الثلاثاء، 16 أغسطس، 2011

لو القضاء مجابش حقنا


يا حللولي يا حللولي ده ايه ده اللي بيحصللي
بيقولك اسماء محفوظ هتتحول لمحاكمة عسكرية قال  يا حلاوة يا ولاد  يعني مش عارف نهني انفسنا ازاي على الحدث العظيم اللي حصل ده
لما جمال مبارك يخرج من المحكمة المدنية وهو رافع ايده بعلامة النصر واسماء محفوظ بتبكي وتعيط علشان هتتحاكم محكمة عسكرية
فعلا كان يوم اسود في تاريخ مصر وربما تناقلته الاجيال وجايز بعد كام سنة كده يتعمل المشهد ده فيلم ويمثل دور جمال مبارك الممثل القدير جيمي عمرو مصطفى (ابن الفنان الكبيرعمرو مصطفى اللي هيبقى نقيب للموسيقيين وبعدها وزير اعلام وكمان وزير اتصالات واللي هيلغي فيسبوك وتويتر واليوتيوب  في عهد الرئيس الفنجري ابوصباع الرئيس السابع لمصر متسالوش عن الخامس والسادس)
ايام سودة عايشينها حاليا
 هل فشلت الثورة المصرية؟
سؤال سألته لنفسي زمان هل احنا عايزين مبارك واعوانه يتحاكمو محاكمة تفتيش ويتم اعدامهم وكده تبقى اشطا فلة شمعة منورة والشعب ينبسط والدنيا تبقى بيس؟
ولا يتحاكم محاكمة عادلة امام قضاء مدني
علطول جاوبت نفسي اننا كعرب اكتر ناس عانت من محاكم التفتيش في الاندلس  وانا ضدها حتى لو مكنش حقي هييجي غير بيها
 وانا مع محاكمة الجميع محاكمات عادلة قدام قضاء مدني حتى العادلي ومبارك من حقهم علينا اننا نحاكمهم محاكمة عادلة بالرغم اننا ماشفناش العدل على ايديهم بس احنا كشعب مش هنعاملهم زي الامعة ان احسنوا احسننا وان اساءوا اسائنا بل هنعمل  بالثوابت اللي مؤمنين بيها
علشان كده فرحت لما مبارك والعادلي اتحولوا للقضاءالمدني
طيب بس دول تعابين صعب نثبت عليهم حاجة واغلب الاوامر شفهية مش ورقية  <<<<. والله نسيبهم للقضاء ونشوف
طيب وبعدين
ولا بعدين ولا قبلين قاعدين مستنين المحاكمات ومنعرفش انها هتتحول لمحاكمات هزلية وسيبك من المحاكمات دلوقت اصل المغرب لسه مادانش واللهم اني صائم
ندخل بقى في الغويط بيقلك قال ان اسماء محفوظ هتتحاكم محاكمة عسكرية علشان بتنبه لو العدل لم يقام هتظهر جماعات مسلحة وتقوم بسلسلة اغتيالات
الغريب في القصة ان اللي اثار المجلس العسكري هو الشق التاني من الجملة مش الشق الاول يعني اللي ضايقهم هو ظهور جماعات مسلحة ومضايقهمش جملتها (لو القضاء مجابش حقنا )
على فكرة انا متفق مع اسماء محفوظ ان عدم اقامة العدل هيعمل فتنة اكبر وقد تكون فتنة مسلحة
بس اللي مستغربله محدش وقف قدام جملتها الاولانية (لو القضاء ماجابش حقنا ) الجملة دي خطيرة واهمالها من المجلس العسكري يخوف جدا او على الاقل خوفني
لما ييجي المجلس العسكري يجيب اسماء محفوظ ويحقق معها ويحولها لمحاكمة يبقى في لعبة ممكن تحصل وميتحققش العدل لأن الطبيعي ان الامور تمشي زي ما هي والقضاء يحكم حكم عادل وبالتالي الامور كلها بيس وزي الفل و مفيش داعي لمحاكمة اسماء محفوظ
يمكن انا مش مع اسماء محفوظ في جملتها (لو القضاء ماجابش حقنا ) لأنني شايفها ضغط على المستشار احمد رفعت قبل المحاكمة علشان يقول الحكم اللي على هوى الناس و ده يوديني لسؤال تاني 
القضاء المفروض يعمل ايه؟
يكون حكمه على هوى الشعب؟
يكون حكمه عادل ؟
يكون حكمه مطابق للقوانين والادلة حتى لو مكنش عادل؟
ده سؤال خطير جدا لأن القضاء عندنا هو تطبيق القانون وبالنسبة لناس مخضرمة زي مبارك ورفاقه نقدر نقول اننا مش عارفين نمسك عليهم ادلة دامغة في ظل كمان وجود محامين الشهداء اللي معرفش جابوهم منين
طيب والحل
قالولنا زمان ان في حاجة اسمها قانون غدر
اشطا زي الفل وكنافة بالمكسرات كمان
خلاص يا حاج يبقى مبارك افسد الحياة السياسية واعدامك المتين فين يا قضاء؟
استنوا استنوا
بس قانون الغدر ده ضد اهم ثابت من ثوابت ثورتنا وهو العدالة ده غير انها ترسيخ لمحاكم التفتيش
طيب ايه الحل؟
والله معرفش شايفها متقفلة طالما المحامين دول متمسكين بالقضية وكل همهم التعويضات مفيش حد فيهم بيدور على ادلة ادانة وكأن مبارك والعادل لو دفعوا دية محترمة يبقى تمام
لو عايزين نرسخ قواعد دولة قوية في المستقبل نشيل من عنينا نضارة الانتقام السوداء علشان نعرف نفكر كويس في طريقة عادلة نقيم بيها الحد والقصاص على قتلة الشهداء بطريقة عادلة
انما طالما اننا شايفين انهم لازم يتعدموا بدون تفكير بمحاكمة تفتيش من غير ادلة ولا نيلة يبقى احنا كده ما قمناش بثورة صحيح هيبقى اعدمنا مبارك بس هييجي بعد مبارك واحد تاني زي مبارك ويمكن اكثر طغيان منه علشان يقدر يوقف قوانين الغابة
يمكن كلامي ميعجبش ناس كتير
بس صدقوني احنا كمصريين جوانا معادن طيبة وجوانا ثوابت قوية لو مشينا ورا المؤمنين بيه بس هنلاقي حاجات كتير توحدنا
هنعرف نجيب حق اسماء محفوظ من المجلس العسكري
هنعرف نلاقي ادلة دامغة تدين الجبابرة
صدقوني لو جوانا بس مصلحة البلد و ينسى كل واحد مننا نه لازم يظهر في الكادر وقتها هنلاقي حلول
لكن طالما احنا دايرين في الساقية مغمضي العيون هنفضل بندور حوالين قشور تافهة وننسى الاصول
هتلاقينا بنقول مدنية ولا اسلامية بالرغم انا لحد هذه اللحظة مش فاهم الفرق بين الاتنين
يعني هل اللي بيقولوا مدنية مش عايزين يطبقوا المادة التانية ؟  .... لا بالعكس دول موافقين عليها
طيب واللي بيقولوا اسلامية  هل هم عايزين يرجعوا زمن الجزية وعدم تجنيد غير المسلمين؟  .... لا بالعكس
طيب ابوس ايديكم حد يفهمني الاختلاف بين المدنية والاسلامية علشان انا زهقت من الموضوع ده وجابلي اكتئاب وشايف انه ترويج لحاجات غريبة وناس عايزة تظهر في الصورة وبتقدم مصلحتها على مصلحة الوطن
اخواني اخشى عليكم من فتنة يكون القاعد فيها خير من القائم والقائم فيها خير من الماشي فارجو منكم التعقل والثبات
كان نفسي افضفض اكتر بس مش عايز اطول عليكم 
اتمنى مايجيش العيد الا لما تكون الامور احسن
باتمنى الاقي في نفسي القدرة على التفاؤل



36 التعليقات:

eng_semsem يقول...

ان شاء الله الامور هتتحسن ونشوف مصر نقيه رافعه راية العداله قدام حسني واتباعه وقدام اسماء والمصريين

ابراهيم رزق يقول...

اخى مصطفى

تصدق بالله
انا اسماء محفوظ دى من الشخصيات التى لا تعجبنى ارائها
لكن فى الموضوع ده انا معاها مية مية انا لم اذهب الى الشغل و ذهبت لكى اقف معها امام النيابة العسكرية و كان نفسى الا تدفع الكفالة لكى تحرج المجلس العسكرى
ما هو الخطأ الذى ارتكبته هى عبرت عن رايها
انا جيت كتبت بوست و بعدين قلت اكتب عن المسلسلات احسن خلينا فى المسلسلات
و بعدين يعنى ايه و ازاى القاضى يحكم بالبراءة اهم من الادلة و القوانين ضمير القاضى و القاضى مع احترامى له لم يأتى من كوالالمبور هو ممنا و عارف حسنى عمل ايه و العدل انه يحكم عليه من اول جلسة و مع ذلك قلنا يأخذ حقه فى الدفاع ابتسامة العادلى و تلويح جمال و كلام علاء لا يوحى بخير
ربنا يستر
تحياتى

مدونة رحلة حياه يقول...

السلام عليكم
عارف يا مصطفى
لما قرأت بوستك بقى عندى مزيج من الاحاسيس والمشاعر المتضادة مش عارف اضحى ولا ابكى نسخر من الاوضاع ولا بتسخر مننا الاوضاع
عاملة زى ما تكون تمثيلية بايخة والادوار بتكرر بوجوه مختلفة
لن تخرج مصر من ازمتها حتى يقدم ابناؤها مصلحة مصر على مصالحهم الشخصية هذا رأيى

دعاء العطار يقول...

لو القضاء مجابش حقنا هتنقسم مصر وهتزيد الفتنه والاختلافات

اللى هيقولك القضاء كده مش عادل

واللى هيقولك مش مهم المحاككمات نركز بقى فى شغلنا

واللى هيقولك انتم عايزين ايه اكتر من كده

واللى واللى واللى واحنا مش هنخلص

انا عن نفسى مش متفائله خالص بمنظر المحاميين دول اللى يسد النفس وهطلهم ودهاء فريد الديب

مش بقول بجد غيييير ربنا يستر عليكى يامصر

Casper يقول...

انا قلت كل ما يجب ان يقال يا مصطفى
انا حابب اقول حاجة صغيرة
ان في وسط كل اللى بيحصل
انا مبقتش عارف اصدق مين ولا اقتنع برأي حد

======

على اية حال احنا متفائلين خير باذن الله
طالما فيه شعب بيتكلم وبيعبر عن رايه دايما

وطالما فيه محاميين كويسين للحق المدني يقدروا يجيبوا حق الناس

وطالما فيه ناس خايفة على البلد دي

==========

تحياتي

Casper يقول...

اقصد لما يبقى فيه محاميين كويسين
لاني متفق تماما مع تعليق الاخت دعاء
ان المحاميين الموجودين حاليا بالحق المدني
شكلهم بطيخ ومش فاهمين حاجة

ريــــمــــاس يقول...

مساء الغاردينيا استاذي مصطفى
( لوالقضاء محابش حقنا )
هذة العبارة بحد ذاتها موجعه
فكيف سيقبل الشعب المصري بهدر حقه ؟؟
الخوف ان يحمل المستقبل الخلافات والفتن ..ولكن ندعو الله سبحانة وتعالى ان يحمي مصر الحبيبة وأن تنال حقها وتكون المحاكمة عادلة ويارب أن يكون عيدها القادم سعادة وابتسامة ليست لمصر فقط بل جميعنا سنسعد بها
لا تجعل الإكتئاب يعرف طريقه الى صدرك وكون دائماً رفيقاً لقلمك لنحظى بفكرك الرائع ونشاركك مشاعرك الراقية "
؛؛
؛
لروحك عبق الغاردينيا
reemaas

سواح في ملك اللــــــــــــــــــه- يقول...

بص يامصطفي

اسماء هتخرج براءة

اثق ان المجلس العسكري لن يؤذيها

بس مبارك وقضيته دي امدها طويل جدا

ربنا يستر

افروديت يقول...

ازيك يامصطفي

اسماء عندها حق

لوميزان العدالة اتقلب
كل واحدلازم ياخد حقه بأيده

وأهلا بالسجون

ياسمين يقول...

أولا: أنا ضد المحاكمات العسكرية دي وبصراحة مينفعش ..كداا..!!
انا مش متابعة أسماء يعني لا معاها ولا ضدها
بس ف الموقف دا بالذات انا ضد انها تتحاكم عسكرية
ثانيا:فيه فرق شاسعة بين الدولة الدينية والمدنية مرجعية إسلامية ومدنية علمانية
الدينية يعني مفيش نقاش ..هو دا أمر ربنا ..وديني بئا محدش يناقش خالص ..زي إيران كداا دولة دينية وهي اصلا شيعية يعني ملناش ف حاجاتهم دي
أم احنا فإسلام بطبيعة الحال أقام دولة مدنية ...بس بمرجعية إسلامية يعني يكون فيه حكم الشرع..وكمان يكون فيه الرأي ..محدش يجبرك ع حاجة..
أم الليبرالية والعلمانية ..فصل الدين عن الدولة والدين يبقي ف المساجد بس...!!
ثالثا: موضوع المحاكمات
مفروض المحاكمات تكون عادلة بغض النظر الشعب عايز ايه؟!
احنا مش عايزين الا عدل ربنا
وانا متفاؤلة جداا

مصطفى سيف يقول...

سمسم
ان شاء الله يا باشمهندس
شكرا ليك منورني

مصطفى سيف يقول...

ابراهيم رزق
انا زيك اغلب كلامها مش بيعجبني بس اللي حصل كان لازم له وقفة لأن المجلس العسكري استباح الحريات
اما القاضي فلازم يلتزم بالادلة والمستندات واعظم القضاة على مدار التاريخ واولهم سيدنا عمر بن الخطاب لما حكم لليهودي في مخاصمته لسيدنا علي بن ابي طالب
الضمير موجود لكن يجب البراهين
تحياتي لك

مصطفى سيف يقول...

مدونة رحلة حياة
كلنا تمتزج بنا تلك الاحاسيس بين ضحك وبكاء
نتمنى غد افضل
تحياتي لك واشكرك

مصطفى سيف يقول...

دعاء العطار
صح يا دعاء لو القضاء ماجابش حقنا او اقنعنا هتبقى كارثة
وانا قلتلك اني متفق مع اسماء محفوظ في الجزئية دي
لو القضاء ماجابش حقنا هتبقى فتنة مسلحة فعلا
ويا رب نقابة المحامين تتخذ اجراء قوي مع محامي الادعاء المدني والا حق الشهداء هيضيع
تحياتي

مصطفى سيف يقول...

كاسبر
صح
احنا في زمن الكل فيه غير صادق وتضمر القلوب ما لا تنطقه الالسنة
اشكرك وتحياتي

مصطفى سيف يقول...

ريماس
من الصعب اختي العزيزة ان امنع الاحباط عن نفسي
اشكرك ومنوراني

مصطفى سيف يقول...

سواح في ملك الله
لا اشك لحظة واحدة من ان اسماء ستخرج براءة
وان كل ما يحدث مجرد قرصة ودن علشان غيرها يسكت
لكن الحكاية كلها مريبة والمجلس العسكري بقى مريب
تحياتي

مصطفى سيف يقول...

افردويت
انا الحمد لله بخير
انتي اخبارك ايه؟
مانا بقولك انا متفق معاها في الجزئية دي
تحياتي

رسالة الثوار يقول...

الفااجعة الكبري في الوقت الذي تحاكم فيه اسماء محفوظ امام محاكمة عسكرية يحاكم مجرم الحرب ومصاص الدماء حبيب العادلي امام محكمة مدنية

مصطفى سيف يقول...

ياسمين
اولا انا برضه ضد المحاكمات العسكرية للمدنيين برضه
ثانيا انا مقصدتش تعريفات بس بتكلم عن اللي بداخل التعريف ايه
يعني لو بقينا اسلامية هيبقى شكلنا ازاي من جوة والدستور ازاي ونفس القصة لو بقينا مدنية
اعتقد لو بصينا من جوة هنلاقي اغلب الحاجة متفقين عليها الطرفين والاختلاف في القشور
ثالثا انا برضه عايز محاكمة عادلة
اشكرك وتحياتي

مصطفى سيف يقول...

رسالة الثوار
اهلا بك في اولى زيارتك هنا
وصدقت اخي انها الفاجعة
تحياتي لك

سندباد يقول...

بغض النظر عن اختلافي مع صدامية اسماء دايما في اراءها انما الوضع كله اللي بيحصل عليه علامات استفهام كبيرة
ادعو الله ان يخيب ظني وظن المتشائمين امثالي
تحياتي ياصديقي

Tears يقول...

لا و اللطيف اوى انهم بيحققوا فى مصادر تمويل كفاية و ستة ابريل و مش شايفيين المقرات اللى بملايين بتاعه السلفيين و لا الاتوبيسات اللى لمتهم من المحافظات و لا الوجبات ولا الفلوس اللى بيرشوها من خلال تخفيض اسعار سلع و همم تلت اربعهم كانوا فى السجون...فلوس السعودية و اعلامها اللى رفرفت و تغطت على علم مصر فى جمعه قندهار مش لافته نظر مجلس مبارك

شمس النهار يقول...

النهاردة محمود سعد ويسري فودة روقوا المجلس بصراحة
الناس لازم تفهم ايه اللي بيحصل

الثورة بتتنشل

د/دودى يقول...

بص بقى هو صحيح انا ضد المحكمات العسكريه لكنى بجد بتمنى تحوليها لمحكمه مدنيه عاديه و فعلا تتحاسب على كلمها ...المفروض شباب الثوره يراعو ان الناس بقت تسمعهم و ان الكلام الثورى المطلق اللى كانوا بيقولوه بينهم و بين بعض مينفعش يتقال علانا دلوقتى...

اسماء قالت كلام حظر فعلا يودى فى داهيه لان كلامها بقى مؤثر فلما سيمع حد الكلام ده و يتحمس فعلا و يلجأ للعنف ...ساعتها يبقى ذنب مين؟؟

محمد الجرايحى يقول...

أخى الفاضل: د/ مصطفى
رغم كل مايحدث إلا أن هناك مساحة كبيرة من الأمل بداخلى فى غد أفضل بمشيئة الرحمن ....

Noha Saleh يقول...

انا هقولك رأيى فى نقطة القضاء

انا بشوف ان القاضى المفروض يكون بعيد تماما عن الرأى العام لانه المفروض بيحكم بأدلة وبيحكم بالعدل

انا مش بيعجبنى كلام اسماء محفوظ لكن مش بيعجبنى كمان انها تكون مظلومة

اما بخصوص الناس اللى بتتحاكم حاليا اللى هما مبارك والعادلى والشلة اياها
الناس دى عندها ثقة مستفزة وربنا يستر

Bent Men ElZaman Da !! يقول...

لازم يكون فى تفائل
والا هنموت من الاحباط :(
املنا فى ربنا كبير ان الوضع يتحسن عن كده ونبقى احسن ان شاء الله

غير معرف يقول...

ثقافة الهزيمة .. مغامرات البقرة الضاحكة

ما قصة لوسي أرتين؟
ـ لوسي أرتين كانت علي علاقة بالرئيس مبارك والعلاقة بدأت عن طريق زكريا عزمي وجمال عبدالعزيز، و كان فيه رجل أعمال مشهور بيحب يعرف مبارك علي فتيات من دول شرق أوروبا وحسين سالم كان متولي دول غرب أوروبا.

هل قصر الرئاسة كان يدار بهذه الطريقة؟
- القصر كان يدار بالسفالة والأسافين والنقار والقمار والنسوان وقلة الأدب ودا كل اللي كان شغلهم ومصلحة البلد بعدين .

هي سوزان كانت بتحس بالغلط اللي كان بيعمله الرئيس؟
- هي كانت مقهورة من اللي بتشوفه والنسوان داخلة طالعة قدامها واللي جايين من أوروبا الشرقية وأوروبا الغربية ومش قادرة تتكلم وبتبكي علي طول بسبب اللي بتشوفه وأحيانا كنت بأصبرها وأقولها مصر مافيهاش غير سيدة أولي واحدة، بس بعدها قرر الرئيس أن ينقل جلساته الخاصة في شرم الشيخ وبرج العرب

ھل تزوج علیھا؟
-لا ھو مش محتاج یتجوز .. البركة في زكریا عزمي وجمال عبدالعزیز. …باقى المقال ضمن مجموعة مقالات ثقافة الهزيمة ( بقلم غريب المنسى ) بالرابط التالى

www.ouregypt.us

zizi يقول...

يا مصطفى ..الصبر حلو ..

المجلس العسكري لا نشك في نزاهته ولكن لا تنسى يا مصطفى انه يتحمل مسئولية شعب متمرد "وهذا اقل وصف لهذا الشعب "..وتخيل انت لو اب عنده عيلين تلاتة متمردين يعمل معاهم ايه فما بالك ده شعب مش عاجبه اي حاجة ..دع الأمور تجري في اعنتها .ولا تبيتن إلا وانت خاليَ البال..

Tarkieb يقول...

انا باستغرب على كمية التعاطف معها ومش مع مايكل اللي كشف حقيقة الجيش واتسجن عسكري ولا حد فتح بقه....عشان كان مسيحي يعني؟...

الاحلام يقول...

لماذاوصل حال بلدنا الى هذا الحد اخى والى اين سنذهب انها فعلا ايام غايه فى السوء ولا ندرى هل الايام القادمه سوف تكون اسواء ام تتغير الى شىء اخر
تمنياتى بان يحفظ الله بلدنا ويبعد عنا كل سوء تحياتى ابوداود

مصطفى سيف يقول...

tarkieb
بالعكس انا مش متعاطف مع اسماء كشخص وانا باختلف معاها دايما في كل اللي بتقوله
ولو حضرتك قريت البوست هتلاقي اننا بقول ان انا باتفق معاها في الشق التاني وباختلف معاها في الشق الاول
وبعدين كلنا ضد اي حد مدني يتحاكم محاكمة عسكرية من زمان من ايام مايكل
مش من النهاردة
بس المرادي الاستفزاز والتعاطف كان اكبر علشان كان بيواكب في نفس التوقيت محاكمة رموز النظام مدنيا
يا ريت بلاش حضرتك تدخل الاديان والعنصرية في تعاطفنا علشان لو دورت مش هتلاقي حد زينا بيؤمن بحرية العقائد وحقوقها
احنا اتعاطفنا مع مايكل واتعاطفنا مع اسماء

وجع البنفسج يقول...

الفكرة انه احنا مع اسماء محفوظ كشخص ولا لأ ، الفكرة انه احنا ضد محاكمة المدنيين امام محكمة عسكرية ومحاكمة عسكريين امام محكمة مدنية ..
اسماء محفوظ غلطانة في كلمتها وفيها تهديد واضح للمجلس العسكري ، والثورجي لازم يكون اعقل من هيك ، وما ينجرش لشعارات رنانة علشان يكون هو حديث الساعة ..
""
بالنسبة لقانون الغدر ، انا سمعت الكلمتين هدول من يومين بس مش عارفة عن شو بيحكي .. بدي احاول اقرأ وافهم ..
:::

استمتعت بقراءة البوست كثير كالعادة .

re7ab.sale7 يقول...

مساء الورد يا دكتور
معلش بقي التأخير ده كله عشان امتحاناتي
اخيرا خلصت
شوف انا حاسة اني ف متاهة
اللي بيحصل ف البلد دلوقت كأننا ماشين في متاهه من بتوع الف ليلة وليلة
محدش عارف اخرها اية ....
ويا تري هنلاقي ف اخرها الحل والباب اللي هنخرج منه والا ......لاء
بتمني ....بتمني من كل قلبي وعقلي ان الظروف تتحسن ...انا بقيت حاسة باليأس اووي

موقع زواج يقول...

اللهم اجعل هذا البلد امنا
صدق الله العظيم

شكرا لك على هذا الموضوع الجميل