حالة من القرف والاكتئاب جايالي مخلياني مش عايز اكتب اي حاجة في اي حاجة والاكتئاب زاد بعد ما ضغطت على نفسي وكتبت بوست طوييييييييييييل وبعدين ضاع بغلطة زر :( كنت مقرر مكتبوش تاني بس قلت اجرب لو باظ تاني مش هاكتبه
بمناسبة اننا في رمضان يبقى لازم ولا بد نسلي صيامنا
سلي صيامك يا بيه سلي صيامك يا استاذ
عندنا سبعين مسلسل يا باشا خليك معانا وستجد كل ما يسرك
بس انا ماليش في المسلسلات انا عندي زهايمر بانسى فطرت ايه افتكر ازاي سبعين حلقة لسبعين مسلسل
خلاص حلك عندنا يا باشا انت ممكن تتابع مسلسل واحد وتتفرج على ست كوم او مسلسل حلقاته منفصلة .. اوك يا باشا رمضان كريم
وسليت الصيام واختارت اشوف مسلسل الحسن والحسين قلت اشوف المسلسل اللي قناتي التحرير والحياة (المصريتين) اتحدت بيهم قرار الازهر بمنعه وعدم جواز تجسيد الصحابة المبشرين بالجنة و الحسن والحسين رضي الله عنهم اجمعين وبغض النظر عن صحة قرار الازهر اللي انا متفق معاه الا ان انا كصاحب قناة حتى لو مش متفق مع الازهر لازم ارضخ لتعليماته لأن الازهر لما بيعلا انا كمصري باعلى معاه ولما انا كمصري محترمش الازهر محدش برة هيحترمه (وجهة نظري وصلت؟)
المهم علشان مطولش عليكم اكتشفت في الاخر ان المسلسل ضعيف اخراجيا وسيناريو لأن اللي كتبه حاول استمالة قلوب الشيعة والسنة على حساب التاريخ في احداث تغاضى عنها علشان ميجرحش حد من الطرفين ودي مصيبة
بعدين ندخل على مسلسل كوميدي ومادام كوميدي يبقى لازم بيتريق على الصعايدة في ظل الركود الفكري لكل كاتبي المسلسلات عندنا يبقى لازم يكون كده سواء في مسلسل الكبير او مسلسل الزناتي مجاهد
آه الزناتي مجاهد مسلسل كاد ان يسبب لي عقدة نفسية فهو توضيح وترسيخ لفكرة الصعيدي الغبي الاهبل العبيط الساذج اللي ينزل العاصمة والكل يضحك عليه والمصيبة الاكبر انه مش لوحده العبيط لا ده كل بلده مجموعة من الاغبياء السذج وكأن الصعيد مافيهاش بني آدم عنده شوية مخ
المسلسل بعيد عن الاحساس بالعنصرية فهو يمكن ان يوضع في قائمة التفاهة واللي يتفرج عليه يبقى تافه والغريب ان انا برضه اكتشفت اني تافه علشان بتفرج عليه والاعجب اني باضحك كمان لحد حلقة الحزب الوطني لما اقتنع ان الفساد مصلحة للبلد واللي في الحزب بيحوشولنا فلوسنا في بلاد برة ولما اقتنع مجاهد ان الفساد هو الحل
وفرح انه فاسد واتصل بامه وقالها (انا فاسد يا اما )
وقتها مقدرتش اضحك معرفش ليه واتضايقت جدا وكنت ناوي اكتب بوست فيه تهزيء للمسلسل ونقد كبير لكن اكتشفت فعلا ان مجاهد معاه حق
لما حصل اللي حصل لممدوح حمزة في مؤتمره بقنا و واحد سلفي كان بيشوف هل مقاس جزمته هو نفس مقاس وش ممدوح حمزة ولا لاء؟ مالقيش طريقة غير انه يسدد جزمته بقوة (تقولش كابتن ماجد) في اتجاه وش ممدوح حمزة
وقتها استغربت انا قناوي وعارف لما يكون عندنا ضيف حتى لو تقيل بنعمل ايه معاه
لكن عمرنا ما كنا قللات الاصل او قللات الادب
يكونش التيار السلفي رسخ جوة الناس ان اي حد يعارضك تضربه بالجزمة؟
ماعتقدش ان دي اخلاق السلف الصالح وانا اعرف سلفيين كتير باجادلهم ويجادلوني بس في بيننا احترام
طيب ايه
طيب آه
الاخ ده جه منين وتبع مين؟
ممدوح حمزة قال ان الراجل ده فجأة دخل المؤتمر ورفع الحذاء ورماه طيب جه منين وتبع مين ده؟ محدش يعرف
طيب وهو ليه المؤتمر ده محدش سمع بيه واغلب اللي حضروه سلفيين بالرغم ان ممدوح حمزة من اكتر معارضيهم؟ هو المؤتمر سري وبس للسلفيين؟ محدش يعرف
وفي ظل كل الحاجات دي اللي محدش يعرفها واحد صاحبي قاللي ان الواد اللي رمى الحذاء ده مختل عقليا
قلتله اشطا كده الحمد لله بدون اي مجال للشك اكتشفنا ان النظام القديم قاعد زي ما هو وان اي مصيبة بيلبسوها المختلين عقليا
المهم ان ممدوح حمزة قال ان ده مأثرش على المؤتمر وكمله قال
فبلاش نجيب في سيرة الناس احنا في رمضان
وقالك ايه قالك آه
قرب يا استاذ قربي يا آنسة
بيقولك في قنا بلد المفاجآت رجع القائد المغوار سيادة اللواء ذو السيف البتار عادل بن لبيب الجبار
انا مش هاتكلم واقول المفروض ييجي او ما يجيش انا هاتكلم بلسان الناس اللي في الشارع
الناس اللي من حقها تتكلم بلسانها هي بدون النظر لأي تيارات او احزاب
علشان كده يمكن تتفاجئوا بكلامي بس انا هاقول اللي بيتقال ووجهات نظر الشارع مش وجهة نظري خالص
رجل الشارع القنائي متأكد تماما ان عادل لبيب فاسد وشارك في افساد الحياة السياسية وتزوير الانتخابات
لكن مع عادل لبيب مش هتقدر تغمض عينيك كل يوم جديد
النهاردة هنعمل كورنيش بكرة هنوسع مسجد سيدي عبد الرحيم بعد بكرة هنعمل بانوراما بعد بعده هنعمل صرف صحي بعد بعد بعد بعده قطر مخصوص آخره قنا علشان القنائي يلاقيله مكان في قطر وهو راجع من القاهرة (كان اسم القطر قطر عادل لبيب) بعد بعد بعد بعده هناخد جايزة من الامم المتحدة وقنا توصل للعالمية
يعني كل يوم جديد وكل يوم شغل صحيح الحاجات دي بتبقى رسوم على فواتير الكهربا بس على الاقل انت شايف بالرسوم دي انجازات قصاد عينك
يكونش الراجل مش نزيه؟ سؤال بيسأله الشارع لنفسه دايما لكن عادل لبيب ذكي شال اي شك من البداية في قنا لما اتعرض عليه من اكبر مطاعم قنا المجاور لمسجد سيدي عبد الرحيم القنائي رشوة كبيرة علشان يوقف التوسعات اللي هتقفل على المطعم الشارع وعادل لبيب بمنتهى الذكاء اخد الرشوة وحطها في ميزانية المحافظة وبعت جواب شكر لصاحب المطعم باسم المحافظة واكمل التوسعات زي ما كان مقرر ليها
بعد الموقف ده بقت في ثقة جبارة بين عادل لبيب والشارع مش بالساهل تتزعزع غير ان الراجل مش بيقعد في مكتبه ابدا في اي وقت ممكن تلاقيه في وشك بعكس اللي كان قائم باعمال المحافظة من بعد الثورة اللي منزلش من مكتبه يشوف الشارع وده خلى المواطن القنائي البسيط يسأل نفسه
هل انا عايز محافظ نزيه ومش شايف شغله؟
ولا محافظ فاسد وشايف شغله؟
طبعا في حاجة تالتة محافظ فاسد ومش شايف شغله (زي مجدي ايوب اللي كان مقضيها خمرة اليوم كله)
اما المحافظ النزيه اللي بيشوف شغله فالمواطن القنائي يراه زي الغول والعنقاء موجودين في نفس صفحة الكتاب ان لم يكن مستحيلا فهو نادرا ومادام نادر يبقى محافظة هي منفى للجميع لا يمكن ان يأتيها مثل ذلك الرجل
طبعا في ناس معارضين كتير لعادل لبيب زي ائتلاف شباب الثورة وكمان قبيلة من اكبر قبائل قنا هي الاشراف اللي كانت بتمني نفسها بمحافظ منها ولكن طبعا لو اي محافظ جه من اي قبيلة قنائية كانت هتحصل مشاكل كبيرة
في النهاية عادل لبيب يحصل على تأييد اكبر من معارضته
بالنسبالي انا قررت الصبر
هاصبر على الحكومة الجديدة لما نشوف اخرتها وهاصبر على عادل لبيب لما اشوف اخره
كفاياكم نكد
معلش رمضان السنادي كنت اتمنى يكون بداية وفاق واتفاق ووحدة واتحاد على كلمة واحدة هي مصر
لكن للاسف مش شايف اي حاجة تخليني اتفائل
رمضان كريم
انا آسف لتقصيري في متابعة التدوينات وزملائي المدونين
بس حالة احباط ان شاء الله تروح
غير ان رمضان وقته ضيق