السبت، 13 أغسطس 2011

انا فاسد يا أمًَاا

حالة من القرف والاكتئاب جايالي مخلياني مش عايز اكتب اي حاجة في اي حاجة والاكتئاب زاد بعد ما ضغطت على نفسي وكتبت بوست طوييييييييييييل وبعدين ضاع بغلطة زر :( كنت مقرر مكتبوش تاني بس قلت اجرب لو باظ تاني مش هاكتبه
بمناسبة اننا في رمضان يبقى لازم ولا بد نسلي صيامنا
سلي صيامك يا بيه سلي صيامك يا استاذ
عندنا سبعين مسلسل يا باشا خليك معانا وستجد كل ما يسرك
بس انا ماليش في المسلسلات انا عندي زهايمر بانسى فطرت ايه  افتكر ازاي سبعين حلقة لسبعين مسلسل
خلاص حلك عندنا يا باشا انت ممكن تتابع مسلسل واحد وتتفرج على ست كوم او مسلسل حلقاته منفصلة .. اوك يا باشا رمضان كريم
وسليت الصيام واختارت اشوف مسلسل الحسن والحسين قلت اشوف المسلسل اللي قناتي التحرير والحياة (المصريتين) اتحدت بيهم قرار الازهر بمنعه وعدم جواز تجسيد الصحابة المبشرين بالجنة  و الحسن والحسين رضي الله عنهم اجمعين وبغض النظر عن صحة قرار الازهر اللي انا متفق معاه الا ان انا كصاحب قناة حتى لو مش متفق مع الازهر لازم ارضخ لتعليماته لأن الازهر لما بيعلا انا كمصري باعلى معاه ولما انا كمصري محترمش الازهر محدش برة هيحترمه (وجهة نظري وصلت؟)
المهم علشان مطولش عليكم اكتشفت في الاخر ان المسلسل ضعيف اخراجيا وسيناريو لأن اللي كتبه حاول استمالة قلوب الشيعة والسنة على حساب التاريخ  في احداث تغاضى عنها علشان ميجرحش حد من الطرفين ودي مصيبة
بعدين ندخل على مسلسل كوميدي ومادام كوميدي يبقى لازم بيتريق على الصعايدة في ظل الركود الفكري لكل كاتبي المسلسلات عندنا يبقى لازم يكون كده سواء في مسلسل الكبير او مسلسل  الزناتي مجاهد

آه الزناتي مجاهد مسلسل كاد ان يسبب لي عقدة نفسية  فهو توضيح وترسيخ لفكرة الصعيدي الغبي  الاهبل العبيط الساذج اللي ينزل العاصمة والكل يضحك عليه والمصيبة الاكبر انه مش لوحده العبيط لا ده كل بلده مجموعة من الاغبياء السذج وكأن الصعيد مافيهاش بني آدم عنده شوية مخ
المسلسل بعيد عن الاحساس بالعنصرية فهو يمكن ان يوضع في قائمة التفاهة واللي يتفرج عليه يبقى تافه والغريب ان انا برضه اكتشفت اني تافه علشان بتفرج عليه والاعجب اني باضحك كمان لحد حلقة الحزب الوطني لما اقتنع ان الفساد مصلحة للبلد واللي في الحزب بيحوشولنا فلوسنا في بلاد برة ولما اقتنع مجاهد ان الفساد هو الحل
وفرح انه فاسد واتصل بامه وقالها (انا فاسد يا اما )
وقتها مقدرتش اضحك معرفش ليه واتضايقت جدا وكنت ناوي اكتب بوست فيه تهزيء للمسلسل  ونقد كبير لكن اكتشفت فعلا ان مجاهد معاه حق
لما حصل اللي حصل لممدوح حمزة في مؤتمره بقنا و واحد سلفي كان بيشوف هل مقاس جزمته هو نفس مقاس وش ممدوح حمزة ولا لاء؟ مالقيش طريقة غير انه يسدد جزمته بقوة (تقولش كابتن ماجد) في اتجاه وش ممدوح حمزة
وقتها استغربت انا قناوي وعارف لما يكون عندنا ضيف حتى لو تقيل بنعمل ايه معاه
لكن عمرنا ما كنا قللات الاصل او قللات الادب 
يكونش التيار السلفي رسخ جوة الناس ان اي حد يعارضك تضربه بالجزمة؟
ماعتقدش ان دي اخلاق السلف الصالح  وانا اعرف سلفيين كتير باجادلهم ويجادلوني بس في بيننا احترام
طيب ايه
طيب آه
الاخ ده جه منين وتبع مين؟
ممدوح حمزة قال ان الراجل ده فجأة دخل  المؤتمر ورفع الحذاء ورماه طيب جه منين وتبع مين ده؟ محدش يعرف
طيب وهو ليه المؤتمر ده محدش سمع بيه واغلب اللي حضروه سلفيين بالرغم ان ممدوح حمزة من اكتر معارضيهم؟ هو المؤتمر سري وبس للسلفيين؟ محدش يعرف
وفي ظل كل  الحاجات دي اللي محدش يعرفها واحد صاحبي قاللي ان الواد اللي رمى الحذاء ده مختل عقليا
قلتله اشطا كده الحمد لله بدون اي مجال للشك اكتشفنا ان النظام القديم قاعد زي ما هو وان اي مصيبة بيلبسوها المختلين عقليا
المهم ان ممدوح حمزة قال ان ده مأثرش على المؤتمر وكمله قال
 فبلاش نجيب في سيرة الناس احنا في رمضان
وقالك ايه قالك آه
قرب يا استاذ قربي يا آنسة
بيقولك في قنا بلد المفاجآت رجع القائد المغوار سيادة اللواء ذو السيف البتار عادل بن لبيب الجبار
انا مش هاتكلم واقول المفروض ييجي او ما يجيش انا هاتكلم بلسان الناس اللي في الشارع
الناس اللي من حقها تتكلم بلسانها هي بدون النظر لأي تيارات او احزاب
علشان كده يمكن تتفاجئوا بكلامي بس انا هاقول اللي بيتقال ووجهات نظر الشارع مش وجهة نظري خالص
رجل الشارع القنائي متأكد تماما ان عادل لبيب فاسد  وشارك في افساد الحياة السياسية وتزوير الانتخابات 
لكن مع عادل لبيب مش هتقدر تغمض عينيك   كل يوم جديد 
النهاردة هنعمل كورنيش بكرة هنوسع مسجد سيدي عبد الرحيم بعد بكرة هنعمل بانوراما بعد بعده هنعمل صرف صحي بعد بعد بعد بعده قطر مخصوص آخره قنا علشان القنائي يلاقيله مكان في قطر وهو راجع من القاهرة (كان اسم القطر قطر عادل لبيب) بعد بعد بعد بعده هناخد جايزة من الامم المتحدة وقنا توصل للعالمية  
يعني كل يوم جديد وكل يوم شغل صحيح الحاجات دي بتبقى رسوم على فواتير الكهربا بس على الاقل انت شايف بالرسوم دي انجازات قصاد عينك
يكونش الراجل مش نزيه؟ سؤال بيسأله الشارع لنفسه دايما لكن عادل لبيب ذكي شال اي شك من البداية  في قنا لما اتعرض عليه من اكبر مطاعم قنا المجاور لمسجد سيدي عبد الرحيم القنائي رشوة كبيرة علشان يوقف التوسعات اللي هتقفل على المطعم الشارع وعادل لبيب بمنتهى الذكاء اخد الرشوة وحطها في ميزانية المحافظة وبعت جواب شكر لصاحب المطعم باسم المحافظة واكمل التوسعات زي ما كان مقرر ليها
بعد الموقف ده بقت في ثقة جبارة بين عادل لبيب والشارع مش بالساهل تتزعزع غير ان الراجل مش بيقعد في مكتبه ابدا في اي وقت ممكن تلاقيه في وشك بعكس اللي كان قائم باعمال المحافظة من بعد الثورة اللي منزلش من مكتبه يشوف الشارع  وده خلى المواطن القنائي البسيط يسأل نفسه
هل انا عايز محافظ نزيه ومش شايف شغله؟
ولا محافظ فاسد وشايف شغله؟
طبعا في حاجة تالتة محافظ فاسد ومش شايف شغله (زي مجدي ايوب اللي كان مقضيها خمرة اليوم كله)
اما المحافظ النزيه اللي بيشوف شغله فالمواطن القنائي يراه زي الغول والعنقاء موجودين في نفس صفحة الكتاب ان لم يكن مستحيلا فهو نادرا ومادام نادر يبقى محافظة هي منفى للجميع لا يمكن ان يأتيها مثل ذلك الرجل
طبعا في ناس معارضين كتير لعادل لبيب زي ائتلاف شباب الثورة وكمان قبيلة من اكبر قبائل قنا هي الاشراف اللي كانت بتمني نفسها بمحافظ منها ولكن طبعا لو اي محافظ جه من اي قبيلة قنائية كانت هتحصل مشاكل كبيرة
في النهاية عادل لبيب يحصل على تأييد اكبر من معارضته 
بالنسبالي انا قررت الصبر
هاصبر على الحكومة الجديدة لما نشوف اخرتها وهاصبر على عادل لبيب لما اشوف اخره
كفاياكم نكد
معلش رمضان  السنادي كنت اتمنى يكون بداية وفاق واتفاق  ووحدة واتحاد على كلمة واحدة هي مصر
لكن للاسف مش شايف اي حاجة تخليني اتفائل
رمضان كريم

انا آسف لتقصيري في متابعة التدوينات وزملائي المدونين
بس حالة احباط ان شاء الله تروح
غير ان رمضان وقته ضيق

25 التعليقات:

ابراهيم رزق يقول...

اخى العزيز مصطفى
حمد الله على السلامة و قلقتنى عليك

فعلا بغض النظر عن وجهة نظر الازهر فى مسلسل الحسن و الحسين لكن المسلسل جاء مخيبا للامال من جميع الوجوه اخراج و تمثيل و تأليف و دى وجهة نظرى لانى دارس نقد على قدى

مسلسل الزناتى مجاهد اعطيته تقديرا كبيرا عندما قلت انه مسلسل تافه هو لا يندرج تحت اسم مسلسل و وصف تافه هو وصف لا يستحقه لانه اتفه من التفاهة

السلفيين جددت الجرح القديم

يعجبنى تجربة عادل لبيب بقنا بغض النظر عن فساده ام لا

اما عن الملل فكلنا يا اخى هذا الرجل
تحياتى

أمال يقول...

والله لستم أنتم فقط من تعانون من المنتوجات السنيمائية والرمضانية الرديئة جداا، نحن كذلك، ومند زمن وليس الان فقط، ورغم نفور الجماهير من متابعتها الا انها لا تشهد اي تحسن مطلقا، وتظل مجردة من القيمة، ومن الرسالة النبيلة التي من المفروض ان تقدمها للمجتمع.
لا اشاهد برامجهم مطلقا لأني لست مستعدة للدخول في حالة الإكتئاب، مازال امامنا الكثير لتغيير الوضع، وتيقن اخي الحالة التي عليها مصر اليوم طبيعية، لانها مرحلة الانتقال بين العهد السابق والجديد.
اتمنى ان تستقر حالة مصر في اقرب الآجال
رمضان مبارك
تحياتي

رشيد أمديون يقول...

أخي مصطفى مساء سعيد.

لن أعلق على الجزء الأخير الخاص بمحافظة قنا لأني ليس لي دخل ولا أعي ما يحدث عندكم، على كل حال أرجو من الله أن يوفقكم ويهدي الجميع للحق.

أما بخصوص المسلسل الديني منذ بداية رمضان خطر ببالي أن أكتب موضوعا عن مسألة تجسيد الصحابة في الدرامة التاريخية، ولكني تكاسلت خاصة وأن لي موقف معين من الأمر، وقد يكون مخالف لما صرح به الأزهر الشريف.
على كل حال لم أتابع أي مسلسل هذه السنة، ولا حتى الكوميديا...
لكن أجد فعلا أنه مازال هناك من يستهزء بالرجل الصعيدي في مصر وخاصة ضمن السنما، وبالرجل البدوي في مناطق أخرى في البلدان العربية.. وهذا انطباع موروث على ما أظن، ولكن بقي راسخا في الأذهان رغم أنه تلاشى مع عصر العولمة.

تحية طيبة أخي ورمضان كريم.
وإن شاء الله حالة الاحباط ستزول.

catroz يقول...

طيب كل سنه و انت طيب بقى :D

ツSmiLeY AnGeLツ يقول...

انا عن نفسي ولا اتابع شي
لان مافي وقت اتابع
يلا افضى الفجر واجلس على النت

واحسن شي تعمله انك تبعد عن التلفزيون عشان الاحباط واخرج شوف الناس وشم هواء وخليها على الله
ربنا يبعد عنك الهم والغم


ايوة مش قرروا الايرانين الي كل سنه يمثلوا نبي وصحابي ان السنة الجاية يمثلوا سيدنا ونبينا محمد عليه افضل الصلاة والسلام
لاحولة ولاقوة الابالله
والله محدش عارف دول الشيعيين كيف بيفكر
دول وهم مسلمين وعارفين انه حرام
استغفر الله

ماتطولش بحالة الاحباط
عشان بيوحشنا مواضيعك

تقبل مروري ^_^

عباس ابن فرناس يقول...

الدراما فى رمضان عبارة عن صداع فى الدماغ ومزمن كمان !

وتصدق بقا لما طرحت على نفسى فكرة الاختيار بين المسؤل الفاسد النشبط
وبين المسؤل النذيه الكسول
احترت ومعرفتس اختار مين !
وخصوصا انى معتقدش ان ممكن يكون فيهخ اختيار تالت

تحياتى المستعطرة

hend anwar يقول...

شوية سيريس ملهمش اى 30 لزمة حاجة بجد تحزن ..

Tamer Nabil Moussa يقول...

شوف ياصاحبى احنا مش عندنا فن هادف بمعنى الكلمة سواء مسلسل فيلم كلة عبط وملوخية

كل سنة وانت طيب وبخير

رمضان كريم

مع خالص تحياتى

zizi يقول...

مصطفى ..كل سنة وانت طيب ووحشتنا جداً

وانا مش لاقياك خالص كنت عايزة اعزمك على وجبات دسمة في رمضان بس مالقيتكش..وبعدين ايه حكاية موضوع صناعة كاتب ::؟؟؟وكنت بعتلك تعليق عليه بس ما عرفتش ردك..اما حكاية المسلسلات فهي من كترها بيبقى صعب افختيارواحلى حاجة زمان لما ماكنشفيه غير مسلسلين تلاتة ودمتم

حكاية المحافظ دي حكاية محيرة فعلاً

وربنا يجعل فيها من يصلح فيها ..

تحياتي وشكري

reemaas يقول...

ميه مره قلتلك ماتفتحوش كذا موضوع مهم فى بوست واحد بتخلونى ارغى كتيييييييييييييييييييييييير

بالنوسبه للسبعين مسلسل فانا بجد مصدومة بسببهم لحقوا امتى يعملوهم؟

بالنسبة للحسن والحسين فده حاجة مستفذه جدا وخصوصا لما يتقال تم اجازته من القرضاوى ومفتى لبيا باين على اساس ان مش مهم انت يا ازهر

اى تانى

التريقه على الصعايدة رغم انى مش صعيدية بس اتعاملت مع اذكى الناس من هناك

بالنسبة لعادل اديب ماهو كويس اهو ماله انتم زعلانين منه ليه

حمدى جعوان يقول...

اولا وجهة نظرك بالنسبة لموضوع احترام الازهر اكيد وصلت
بالنسبة للمسلسلات والله بجد فعلا حاجه تخرب اى عقل حت لو خربان اصلا واسمحلى اضيف للمسلسلات البرامج اللى بيقولوا انها كوميديه ( المفروض نضحك يعنى ) تحس فجأه كده ان الشعب كله بقى ناس دمها خفيف وكمية الاستظراف بقت للركب ( على راى اخونا زكريا بيه عزمى )
انا متفق معاك فى اننا لازم نعطى فرصه للحكومه وان غدا لناظره لقريب

شكرا جزيلا

مدونة رحلة حياه يقول...

السلام عليكم
ممتع حتى وانت بتهزر وكلامك بيقطر منه الدمع
يالا نصبر سوا يا صاحبى ويارب يكون اخرة صبرنا خير
دومت بخير

زينة زيدان يقول...

أخي مصطفى

أشكر تفصيلك وتحليلك في نظرتك التي تجسد نظرة عامة لشريح عظيم جدا من الناس..
المسلسلات ليس فقط هذا العام إنما منذ عدة سنوات أو عقد تتنافس في السذاجة والسطحية والابتعاد عن الواقع ..
أنا شخصيا لا اتابع أي مسلسل قد أكون شاهدت عدة لقطات من عدة مسلسلات لقطات سريعة ولم يستهوني أي منها ..مسلسل "الريان" الذي كما عهدنا في الفن العربي يشوه الدين والمتديين ..
راقني جدارأيك في مسألة احترام قرارات الأزهر الشريف فالمفترض أن يكون مرجع فقهي للجميع وقراراته ملزمة ..

أنا أخي من بلد يفتقر للفن والفنانين وبالتالي للمسلسلات لدينا طوال السنة فقط مسلسل واحد يجسد الواقع الاجتماعي
والسياسي الفلسطيني بشكل هزلي أدعوك لمشاهدته بعد الافطار مباشرة على قناة فلسطين الفضائية ..مسلسل "وطن على وتر" ويليه برنامج ثم اسكتشات هذا كل ما لدينا من فن.. امكانات التمثيل بكل محاورها لدينا ضعيفة لذلك ستجد كل شيء ضعيف..

ندعو الله أن يحمي مصر ويوجه أهلها للخير والسداد..

كل عام وأنتم بخير

Unknown يقول...

مصطفى أخي العزيز أتمنى تكون بخير
حاولت أتابع مسلسل الحسن و الحسين بصراحه مقدرتش بيشبهوا بعض جداً و الإخراج سئ و الحوار غير مفهوم.
تقريباً مش متابعه أي حاجه في التليفزيون غير رامز و برامج كده على خفيف الدراما مبقاش سوقها ماشي خالص و الكوميديا اللي بتعتمد على الصعايده بجد مستفزه لأنهم بدون مجامله أحسن ناس :)
عادل لبيب مش عارفه تفاصيل كتير و أشكرك على توضيحك للي بيحصل بالظبط أتمنى اللي جي يكون خير

أرق تحية لك

دعاء العطار يقول...

أنا كمان بتغاظ أوووى لما اكتب حاجه وفى الاخر تضيع او تتمسح

بالنسبه للمسلسل بتاع الحسن والحسين فأنا كنت ناويه اتابعه قبل رمضان بس كالعاده معرفتش عشان ضيق الوقت .. فمش عارفه بصراحه احكم عليه

بالنسبه بقى لمسلسل الزناتى فأنا حتى معرفشى ان فيه مسلسل اسمه كده .. بس انت مستغرب ليه ماهى دى عادتهم .. كان الصعيدى ده مابيتغيرش من الاف السنين كل الناس تتغير وهو خارج نطاق الزمن .. ناس عجيبه والله .. انا اعرف صعيديين مودرن جداا ودماغ جداً

السلفييين بقى فانا مبقيتش فاهمه هما عايزين ايه

ولو ع الاكتئاب والملل فدى حاله بنمر بيها كلنا وان شاء الله نخرج منها

دمت بخير (:

شمس النهار يقول...

كويس انك رجعت تكتب الكتابة اكبر دوا للأكتئااااااااب

اما المسلسلات مالييش فيها فامش هعرف ارد
لكن موضوع الصعايدة ده باخ اوي وعيب نتصرف بالعنصرية دي مع بعض
مع العلم اني من اصول تركية علي صعيدية

اما موضوع ممدوح حمزة ده حسيته تمثيلية لما قريت عنه بس من تاليف واخراج مين الله اعلم

نيجي بقا لموضوع المحافظ
ده شئ الايام هتثبته وعايزة اقول مش كل الناس كانت فاسدة ايام المخلوع
في ناس كانت كويسة وحاسة انها بتخدم ومش عايزة تتخلي عن مسؤليتها وفي سبيل ده كانت بتنفذ لهم طلبتهم وكده كده كانوا هيجيبوا ناس تانيه تنفذها يبقا انفذها انا وافضل في موقعي اخدم الناس بدل مايجيبوا حد غيري يقرفهم في عيشتهم ومادام انا نضيف ومابمدش ايدي للحرام خلاص
وعلي فكره ده كلام سمعتوه من واحد منهم

كل سنة وانت طيب ورمضااااااان كريم

هيفاء عبده يقول...

كل عام وانت بخير اخي مصطفى..

من ناحية المسلسلات لا ادري لم اعد احب مشاهدة التلفاز ولم تعد تشدني قصصهم الفارغة ..اصبحت المشاهد فيها مملة والاخراج ضعيف والقصص هابطة ..
لذلك فضلت مقاطعتها ..
من ناحية الصعيدي هذا للاسف ما اعتدنا ان نراه حتى اخذنا هذا الانطباع بالفعل عنهم ..ومن جهة آخري عندنا ولد القرية ايضا يستهزء به ودائما هو هدف الكوميديا لدينا ..لذلك لا تغضب ! فلديكم ولدينا العجب

أما حالة الاكتئاب التي تنتابك هي حالة طبيعية تأخذ وقتها وما ان تلبث وتعود للكتابة وبشكل افضل من قبل ..


تحياتي لك ..

سندباد يقول...

دايما صاحب فكر ومبدا وبتدافع عن وجهة نظرك بطريقة متحضر وباسلوب الفاهم وليس باسلوب الصوت العالي
مش هاعلق علي البوست لانه موضح نفسه انما هاعقلك اننا فعلا كلنا فقدنا الامل في كل حاجة
تحياتي ياصديقي

Bent Men ElZman Da !! يقول...

استغربت بردو موضوع الحسن والحسين
ومش اتشجعتله بالرغم من كميه الفتاوى اللى اباحت عرضه اللى دايما يجبوها على الحياه عشان يشيلوا من عليهم المسئوليه
ولذلك ريحت نفسى ومش شوفته
وكذلك الوضع مع مسلسل الزناتى مجاهد
تخنق بجد المسلسلات اللى بتتريق على فئه معينه لمجرد التريقه وخلاص

اول مره اسمع عن اللى بيحصل فى قنا صراحه !!

Noha Saleh يقول...

انا شايفة ان ماينفعش يكون فى تجسيد للصحابة والانبياء ابدا

خصوصا لو فى مغالطات تاريخية بتفسد اى عمل تاريخى

المسلسلات السنة دى كلها فى رمضان نقدر نقول على معظمها انه مسلوق

ورمضان كريم

غير معرف يقول...

صباحك غاردينيا أستاذي مصطفى
والف الحمدالله على سلامتك انا بشوفهم يقولو الحمدالله انك رجعت يبقى كويس انك كنت غايب معايا ههههههه طبعا عشان مايكونش فاتني حاجة من حرفك الرائع بالنسبة للمسلسلات للأسف السنة دي بالذات حاسة انه مافيش مسلسلات او حتى هدف رغم اني بعيدة عن التلفزيون :) بس الي بسمعه من اخواتي
نيجي بقى لحالة الإكتئاب اجمل حاجة ليها هو انك تكتب كل الي تحسه صدقني مش حتلاقي اوفى من قلمك ليك المهم ماتغبش عنا :) "
؛؛
؛
لروحك عبق الغاردينيا
reemaas

faroukfahmy يقول...

اخى وحبيبى مصطفى
حمدالله على سلامتك انا كنت قلق على غيابك قوى ، انا عن نفسى لا اتابع ولا اشاهد ما يعرض فى التلفاز حتى لا أصاب بالاحباط والصداع ... افتح الاذاعة ياسيف هتلاقى نفسك فى عالم تانى احسن من المشاهد ألمرئيةاللامرئية
ومسألة المحافظ دى حكاية محيرة فعلا

سكن الليل يقول...

والله يا مصطفى الواحد ماعارف يتفرج على ايه

انا قاطعت القنوات المصرية
ماباخدش منها غير برامج دينية وخلاص

يعني الواحد يا يسلي صيامه على حاجة عدلة يا بلاش احسن

انا ماشفتش الحسن والحسين
ولا مجاهد
لاني بجد مش بحب سامح حسين
بحس انه كتلة تفاهة متحركة
لا مش متحركة..دي لابدة في الطين

وبالنسبة للاحوال السياسية
وحال البلد اللي مايسرش
بجد الواحد مش عارف هيصبر لحد امتى
ادينا صابرين ومستنيين
ويا ترى حدود الصبر هتوصل لفين؟؟

يلا

رمضان كريم يا مصطفى
ويارب رمضان القادم نشوف فيه اللي اتمنيناه السنادي
واحسن طبعا

يارب

منيرة سوار يقول...

حمدالله على السلامة أخي مصطفى..
طبعا لابد ان تصاب بأكتئاب بعد ان استبدلت الكتابة بمشاهدة مسلسلات هذا العام التي لا تقل احباطا عن الوضع السياسي في مصر وفي البلاد العربية عموما!
نورت مدونتك من جديد..
تقبل مروري اخي الفاضل..

موقع زواج يقول...

تعجبنى افكارك
شكرا لك