتحقق معاها في هيئة الكسب غير المشروع ومثبتش عليها حاجة  لان احنا البلد الوحيد اللي الفساد فيه من غير ورق  ومش لازم تظبط ورقك يا ريس هو تليفون صغنن وكل سنة وانت طيب
استشرى الفساد في عهد المخلوع وتغلغل في تراب مصر  لتنمو بمائه اشجار خبيثة اكلها من الحنظل لا يتجرعه الا الضعفاء
اتساع الدوائر له عيب خطير جدا فالمرشح المحترم الذي كان يبحث عن الرقي للوطن كان يرشح نفسه في دائرة صغيرة هم فقط من يعرفوه فيها لانه سيخسر اما اعضاء الحزب الوطني فهم منتشرون  ومعروفون بنفوذهم وقوتهم داخل كل الدوائر المجاورة لذلك فرصتهم اكبر كثيرا  من فرصة الآخرين
حتى الآن لم تتضح صورة القوائم  وكل من ترشحوا من الفردي هي وجوه قديمة لانها الوجوه الوحيدة المستعدة لمعركة شرسة حدودها اوسع بكثير
اتمنى ان يمتد فتح باب الترشيح اكثر من اسبوع واعتقد ان هذا ما سيحدث في ظل عدم تفاهم واضح بين التحالفات وطمع كل منهم في الظفر باغلب المقاعد على حساب الباقين
اعتقد انها ستكون قوائم واهية ضعيفة وستصبح مهزلة انتخابية ولي سؤال
يقولون ان القائمة التي ستحصل على اتناشر  في المية سيضمن اول اسم فيها  مقعده داخل البرلمان فماذا لو لم تحصل اي قائمة على هذه النسبة هل ستكون انتخابات لم ينجح احد؟

احد اسباب قيام الثورة المصرية وربما كان من اهم اسبابها هو الفساد السياسي الذي وضح تأثيره في انتخابات 2010  وغباء عز المستفحل في اصراره على التزوير الذي تراه كل العيون  بغباء شديد ونتج عن ذلك  مقاعد ضعيفة جاهلة كل ما يعرفونه في الحياة تقبيل ايدي اسيادهم كل منهم اشترى ذلك المقعد والحصانة التي تتبعه بماله الخاص
فأتت الثورة ليكون اهم ملفاتها ذلك الملف الخطير لكننا استيقظنا من الحلم على ان هؤلاء الذين خربوا وافسدوا البلد هم انفسهم  يستطيعون الدخول مرة اخرى للمجلس وافساده بل هم الاجهز والاكثر نفوذ والاقرب للكرسي من غيرهم 
اعتقد ان مقاعد الفردي محسومة لهم  فلا يوجد منافس قوي تستطيع ان تراهن عليه
سؤال اوجهه لحكومة السيد شرف  وللسادة اعضاء المجلس العسكري  
لماذا لم يتم تطبيق قانون الغدر وقانون العزل السياسي على هؤلاء؟
لماذا سمح لهم الاجتماع والتوحد بل والتهديد المباشر للدولة وحكومتها ؟
لماذا لم يتم تطبيق قانون الطوارىء واعتقال كل هؤلاء كما كان يفعل مبارك ونظامه ليلة الانتخابات؟
لماذا تم قبول اوراق شخص مثل عبد الرحيم الغول متهم في احداث نجع حمادي و الغريب هو صدور قانون منع التمييز  بعد ذلك كيف تقرون ذلك القانون بالسنتكم بينما ايديكم توافق على قبول ترشح الغول مفجر فتنة نجع حمادي  ؟
لماذا حدثت ازمة ماسبيرو هذه الايام وما علاقتها  المباشرة  بقرب فتح قبول اوراق الانتخابات؟
لماذا التهاون والتراخي مع من يقولون اذا تم تطبيق قانون العزل سنقوم باغلاق  اللجان؟
اسئلة عديدة وكثيرة تجتاح رؤوسنا لنرى مستقبل البلاد المرهون بتلك الانتخابات مستقبلا مظلما غير واضح المعالم فثلثه سيكون من وجوه قديمة افسدت او شاركت في الفساد


خارج الاطار : سؤال للعيسوي الذي يقول انه لا توجد قناصة في الداخلية
كيف سمح حبيب العادلي ورفاقه من زبانية الداخلية ان تمر جملة صلاح عبد الله في فيلم كلاشينكوف (الرائد خالد احسن قناص في الداخلية )  مرور الكرام بالرغم من الرقابة الصارمة على كل المصنفات الفنية ايام النظام البائد
فهل ما اقره العادلي تنفيه انت؟

----------------------------
تحديث

جزئية نسيت اوضحها اشكر الاستاذ سواح في ملك الله انه لفت نظري ليها
الفرق بين دلوقت وانتخابات 2005 ان دلوقت مفيش تنافس بين الفلول واي حد
الفلول نازلين في الفردي لوحدهم وباقي الاحزاب نازلين في القوائم
يعني اقدر اقولك ان تلت المجلس هيبقى فلول
وان التلتين هيتوزع على الباقي
بحسبة بسيطة اقدر اقولك ان الاغلبية هتبقى فلول
وسلملي على الثورة

39 التعليقات:

ابراهيم رزق يقول...

اخى العزيز
مصطفى

فتحت الجرح

الغول من اكبر قيادات الوطنى حضر جنازة القاتل الكمونى و تصدرها ثم فى اليوم التالى تقدم باوراق ترشيحه
ترى اى رسالة يصدرها الى الناس و على اى شىء يركز فى دعايته الانتخابية
و المجلس العسكرى لا يرى لا يسمع و لكنه يتكلم يتكلم و لا يقنع
لكى الله يامصر
تحياتى

Emtiaz Zourob يقول...

والله بتهيألي انهم بيعملوا هيك علشان يشغلوا الناس عن موضوع الانتخابات ..

في لخبطة كبيرة وضياع وفوضى .. اتمنى ان تنتهي كل أشكالها على خير ..

نحن لم نعد نحتمل أكثر من ذلك ..

سواح في ملك اللــــــــــــــــــه- يقول...

بص يامصطفي

الرهان دلوقتي علي وعي الناس

في انتخابات 2005

نزل جمال مبارك مع اعضاء الحزن الوثني

يلف في المحافظات كنوع من الترويج ليهم

وعشان الناس فاهمة وجمال كان وجه غير

مرغوب فيه بالنسبة للناس

اكتسح الاخوان في الجولة الاولي ب88 مقعد

وسقط معظم اعضاء الحزن الوثني

في الجولة الاولي

ولما كان هناك في جولة ثانية وتالتة

ادرك الحزن الوثني غلطته

وزور الجولتين الباقيين

الرهان هنا علي وعي الشعب

مش علي نزول بتوع الوطني من عدمه

مصطفى سيف الدين يقول...

ابراهيم رزق
هو في رسالة ابلغ من مؤتمر اتق شر الصعيد اذا غضب والكلام اللي اتقال فيه؟
المجلس العسكري عمل اطرش ومسمعش حاجة
تحياتي لك واشكرك يا صديقي

مصطفى سيف الدين يقول...

وجع البنفسج
فعلا باتفق معاكي كل الدوشة دي علشان الناس تصحى الصبح تتفاجىء بالانتخابات
ربنا يستر ان شاء الله
تحياتي

مصطفى سيف الدين يقول...

سواح في ملك الله
الفرق بين دلوقت وانتخابات 2005 ان دلوقت مفيش تنافس بين الفلول واي حد
الفلول نازلين في الفردي لوحدهم وباقي الاحزاب نازلين في القوائم
يعني اقدر اقولك ان تلت المجلس هيبقى فلول
وان التلتين هيتوزع على الباقي
بحسبة بسيطة اقدر اقولك ان الاغلبية هتبقى فلول
وسلملي على الثورة
ربنا يستر واكون انا المتشائم ويخلف ربنا كل ظني
تحياتي

شهر زاد يقول...

السلام عليكم اخي مصطفى
أتمنى من كل قلبي أن تستقر الاوضاع في بلدي التاني وأن تنعم أم الدنيا بالسلام يارب
تحياتي

حياتي يقول...

صباح الخير استاذ مصطفي

احب اشكرك للفت النظر ده

لان فعلاً اللى حاصل انهم هم نفسهم

المرشحين اللى عاوزين وناويين يرجعوا

الذى مضي مع اني معرفش فى السياسة

لكن الواضح ان المؤامرة كبيرة

وعظيمة لكن الله اعظم واكبر

اتمني من الله تعالي ان يولى امورنا

خيارنا ولا يولي امورنا شرارنا

وان يحمي مصر وجميع الدول العربية

من هذه الفلول الداخلية والخارجية



دمت بكل ود

زهرة

شمس النهار يقول...

ماكنتش عايزة اتكلم في الموضوع ده دلوقتي ومستنية لما باب الترشيح يتقفل

بس عايزة اقولك ان احداث ماسبيرو معمولة مخصوص علشان الانتخابات
علشان الناس تتلهي في الاحداث واللي ماتوا واللي راحوا

ومانركزش في المرشحين
انا محضرة بوست في المسودة
وكل يوم بضيف شئ بناء علي الاحداث

ومن ضمن البوست بل الافتاتحية
ان المجلس القادم هيبقا :
اولا اخوان
ثانيا فلول الوطني وماشابههم
ثالثا السلفيين
رابعا الوفد
خامسا بقيت التيارات كلهم علي بعض مش هيبقوا 5%
اما شباب الثورة مش هيدخلوا اصلا

الانتخابات شئ تاني
وموضوع الدوائر برضوا متكلمة عنه
وليه كبروها
وضاربة مثل لدايرة معينة
كانت من سنين مغلقة علي نفسها

اما العيسوي ده كبيره يلبس عمع ولاسة وجلابيه ويقعد يحرس عمارة ويدوه مسدس رش
:)))

Unknown يقول...

" بل هم الاجهز والاكثر نفوذ والاقرب للكرسي من غيرهم "

للأسف هي دي الحقيقة واللي بيحصل أدامنا وهيحصل وإحنا مازالنا إيدينا متكتفة مع إن صوتنا علا ..
أكيد مش محاكمة مبارك وكام واحد من أعوانه هيمحي الفساد من مصر ،
يمكن إحنا جزينا الجذر بس الساق للأسف طاله كتيير من الفساد ده ..

وربنا يستر على البلد وولادها ..

رائع ما ناقشت ،
دمت بخير .

Tarkieb يقول...

ياسيدي فلول مش فلول الاخوان ح يكتسحو الانتخابات للاسف مفيش بديل غيرهم حزب الوفد ازبل حزب شفته في حياتي ...والاحزاب الاخرة جعجعة ع الفاضي ..الاخوان ح ياخدو المجلس والعسكر ح يفضل يحكم للابد

مصطفى سيف الدين يقول...

شهرزاد
شكرا ليكي ونورتينا
وان شاء الله بكرة هيكون احسن

مصطفى سيف الدين يقول...

حياتي (زهرة)

بصراحة انا شايف سيناريو ميطمنش
ربنا يستر
ربنا يخيب الظنون ان شاء الله ولو ان الوقائع كلها بتأكد الظن
تحياتي

مصطفى سيف الدين يقول...

شمس النهار
ده توارد خواطر بقى يا شموسة :)
متفق مع كل حرف كتبتيه
وللاسف بناء على المجلس ده هيكون الدستور يعني دستور مطابق لمواصفات الفلول
وربنا يستر
تحياتي

مصطفى سيف الدين يقول...

منة
ربنا يستر ان شاء الله
ويا رب بكرة يبقى احسن وتخيب ظنوننا
تحياتي

مصطفى سيف الدين يقول...

الاستاذ تركيب
الاخوان هيكتسحوا القائمة طبعا وبعدهم السلفيين
لكن الفردي متظبط على محاسيب الحزب الوثني
على فكرة انا مش خايف من الاخوان لانهم سياسيين وعقلانين
الخوف من السلفيين اللي اغلبهم ميعرفوش يعني ايه روح الاسلام

اما عن المجلس العسكري ده علامة استفهام كبيرة هو عايز حاجة من اتنين يا يفضل يحكم يا يعزل المؤسسة العسكرية ويخليها مع نفسها مياخدش تعليمات من حد يعني يبقى زي تركيا المؤسسة العسكرية بتفرض قراراتها على الكل

تحياتي

الاحلام يقول...

ومازال الحديث متواصل وما زالت الاحداث قائمه وما زالت مصر متارجحه بعدم اتزان واضح وصريح لا اعرف الى متى سنظل هكذا اتمنى ان تجد مصر من يقومها وينتشلها ممن هى فيه الان
تحياتى اخى العزيز على قلمك الرائع
الاحـــــلام

Unknown يقول...

السلام عليكم ورحمة الله وبركاته
هؤلاء الفلول لايتحركون من تلقاء أنفسهم هم تعودوا على تلقى التعليمات والتنفيذ
وواضح أن هناك مخطط تم وضعه هناك فى مزرعة طورة ، ولايمكن ان يمر هذا من تحت أعين الداخلية والمجلس العسكرى إلا برضاهم ..,اضح أن الموضوع كبير.
الحل الآن بيد الشعب إما يحافظ على ثورته ودماء أبنائه من الشهداء وإما يتحمل ان يعيش عبداً ذليلاً على مدى حياته ولن يرحمنا التاريخ

غير معرف يقول...

مساء الورد مصطفى

أعتقد الخوض في هوية المجرم في أحداث ماسبيرو سابق لأوانه مع أنني أعتقد أنه ستضاف لبقية الجرائم التي لم يكشف الفاعل الحقيقي لها بعد ومن ظمنها تفجير كنيسة الإسكندرية والتي أتضح من ورائها فيما بعد وزير الداخلية ولا أعلم إذا ثبتت عليه التهمة أم لا أما مجلس الشعب والذي ترشح له أسماء عديدة كانت في القائمة السوداء دون أي حياء فهي بالفعل مشكلة لأن هذا المجلس بالفعل سيقر الكثير من الأمور في الدستور وطالما هلاء هم من سيترشحون فأعتقد أنه سيكون هناك سجال كونهم من أذناب النظام السابق وعلى وجه الخصوص الأسم الأبرز عز والذي لا أعرف كيف فلت من العقاب برغم أفعاله وفي النهاية أتمنى صدقاً أن يتنبه الشعب المصري ويختاروا مرشحيهم بعناية وأن يكون هذا المجلس خالي من عمليات التزوير والتي أنتهجها النظام السابق ليحوز على غالبية الأصوات ...

أعتذر عن الإطالة برغم أنه موضوع مصري بحت ولكن كنا دوماً ننادي بنزع الحدود ليقوم كيان واحد وشعب واحد يضم أبناء الأمة العربية لذلك لم أجد أي حرج بالتحدث فهذا شأننا أيضاً فتقبل كلماتي أخي العزيز مع أمنياتي بإنصلاح الحال في مصر ...

تحياتي وإحترامي

رحاب صالح يقول...

للأسف يا مصطفي
هو ده الحال
هو ده اللي انا كتبته
واللي انا وانت وغيرنا خايفين منه
بس للأسف مش عارفين نعمل اي حاجة
غير اننا نكتب وبس
ونقول ان ده مش عاجبنا ان ده خطر علي البلد
ان ده مينفعش
بس لا حياة لمن تنادي او زياللي بيدن ف مالطة ده حتي مالطة ممكن تدن فيها وحد يفهمك مش زي هنا

أمل م.أ يقول...

استاذي العزيز
بصراحة الوضع في الشقيقة مصر الان مشوش جدا
وكل التحليلات وكل التوقعات واردة لانه لا شيء واضح الان
اتفق معك علينا عدم استباق الاحداث
وعليهم فعلا عمل لجنة محايدة في موضوع فاجعة ماسبيرو
وكما قال الاخ سواح
الرهان الان على الشعب المصري بكل اطيافه وانتمائاته
وعلى المفكرين والمثقفين يقع الدور والعبء الاكبر في توعية الناس البسطاء
وتنبيههم لعدم الانجرار وراء الفتن الطائفية
وفضح فلول النظام البائد التي لا زالت تعمل بالخفاء
لان الفساد بالفعل استشرى في عهد النظام البائد
ولا يمكن في يوم وليله وئده بسهولة
ربنا يكون معكم ويوفقكم وينور بصيرتكم لما فيه خير للجميع ان شاء الله

كن بخير دوما

reemaas يقول...

وهو ده اللى نفسى الناس تفوقله مع احترامى للاخوان لازم يبعدوا والفلول كمان ومش هيبعدوا اكيد بارادتهم الشعب لازم يبقى فايق ويعرف بيختار مين وليه

مصطفى سيف الدين يقول...

الاحلام
نتمنى ان تنتشل مصر قريبا جدا
وان يكون فرج الله قريبا

تحياتي

مصطفى سيف الدين يقول...

الاستاذ محمد الجرايحي
ربما بالفعل راس المؤامرة في طرة ولكنني لا انفي خطورة عقليات هؤلاء الفلول ويعرفون معنى العنف ويخبرون ماهية المؤامرات
تمنياتي ان يستيقظ الشعب وينقذ ثورته

تحياتي

مصطفى سيف الدين يقول...

ريبال بيهيس

عز لم يفلت من العقاب فهو الآن بسجن طرة ربما في قضايا اقتصادية وليست سياسية لكنه بالتاكيد افسد الحياة السياسية

اما عن احداث ماسبيرو فهي ستظل لغزا والخوض فيها منا بدون ظهور نتيجة التحقيقات هي مضيعة للوقت اتمنى اسناد القضية لجهة محايدة

اشكرك يا استاذي العزيز ومثلك اتمنى ان ترفع الحدود بين كل الامة العربية لنصبح دولة واحدة ما يحدث في شرقها يؤرق غربها وهكذا
لقد اسعدني تعليقك سعادة خاصة ولا تجد حرجا ابدا في اسداء نصح او تعليق فدوما سنتفهم انك تريد الافضل للامة
تحياتي

مصطفى سيف الدين يقول...

رحاب صالح
صح
صدقتي
بقيت حاسس اننا بننفخ في قربة مقطوعة
ربنا يستر يا رب
تحياتي

مصطفى سيف الدين يقول...

امل م .أ
اشكرك على شعورك الطيب
واتمنى بالفعل من الشعب ان يستيقظ وينظر لمن تكون مصلحته انتشار الفوضى والفتن
اشكرك واتمنى ان يكون الغد افضل

مصطفى سيف الدين يقول...

ريماس
اعتقد في ظل الديمقراطية التي طالبنا بها يوم 25 يناير لا يجوز لنا ان نطلب من اي طائفة ان تبتعد
فقط نطلب من الجميع ان يضعوا مصلحة البلاد نصب اعينهم ويقدموها على اي شيء آخر
تحياتي

لــــ زهــــــراء ــــولا يقول...

الحقفيقة اللي بتوجع هي نتيجة كل ما قلت
سلملي ع الثورة
وع الشهدا


لولا

eng_semsem يقول...

ده تكون فعلا النهايه الصعبه للثوره لو نجح الفلول والاعضاء المشبوهين التي تلوثت اسمائهم وكانوا تابعين للحزب الوطني
ان شاء الله انا واثق في اختيار اهل مصر ومتهيالي لو اختفى التزوير مش هتظهر الشخصيات ده
تحياتي

Unknown يقول...


السلام عليكم
أخي مصطفى...
لقد بحت الكثير من الأصوات في التنبيه إلى ما أشرتَ إليه من أهمية الانتخابات لأنها المعبر الوحيد والمتاح (وليس المثالي) لإنهاء المهازل التي يمر بها الوطن.. لكن كانت هناك أصوات (لم أرها والله إلا من كارهي التيار الإسلامي) تحاول اتهام المقاصد والنوايا وتكرر كالببغاوات (قصة التورتة إياها)!!!! سبحان الله.. هل يجب دائما أن نتهم كل من يريد إتمام الانتخابات وتحصيل مقاعد تؤهله لطرح مشروعه (أيا كان) الذي يرى (وفق اجتهاده) أنه سيكون فيه صالح الوطن؟!! ألم تثبت الأيام أنه لا حل لكل (المشاكل الفئوية والفوضى في الشارع والشرطة المختفية والوزارة الضعيفة والدستور المطلوب والاقتصاد شبه المنهار والعلاقات الدولية المخجلة والقضاء المهتز والمحاكمات الهزلية) إلا بالانتخابات الحرة النزيهة...
لقد اتضح للكثيرين أن المجلس العسكري مُصرّ على إجراء الانتخابات (شئنا أم أبينا) لكن التعطيل وتأخير قانون العزل حتى يتجهز من يتجهز من الفلول... لذا كان على الجميع التعامل مبكرا مع الواقع (حيث السياسة هي فن الممكن) ولا ينشغل بمعارك جانبية كل وقت وحين!!!!!! لكني لم أر أحدا (وهذه قناعتي الشخصية) يتعامل بهذا الفقه الواقعي مع الأحداث إلا من يُتهمون دائما بأنهم..... منظمون ومستعدون (ويا لها من تهمة تثير الدهشة قبل الضحك!!!!)...

ما زال الأمل يملأني في أن القادم أفضل.. مع إدراكي (بل شبه يقيني) بأن البرلمان القادم لن يكون في صورته المثلى.. لكن أن يكون السواد فيه 20-30% أفضل من أن يكون 100% كما في 2010م الذي كان بحق أحد أسباب التعجيل بالثورة..!!!!
وبإذن الله سيكون البرلمان التالي قادر على إزالة الخبث تدريجيا حتى يزيله تماما...
تحياتي.

zizi يقول...

مصطفى ..الأيام الجاية شايلة لمصر حاجات كتيرةيمكن ما نقدرش نعمل حاجة في المتقدمين للإنتخابات اياً كانت انتماءاتهم لكن اللي نقدر نعمله ان كل مواطن له كلمة وصوت على المدونات أو على الفيسبوك..لازم في الأيام الجاية يتعمل شبه توضيح للشباب ايه الدور اللي ممكن يعملوه في الإنتخابات واللي قاموا بالثورة قادرين يحافظوا على اللي جاي من مستقبل مصر لأنه مستقبلهم ومستقبل ولادكم ؟؟مصطفى اختار من بين المدونين من لهم القدرة مثلك على اثراء الفكر بالكلمة الصادقةواعملوا حاجة ..لايمكن حانقعد نتحسر ونتكلم ونكتب وبس لازم نعمل حاجة ..تحياتي وربنا يوفقكم ..

جايدا العزيزي يقول...

هو ده اللى كنت خايفه منه دكتور

بس اللى مطمنى ان فيه ناس زيك اكيد

هيرفضوا ان دم الشهداء يروح هدر

ومهما طال الليل جى نهار

اكيد هيخافوا

وان كانوا بيعملوا كل ده عشان الانتخابات

اكيد احنا واعيين بالقدر الكافى

مقال رائع وشكرا على سؤالك عنى

تحياتى

Carmen يقول...

انا مش متفائلة ولا مرتاحة ربنا يقدر اللي فيه الخير

شهرزاد المصرية يقول...

عزيزى و الله كلنا خايفين من الفلول و اللى مش فلول و دخلوا فى المعادلة جديد
فعلا المستقبل يبدولى بصورة مخيفة و ربنا يستر

تحياتى

دعاء العطار يقول...

حاسه ان الثوره بتتسرق مننا شوية بشويه واحنا مش عارفين نعمل ايه

حاسه كانه تعبان توقعنا اننا لما قطعنا راسه انه خلاص كده مات وفجاه لقيناله 100 راس فوقفنا مصدومين ومش عارفين نتصرف

حاسه كانها حفر كتيييييير ... نطلع من حفره نلاقينا وقعنا فى اعمق واوسع

الخلاصه ربنا يستر ع مصر والمفروض مصحصح بقى ونفووووق والا بعد كده هنقول

كان فيه مره ثوره راحت فين ؟

رشيد أمديون يقول...

والله أخي العزيز كم أتمنى أن أغمض عيني وأجد أمور مصر انحلت بشكل ودي، والأمر صار للأحسن..
أسال الله أن يصلح كل الأحوال، وأن يعيد استقرار البلاد.

دعاء يقول...

إنه جرح عميق يندمل و يعود ليفتح من جديد ...
بصرآحة أنا أتمنى أن يعم الأمان و السلام في دولة مصر الحبيبة و فقط !

تحيآتي لكْ ...

عمرو يسرى يقول...

ربنا يستر