لو القضاء مجابش حقنا

يا حللولي يا حللولي ده ايه ده اللي بيحصللي

بيقولك اسماء محفوظ هتتحول لمحاكمة عسكرية قال  يا حلاوة يا ولاد  يعني مش عارف نهني انفسنا ازاي على الحدث العظيم اللي حصل ده

لما جمال مبارك يخرج من المحكمة المدنية وهو رافع ايده بعلامة النصر واسماء محفوظ بتبكي وتعيط علشان هتتحاكم محكمة عسكرية

فعلا كان يوم اسود في تاريخ مصر وربما تناقلته الاجيال وجايز بعد كام سنة كده يتعمل المشهد ده فيلم ويمثل دور جمال مبارك الممثل القدير جيمي عمرو مصطفى (ابن الفنان الكبيرعمرو مصطفى اللي هيبقى نقيب للموسيقيين وبعدها وزير اعلام وكمان وزير اتصالات واللي هيلغي فيسبوك وتويتر واليوتيوب  في عهد الرئيس الفنجري ابوصباع الرئيس السابع لمصر متسالوش عن الخامس والسادس)

ايام سودة عايشينها حاليا

 هل فشلت الثورة المصرية؟

سؤال سألته لنفسي زمان هل احنا عايزين مبارك واعوانه يتحاكمو محاكمة تفتيش ويتم اعدامهم وكده تبقى اشطا فلة شمعة منورة والشعب ينبسط والدنيا تبقى بيس؟

ولا يتحاكم محاكمة عادلة امام قضاء مدني

علطول جاوبت نفسي اننا كعرب اكتر ناس عانت من محاكم التفتيش في الاندلس  وانا ضدها حتى لو مكنش حقي هييجي غير بيها

 وانا مع محاكمة الجميع محاكمات عادلة قدام قضاء مدني حتى العادلي ومبارك من حقهم علينا اننا نحاكمهم محاكمة عادلة بالرغم اننا ماشفناش العدل على ايديهم بس احنا كشعب مش هنعاملهم زي الامعة ان احسنوا احسننا وان اساءوا اسائنا بل هنعمل  بالثوابت اللي مؤمنين بيها

علشان كده فرحت لما مبارك والعادلي اتحولوا للقضاءالمدني

طيب بس دول تعابين صعب نثبت عليهم حاجة واغلب الاوامر شفهية مش ورقية  <<<<. والله نسيبهم للقضاء ونشوف

طيب وبعدين

ولا بعدين ولا قبلين قاعدين مستنين المحاكمات ومنعرفش انها هتتحول لمحاكمات هزلية وسيبك من المحاكمات دلوقت اصل المغرب لسه مادانش واللهم اني صائم

ندخل بقى في الغويط بيقلك قال ان اسماء محفوظ هتتحاكم محاكمة عسكرية علشان بتنبه لو العدل لم يقام هتظهر جماعات مسلحة وتقوم بسلسلة اغتيالات

الغريب في القصة ان اللي اثار المجلس العسكري هو الشق التاني من الجملة مش الشق الاول يعني اللي ضايقهم هو ظهور جماعات مسلحة ومضايقهمش جملتها (لو القضاء مجابش حقنا )

على فكرة انا متفق مع اسماء محفوظ ان عدم اقامة العدل هيعمل فتنة اكبر وقد تكون فتنة مسلحة

بس اللي مستغربله محدش وقف قدام جملتها الاولانية (لو القضاء ماجابش حقنا ) الجملة دي خطيرة واهمالها من المجلس العسكري يخوف جدا او على الاقل خوفني

لما ييجي المجلس العسكري يجيب اسماء محفوظ ويحقق معها ويحولها لمحاكمة يبقى في لعبة ممكن تحصل وميتحققش العدل لأن الطبيعي ان الامور تمشي زي ما هي والقضاء يحكم حكم عادل وبالتالي الامور كلها بيس وزي الفل و مفيش داعي لمحاكمة اسماء محفوظ

يمكن انا مش مع اسماء محفوظ في جملتها (لو القضاء ماجابش حقنا ) لأنني شايفها ضغط على المستشار احمد رفعت قبل المحاكمة علشان يقول الحكم اللي على هوى الناس و ده يوديني لسؤال تاني 

القضاء المفروض يعمل ايه؟

يكون حكمه على هوى الشعب؟

يكون حكمه عادل ؟

يكون حكمه مطابق للقوانين والادلة حتى لو مكنش عادل؟

ده سؤال خطير جدا لأن القضاء عندنا هو تطبيق القانون وبالنسبة لناس مخضرمة زي مبارك ورفاقه نقدر نقول اننا مش عارفين نمسك عليهم ادلة دامغة في ظل كمان وجود محامين الشهداء اللي معرفش جابوهم منين

طيب والحل

قالولنا زمان ان في حاجة اسمها قانون غدر

اشطا زي الفل وكنافة بالمكسرات كمان

خلاص يا حاج يبقى مبارك افسد الحياة السياسية واعدامك المتين فين يا قضاء؟

استنوا استنوا

بس قانون الغدر ده ضد اهم ثابت من ثوابت ثورتنا وهو العدالة ده غير انها ترسيخ لمحاكم التفتيش

طيب ايه الحل؟

والله معرفش شايفها متقفلة طالما المحامين دول متمسكين بالقضية وكل همهم التعويضات مفيش حد فيهم بيدور على ادلة ادانة وكأن مبارك والعادل لو دفعوا دية محترمة يبقى تمام

لو عايزين نرسخ قواعد دولة قوية في المستقبل نشيل من عنينا نضارة الانتقام السوداء علشان نعرف نفكر كويس في طريقة عادلة نقيم بيها الحد والقصاص على قتلة الشهداء بطريقة عادلة

انما طالما اننا شايفين انهم لازم يتعدموا بدون تفكير بمحاكمة تفتيش من غير ادلة ولا نيلة يبقى احنا كده ما قمناش بثورة صحيح هيبقى اعدمنا مبارك بس هييجي بعد مبارك واحد تاني زي مبارك ويمكن اكثر طغيان منه علشان يقدر يوقف قوانين الغابة

يمكن كلامي ميعجبش ناس كتير

بس صدقوني احنا كمصريين جوانا معادن طيبة وجوانا ثوابت قوية لو مشينا ورا المؤمنين بيه بس هنلاقي حاجات كتير توحدنا

هنعرف نجيب حق اسماء محفوظ من المجلس العسكري

هنعرف نلاقي ادلة دامغة تدين الجبابرة

صدقوني لو جوانا بس مصلحة البلد و ينسى كل واحد مننا نه لازم يظهر في الكادر وقتها هنلاقي حلول

لكن طالما احنا دايرين في الساقية مغمضي العيون هنفضل بندور حوالين قشور تافهة وننسى الاصول

هتلاقينا بنقول مدنية ولا اسلامية بالرغم انا لحد هذه اللحظة مش فاهم الفرق بين الاتنين

يعني هل اللي بيقولوا مدنية مش عايزين يطبقوا المادة التانية ؟  .... لا بالعكس دول موافقين عليها

طيب واللي بيقولوا اسلامية  هل هم عايزين يرجعوا زمن الجزية وعدم تجنيد غير المسلمين؟  .... لا بالعكس

طيب ابوس ايديكم حد يفهمني الاختلاف بين المدنية والاسلامية علشان انا زهقت من الموضوع ده وجابلي اكتئاب وشايف انه ترويج لحاجات غريبة وناس عايزة تظهر في الصورة وبتقدم مصلحتها على مصلحة الوطن

اخواني اخشى عليكم من فتنة يكون القاعد فيها خير من القائم والقائم فيها خير من الماشي فارجو منكم التعقل والثبات

كان نفسي افضفض اكتر بس مش عايز اطول عليكم 

اتمنى مايجيش العيد الا لما تكون الامور احسن

باتمنى الاقي في نفسي القدرة على التفاؤل