الأحد، 6 أكتوبر، 2013

مذكرات واحد مخنوق (2)


اولا احب اشكر كل اللي اهتموا بصحتي ، الحمد لله انا حاسس بتحسن و كويس  بس لسه الضغط متظبطش 
ثانيا علشان جبت سيرة ظلمي و ضياع حقي تماما في عهد مرسي على المستوى الشخصي هتكلم عن الحكاية دي 
انا كنت شغال في مصنع أدوية بينتج  المادة الخام حمض السيفالوسبورين و هو أساس  لفرع كبير من المضادات الحيوية و هو المصنع الوحيد من نوعه في الشرق الاوسط  بس مش هتكلم عن المصنع دلوقت ، الكلام عن المصنع محتاج حلقات كتير و ناس فاضية تركز ، المهم ان المصنع ده صاحبه لطش القروض و هرب  خارج مصر  من يناير 2010 و من وقتها احنا عواطلية ساعات الحكومة تحن علينا كل فترة و تصرفلنا شهر من عندها لكن كنا بندور على حلول (الكلام موجز جدا التفاصيل في بوستات لاحقة )
دي مقدمة لا بد منها لكن خليني اتكلم عن اللي انا عايز اتكلم عنه (الدكتور مرسي) 
مشكلة الدكتور مرسي الاساسية انه فاكر ان شعب مصر قبل 25 يناير هو نفسه  شعب مصر بعد 25 يناير ، كفاية شوية وعود و هينسوا و خلاص 
الناس ليها أحلام و مستنية اللي يحققها و بيتعلقوا باللي يوعدهم و يعدوا الايام يوم ورا يوم لحد ما يعدي ال 100 يوم اللي وعدهم بيها 
عن نفسي قلت بعد نجاحه مش هتكلم عن سياساته قبل ست شهور علشان يشتغل ، قالولي لا ده قال حاسبوني بعد 100 يوم على وعود قطعها ، مستحيل ينجزها ، هو أدرى ، ده حد بيورط نفسه اما مش فاهم ان ده مستحيل او فاكر الناس هتنسى 
و الناس منسيتش  فاضطر يعمل خطاب ال100يوم مع الاحتفال ب 6اكتوبر 
و بدل ما يكون في شفافية بدأ الفشر ، حلينا 80% من ازمة الوقود هيييييييييييييييييييييه
حلينا 70 % من الامن هيييييييييييييييييييييييه 
و غيره و غيره من فشر مش وقته نتكلم فيه المهم بالنسبالي انه زود الوعود بوعود  تانية يومها و كلف نفسه مهام هو مش قدها ، الفرق بين الببلاوي و مرسي ، الببلاوي مش بيوعد ، طول الوقت موعدش غير بحد ادنى للاجور و لو مقدرش ينفذه في التلات شهور الجاية هيحصله هو و حكومته زي اللي قبلهم  
الوعد بقى اللي يهمني اللي وعده مرسي يومها انه قال انه هيجيب كل المستثمرين اللي هربوا برة بفلوسهم و يشغل مصانعهم  ، ارنبت وداني لما سمعت الوعد ده ، يا راجل ارحم الناس و بلاش لعب باحلامهم ، سنين فاتت بدأ يتأقلموا ان مفيش امل لو أحييته تاني و طنشت مش هيرحموك و انا عارف انك متقدرش تعمل كده بس استنيت و جالي الرد بعد كام شهر 
1/4/2013كان الرد من وزيرة التأمينات الاخوانية في الحكومة الاخوانية و عهد الرئيس الاخواني اخدوا القرار اللي مقدرش لا مبارك و لا المجلس العسكري ياخده ، بدل ما يوجهوا جهودهم لتنفيذ وعد مرسي ، رفدوا كل العاملين في المصنع بأثر رجعي من 1/2010
ضيعوا كل حقوقنا و بأثر رجعي ، لغوا تأميناتنا و بأثر رجعي ، أهدروا مال عام يصل ل 3 مليون جنيه تأمينات مستحقة على صاحب المصنع و بعدين يا ريت سكتوا ...
الوزيرة الاخوانية المحترمة  بعتتلنا كصيادلة معانا صيدليات انه يتأمن علينا في صيدلياتنا ، قلنا ماشي ، قالت بس بأثر رجعي من 1/2010 و بنفس الشريحة اللي كنت بيها في المصنع مش شريحة صاحب عمل 
يعني طلبت منا مبلغ و قدره  حوالي خمستلاف جنيه ، يعني يشيلوا دين المستثمر الفاسد و يحملوه للعامل 
ده ظلم ؟ 
فضلنا بقى  في شكاوي و خناقات و روح و تعالى و قلنا نرفع قضايا لحد ما اكتشفنا ان مفيش اي محامي فاهم حالتنا و قادر يتعامل و كله يقولك يا عم التأمينات دي هترجعلك ، ما هي المفروض مش انا اللي ادفعها انا قانونا محسوب على المصنع اللي صاحبه دلوقت زمانه بيشرب كاسين مع الشيطان احتفالا باللي حصل ده كفاية بس يغير اسم رئيس مجلس الادارة و يحط اخوه حتى  و تسقط من عليه كل الديون 
في الوقت اللي فيه ناس اعرفها بيوتها اتخربت و طلقوا مراتاتهم علشان مش عارفين هيصرفوا عليهم منين
و تقوللي بعد ده كله نرجع مرسي ؟
الشرعية مش اصوات صناديق 
الشرعية صوت صادق يعي أبعاد ما يقول ثم يفي بما يعد




رجاء 
1-متستناش مني نقاش يزود مرضي انا واحد صاحب عيا 
2- بلاش دخول في نقاشات جانبية و جدال انتو عارفين انه لا طائل منه
3- بلاش شتايم في تعليقات لاي حد مذكور
4- آرائي لا تلزمك لكنها تلزمني فإن كنت لا تحترمها تعليقك لا يلزمني 

5 التعليقات:

ابراهيم رزق يقول...

بجد مش كلام اقوله يا درش مع انى عارف القصة غير كلام عمنا نجيب سرور من قصيدته الشهيرة
بس انت بقى عارف الرقابة

وزير سيادتك .. وماله بس دبَّرني

تدابير تخش الدماغ مش طَزة تقلب طُز

لما الوزاره وسـيَّه تسـاع ولا تسـعنى

دا يبقى ***** وزارى ولا يبقى حظ ؟

بلد مجانين صحيح

Shereen Samy يقول...

طول عمرها بلد الظلم

هقولك إيه أنا أول مره أسمع القصة دي بس بجد منتهى الظلم و قلة الفهم و الأدب كمان..دي آخرة عدم الكفاءة في أي شئ.
طب ليه معادوش توزيعكم في مصانع تانيه أو شركات تانيه تابعه للحكومه؟
أنا كمان عندي مشكلة كبيرة في شغلي يا مصطفى بسبب السياسة..لأني دافعت أيام رابعة عن اللي ماتوا فإتحطيت ضمن قايمة الإخوان! أنا! تخيل! و بناء عليه تحقيقات بقى و إسمي نزل مع ناس تانيه في اليوم السابع و لحد دلوقتي مهدده بترك المكان بعد كام شهر..إكتءاب السنين لما تلاقي رأيك في موضوع ممكن يأثر على مستقبلك أو شغلك..هقولك إيه صبراً.
إظاهر كلنا هنكتب في السلسلة دي عن خنقتنا :)
إستمر يا صديقي مفيش أحسن من الفضفضة و الحكي مع ناس عايزه تسمع.

reemaas يقول...

جبتش حاجة من عندى اهووووووووو

مع ان الحلول كانت ممكنة بس اختاروا اغبى الحلول ( دى مش شتيمة ده وصف )


منتظرة باقى الحلقات جدا

doaa elattar يقول...

ألف سلامة عليك يادكتور مصطفى

أنا بقالي زمن مقاطعة السياسة والكلام فيها من كتر الإحباط :( .. بس نتكلم :)

"رحم الله امرؤ عرف قدر نفسه"

مشكلة الإخوان إنها مكنتش مدركة حجمها الحقيقي .. فضيعوا نفسهم وضيعونا معاهم :(

غير معرف يقول...


النصابين

أعلن عدلى منصور، رئيس الجمهورية المؤقت، في كلمته التي بثها التليفزيون المصري، السبت 5 أكتوبر 2013، بمناسبة احتفالات نصر أكتوبر،، عن البدء فى تدشين أولى خطوات مشروع إنشاء محطات نووية للاستخدامات السلمية، منها استخراج الطاقة، على أن تكون منطقة الضبعة أول المواقع المقترحة للدراسة!!!

لماذا نشترى مفاعل نووى تزيد تكلفته على 5.52 مليار إيرو ، و 300 من مراوح توليد طاقة الرياح تنتج ما يعادل مفاعل نووى و تتكلف 900 مليون إيرو فقط؟!!!
و بعد نهاية خدمة المفاعل النووى يلزم تفكيكه و تخزينه وهذا يتكلف حوالى 600 مليون إيرو....

ستنتج مصر بعد كل الفرقعة الاعلامية والتكلفة الباهظة 4000 ميجاوات فقط لا غير من خلال 4 مفاعلات نووية .. فى حين أن ألمانيا تنتج حاليا 20 ألف ميجاوات من الكهرباء من الطاقة الشمسية ، و هو ما يعادل أنتاج 20 من المفاعلات النووية وإيضا تنتج 31 ألف ميجاوات، من طاقة الرياح.

فى تصريحات صحفية فى إبريل 2011 يقول د.فاروق الباز ، مدير مركز أبحاث الفضاء في جامعة بوسطن بالولايات المتحدة الأمريكية ، أن توليد الكهرباء بأستخدام الطاقة النووية تنتج عنه مواد مشعة فشلت كبرى دول العالم في التخلص منها، و أنه يمكننا تطوير الطاقة الشمسية فى الصحراء الغربية لتحقيق جميع أحتياجاتنا فى وادى النيل، كما أنه يمكن الأعتماد فى منطقة البحر الأحمر على طاقة الرياح ، و" أن المرحلة الحالية تتطلب تطوير تكنولوجيا الطاقة الشمسية والأستفادة منها ".

من المنتظر أن يستغرق العمل 40 سنة لأزالة الأنقاض ، تكاليف تعويضات ضحايا الكارثة النووية فى فوكوشيما وأعمال إزالة المخلفات 100 مليار إيرو، قاع البحر أمام فوكوشيما سيتم تغطيته بالخرسانة ، و بتكلفة قدرها 10 مليار إيرو ، وهناك تقديرات بأصابة حوالى 100 ألف طفل بأمراض سرطانية نتيجة كارثة فوكوشيما.."

و تقول إيفا جلفشنيج ، رئيسة حزب الخضر فى النمسا، تكنولوجيا المفاعلات النووية لا يمكن التحكم بها.
وقالت المستشارة الألمانية، أنجيلا ميركل : "إن الأحداث التي وقعت في اليابان تبين لنا أنه حتى الأشياء التي تبدو مستحيلة من الناحية العلمية قد تحدث."

ألمانيا و بلجيكا و سويسرا يقرروا إنهاء الطاقة النووية و أغلاق مفاعلاتهم النووية تدريجيا ، و إيطاليا تظل خالية من الطاقة النووية، هو قرار الإيطاليين فى أستفتاء شعبى و الذى صوت بنسبة 95 % ضد الطاقة النووية. علما بأن النمسا و الفلبين بعد بناء مفاعل نووى على أرضهم لم يتم تشغيله و أصبح مزارا للسياح .

نرجو من السادة القراء العقلاء و الوطنيين قراءة هذه الموضوعات التى تناقش موضوع النووى السلمى من الألف إلى الياء و التى اتفق كل الخبراء على أن عيوبه أكثر من مزاياه

ثقافة الهزيمة .. كارت أحمر
ثقافة الهزيمة .. حدث فى اليابان
ثقافة الهزيمة .. أرجوك لا تعطنى هذا السرطان‏
ثقافة الهزيمة .. البحث عن الشمس


مزيـــد من التفاصيل و قراءة المقالات بالرابط التالى

www.ouregypt.us