الاثنين، 10 أكتوبر 2011

لحد امتى ؟



اولا خالص تعازي الحارة  للدماء الطيبة الذكية المصرية بالامس سواء كان قبطيا او مسلما مدنيا او عسكريا فكلنا مصريون 
طبعا اللي حصل امبارح كارثة بكل المقاييس  لان جهلنا بكيفية اللي حصل وحصل ازاي ده ام الكوارث 
حاجة غريبة صح؟
مثلا بالنسبالنا في قنا واحد مسيحي بيقولي الناس اللي كانت عند الكنيسة دي منعرفهاش ومش  مننا  ولما القسيس بيقولهم امشوا من هنا ضربوه
طيب مين دول  يا  اخوانا
الاجابة منعرفش
طبعا محدش ينكر على اخواننا الاقباط خروجهم في مظاهرة سلمية لتحقيق مطالب مشروعة  ومحدش ينكر ان امبارح كان في دماء ذكية سالت على ارض مصر الطاهرة ربنا يتولاهم برحمته 
الاهم  دلوقت اننا نخرج من حالة الذهول ونشغل مخنا شوية ايه اللي حصل وازاي
نبدأ نحط  قطع البازل على بعض علشان يطلعلنا شكل ممكن يكون فيه حاجة مفيدة
ادي عندنا قطعة بازل اهيه
وزيرة خارجية امريكا بتقول سيبونا نحميلكم  دور العبادة
الظاهر كده مكفتهمش ليبيا قالوا نيجي مصر اهي بلد مقشرة قدامناومن غير طيارات ولا صواريخ

قطعة بازل تانية اهيه
قانون العزل  هيتطبق على كوادر الحزب الوطني 

لا استنى  في قطعة بازل انت مش واخد بالك منها
مؤتمر  ( اتق شر الصعيد اذا غضب )من حزب الحرية بتاع معتز محمد محمود وهشام الشعيني  و المؤتمر تحت سمع المجلس العسكري وقالوا فيه لو  اتطبق قانون العزل  هنقفل كل اللجان ونقطع الطرق
الغريب ان مجلس العسكري سمع تهديد زي ده ودخله من ودن وطلعوا من الودن التانية ولا كأن له كرامة

قطعة بازل جديدة النهاردة
السفيرة الامريكية في قنا  ودي بتهبب ايه في قنا  الصورة هتوضح  شايفين اللي جنب المحافظ عادل لبيب ده ايوة هو الراجل اللي لابس جلابية ده العمدة عبد الفتاح دنقل  من اكبر اعضاء الحزب الوطني المنحل وعضو مجلس الشورى اكتر من عشرين سنة  البيه بيعمل ايه مع السفيرة الامريكية  الخبر من هنا اضغط


حطوا قطع البازل جنب بعض  يمكن تلاقوا صورة تعرفوا بيها اننا بيتلعب بينا

فبرك مظاهرة وسخن الناس وكله يطلع  واحد يرمي طوبة من هنا اكيد هيترد عليه من هنا  وضرب النار يشتغل والدم للركب 
بعدين السفيرة الامريكية تحتفل  مع الفلول بالنتيجة  في حضور سيادة  محافظ حكومة الثورة
ولك الله يا مصر 

واحدة واحدة محتاجين نلم قطع البازل ونرصها بعناية  مع وضع ثوابت اننا كمتظاهرين مصريين بنطالب بحقوقنا ومش بنحب التخريب وكل مرة بنطلع فيها بيتعمل نفس الموقف ناس تندس وتبدأ تخرب  

نفسي بقى نتعلم اننا مش لوحدنا نفسي بقى نبص لقدام نبص لكل خطوة هنعملها ونحط في حسابنا ان في ناس عايزة تخرب بيوتنا  ومنديهمش الفرصة دي 
نفسي بقى نبص ونحلل قبل ما نخطي اي خطوة كفاية بقى كل مرة شهداء بتروح ونفضل نعيط وبعدين نكرر نفس الغلطة وشهداء تانين يروحوا واحنا نفضل 
المجلس العسكري زفت الزفت و مش مخلص ولا عايز يسلم سلطة وكل قراراته فشنك و الحكومة  تقريبا اوفصايد حامل الراية رافعلها رايته من زمان وبرضه عايزين يكملوا الهجمة 
وعادل لبيب محافظ قنا وممثل الحكومة  اهوه عبد الفتاح دنقل بيمليه اللي يقوله في الصورة والله مهزلة 

لحد امتى هيروحوا شهدا  وناس مالهاش ذنب ولحد امتى هنتسك على قفانا ومنتعلمش 
اخواني الاقباط اخواني المسلمين لا اقباط ولا مسلمين  اخواني المصريين 
ارجوكم اتوسل اليكم  احنا عندنا احسن محللين سياسيين في العالم عندنا احسن محللين اجتماعيين في العالم عندنا احسن ناس تظبط مظاهرات سلمية في الدنيا ليه لما نعمل مظاهرة  تطالب بحقوقنا المشروعة مندرسش المظاهرة نعرف مين اللي هيجي ومين يندس نعمل لجان شعبية على كل مظاهرة علشان ميجيش حد يدخل بيننا ويتسبب في ازمة 
نفسي بقى نصحى من النوم 

13 التعليقات:

مدونة رحلة حياه يقول...

السلام عليكم
عارف يا مصطفى احنا عندنا وعندنا بس كلها غير قابلة للاستخدام المصرى قصدى السلمى قصدى الوقائى قصدى في من وراها فوايد كتير لو ولعت وخربت قصدى فى كتير عاوزينها كدا قصدى مش من مصلحتهم تتعدل قصدى تلاكيك باى شكل واى لون يوووووووووووه تعبت قصدى اعلق وامشى
احييك على طرحك الرائع يا صاحبى اما انا فممتنع عن الكتابة لحين اشعار اخر
دومت بخير

haneen nidal يقول...

لا حول و لا قوة الا بالله ربنا يعدلها من عندوا

ريبال بيهس يقول...

مساء الورد مصطفى

ما حدث أمس مؤلم بكل المقاييس و

مصدر ألمها ليس فقط أرواح ودماء

سفكت بل أننا على علم بأن هناك

مندسين يسعون لأهداف محددة وواضحة

المعالم فلا أجمل من فتنة طائفية

حتى تقع أي دولة في قبضة أعدائها

كونها ستنهكها تماماً ولكنني أتمنى من

قلبي أن يتحرك على الأقل رجال الدين

لأنهم الأكثر إستماعاً من المواطنين

حتى يقضوا على هذه الفتنة وألا يسمحوا

باي مظاهرة في هذه الفترة خوفاً من

دخول المخربين بينهم لإحداث شرارة

لا تنتهي إلا بعشرات القتلى ...

تعازي الحارة لأسر القتلى وأتمنى من

الله أن يحفظ مصر .

تحياتي وإحترامي

محمد الجرايحى يقول...

ما حدث بالأمس على ماأعتقد بداية
هناك تخطيط وتدابير تجرى بأيادى قذرة من خلف الستار.......
هناك من لايريد لنا الاستقرار لأن الاستقرار فيه ضرر له ولمصلحته
ابحث عن المستفيد من احداث الأمس
تجد إجابة السؤال.....
اللهم أنت مولانا ونعم النصير
انصرنا واحفظ مصرنا من كل سوء
اللهم آمين

نور القمر يقول...

مساء الخير ..
الله يرحم الشهداء يارب ..
لازم تكونو ايد وحده قلب واحد لانكم شعب وااحد
ويارب يحميكم
نور

Carmen يقول...

لحد ماكل واحد يعرف دينه بجد :)

eng_semsem يقول...

في حاجه غلط بتحصل وفي ناس بتستغل شباب عايز يقول انا موجود وبطالب بحقي عشان يهدم الثوره اللي كانت ناجحه
اكيد اللي حصل امبارح مش فعل اقباط عاديين زي الللي عايشين معانا
لازم نلتزم الهدوء ونفكر شويه عشان واضح ان في ناس بتقودنا لهلاكنا باسم حريتنا
تحياتي لك وشديد اسفي على كل من توفى بالامس بلا ذنب

candy يقول...

صوت عاقل وصوت دوشة الغوغاء
بس بتكلم مين ؟؟
الوضع دلوقتى هستيرى
:S

أمل م.أ يقول...

استاذي العزيز
بداية انا في اشد الالم والاسف لما حصل
ربنا يرحم الشهداء الذين لا ذنب لهم

طبعا وبما ان مصر تمر الان بمرحلة انتقالية
فالامور لن تكون سهلة ولن ياتي الاستقرار والحلم المنشود على طبق
من ذهب هذا شي مهم على الجميع ان يفهمه
هذا من ناحية... ومن ناحية اخرى
فما حصل واخشى مما ايضا ممكن ان يحصل والذي تلعب به الايدي الخفية التي همها الاول تقسيم الغنائم وكاننا في ساحة حرب
واايضا بالطبع هنالك كُثر يعنيهم عدم نجاح هذه الثورة العظيمة
حتى من دول عربية للاسف
علينا جميعا خصوصا انتم يا هلنا واحبتنا في مصر توعية الشارع المصري لما يحدث ولما يُحاك له في الخفاء وربنا يوفقكم جميعا
ولك الله يا مصرنا الحبيبة ام الدنيا

شمس النهار يقول...

المجلس ماتفهمش الموضوع وسع منه مش قده في ايه
مش عارفة
بيهبل

سمعت نهي الزيني المستشارة النهاردة حزنت علي حزني

وجع البنفسج يقول...

اللهم أنى أستودعتك مصر..♥ رجالها و شبابها .♥.

نساءها و فتياتها .♥. أطفالها و شيوخها .♥.

اللهم أنى أستودعتك ممتلكاتها و مبانيها و منشآتها .♥.

اللهم أنى أستودعتك نيلها و اراضيها و خيراتها .♥.

اللهم أنى أستودعتك أمنها و أمانها و أرزاق اهلها .♥.

اللهم أنى أستودعتك حدودها و بحورها و جنودها .♥.

فأحفظهم بحفظك يا من لا تضيع عنده الودائع و أنت خير الحافظين .

( حياتى ) يقول...

صباح الخير استاذ مصطفى

معروف طبعا ان فيه مؤامرات

وخطط ومحاولات كتير من برة وجوة

وكل المصايب بتحصل لما السفيرة

الامريكية بتيجى مصر زى ما يكون

بتديهم اوامر يعملوا ايه

وكمان معروف مين اللى ورا دا كله

اللى قال طبعاً ياما تختارونى ريس

عليكم او هعيشكم فى فوضة

وهى الفوضة موجودة وياريت فوضة بس

ده خراب للبلد

طول عمرنا مسلم ومسيحى عايشين خوات

بناكلوا مع بعض ونعيدوا مع بعض

ونسهروا مع بعض ايه اللى جد جديد

المفروض لو حكومة شرف مش قادرة تحقق

حاجة يطلع ويعرض على الناس ويقول

بصراحة يا خوانا انا مقدرتش احقق

كذا وكذا عشان كذا وانا بنسحب وشوفو

غيرى انما دى حكومة مش لاقية اللى

يحاسيبها وفين البرلمان اللى

هيسالها انتِ عملتى ومعملتيش




وفى النهاية حسبنا الله ونعم الوكيل

اللهم من اراد مصر بسوء فاهلكه

وارنا فيه عجائب قدرتك وقهرك وقوتك

فانك تقدر ولا نقدر وانت على كل شئ

قدير


زهرة

سبايدرمان يقول...

الغريب انك زي ما قولت
احسن محللين في مصر
و محدش شايف حاجه للاسف !!!

الموضوع باختصار شديد : مصالح شخصيه لناس معينه