الخميس، 31 مايو، 2012

البس يا شعب



زمان أول ما حصلت الثورة (ايوة زمان  او زا وومن التاريخ بيتحسب بالاحداث مش بالزمن علشان كده زمان  ) كانت لي أحلام كبيرة و طموحات أكبر على الثورة  ,حلمت  ان هيبقى في حرية رأي  أقدر اقول اللي انا عايزو اكتشفت ان اللي بيتكلم اما بيتحاكم محاكمة عسكرية أو بيتم تخوينه 
حلمت بديمقراطية كل واحد يختار اللي هو عايزو اكتشفت ان الأصوات كلها موجهة و محدش بيملك صوته بل كل صوت تابع للطائفة او الجماعة اللي بينتميلها 
حلمت ان المفسد هيتحاسب و احنا هنبدا نشتغل علشان البلد دي اكتشفت ان لا المفسد بيتحاسب و لا احنا هنشتغل او بنشتغل علشان البلد لا ده كل واحد عايز نفسه بس 
حلمت بمستوى معيشي محترم لكل فرد في مصر و مستوى تعليمي مش اقل من التعليم في اكبر دول العالم اكتشفت ان كل احلامي بتطير
حلمت بروح التحرير تفضل كل الناس بمختلف انتماءاتهم على قلب راجل واحد و ان مصر نسيج واحد اكتشفت العكس
يمكن لسه محتاجين وقت و مفيش ثورة بتنجح في سنتين بس
لكن لكل حاجة شواهد و الشواهد لحد دلوقت بتقول (انتبه من فضلك السيارة ترجع إلى الخلف)
ليه أتأخرنا اوي كده , سنة و نص قضيناها في تخبط وثقنا في من هم ليسوا على قدر الثقة و سلمنا القط مفتاح الكرار تفاهة سياسية من جميع القوى السياسية  كل ده خلا بعض المشايخ يطلعوا في الجوامع يقولوا  قولوا  نعم للتعديلات الدستورية  نعم للدين  نعم لفسطاط العلماء   نعم نعم نعم 
هو احنا اتعودنا نقول غيرها؟ انا كنت فاكر اننا اتعلمنا نقول لا 
لا ما تفتكرش احسن خليك ناسي  
قالوا نعم و فاكرين نعم هتنعمنا , لكنها ازكت حس طائفي جوانا و علمتنا الفرقة كل ده علشان مشايخ افتكروا نفسهم علماء سياسيين و فاهمين في السياسة و لبسونا في الحيطة  , ماشي مش مشكلة احنا نقدر نصبر
تصبر ايه يا معلم ده مبارك اتخلع الشهر اللي فات كان فرصة نقول لا قبل ما الفلول يفوقوا و يتجمعوا يلا معلش الشعب عايز كده نكمل احنا بقى الطريق
و المخطط شغال ادارة مقرفة  من المجلس العسكري ازكاء اكتر للتشتت و التفرق  كنيسة امبابة و بعدها اسوان و في النص اختك كاميليا 
ندخل بقى في البرلمان و انتخاباته هتدي مين؟
الاخوان طبعا او حزب النور  انت شفت ايه من شرع ربنا علشان مترضاش بيه و بعدين شفنا الالوان التانية خلينا نشوف اللون الاسلامي
خلاص يا عم دي حرية شخصية انت لو شايف انهم بيطبقوا شرع ربنا يبقى خلاص هي دي الديمقراطية و الحمد لله ان الفلول خسروا و انهزموا هزيمة رادعة انا حاسس ان الثورة بتقوى و الفلول ظهر ضعفهم 
و قد كان و نجح الاسلاميين  و لكن لم يكن المجلس  على ذات القدرالمأمول منه  بلاش ادي امثلة كلنا عارفينها انا هاخد هولز و اريح بعد الغدوة السمينة اللي قعدنا فيها عشر شهور 
و ريحت و نمت و انا سايب الفلول مطحونة و متبهدلة علشان نوصل لانتخابات رئاسية  
عمو يا عمو  هو شفيق ده مش اللي احنا قلنا عليه بلوفر و شيلناه السنة اللي فاتت
ايوة يا حبيبي
ازاي يا عمو ممكن يبقى رئيس
يا حبيبي في حاجة لازم تتعلمها في مصر متقولش ازاي 
في مصر مينفعش تقول ازاي الشعب الغريب العجيب عارف مصلحته كويس جدا و بعض رجال الدين القبطي اكثر منا خوفا على الوطن علشان كده قرروا التعجيل بثورة تانية بأنهم يلبسونا في الحيطة برضه و يقولوا لبعض مشايخ ال(نعم) لستم أكثر منا تلبيسا
قاموا دعموا و ايدوا شفيق و وجهوا بعض انصارهم لشفيق يا حلاوة يا ولاد

البس يا شعب البس يا شعب البس و اترسم يا شعب 

و بعد كل الهبل اللي احنا عايشينه  تطلع التعابين من جحورها بقى و يبدأ فرد العضلات  الفلول البهوات  يخرجوا للساحة (الله يجازي كل اللي اخر انتخاباتنا لحد ما الناس دي فاقت )و طبعا مفيش مكان انسب من قنا علشان يجتمعوا فيه  جم مدججين بالسلاح معاهم عصاباتهم و بلطجيتهم و رجالتهم
من شتى انحاء المحافظة اتحدوا و هم اللي بينهم  خلافات قاتلة و كراهية مقيتة اجتمعوا و الثوار هم اللي اتفرقوا 
المهم البهوات مش اجتمعوا بس لا ده كمان بيتباهوا  اللي يقولك انا ابو فلول قنا و الغول يقولوا لست اكثر منا فلولا انا ابو الفلول في مصر  كأنه بيقول أنا ابو الهول مثلا , عقبال ما تتجوز يا ابو الفلول ام الخلول

يا حلاوة يا حلاوة 
لفظة فلول بقت مفخرة لا مفخرة مفخرة يعني مش اي حد  ينولها 
و زي ما قال سيكورتي زمان ( لو لم اكن فلا لتمنيت ان اكون فلا) الله يرحمك يا سيكورتي 
طيب و بعدين بقى الشباب الثائر طبعا ما سكتش و هتفوا ضد الفلول و شفيق تم الرد على الهتاف بالنار 
ضرب نار في وسط المدينة في شوارع مأهولة بالسكان  شقق فيها اطفال و ناس بفرض حد اتقتل ده مسئولية مين
و فين بقى مجلس العرر قصدي مجلس الشعب 
خلوا بالكم في منهم اعضاء في البرلمان الحالي من  احزاب الفلول (الحرية و المواطن المصري) اعضاء في برلمان العرر قصدي برلمان الثورة  اللي مالوش علاقة بالثورة 
زياد العليمي علشان قال كلمة حق و قال ان المشير حمار  حصل اللي حصله طيب بقى اللي ضرب نار وسط مدينة سكنية في شارع مأهول بالسكان ضد شباب مصري نقي 
ده يتعمل فيه ايه؟
بصراحة انا هاقاطع علشان قرفت  
احمد زي الحاج احمد احنا حارقين دمنا ليه؟ و كله على قلبه زي العسل  و زمانهم بيشربوا شاي مع بعض في المجلس و الضحايا هم الشعب
هو احمد مش زي الحاج احمد بالظبط يعني القاتل ميتساويش بحد بس احمد زي الحاج احمد في سياسة المصالح
70% من مجلس الشعب من الاسلاميين و مفيش اي رد فعل قوي لحد دلوقت الساعة واحدة الضهر محدش جاب للمسكين ده  حقه 



بدأت اؤمن ان هناك صفقة مقيتة  بين الكل و الشعب بس هو اللي بيلبس و هيلبس ليست صفقة متفق عليها لكن صفقة مجازية دون اتفاق الكل يتآمر على الشعب و بينهل من جهله 

الثلاثاء، 29 مايو، 2012

خسئتم






سالت الدماء من الأوردة كالسيل المنهمر لتمتزج بالأسفلت الذي صار قانيا و على الأرض أشلاء جثث متناثرة و فوق الأرض جثث تراقب بعيون ذاهلة 
تسائل الكنبيون : أي يوم ذلك و لماذا كل تلك الدماء ?
فخرج رئيس الوزراء مهنيا حاملا بعض الحلوى و البونبون : إنه يوم عيد , فالخيول و الجمال هناك يتراقصن  و الأضاحي قرابين سالت دماءها فهنيئا لكم .
فرح الكنبيون و هنوا أنفسهم بالعيد و نسوا أن يترحموا على الحملان النافقة و التي يدعونها الثوار بالشهداء 
خسىء كل من جعل من شهدائنا أضاحي و حملان ذبحوا في يوم عيد 
و ثكلت الأمهات كل من سمح لقاتلهم بالبقاء على رأس الدولة 
لعنكم الله



الاثنين، 28 مايو، 2012

مقاطع




لحد امتى يا مصر حبي ليكي هيفضل من طرف واحد 
لحد امتى هتحبي الرمرمة 
لحد امتى هتحبي اللي يكرهك و تكرهي اللي بيحبك 
خلي عندك دم بقى و حسي بينا 

مقاطع لحد لما مصر تتوب عن كونها قطة بتاكل عيالها و تحب خناقها 
مقاطع لحد لما مصر تنسى انها قطة عايشة في صفافيح الزبالة 
اخرجي بقى من صفيحة الزبالة و شوفي جمالك اللي مبهدلاه بالرمرمة  
من غير ميك اب انتي ملكة جمال بس محتاجة شوية نضافة 
مقاطع لحد لما مصر تقرر تنضف 
بالرغم من ده كله لسه عندي امل   و لسه متفائل لأني لو فقدت الأمل هموت 

مش قلة مندسة



من يومين انا في طريقي للقاهرة أخدت تاكسي من قفط لقنا و قلت اجر شكل السواق خصوصا ان سواقين العربيات اكتر ناس ساخطة على الثورةو حاسين انها هي السبب في ازمة البنزين و الجاز و غيره 
بيني و بين نفسي قلت اكيد الراجل ده من الخمسة مليون اللي ادوا شفيق , المهم سألته ايه رأيك في الانتخابات 
قاللي خلاص هيجيبوا رئيس الآخر ساعتين
قلتله : يعني ايه آخر ساعتين 
قاللي : حضرتك الظاهر مش فاهم اللعبة  , القصة ان كل اللجان اتقفلت الساعة تسعة و بدأ الفرز و التليفونات اشتغلت تيجي من لجان اسكندرية , حمدين معدي طلع قرار من اللجنة القضائية بمد التصويت في 3 محافظات لحد 12 بالليل الشرقية و القاهرة و الجيزة , و في الفترة دي صوت ما يقرب من 2 مليون واحد تقدر تقولي ازاي 2 مليون صوتوا بالطريقة دي
قلتله : يا راجل ده في نواب  و مندوبين للمرشحين في كل لجنة ازاي يعني تخيل عليهم حكاية زي دي و ناس تيجي من تحت الارض تصوت 
قاللي يا باشا الناس دي اساميها موجودة و جاهزة للخطة (ب) لو حست ان الدنيا هتتاخد من تحت رجلهم فينزل بالخطة دي افتح الصندوق الاسود و طلع البواكي و قبض الناس المعلوم و كله معاك 
بعدين سكت شوية و قاللي : محدش كان يفهم حاجة في كل اللي نزلوا غير اتنين حمدين و ابو الفتوح هم بس اللي عرفوا معنى الأمن الباقيين مش فاهمين حاجة , سمعتهم لما قالوا الأمن انك متخليش فيها جعان , لو شبعت الناس هتسرق ليه 
بغض النظر من الخطة (ب) اللي اتكلم عنها و اللي مدخلتش نافوخي الا ان اللي عجبني انه مش بس مؤمن بالثورة لا ده بيدور و يحاول يعمل تحليلات علشان يوصل لسبب التزوير   
اعتقد ان الناس اغلبها مؤمنة بالثورة ايمان شديد   
ده اللي اداني امل خلاني اعرف اد ايه الناس البسيطة بتحب الثورة و الامل ده اللي خلاني بعد ما نزلت من التاكسي اتصل بابراهيم رزق و اقوله  متتضايقش و لا تحبطش  انا حاسس ان حمدين في الاعادة  يا ريت نجهز للاحتمال ده  
بعد ما وصلت القاهرة اخدت تاكسي تاني هناك  المرة دي محاولتش جر شكل لأن الراجل كان واضح عليه الحزن الشديد و هو بيتكلم عن شفيق  و نجاحه قال انه من كام يوم  كان معدي جنب مؤتمر لشفيق جاله واحد  قدمله 100 جنيه قاله علق البوستر ده على عربيتك  علشان تحل البركة
السواق رد عليه : تحل البركة؟ ده على اساس انه من اولياء الله الصالحين
التاني قاله : بطل لماضة و خد ال 100 جنيه عيالك اولى بيها
بعد ما حكى القصة السواق بصلي و قال  : انا احوج لعشرة جنيه مش 100 جنيه لكن مش هابيع الدم ب 100 جنيه علشان كده قلتله انا سواق على العربية و مش بتاعتي  و مشيت
ده حال الناس في البلد الكل مذهول من اللي حصل 
و محدش عارف منين جت الضربة بس اللي فرحني اني اكتشفت ان احنا مش قلة مندسة لا ده صوت الشعب الحقيقي اللي بيخرسوه او عايزين يخرسوه بس مش هيقدروا , الوعي زاد و الناس عرفت و شوية شوية هنوصل 
حمدين هيعيد مالهاش حل تاني معاهم عارفين ليه . علشان احنا مبقيناش زي زمان بنشوف التزوير قدام عنينا و نسكت  
دلوقت كل واحد فينا بيحاول يحلل و يوصل و يعرف الدنيا جاية منين و رايحة فين 
حمدين هيعيد علشان احنا مش قلة مندسة  و مجموع ابو الفتوح و حمدين  من الاصوات اكبر دليل 
احنا مش بعيد عن الشارع  علشان اكبر مدن في الجمهورية كانت اصواتها للثورة
حمدين هيعيد قلبي قال كده و انا مصدقه 

السبت، 26 مايو، 2012

علمتني الانتخابات



وقف في وسط الطابور قعد يزعق و يهاتي و يقول  للناس
حسبي الله و نعم الوكيل فيك يا مبارك ياللي سرقت مليارات البلد , 67 مليار يا مفتري مش مكفيك مليار او اتنين  الله يخرب بيتك انت و كل اللي كان بيساعدك 
بيني و بينكم  فرحت قلت كويس ان الوعي وصل لحد عم احمد الانسان البسيط 
لكن الناس سألته : هو انت هتدي مين يا احمد ؟
قال و بكل ثقة : طبعا عمرو موسى 
اتصدمت
----------------------
أنا ممكن اتفهم ان الناس تتعاطف مع عمرو موسى و معاهم ذكريات كتير وانطباعات عنه وثقتها اغنية شعبان عبد الرحيم و بالذات بسبب موقفه رغم اختلافي معاه مقدرش انكره يوم أزمة الصعايدة في خيطان بالكويت  و احتلالهم لخيطان و اعلان أنها مقاطعة صعيدية ,  
القصة مش تشبيه رمزي , لا ده حصل فعلا  رغم ان القصة اتكتم عليها علشان متأثرش على العلاقة المصرية الكويتية من ناحية و من ناحية تاني كان في مصيبة اكبر و هي سقوط طيارة البطوطي  في نفس التوقيت فالاعلام كان يتوجه الى امريكا لمعرفة سبب سقوط الطائرة  بينما كان هناك في الكويت صعيدي من سوهاج  يأكل في أحد المطاعم الكويتية  ايده كان فيها أثر للدهن فاتزحلق الطبق من ايده و سقط على الأرض و اتكسر  , الراجل بكل ذوق و أدب  راح لصاحب المطعم الكويتي و قاله بكام الطبق اللي كسرته و اعتذرله و انه كان غصب عنه , بتناحة الدنيا و تعالي قارون قام الكويتي شتمه و قاله : أنت يا .... عايز تدفعلي هاستنى منك عوض 
السوهاجي مقبلش الشتيمة و كلمة من هنا و كلمة من هنا حصلت الخناقة , الكويتي نادى على كل العمال الهنود و البنغال و ضربوا الصعيدي . و دي كانت السبب في اللي حصل  , السوهاجي رجع لاهله و اصحابه و منطقة الفروانية و خيطان بالذات مشهورين بالعمالة الصعيدية الكثيفة  , الصعايدة  اللي من اسيوط و قنا و الاقصر و سوهاج لموا نفسهم و قالوا لازم تأديب الراجل ده  و قد كان 
أخدوا بقى العصي و الشوم و ناس استنت في أول الشارع و ناس بقى في آخر الشارع و دخلوا بقى المطعم جابوا عاليه واطيه  , و علشان عارفين اللي هتعمله الشرطة الكويتية مسمحولهمش بدخول الشارع و حصلت خناقة رهيبة بين الصعايدة و الشرطة الكويتية و الغلبة كانت للصعايدة اللي استطاعوا احتلال المنطقة بالكامل وقت طويل يوصل لشهر و طردوا السكان الكوايتة من منطقتهم  قالوا لنفسهم كده كده هيطردونا و يرجعونا بلدنا يبقى نخلص من دلوقت و ناخد حقنا كامل لرد اهانة صاحبنا احتلوا المنطقة بالشوم و العصي و اي سلاح يلاقوه في وشهم و أخدوا اتاوات بقى من اي حد و قطعوا الطريق  اللي من الكويت ميعديش غير بعد ما يبهدلوه لو صعيدي اللي هيعدي يطالبوه ينزل و ينضم ليهم لو من اي دولة تاني يعدي عادي
الكويت حاولت في الطريق السلمي و وزارة الخارجية بقيادة عمرو موسى  في الوقت ده وصلت لحل سلمي بين الصعايدة و الشرطة الكويتية و هو ان الناس دي مش هتتحاكم و هترجع و ارضاء ليهم كل واحد يختار حد من عيلته اخوه ابنه ابن خالته اي حد ييجي يشتغل هناك بداله و فعلا هو ده الحل اللي حصل و تمت القصة على خير  , صحيح لما راحوا الجدد استلمتهم الحكومة الكويتية بالتفريق مخلتهمش يجتمعوا في خيطان بالكثافة نفسها ووزعتهم على مناطق الكويت (و دي نفس الاستراتيجية اللي بيعاملونا بيها دلوقت  -التفريق- كفاية يخليك تسيب التحرير و تنسى احاجات اللي بنتوحد عليها) لكن هو حل منطقي منسيهوش اهل بلدي اللي كان في منهم كتير هناك اشتركوا في القصة دي و حسوا انه حللهم المشكلة بطريقة مرضية علشان كده عم احمد قال لكل اللي في الطابور بثقة جامدة طبعا عمرو موسى 
من هنا انا كنت متوقع ان بلدنا تصوت لعمرو موسى و فعلا ده اللي حصل و أخد الغالبية رغم محاولاتنا كشباب توعية ان موقف واحد لعمرو موسى غلط تبني عليه  قرارك لكن الانطباع الاول يدوم 
علشان كده انا ممكن اقتنع ان في ناس ممكن تصوت لعمرو موسى لخلفية مواقف قديمة و ميراث قديم , لكن الزفت شفيق ده يصوتوله بناء على ايه؟
ايه تاريخه النضالي بقى  ده واحد اول مرة اشوفه عن نفسي كان بعد خمسة و عشرين يناير لما وكلوا له عمل الحكومة و بعدها بكام يوم كانت موقعة الجمل  
و بعدين فضل زي التنح رئيس وزراء  يقولوله انخلع يقول و انا ماليها  
لحد ما حصل اللي حصل و بعد 3 مليونيات و برنامج و علاء الاسواني انزاح 
نقوم نرجعه بالصناديق 
بصراحة احنا شعب غريب 

---------------------
علمتني الانتخابات 
أنه يمكن أن تبيع أي شيء من أجل لا شيء 
أنه يجب تطبيق الشريعة الاسلامية بحذافيرها و أولها عدم الأخذ بشهادة العبيد 
أن اتصالات كان معاها حق لما قالت الدنيا لسه فيها اكتر  (ماسبيرو و مجلس الوزرا و العباسية و محمد محمود مش كل حاجة و البقية تأتي )
أن هناك من أمنوا بالثورة و أهدافها للمصلحة العامة و هناك من كفروا بالثورة تماما و الأكثرية هم من يظهرون ايمانهم بالثورة لأهدافهم و مصالحهم الخاصة

الأحد، 20 مايو، 2012

اصمتوا يرحمكم الله



اللي بيعمله البعض اللي بيسموا نفسهم بالنشطاء حاليا يثير الغثيان 
تلوين الكلام و تحويره و اعادة صياغته , مهاجمة المرشحين الآخرين علشان  ألمع  المرشح بتاعي  بالرغم ان المرشح التاني من يومين كنت باقول فيه شعرو غيره و غيره و غيره
كل ده ادى الى /
 لما سألت واحد أعرفه هتصوت لمين  ؟
قاللي و بكل ثقة : أحمد شفيق طبعا
قلتله  : ليه؟
قاللي لا اخوان و لا سلفيين تاني 
قلتله : طيب فيه حمدين 
قاللي كلهم منافقين مفيهمش حد مش منافق 
قلتله : يعني شفيق اللي مش منافق 
قالللي : لا شفيق ضلالي  بس , و انا انتخب واحد ضلالي  و لا انتخب واحد منافق 

----------------------
شكرا لكل النشطاء اللي بالفعل بيعبروا عن الثورة و مستعدين بأن يبذلوا الرخيص و الغالي في تشويه كل من كان معهم في الثورة  
شكرا لكل النشطاء اللي بيحوروا و يلونوا و يهبلوا في الكلام و ميعرفوش ان رجل الشارع البسيط بيوصلوا التهبيل ده و بياخد انطباع ان كل من كانوا في التحرير منافقين , و حسب المصلحة امدح فيك و لما تديني ضهرك ادبحك 
------------------------------
و ده السبب الرئيسي  اللي هيخليني أدي صوتي لابوالفتوح 
علشان اللي شفته الايام اللي فاتت من تحوير اي تصريح يقوله
مثلا قال  انا هارجع هتاف الجيش و الشعب ايد واحدة بعد ما المجلس العسكري قام بتشويهه في الفترة الانتقالية
يقوموا البهوات يقولوا ده بيقول الجيش و الشعب ايد واحدة
الراجل يقول : اي حد تخطى السن القانوني في اي مؤسسة حتى المؤسسة العسكرية هنقولوا شكرا ووسع للشباب 
يقولوا ده قال هاستعين بالمشير
الراجل يقول : هاقفل مصانع الخمور 
يقولوا ده ضد الليبرالية
يا بهوات اي مرشح هيتسئل عن مصانع الخمور و حتى ان مكنش اسلامي هيجاوب نفس الاجابة  
هنفضل نحور و ندور و نلون في الكلام  لحد امتى
يمكن ابو الفتوح مش الاصلح و مش الاحسن في الموجودين لكن هو الوحيد اللي قدر يجمع حواليه ناس مختلفين الطوائف فيهم الليبرالي و المسيحي و الاخواني و السلفي و اليساري و الصوفي 
قالوا عليه اخواني و تابع للمرشد بالرغم ان الاخوان لما قالوا عن اللي في محمد محمود بلطجية  هو كان هناك و ابنه اصيب  
وده يتنسي عادي جدا 
زي ما كل حاجة بتتنسي 
زي ما دم الشهدا اللي سال علشان نتجمع على كلمة واحدة اتنسى 
للاسف البعض من النشطاء هو اسوء من يعبروا عن الثورة بل تركوا  انطباع سيء جدا لدى البسطاء

الثلاثاء، 8 مايو، 2012

ليمونة




يعني حتى الليمون بقى الكيلو بتاعه بعشرين جنيه 
اعمل ايه بقى في حالة الغثيان  اللي جيالي  من حال البلد   و من القرف اللي شايفينه 
هو في غثيان من غير ليمون؟ 
حتى المجلس العسكري مش هلاقي لمونة و اعصرها عليه علشان  ابلعه 
اشرب اسبرايت؟
لا احسن يطلعلي حسام من جوة الازازة ما هو متحاكمش من يوم احداث  مجلس الوزرا
مفيش غير حاجة واحدة بس قدامي
اهتف و اقول ( يسقط يسقط حكم العسكر )

الخميس، 3 مايو، 2012

قشرة




الحلاق زهقني دايما يقوللي   (ما تشوفلك حل في القشرة دي اللي في شعرك )
مش عارف ليه مش راضي يفهم ان القشرة دي مهمة جدا  علشان لما المس شعري بصوابعي  ألاقي تراب