الجمعة، 4 أكتوبر، 2013

مذكرات واحد مخنوق



عزيزي زائر المدونة و مشتركها و قارىء بوستاتها محدثكم مصطفى سيف يعيش فترة رهيبة من المرض و التعب و القرف ، من كام يوم نزلت بوست اسمه كورتيزون و شيلته تاني كنت بقول فيه ان الضغط بتاعي وصل 190/120
و مكملتش زي عادتي و مش باتكلم عن حياتي العادية اللي عايشها و ساعات باحس اللي بيتكلم كتير عن نفسه ثرثار 
يعني الحكاية دي كانت فيا لدرجة ان اليوم اللي رحت في اقيس الضغط كان في صيدلية واحد زميل  هو من اللي بيحترموا الاخوان بس مش منهم و كان مشغل الجزيرة مباشر المهم البيه و هو بيقيس ضغطي مكنش مصدق وقاللي : انت ازاي ضغطك 190/120 ، داللي زيك اصلا يبقى ضغطه واطي دانت طول عمرك  .... و سكت 
كملتهاله بابتسامة علشان الاحراج خصوصا ان في ناس قاعدة : بارد ، قولها متتكسفش 
كنت منتظره يقول لا يا راجل مش قصدي  ، لكن قلبك مريحك ، مكبر دماغك كده يعني  أي كلمتين متخليش الناس فكرها يروح لبعيد
لكنه سكت  آه و الله سكت كأنه بيأكدها 
الحكاية في الاساس مش مهمة بالنسبالي المهم ان الراجل اللي يعرفني من عشر سنين شايفني بارد ، ليه ؟ يمكن علشان مبفضفضش طيب محدش اصلا مستحمل حد يعني انت لو فضفضت عن رايك السياسي علشان ترتاح هتلاقي مليون واحد يجيبولك ضغط و سكر 
انت لو فضفضت بحاجة مضايقاك هتلاقي نفسك كل يوم بتخسر واحد و انا من الناس اللي بتحترم حتى اللي بتكرههم 
يعني بوش و شارون و حتى هتلر باحترمهم على صراحتهم ناس مش بتوع ملاوعة  ستريت هنضرب هنقتل هندبح و يعملوا احنا بقى بتوع كتاب ربنا و تلاقي الاتحادية ، و احنا اللي جايين ننزل على ارادة الشعب و تلاقي مذبحة رابعة 
آه باحترم هتلر و شارون و بوش بس مبحبهمش ولو طولت اقتلهم اقتلهم 
و مش باحترم مرسي و السيسي  بس مش باطالب بقتلهم 
شايف كلامي مضايقك ؟ انت حر بس انا قررت افضفض بقى هارجع في وشك بآرائي و اقرفك وكمان مش هناقشك بس يا ريت متشتمش 

زعلان على مرسي اوي ؟
طيب طولت ايه من وراه ؟
حققت ايه ؟
اقولك على حاجة انا مش هتكلم سياسة هتكلم عن مشاكلي الشخصية ، أنا واحد من اللي اتظلموا في عهد مبارك و اتظلموا في عهدالمجلس العسكري  ، و كان موتهم و خراب ديارهم في عهد مرسي  و مع ذلك شاف كل اللي بيحصل فتنة  و ابتعد
عايز تعرف ازاي ؟ استنى الحلقات الجاية 

لكن دلوقت خلينا نتكلم عن حالتي الصحية هأبدأ من ورا من يوم 15/9 يعني من سعتاشر يوم كده  بعد ما زادت الاوكزيما في رجلي اللي بتعالج منها من 12 سنة و مش راضي اتعالج منها علشان عارف ان العلاج فيه لازم على الاقل حقنة ديبروفوس و الكورتيزون له روايات معايا من ابتدائي لما كنت بتعالج من الرمد الربيعي  و اخبط بحقن كورتيزون ، افتكر مرة و انا في الاعدادي جتلي ضربة شمس و سخونية شديدة اوي الدكتور جرب معايا كل خوافض الحرارة لحد ما راحت وجتلي بدالها حساسية و هرش شديد و شبه مش في الدنيا البيه طلع بقاعدة ان انا عندي حساسية من النوفالجين
بقى عندي اتنين اعداء الديبروفوس و النوفالجين ، لحد ما يوم تاريخي ايام الجامعة و انا في اعدادي صيدلة نزلت فيه من اسيوط للبلد كان اكتر يوم في حياتي ارتفعت فيه حرارتي فالدكتور و هو جارنا  اخد دراعي و انا نص مغيب و حقنني  بسيفاجين بعد ما خلص رحت قايله خلي بالك عندي حساسية من النوفالجين  ،الراجل وشه جاب الوان و هووووووووب لطشني بحقنة ديبروفوس و قعد يزعقلي ازاي متقولش ازاي مش عارف ايه ، بس بعدين قاللي انت معندكش حساسية اصلا لو  كانت عندك  مكنتش عشت لدلوقت 
المهم  اخدت اربع ايام نايم من تأثير السيفاجين و الديبروفوس و رحت الكلية و انا مضيع كتير من الوقت و عدينا , ليمر الزمن و اروح الجيش الذي أورثني الاوكزيما و هي نوع من الحساسية  اللي علاجها كورتيزون 12 سنة كل ماروح لدكتور اتعالج يكتبلي ديبروفوس و هكذا قررت متعالجش منها ، لكن السنادي الست الوالدة اصرت زن على الودان ، يا ماما هيكتبها ، لا مش هيكتبها طيب و نزلا على رغبتها رحت كشفت عند دكتورة يوم 15/9 اللي فات الدكتورة قالتلي انت جواك ضغوط نفسية هي السبب، قلت لنفسي الست مكشوف عنها الحجاب كويس ، كملي يا حاجة معاكي  
راحت تحفاني بروشتة فيها مش الديبروفوس لوحدها لا كمان ده كينا كورت برشام ،" ايه يا ولية  حرام على اللي جابوكي شيلي  الكلام ده مش هاستحمله "، "عيب متقولش كده على نفسك انت حد جميل" ، " انا عارف نفسي ، هتعب  و بعدين يعني يا ديبروفوس يا كينا كورت لكن الاتنين ؟ ده غير كمية المراهم اللي كلها كورتيزون ده لو هنتحر مش هاعمل كده "  ،" مالكش دعوة انا حاسبة الجرعة " ، " حاضر " ، قلتها و في نيتي  اكبر دماغي  و اخد الروشتة و اجيب الحاجات اللي فيها من غير الديبروفوس 

رجعت البيت والدتي سألتني قلتلها "كتبتها "،" طيب و ايه يعني ما تاخدها" ،" مش هستحملها " ، " يا ولدي هي عارفة اللي بتعمله " 
" آه هي عارفة  ، على فكرة يا ماما انا صيدلي يعني " ، " ايوة بس دي قديمة و اكيد كتبت كده لحد تاني و مسمعناش حد مات و يعني لو الحقنة دي بتموت حد مكنش حد باعها " ، " طيب "
و تحت الاصرار اخدت العلاج كامل لمدة اربع ايام بعدين مقدرتش اكمل حسيت بطواحين في صدري ،قررت اقيس الضغط و كان المشهد اللي في صدر البوست 190/120 ، نزلته ل 160/105 و بس قدرت اتنفس تاني  
و وقفت طبعا العلاج بعدين جاللي صداع رهيييييييييييب و دور برد و سخونية شديد منعني حتى اني اتابع قياس الضغط ، قررت اروح لدكتور عيون و دكتور باطنة اتكلم الاول عن الباطنة ، التمرجي مشغل تسلم الايادي  و بعد ما خلصت جه مصطفى بكري و امجاد السيسي و الهبل ده اللي مطالب تتفرج عليه لحد دورك يجيلك دورك تدخل للدكتور ، يقيس الضغط يلاقيه 160/100 و الحرارة 40و و انت عمال تشرحله القصص من الاول و تحكيله انك بتاخد اموكسيكلاف و بانادول علشان دور البرد ده و السخونية مش بتنزل و في وسط ده كله تلاقيه بيسألك عن رابعة 
- رابعة ؟
- آه ايه رأيك  في اللي حصل ؟
- فتنة 
الكلمة معاجبتهوش  فقعد يخطب عن رابعة رمز الصمود عن الدم  اللي سال عن عن ... و المفروض نسمعه اوكيه  بس نخلص انا اصلا مرديتش عادي كل واحد من حقه يقول اللي يقوله في البلد دي مادام اللي قدامه مضطر يستناه ، و بعدين انت قدامك واحد ضغطه عالي جسمه ملهلب عينه تعبانه و صداعه مخليه يدوب فايق و انت بتخطب ؟ المهم كان ردي قلته بصوت واطي واهن : قول كده للتمرجي المشغل تسلم الايادي برة بدل ما تقولهولي 
تقريبا سمعني لأن الروشتة عبيطة عبط السنين كتبلي ايموكس حقن و ادول  ، و انا قايله الايموكسكلاف و بانادول منفعوش 
هو يا بيستعبط يا بيعاقبني  ، برضه متكلمتش حاولت اكون مهذب و مناقشتوش اخدت الروشتة و مشيت المرادي  اتصرفت مع نفسي بس اللي مضايقني هو ليه الناس بقت بتقدم الانتماء السياسي على الواجب الانساني 
ياخي ادي ام واجبك الانساني الاول  و بعدين السياسة رفاهية 
صدقوني الفضائل الانسانية لو كانت لها اولوية عندنا لوصلنا لكل اللي مفروض نوصله 
البلد دي آخر حاجة ممكن تفكر فيها هي الانسان و على فكرة انا مسردتش المواقف اللي فوق على اساس اني مختلف معاهم في آرائي السياسية و كونهم بيناصروا طرف ده السبب  ، لا انا اعرف كتيييييييير  مختلف معاهم و في قمة الاحترام حتى الناس دي محترمين بس المواقف دي حصلت و الله العظيم حصلت  و كل اللي هكتبه هنا في الحلقات الجاية حصل
اما دكتور العيون بقى فبعد ما كشف على قاع العين و عملنا اشعة على الشبكية اكتشف تمدد لاوعية داخل مركز الابصار و شكل الموضوع كده هيبقى جلسات ليزر و حركات  ربنا يستر 
طولت عليكم 
معلش بقى

رجاء 
1-متستناش مني نقاش يزود مرضي انا واحد صاحب عيا 
2- بلاش دخول في نقاشات جانبية و جدال انتو عارفين انه لا طائل منه
3- بلاش شتايم في تعليقات لاي حد مذكور
4- آرائي لا تلزمك لكنها تلزمني فإن كنت لا تحترمها تعليقك لا يلزمني 

7 التعليقات:

Lobna Ahmed يقول...

سلامتك يا مصطفى
معلش

ابراهيم رزق يقول...

حمد على السلامة يا درش

سيبك منهم كلهم و تعالى الى القاهرة
حيث الهدوء
حيث المتعة
حيث الجمال
حيث راحة البال

فيو رائع ستشاهد
و لا اقولك خليه مفاجاة لما تيجى

سيبك من كل ده
خليك فى صحتك و مع انى مش فاهم حاجة من الادوية اللى قلتها
لكن معاك حق
تحياتى

رحاب صالح يقول...

سلامتك يا مصطفي
انا ملاحظة غيابك
بس قلت انك مش عايز نقاش وبتبعد عن الكلام عشان كدة قلت عادي
بالنسبة للحساسية والدكاترة فصدقني ان دكاترة مصر معلش يعني كلهم اغبيا لاني مجربة كتير منهم
انا في دكتور عطاني كورتيزون بسبب حاجة بسيطة عملتلي مشاكل لمدة سنتين مكنتش اعرف اخرج من البيت بسبب الحساسية وحرارتي مكانش ليها معدل طبيعي اصلا كفاية اني اقولك اني كنت بحط التلج علي وشي بلاقيه سخن جداااا معرفش ازاي
المهم الف سلامة عليك
وفضفض ولا يهم
انت لومفضفتش معنا هتفضفض مع مين ...
اقولك علي حاجة تعالي يا عم اتغدي مع احمد واوعدك اني مش انا الي هعمل الغدا ^_^
وهخلي ماما تعمل بط عشان انت بتحبه شوفت انا طيبة ازاي

شمس النهار يقول...

ايه ده كله سلامتك ياقناوي الف سلامة مالك كده
اجمد يارااااااجل
دول همه شوية عسل اسود علي الريق وبصلتين جمب الغدا
وتبقا فله

شوف زمان مش زمان اوي :))
دكتور صاحبنا قالي مريض الحساسية لا بيموت ولا بيخف :))
من يومها مش باخد دوا حساسية الا لما بكون تعبانة اوي

ارمي ورا ضهرك يادكتور ماحدش بينفع حد

وبعدين ازاي تقول شمس ضربتك انا جاية اقرا تدوينة ولا البس قضية :))

reemaas يقول...

كنا لسه فى سيرتك امبارح ويطلع كل ده عندك ومانعرفش
الف سلامة عليييييييييييييييييك يا درش
اللى يرفعلك ضغطك ولا تعبره

Shereen Samy يقول...

إيه يا مصطفى كل ده
شايل كل ده فقلبك و ساكت
ألف سلامة عليك
إنت صحيح يمكن مش بتتكلم عن نفسك كتير
بس أنا حساك إنسان صبور و حمول
عشان كده الفضفضه هتريحك كتير
أنا عن نفسي كنت زعلانه عشانك بس كنت مبسوطه إني عرفتك أكتر..ساعات أنا كمان ببقى نفسي أفضفض شوية بس مش بخاف تبان ثرثرة..لكن بخاف من سخافة الناس :)
المهم خلي بالك على نفسك
حبيت مامتك على فكرة :)
أنا شايفه إن الإنسان طبيب نفسه
بس مفيش مانع إنك تجرب دكاتره لحد ما تلاقي حد تقتنع بكلامه و وصفه.

طولت عليك معلش
مستنيه الحلقات الجايه

Blogger يقول...

.انضم إلى eToro وقُد ثورة التكنولوجيا المالية

انضم إلى مسيرة النجاح اتصل بأكثر من 4 ملايين متداول ومستثمر من 170 دولة