الف مبروك للطفلة الزنانة

اولا كل عام وانتم بخير بمناسبة عيد الفطر المبارك  وربنا يعيده علينا بخير وسعادة

ويا رب اسمع اخبار حلوة كتير

ونصيحة متتقلوش في الكعك ويستحسن متاكلوش خالص ابقى ابعتولي الكعك اللي عندكم :)
ثانيا : تم قبول كتابي في مشروع النشر لمن يستحق عن دار ليلى

ثالثا :طبعا بتسألوا عن عنوان البوست اقولكم بقى

الطفلة الزنانة خلاص هتتجوز يوم الخميس الجاي ده مش هزار ده خبر بجد

اه هي مشهورة بكده طفلة زنانة ومش بتبطل زن واللي يعرف مدونتها اكيد عارف كده كويس

اسم الشهرة بتاعها  سكن الليل  ومدونتها اسمها وغدا (على فكرة وغدا يعني وبكرة احسن حد يقراها غلط هههه )

انا باتكلم جد ان شاء الله فرح سكن الليل الخميس الجاي   

الف مبروك يا اسراء  ده اسعد خبر سمعته الشهر ده

اخيرا هنخلص منك بقى و نرتاح من زنك :)

انا على فكرة اعرف اسراء من 4 سنين كنا مع بعض في منتدى واعرف كويس انها حافظة القرآن ومتدينة جدا وبتتمتع بحس جميل جدا ولها قلم بيعرف ينقل احساسها الطفولي كويس اوي

الف مليون مبروك تاني

وخدي عندك شوية صور تتماشى مع المناسبة السعيدة دي

ده طبعا حسن اكيد هيحاول يطفش :)

يا عيني عليك يا حسن :)

على العموم الف مبروك مش عايز اغتت اكتر من كده  بالرفاء والبنين وفعلا (الطيبات للطيبين والطيبون للطيبات )

معرفش الصراحة هتقدر ترد عليكم ولا لاء انتو عارفين طبعا العرايس  بيبقوا مشغولين ازاي في اسبوع الفرح

ربنا يتمم بخير يا اسراء

اللي ميعرفش اسراء انا هاجيبلكم خاطرة ليها

خاطرة سكن الليل

سكن الليل ؛؛

والسنا لملم ثيابا

وأسدل الستار

عن مشهد من عمري

من حياتي

عن سكوني

عن حلمي وهفواتي

وبقي الدمع في عيني سجين الانتظار

سكن الليل

ثارت شجوني

والآهة المكبوتة في جفوني

وأرق العين سكين الألم

والذكريات تدافعت

تلاحقت

تقاتلت

وكأنها يأجوج كانت

أو مأجوج

أو كلتاهما

هدمت قيودا من فؤادي

رفعت رايات الدمار

غادر النور

حل الظلام

والآن فتحت الستار

وخرج الأبطال

يحيون...ينتظرون أن أرفع يدي

أصفق

أهتف بهم

دمعا ودم

ووردة جارحة

وقذيفة من نار

الآن أعلنت الحصار

أوقفت عقارب الزمن

وركبت بحري

موجي العاتي

ونورسي

وزجاجتي...ورسالتي

والصَدفة الراسية على جزيرتي

تحمل دعائي

..أشواقي

مودتي

ذكرى صباي..ضفيرتي

وعروستي

هدية أمي

وعيون أبي

بسمة أخي

وصديقتي

أرسيت..وسماء من عجب

كوخ خشب

ومكتبي..وأوراقي......وقلمي وألمي

يروون حكايات الزمن

وهمسة الجدران حولي

صرخات وضحكات

رقية الطَيب

و تعويذة الساحرات

ومنديل معطر...

بدمائنا معا

والآن أسدلت الستار

وصوت المؤذن ..يرفع الأذان...أذان الفجر

ويعلن النهار



.


بقلم
سكن الليل
21/12/2007

تاج الثورة

اشكر صديقي العزيز sindbad صاحب مدونة فكرة على التاج :)

هل توقعت ثورة 25 يناير ؟

قطعا لم اكن اتوقعها بل لم اكن اتوقع ان تحدث في خلال عشرين عاما من الآن وزاد اعتقادي في ذلك بوصفي للشعب المصري انه مات ولن يقوم كتبت قصصا عديدة  عن سلبية الشعب المصري  وانه انتهى وان كل ما يهم المصري هو اسرته الخاصة اما القضايا العامة فلا تهم  اعترافي بذلك ليس شجاعة مني بل هو كي اقدم اعتذارا واجبا عن كل حرف كتبته ظلمت فيه ذلك الشعب العريق وهؤلاء الشباب الذين كنت اظنهم جيل تمورة والهضبة وابوتريكة وشيكابالا  عذرا يا شعب مصر وعذرا يا شباب مصر

هل كنت من ثوار ميدان؟ التحرير _ الكنبة _ الكمبيوتر _ حدد الميدان الآخر الخاص بك؟

ربما لا يعرف الكثير منكم ان حجم مدينتي صغير جدا من حيث المساحة لذلك بدأ خروج اهل مدينتي في جمعة الغضب 28 يناير تجمعنا في اكبر المساجد في بلدتي عند صلاة الجمعة لكن للاسف كانت هناك صلاة جنازة في ذلك المسجد وعندما تكون هناك جنازة فاهل البلد جميعا تخرج للمقابر وعندما عدنا بدأنا النضال كان الوقت قد اصبح عصرا عندما تجمعنا مرة اخرى لم يكن هناك في بلدتنا قوات امن حيث توجهوا للمدن الاكبر بجوارنا الذين خرجوا من صلاة الجمعة لذلك كانت الثورة اسهل عندنا فاسقطنا مقر الحزب الوطني واحرقنا صور مبارك وتمادى البعض في تطرفهم من تكسير عربات رئيس مجلس المدينة  وقرروا الذهاب لاشعال النار في قسم الشرطة حيث لا توجد اي قوات تذكر كان ذلك بعد المغرب وبالفعل عندما بدأ اشعال النار في القسم خرجت الاهالي كلها اطفأت الحريق وطلبت من الشباب التوقف عن ذلك التطرف الاعمى وقام الاهالي بعمل دوريات مسلحة واشدد على كلمة مسلحة فالسلاح متواجد في اغلب البيوت في الصعيد قام الاهالي بعمل دوريات مسلحة لحماية قسم الشرطة بعد ان مضوا تعهدا للمامور بحمايته (لن تجدوا ذلك في اي مدينة اخرى في مصر غير مدينتي) بعد ان انتهى الامن واصبحنا نحن من نحمي قوات الشرطة لم يخرج الاهالي في ثورات الا بعد الوقفات الاحتجاجية على انغام الدي جيه في شيء اجواء احتفالية اكثر منها ثورية بعدها وفي جمعة التنحي نزحنا لقنا كي نشاركهم في الثورة من هناك هذا بالنسبة لمشاركتي الميدانية بخلاف اللجان الشعبية لكنني كنت مشارك طبعا عن طريق الكمبيوتر طوال الوقت

مالم تنجح الثورة في تحقيقه هو...... اختار شيئا واحدا؟

الثورة لم تنجح في ترسيخ مفهوم الديمقراطية في نفوسنا فظننا ان الحريات بلا حدود وهذا ربما قد ادى لبعض الفوضى

أكثر شىء فرحك في هذه الثورة هو...... اختار شيئا واحدا؟

اكثر ما اسعدني هي السلوكيات التي تحلى بها الشعب المصري خلال الثورة لو نظرنا للميدان سنجد جميع فئات الشعب تناسوا خلافاتهم سنرى شبابا كنا نعدهم بالسلبيين يزودون عن بيوتهم واهليهم في لجان شعبية

الشخصية التي أعجبتك خلال الثورة؟

كل من شارك في هذه الثورة وقدم مصلحة الوطن على مصلحته الشخصية يجب ان نرفع له القبعة ويجب ان يعجبني ولكن كان يعجبني اراء عمرو حمزاوي خلال الثورة

الشخصية التي احتقرتها بسبب الثورة؟

كثيرون ولكن اخص منهم طلعت زكريا وسيد على وكل قناة المحور

أطرف ما سمعته خلال الثورة ؟ تعليق _ نكتة _ حدث _ أخرى

النكت عديدة وكلها رائعة منها ارجع يا ريس كنا بنهزر معاك الكاميرا الخفية

وارحل انا عايز اتجوز بقى

القناة التي تابعت من خلالها أحداث الثورة هي؟

بي بي سي - الجزيرة - العربية بهذا الترتيب

الجريدة التي كنت تقرأها لتتابع الثورة هي؟

هو لسه في حد بيقرا جرايد؟

الكاتب المفضل خلال الثورة هو؟

كنت اتابع مقالات بلال فضل وعمر طاهر

المذيع (المذيعة) المفضل خلال الثورة هو؟

ريم ماجد

كلمة تقولها لشهداء وجرحى 25 يناير؟

اغبطكم اخواني واتمنى ان الحق بكم واتمنى انكم نجني ثمار ما صنعتم وان نحقق الهدف من تضحياتكم بأن نستطيع ان نرفع رأس هذه البلد عاليا اتمني ان تكونوا راضون عنا وألا تضيع دمائكم هباء

متقولش إيه إدتنا مصر وقول حندي إيه لمصر عندك حاجة تديها لمصر؟

لن ادخر جهدا لها فروحي فداها

من سترشح لرئاسة الجمهورية ؟ ولماذا؟

صاحب البرنامج الافضل هو من سأرشحه لذلك لم تتضح الصورة ولن تتضح الا بعد قراءة جميع البرامج وفحصها جيدا

لو أصبحت رئيسا لمصر ما هي أول ثلاث قرارات لك؟

ياااااااه كتبت بوست كبير اوي عن ده قبل كده بس لو 3 قرارات بس يبقى

1- تحقيق سيادة القضاء كاملة (ده اهم قرار فالقضاء هو حصن العدالة وبلا عدل لن تقوم البلد)

2- مراجعة كل الاتفاقيات الخارجية وتعديل مسارها الى ما فيه مصلحة البلد

3- القضاء على الفساد في كل الوزارات بكل صوره

لو أعطوك نصيبك من المليارات المسروقة..ما توقعك أن يكون نصيبك منها وماذا ستفعل بهذا المال؟

والله معرفش بالظبط كام بس هيبقى مبلغ محترم اوي بس وقتها الناس كلها هتبقى معاها نفس المبالغ وبالتالي الحاجات كلها هتزيد بس هاشتري حتة ارض اعمل قدامها جنينة احط عليها كنبة واسرح في ساعة العصاري مع كوباية شاي وقتها هاحس ان مفيش حد عايش في الدنيا غيري

أمرر هذا التاج إلى

بصراحة مبحبش امرر بس يلا معلش نغتت على الناس وخلاص مادام مطلوب مني تمرير التاج

امرره

للاخت / ام هريرة (lolocat)

الاستاذ / محمد الجرايحي

الاستاذ / ابراهيم رزق

تبرعوا له بالدم

اعتقد انه وضح للجميع ان الرئيس السابق حسني مبارك معندوش ريحة الدم

قاعد ومتبت فيها بايديه وسنانه بالرغم انه شايف ان مفيش حد طايقه

امبارح بيقول انه عايز البرلمان يعدل الدستور؟

ايه الاستهبال ده لما احنا صوتنا ضاع واحنا بنقول ان البرلمان ده باطل والله باطل يا حسحس

ازاي برلمان باطل يعدل الدستور هو احنا هنسلم القط مفتاح الكرار؟

والبيه جاي بيقول انه مش طالب سلطة ولا عمره كان طالب سلطة؟  هو انت ناوي تاكل الكباب من غير سلطة؟

يا راجل حل بقى عن سمانا كفاية عليك تلاتين سنة

سيبنا بقى نجرب نعيش حياة من غيرك انت مش فيها ريس يمكن نفشل او ننجح بس على الاقل مش هنحس اننا بنتسرق اننا بنستعبد

هنحس اننا احرار

مجبش سيرة حبيب العادلي ومعاقبة السبب في الفوضى والسلب والنهب

بالعكس قال اختاروا بين الفوضى والاستقرار

اعتقد هو اللي ادان نفسه وان الفوضى دي حصلت في عهده هو مش حبيب العادلي ده وزيره؟

مش هو سبب الفوضى اللي احنا فيها دلوقت؟

الاستقرار مش هيحصل في مصر غير لما طيارتك تغادر البلاد لاي داهية واحنا  لاول مرة نختار بعدها ريسنا بعد ما كان فرض علينا

عجبتني كلمة اردوغان لما قال ان الانتخابات اللي معروفة نتيجتها مسبقا مش انتخابات وده فعلا اللي كان بيحصل في البلد دي على طول فترتك الرئاسية

تزوير الانتخابات تكميم الافواه اعتقال منافسيك في انتخابات الرئاسة اللي لحد دلوقت بتذلنا علشان خليتها انتخابات بدل استفتاء على اساس انك بتتفضل علينا باقل حقوقنا

وبعدين انت جاي تقولنا انك مكنتش ناوي تترشح تاني بطل كدب بقى حتى لو مكنتش هتترشح فكان جمال هيترشح

احترم عقولنا ياخي

احنا مش شوية ناس عبيطة زي زمان  كنت هتضحك عليهم بكلمتين

خلاص احنا عرفا وفهمنا وقرينا وشفنا

مبقيناش زي زمان

انت لو عندك ريحة الدم تحس ان في ناس ضحت بكل ملذاتها و عرضت حياتها للخطر والموت ورضيت انها تقعد في ميدان التحرير تبات في عز البرد  تسع ايام بس علشان انت تمشي

معتقدش ان في حاجة ممكن ترجعهم بيوتهم غير رحيلك عن البلاد

نفسنا بقى نختار

عايزين نختار

 عايزين نقول ده كويس عايزينه وده وحش مش عايزينه

نفسي احس ان صوتي مهم وان ليا اهمية في البلد دي

واني مخير فيها مش مسير

ارحل بقى

ماهو يا انت يا احنا في البلد دي

ومعتقدش ان 80 مليون ممكن يرحلوا علشان واحد بس يفضل فيها

يامن لعرضي هتك فقدت شرعيتك

من ربع قرن كئيب لعنتها طلعتك

اموالنا لك حل فملا بها جعبتك

خلف الحراسة دايما مستعرضا قوتك

تبدي مظاهر عزا تخفي بها ذلتك

سلاح جيشك درع تحمي به عصبتك

مع العدو كليل لكن بشعبي فتك

سواد قلبك باد فاصبغ به شيبتك

ياتيك دعم عدوي فاصلب به قامتك

سجدت للغرب دوما مستبدلا قبلتك

بادمعي ودمائي كتبتها قصتك

خذلت كل شريف حتي غدت لذتك

وكل ابناء شعبي قد شاهدت قسوتك

وكم منحت لصوصا يا قاسيا رحمتك

تعطي لنسلك ارضي ممارسا سلطتك

كان ارض جدودي قد اصبحت ضيعتك

لا شك موتك ياتي مستاصلا شافتك

يوم الحساب قريبا تري به خيبتك

يوم المنصة حقا فخذ به عبرتك

هذه الجموع يقينا ما جددت بيعتك ما جددت بيعتك

فخور بشعبك يا مصر

بصراحة مش عارف اقول ايه

من زمان اوي محستش بالفخر اني مصري زي اليومين دول

كنت فاكر ان الشعب ده ميئوس منه وانه انتهى لكن بالعكس النهاردة عرفت ان المصري ممكن يصبر ويستحمل لكن وقت ما يغضب ينفجر بركان

انا سعيد جدا ان وجهة نظري كانت غلط واني كنت باصص لنص الكوباية الفاضي

صدق الرسول عليه الصلاة والسلام لما قال ( اذا فتحتم مصر فاتخذوا منهم جندا كثيفا فانهم خير اجناد الارض) خير اجناد الارض لانهم صبورين خير اجناد الارض لانهم صمودين بيستحملوا لكنهم وقت ما يغضبوا بيبقوا في شجاعة الاسود

رغم الذل والهوان رغم ان اغلب الناس اللي اتظاهرت مشفتش اي نظام تاني غير الحالي

رغم تلاتين سنة عايشين زي الاعمياء حياتنا كلها ضلمة

الا انه حصل ان في 100 الف واحد وسط الضلمة شايلين شعلة نور وبيقولوا لسه في امل

هنستنى ايه تاني؟

يا رب ما تطفي شعلتنا دي ابدا

يا رب قويها وبدل ما تكون 100 الف شعلة يا رب خليها 80 مليون شعلة

انا بقولها وكلي اعتزاز انا مصري

يا رب نكمل اللي بدأناه

ويا رب قوينا علشان نكلل مجهودنا بالنجاح

يا رب اعنا

يا رب اعنا

يا رب اعنا

ومش لاقي حاجة ممكن تتقال غير قصيدة هشام الجخ ( كان يوم مطر) يمكن تقوي عزيمتنا وتحسسنا انه مهما كانت النتيجة مادام بنعمل الصح اكيد ربنا هيوفقنا

وبغض النظر عن اي نتيجة ممكن تكون انا فخور و سعيد ان شعبنا اثبت لكل الطغاة والفاسدين انه مامتش وانه في اي وقت هيطلع المارد اللي جواه وان كراسيكم مش دايمة

اتمنى نكمل المشوار بنفس الروح لحد ما الغمة تنزاح

اسيبكم مع القصيدة

كان يوم مَطَر .
.
البغبغان جُوَّا القَفَص طَلَّع لِسانُه لعصفورين فوق الشجر .
.
خَلِّيكو سايقين العناد ..

العِشّ قاد ..

وخسِرتُو ويَّاه الولاد .. لَـمَّا انفَجَر ..

هو انتو حِمْل السِيل ؟؟ ولا حِمْل المطر ؟؟

كان فيها إيه لو تِعْمِلُوا زيِّي وتقولوا زَيّ ما يقول البَشَر ؟؟

ردُّوا علِيه العصفورين : لَوْ عَ الوِلاَد .. البَطْن ولاَّدة .
.
والعِشّ مَهْمَا يقِيد ..

صخر الجبل عَنَاقِيد ..

نِفْرِشْهَا سِجَّادة ..

وانتَ اللي فرحان بالقَفَـص ..

أصْلَـك ( قَفَص ) !!..

كَتَمُوا الهوا جُوَّاك و نَسُّوك ان ما بين الحياة والموت .. نَفَس ....

لو كنت مسئول ( واجب مدونة المدينة الفاضلة )

بصوا بقى بما اني شطور ومبحبش اخلي اي واجب عليا وعلشان عارف نفسي  مادام مطالب اعمل حاجة هافضل قلقان وافكر فيها قلت اتكل على الله واحل واجب اختي الفاضلة / ام هريرة

استعنا على الشقا بالله

لا استنوا لو هابقى مسئول في البلد دي ليا مطالب

اولا انا مش باطيق عيشة القاهرة يعني لو وافقتوا ابقى مسئول عن وزارة او رئاسة مجلس وزراء هيبقى مقرها الصيدلية بتاعتي مانا مش هاسيب الصيدلية واقفلها علشان وزارة اخرها تغيير وزاري بعد ربع ساعة

ثانيا مش عاجبني العلم مش قصدي الالوان لكن قصدي الطائر العجيب اللي فيه اللي بيسموه نسر  النسر يا اخوانا بيدل على الجبن في رايي بياكل الجيف ومش بيقدر ياكل غير بعد ما الاسود تخلص اكل  زمان اول الثورة كان الرمز هلال ونجوم وفعلا كان نجمنا ساطع في البداية بعدين بقى رمزنا صقر والصقر جريء وقوي وتحت شعار الصقر بجرؤته انتصرنا في حرب اكتوبر لكن النسر ده من سنة 1984 علمنا الجبن زيه اعتقد كل بلد بتاخد من رمزها هتقولولي سعادتك (ايوة طبعا سعادتك انا مسئول) تحب ايه على العلم مش هاقولكم تويتي زي احمد عيد ولا هاقول رجعوا الصقر (بصراحة صعب رسمه) اختاروا حاجة سهلة وتكون رمز لينا زي الاهرامات او نخلة او غصن زيتون


لكن نسر ايه بس ده انا فضلت من اولى ابتدائي لحد تالتة اعدادي مبعرفش ارسم العلم بسبب النسر

هتقولولي طلباتك كترت هاقولكم يا كده يا يفتح الله

على العموم علشان مطولش هادخل في الواجب الاول هتبقى في حاجات ثابتة في كل مسئول هاكتبها مجمعة علشان مكررهاش دايما

اول حاجة  هاخلي كل مكاتب الوزارة من غير ادراج وأجبر كل موظف ييجي الشغل ببدلة من غير جيوب والسيدات لو لازم ييجو بشنطة يسيبوا شنطتهم على البوابة علشان اللي حابب ياخد رشوة ياخدها عيني عينك قدام الناس كلها لانهم اولا هيجيلهم يوم يتخانقوا مع بعض ويفتنوا على بعض

 ثانيا لو اكتشفت ان في رشوة اجازي المصلحة بالكامل

ثانيا : مسابقات التعيين لازم يكون اي وزير عضو في لجنة الاختيار ويشرف على الاختبارات وطريقة الاختيار بنفسه ولو اكتشف اي تلاعب انتو عارفين طبعا يعمل ايه

ده بقى الحاجات المشتركة

نفصل بقى

رئيس مجلس الوزراء

خلاص يا اخوانا بقيت رئيس مجلس وزراء (الف مبروك يا درش) قراراتي بقي اول حاجة  عدم اختيار اي وزير رجل اعمال الا اذا باع كل شركاته مش اجيبه النهارده يخليلي كل تاكسيات العاصمة شيفروليه ويشغل نفسه بنفسه

ثانيا اي اتفاقيات مع اسرائيل حصل قبلي اعتبرها ملغية لو مقدرتش على الاقل مجددهاش واحاول اعيد النظر في الاتفاقيات القديمة اللي فيها ضرر على مصر زي اتفاقية الغاز

ثالثا شعبي الحبيب المهاود يا سلام وانا ليا مين غيركم عمو نظيف كان هيخلي الحد الادني للاجور كام ؟ 400 جنيه مش كده؟ خلاص ولا يكونش عندكم خبر هازودكم هاخليها 500 جنيه مرضيين؟ اهو اكتر من 1000 دولار سنويا عايزين ايه تاني ؟ بتقولو ايه؟ لا مالكمش دعوة بقناة السويس دي يدوب تطلع مرتبي انا والبارتيتة بتاعتي وبعدين لو فكرتم تعملوا اعتصام علشان الخمسمية جنيه دي معتقل الوادي الجديد فيه متسع للجميع يشيل 80 مليون واكتر وبعدين اصلا مش هتعرفوا تعملوا اعتصام مانا واعي وخليت مقري في بلدي واهلي الصعايدة هيحموني قبل الحكومة

رابعا هاطلب من الجهاز المركزي للمحاسبات يفتش شهريا على كل الوزارات مش سنويا بعد تظبيط الدفاتر

وزير الدفاع والانتاج الحربي

انتي ضمتيهم في وزارة واحدة؟ مش مشكلة اصلا بتاع الانتاج الحربي مش فاهمله فايدة غير تصنيع البوتاجازات ونادي الانتاج الحربي اللي بيلعب في الدوري خلينا في بتاع الدفاع كنت عايز اقول كلام كتير عنه بس للاسف مش هينفع كنت عايز اتكلم عن فترة تجنيدي بالتفصيل وافضفض بس مينفعش

خلينا في العموم اول حاجة الغي سلاح الشرطة العسكرية ما يليقش بعسكري مجند المفروض له قيمته واحترامه في البلد اللي بيحميها لما يشوف عسكري شرطة عسكرية يفضل يجري لحد ما الست بتاعت الجرجير تقوله ادخل البيت ده استخبى (بيصعب على بتاعت الجرجير) وبعدين لما يمسكه بتاع الشرطة العسكرية يقوله : انا كويس ولابس تمام وماخطئتش  بتاع الشرطة العسكرية يقوله : معلش يا بيلدي (بيلدي كلمة ماسمعتهاش غير في الجيش بمعنى بلدياتي) بس انت عارف اجازتنا بعدد الاورنيكات

طيب ما بلاها شرطة عسكرية واللي في الشرطة العسكرية نحولهم للمخابرات العسكرية والامن الحربي على الاقل بتاع المخابرات بيلبس ملكي ومش هيفضل العسكري يجري ويهين كرامة الجندي

ثانيا : هادرس ملف ابو غزالة كويس اوي وايه اللي كان بيعمله واحاول ابدا اللي عمله تاني من اعادة هيبة للعسكري ومحاولة تطوير للجيش باسلحة جديدة

كفاية كده كان نفسي اقول كلام كتيييييييييييييييييييييييييييييييييييير في النقطة دي بس صدقوني مش هينفع

وزير المالية

هالغي ضرايب العقارات وضرايب المرتبات للموظفين وضرايب المبيعات (ايه انواع الضرايب دي كلها )

هالغي قرار الاعفاء الضريبي العشر سنوات عن اي مشروع استثماري ولو  مقدرتش لازم اخد ضمان من صاحب المشروع انه هيفضل شغال بعد العشر سنين دول شغال لان اغلب المشاريع دي بتشتغل العشر سنين بتوع الاعفاء وبعدين كل سنة وانت طيب واعتبر اكتر من 300 اسرة كانت في المشروع اتشردت

كفاية على وزير المالية كده

وزير الدولة للشئون القانونية والمجالس النيابية

هو بيشتغل ايه بالظبط يعني؟ بيدرس القوانين مش كده؟

لا مش حابب الشغلانة دي الغوها من الوزارة

وزير الداخلية

والله بقيت وزير داخلية يا ابو درش (هانيمك  من المغرب يا صين )

هاشيل يافطة الشرطة والشعب في خدمة الحكومة هههههههه

واخليها الشرطة شغالة عند الشعب بفلوسه اللي بيدفعها في الضرايب

هاطلب الغاء قانون الطوارىء 

الظابط اللي ييجي فيه شكوى من مواطن لو ثبتت صحتها هانقله حلايب

اه في حاجة مهمة دي علشاني هاعمل تامين اكبر لطريق الغردقة الاقصر علشان الافواج السياحية تمشي فيه بدل ما بتعدي في وسط بلادنا ويوقفولنا المرور فترات طويلة (عملوا الطريق الجديد بس بيقولو مش امان علشان كده بقى الطريق الرسمي لتجار السلاح والمخدرات )

لما يتم القبض على مهرب اثار هيتم تسليمها للمتحف مش يبيعها الظابط ويقسم مع المهرب ونكفي على الخبر ماجور

وزير البترول

هاوصل الغاز لكل بيت مصري وامنع تصديره لاسرائيل

هاحاول توفير وظايف عمل

توفير انابيب بوتاجاز

وزير الطيران المدني

اهتم اكتر حاجة بصيانة الطيارات لان اغلبها قديم

وزير البيئة

بص بقى معايا اقتراح جامد اي  مصنع يخالف ارشادات حماية البيئة في اسلوب الصرف او خلافه مش هاقولك يتقفل المصنع لان الناس اللي شغالة مالهاش ذنب كل اللي يحصل اننا نصادر المصنع لحساب الدولة

ثانيا توفير سلة زبالة على كل عمود نور ولو ورقة اترمت في الشارع يبقى تتوقع غرامة جامدة (الله يمسيك بالخير يا عادل لبيب كان فيها 100 جنيه غرامة على ايامه )

بالنسبة للسحابة السودة وقش الرز اكيد هالاقيلها حل

وزير الشباب

هو ايه فايدته اصلا  الراجل ده؟ يا عم شغلوا الشباب بدل ما تعملولهم وزارة

وزير الاستثمار

اهم حاجة عند انشاء مصانع او مشاريع جديدة متابعة تعثر صاحب المشروع ولو اتعثر مرتين ماتديهوش قروض تاني بياخد الفلوس ويهرب ويا ريت تتسهل اجراءات انشاء مشاريع جديدة

وزير التجارة والصناعة

هاعمل حاجة واحدة بس هابعت بعثات للصين يتعلموا ازاي الصينيين بيبيعو المنتجات دي بالجودة دي اللي ممكن تكون احسن من المصري باقل من نص سعر تكلفة المصري

مصانع كتير بيتها اتخرب بسبب الصيني

وزير التربية والتعليم

شغلانة خطيرة مكنتش احب اشتغلها علشان مصير جيل كامل متعلق برقبتي

هاحاول ازود من تفكير الطالب وبحثه عن المعلومة بتغيير المناهج واخلي الطالب نفسه يحب المادة  علشان التشويق اللي فيها وازود مجالات الابداع علشان يقدر يواجه الحياة بعقلية متجددة معرفش طريقة حاليا تعمل كده بس اكيد لو كنت وزير كنت هالاقي طريقة

وزير الزراعة والاستصلاح الزراعي

هاقدم مشروعات لزيادة رقعة المساحة الزراعية الافقية والرأسية

مش  هستورد اي كيماويات او اسمدة من اسرائيل

هاعمل لجان تشرف على التقاوي دايما وتختار احسن السلالات

وزير القوى العاملة

هاحاول على قد ما اقدر اشغل المؤهل المناسب في المكان المناسب

وزير الموارد المائية

اول حاجة هاشوف صرفة مع اثيوبيا ودول منابع النيل دي اهم حاجة حاليا ثانيا هاحاول شق ترع لاستصلاح الصحراء

وزير الاوقاف

اولا هابطل ادي ائمة المساجد مواضيع الخطبة اللي هتتقال الاسبوع ده وكل واحد يختار الموضوع اللي على مزاجه

ثانيا  هاسيب المساجد مفتوحة اربعة وعشرين ساعة ده بيت ربنا ازاي اقفله

ثالثا عند اختيار ائمة المساجد هاراعي الناس اللي فاهمة في الدين كويس لان امام المسجد يعتبر المرجع الاسلامي في منطقته

رابعا هاعمل كتاتيب في المساجد لتحفيظ القران

وزير الكهربا

هاحاول باي شكل ابدا في مشروع مفاعل الضبعة لان واضح ان النيل هتبقى فيه مشكلة والسد مش هيقدر يولد كمية كهربا تكفي يعني لو الضبعة ماتعملش لا هنلاقي لا مية ولا نور في البلد لازم اتصرف ان شالله اشحت علشان مفاعل الضبعة يبدا

ثانيا كل شهر بيزيد تمن الكيلو وات بطريقة غريبة منتهى الجشع

وزير الاعلام

هاقفل كده كام قناة من نفسي 

في كلمات قبيحة كتير بدات تظهر في القنوات هاعمل جزاءات جامدة لمحاولة الانضباط

وزير الخارجية

هاطلب عمل سفارة في فلسطين وابقى اول دولة في العالم اعترفت بفلسطين كدولة

هاطرد السفير الاسرائيلي من مصر وهاجيب سفيرنا من هناك

بالنسبة للمصريين المغتربين هاحاول اساندهم علشان يحسوا ان لهم بلد بتسال عنهم مش ناس رمياهم في بلاد غريبة تتهان كرامتهم ويسكتوا

وزير الاتصالات

هاخلي اقل سرعة للانترنت في مصر 2 ميجا وهتبقى بسعر ال 512

هالغي حكاية الانترنت المحدود دي للابد

واحتمال اقفل تي داتا (لسه في طور الدراسة )

وزير الاسكان والمرافق

المشاريع الجديدة والشقق الجديدة هاحاول اراعي ظروف المتقدمين قبل ماختار النتيجة واسلمهم الشقق

هاحاول اعمل مدن جديدة

وزارة التعليم العالي والبحث العلمي

تقدر حضارة الدول بالبحث العلمي علشان كده بتوصل ميزانية البحث العلمي في بعض الدول الي 25%

طبعا في مصر مفيش بحث عملي

لو كنت وزير البحث العلمي كنت عملت مجمع بحوث في كل محافظة وبعتت بعثات برة يتعلموا ويرجعوا يطبقوا اللي اتعلموه

وزير التضامن الاجتماعي

مش ده برضه بتاع التموين؟

هارجع الشاي تاني للتموين (قال الشاي قال سلعة كمالية)

هاضيف اي مولود لبطاقة التموين

بالنسبة للاسعار لازم اشوفلي حل مع اللحمة اللي كل يوم في الطالع

وزير النقل

هاحاول بشتى الطرق زيادة عدد القطارات حتى لو كان عن طريق زيادة الخطوط

بالنسبة للصعيد بالذات القطار هو وسيلة المواصلات الاهم اللي بتربط الصعيد ببحري

هاحاول تامين السكك الحديدية علشان متجيش بقرة تاني تقلب القطر

بالنسبة للطرق العادية هاحاول ائمنها واتاكد من وجود اللافتات الصحيحة في المكان الصح (علشان دي مهزلة)

وزير السياحة

هافهم الناس كلها ان للبلد دي ابناء  وان السياح دول مجرد ضيوف على عيننا وراسنا بس ماهينش ابن البلد علشانهم

وزير العدل

كلنا بنثق في القضاء المصري بس نتمنى احترام القضاة للمحامين اكتر ده مهما ان كان زميل كلية الفرق بينه وبين القاضي ده ابوه قاضي وده ابوه فلاح

ثانيا بالنسبة للشهر العقاري عايزالها قعدة  اي حد بيحاول يخلص اي حاجة في الشهر العقاري مبتخلصش من الزحمة وضيق صدر الموظفين

وزير الصحة

كويس سايبهولي في الاخر علشان احلي بيه

اول حاجة هالغي كل القوانين اللي عملها اللي اسمه حاتم الجبلي هارجع كل حاجة زي ما كانت واعتبر فترته كأن لم تكن

ثانيا هاحاول اعمل عدالة بين الصيادلة والاطباء اللي بيشتغلوا في وزارة الصحة

ثالثا قانون التامين الصحي محتاج دراسة واعية جدا جدا علشان يحقق المرجو منه

رابعا العلاج على نفقة الدولة هاعمله شروط جديدة واشيل يد اعضاء مجلس الشعب منه هاخليه من الجمهور ليا علطول

خامسا شركات تصنيع الدواء هابعتلهم تفتيش اسبوعي علي التشغيلات

سادسا  تفتيش اسبوعي علي المستشفيات الحكومية

كفاية كده تعبت

شكلي رغيت كتير يلا بقى فوتكو بعافية

اتمنى انني كنت ضيف خفيف