الأحد، 16 ديسمبر، 2012

فصلك مش مناسب




-فصلك مش مناسب !!
علموك  إيه عن المواطن ؟
- له حقوق و عليه مواجب 
- فصلك مش مناسب 
- له كراسة و قلم يقرا و يتحاسب
- فصلك مش مناسب 
- سرير في مستشفى يتداوى و يتلاعب
فصلك مش مناسب 
قالولك إيه عن طابور أوله شباك و آخره مزلقان 
و المزلقان يا عيني مفتوح بلا مفتاح 
و الشباك ضيق مافيهوش براح
و ضهر محني طالع منه ايد 
ممدودة تشتري تذكرة تمنها كل ما راح
و القطر مبيرحمش لا ملاكي و لا كبوت
و ان كنت راجل فوت 
و ما هتفوت الا بعد ما تموت 
أصلك هلفوت ! 
قالولك إيه عن العيش اللي دايب في ملح العرق
و اشقى و اتعب و في الآخر شقاك هيتسرق 
طب قالولك إيه عن اللحمة ؟
- عارفها و كداب اللي يقول مكلتهاش
- ماختلفناش 
بس اللحمة حتة وطن مقطوعة 
عليها ديابة مسعورة 
و شوكهم فيها مغروس 
و ببجاحة يقولولك اتفضل دوس 
و تدوس 
على جثة وطن مهروس 
و لما تقرب تلاقي شوكهم في قلبك يا مهووس
اتفضل دوس
(فصلك مش مناسب )
مفيهوش عماد و مينا و اسلام 
صوفي و قبطي و إخوان 
الظلم مبيفرقش انسان 
و مع ذلك اطلع قول نعم و لأ 
في الحالتين إنت أخرس
- أنا على الوطن أحرص
- لا بقى أخرس

صوتك مبيسمعهوش غير أطرش
و أعمى هو اللي شايف دمك 
و مكسح اللي شايل همك 
(فصلك مش مناسب )
قالولك ايه عن المواطن 
-له حقوق و عليه مواجب
بس مجابوش الحقوق لكن نزعوا الحواجب

9 التعليقات:

;كارولين فاروق يقول...

فصلك مش مناسب
ليه كده يا مصطفي
كفايه اللي مكفينا
مؤلمه أوي
انا خلاص بقيت زي النعامه
اللي مش عايزه تشوف ولا تسمع
علشان عليه الطلاق مافيش فايده
كويس ان العصمه مش ف إيدي
بقولك إيه في أغنيه صعيدي بتقول
ماجليش ماجليش ماجليش كان عايز يجولي
ولا جليش أنا مش فهماها لغايه دلوقتي
تفتكر أنا خلاص اتجننت

تحياتي وكده هون
نسيت أقولك كلامك معبر جدا وسياقه أروع

رؤى عليوة يقول...

ياربى

انا بهرب من الكتابة عن اللى بيحصل حتى لو بطلت اكتب خالص

وبطلت اسمع بس غصب عنى مش عارفه اقفل قلبى اللى بيسمع الانات


كلامك صح بس لازم نهرب شوية ومنبعدش كتير
عشان نقدر نكمل مشوار منعرفش اخره


دمت بخير

زينة زيدان يقول...

كلماتك قوية مؤثرة لأنها صادقة أتت من القلب لتصف مأساة وشعور شعب بأكمله


"إن مع العسر يسر"

هبة فاروق يقول...

تحففففففففففففه لاخر الدنيا
ابدعت يا دكتور كلمات واحساس عالى شعرت ان قلمك ينزف وانت تكتب
دام ابداعك

Bahaa Talat يقول...

السلام عليكم...
تقدر تعتبر ده تعليق من واحد موافق على الاستفتاء، ونزل وقال "نعم" يعني مختلف معاك تماما!!
كلامك جميل جدا جدا، ولا أرى فيه أي شيء يمكن أن أقول أن الحق ليس معك فيه...
ولكن...
انتهى، لأني لا أريد ان أدخل في أي حوار سياسي، لذلك أكتفي بكلمة ولكن وأترك الخيال لك والمعنى في بطن الشاعر...
كل ما أريد أن أقوله أنني كنت أتمنى أن نتفق، وإن اختلفنا يكون اختلافنا أبسط مما هو عليه الآن!
أصدقك القول...
منذ أن بدأت أنشر أفكاري وما يخطه قلمي لم أفكر أبدا في التوقف إلا في ثلاث مرات، المرة الأولى بعد البداية مباشرة (رهبة البداية)، والمرة الثانية كانت عند إصدار قرار حل مجلس الشعب (وعندها قمت بإغلاق جميع حساباتي على الفيس والبلوجر والتويتر في ساعة واحدة)، وهذه هي المرة الثالثة التي أشعر فيها برغبة في التوقف تماما عن كل شيء...
لا تتخيل أن حال البلد عاجب حد حتى من أهدت إليهم الصناديق بشائر المنتصرين، فقد نجحت المناحة الموجودة في البلد في إثارة جو الكآبة على جميع المصريين، وأثارت كلاب السكك الضالة من جحورها لتهاجم رواد الطرق الآمنين، ورجعت بنا إلى عصور القهر والذل أعواما وسنين...
ورغم ذلك...
ما يزال يعتصرنا الحنين!!
تقبل تحياتي...

كريمة سندي يقول...

كلمات مناسبة في مواقف مثيرة للجدل أبدعت

Mongi Bakir يقول...

نصّ يجمع بين التشخيص الصحيح و الحرف البليغ ...

تقديري

http://zaman-jamil.blogspot.com

ريـــمـــاس يقول...

مساء الغاردينيا أستاذ مصطفى
لم تكن هنا مجرد حروف
كانت قلم بـ لسان وطن وحرفك كـ العادة رائع يحاكي بحرفية وجمال"
؛؛
؛
لروحك عبق الغاردينيا
كانت هنا
reemaas

أبو حسام الدين يقول...

بعيدا عن الاتفاق أو الاعتراض مع مضمون هذا النص العامي الجميل، وبعيدا عن وجهة النظر التي يحملها، فأنا أعجبني جدا توظيفك للعامية، أبهرني النص كثيرا.
مودتي