الاثنين، 10 ديسمبر 2012

الحي بيتلولو



شايل كاسات دم في عينيه و هو داخل عيادة مكتوب على يافطتها الدكتور فلان العلاني  طبيب نفسية و عصبية  و عمال يتاوب و هو داخل و بيبص في ساعاته اللي عقرب دقايقها كاتم على نفس عقرب ساعاتها  و الاتنين على رقم  ستة  , التمرجي قاعد على مكتبه  و قدامه الكشف
- الضاكتور جه؟
- لسع القطر بتاعه مدخلش البلد
بص صاحبنا حواليه العيادة اللي بتشغي عيانين و لقي كرسي فاضي اترزع عليه و سند راسه على الحيط وراه و كمل نوم علشان كده مشافش الشاب ابو دقن اللي جنبه و هو لما شاف شاب داخل قام وسعله  علشان يقعد و قاله و هو مستغرب
-  ايه ياض اللي جابك هنا؟
- الدنيا
- و إنتا فين في الدنيا؟
- الحي بيتلولو  (جملة بديعة بيها كمية تورية جامدة  الظاهر مادام بيتلولو يبقى المقصود بالحي التعبان , لكن الباطن هو الانسان العايش بيتلولو زي التعبان بين مسالك الدنيا بيحاول ييجي يمين شوية و شمال شوية يمكن تتعدل)
ضحك ابو دقن   و قال
- ليا عاد كده؟ هو لسع المصنع واقف؟
- صاحبه طفش خد فلوسنا و هرب , و حقوقنا ضاعت
- دلوك في ريس حقيقي  و هيرجعلكم حقوقكم
- و النبي اتلهي  , أهو قالك في الهني بتاع المظالم  اللي فتحه ده و قالك اللي معاه شكوة ييجي و أنا اقضيهاله , استلفت قرشين و اتدليت على مصر دعبست لحد لما عرفت اوصل للهني ده و قدمت الشكوة  قالولي تعالى بعد اسبوعين علشان تعرف الرد و اتنيلت رحت تاني بعد اسبوعين
-  طه اومال فيك ايه
- الرد يا ابوخالو انهم قالولي ابعت شكوتك للنيابة
- و فيها إيا عاد ما تروح للنيابة
- يا أبو خالو أنا مقدم كوم شكاوي في النيابة و رافع قضايا و مفيش حاجة بتيجي
- مفيهاش حاجة يا صاحبي بكرة لما نقول نعم للضستور  الوضع يتعدل و حقوقك ترجع
- إنتا قريته ؟
- لاع بس الوضع مبيتعدلش غير ولاد الكلب اللي قارفينا كل يوم مظاهرات يترزعوا في بيوتهم
- الضستور مفيهوش أي حاجة عني و لا أي حاجة تحفظ الناس تبقى زيي , الضستور زي السباك اللي جايبه علشان يركبلك المواسير و يعملك البير لو مكنش معدول من الأول هتلاقيه طافح كل يوم و كل يوم تكسح فيه و ميخلصش قرفه
اللي طلعهم برة الحوار راجل بيزعق في واد صغير بعصبية , كان الواد اللي عنده كهربا حركته كتيرة و لاخمه فزعق فيه
- اترزع هنا جاري  و اتلم
ام الواد خطفت الواد و حطته على رجلها لكن التمرجي بص بصة مش اللي هي للراجل فالراجل اتضايق و زعق في التمرجي
- خبر ايا  الضاكتور اتأخر ليا؟
- القطر !!
- القطر معاده فات
- عمرك شفت قطر بييجي في معاده؟ أ÷وه أكيد على جي
- و لما القطر مبيجيش في معاده جايبينا ليا من الفجور
- مانا مرزوع هنا زيك من الفجور
- الفجور ده إنتا و و ضاكتورك
- تصدق إنتا راجل غلاط و لسانك زفر
الخناقة احتدت أخده واحد من العيانين و طلع بيه برة العيادة قعد على السلم  , واحد عايز يطلع للشقة اللي فوق قاله
- شقلي طريق يا خال
- خبر ايا امحمل اجمال ما تطلع
- طب اصحفلي
-يحرق محرقينك و الله لاسيبهالكم و غاير ع القهوة لحد ما ييجي المحروس
و خد بعضه و نزل
ام الواد الصغير لقيت ست جنبيها و هات يا رغي
- غادي فرح البت رسمية
- هي مش اتجوزت  السنة اللي عدت
- أيوة بس اتطلقت و هتتجوز تاني
- و هتعمل فرح؟
- أيوة اصلها لسع بنت ( و غمزت للست اللي جنبها غمزة ليها مغزاها )
- واه يخيبه , ده حزن و مرار طافح ده راجل جتة بشوفه و هو راجع من الحرجة  سايق البهيمة  شديد و عفي
- سيبك من السيرة اللي زي بعضيها دي أحسن حد يسمعنا
- أحسن برضك امبارح قعدت ساعة مستنية عربية كل عربية تعدي أقوله  كوبري الكلالسة يقولي لاع كنه ساخط على كوبري الكلالسة
- فكرتيني و شيلتني هم الترويحة يلا بس المعدول ياجي
- يا حزني الواد خد النقطتين و نام على حجرك قبل الضكتور ما ياجي
و فجأة دخل تلاتة شايلين راجل كبير يدوب مفتح عينيه و مش قادر يتحرك  الكل قام يوسعله علشان يريح  و ولده راح يحجز من التمرجي
- بقولك رقمك 57
- ياخي انتا مش شايف ابويا 57 ايا؟
- خلاص استئذن من اللي قبلك
قام واحد قاله :
- انتا مبتفهمش دي مش محتاجة إذن من حد حطه اول واحد و اللي مش عاجبه يخبط راسه في حيطة
- طايب بس هقولهم إنك إنتا اللي قلت
- و ماله
عدت ساعة ورا ساعة و ستة و نص بقت عشرة و الناس بتغلي كلام و حكاوي و كله سايب شغله و مستني الدكتور اللي موصلش لحد ما التمرجي  قال بصوت عالي :
- الضكتور اتصل و بيقول إنه  مركبش القطر علشان السكة مقطوعة في بلد الكهربا قاطعة فيها من امبارح
-طاب ماجاش ليا في عربية و ليا متصلش من بدري بدل ما مرزوعين علشانه
بصله التمرجي بصة باردة و كمل كأنه مسمعهوش : كل ياجي ياخد فلوسه
الشاب قال لابو دقن :
- أهو اتفضل يا عم الحاج البلد كلها خربانة و تقولي قول نعم
- ياخي دي ناس بتستعبط مش مقدرين الخدمة اللي خدمهالهم , ده قطعلهم النور علشان ميشفوش الوشوش العكرة بتاعت حريمهم
ضحك الشاب و قاله : شكلك معبي من مرتك
- انا زي الراجل اللي جاب لمرته كل حاجة ايشي بطاطس و ايشي قلقاس و  لو سألتني كم قاسى قلبك ؟فقل قاسى و قل قاسى و قل قاسى (تتقري كده برضه فقلقاسة و قلقاسة و قلقاسة  بمعنى انه كل ما يعاني يشتريلها قلقاس)
ضحكوا الاتنين لحد ما ساخوا على نفسهم من الضحك
و الست ام الواد راخية ودنها معاهم و بعدين سألت اللي جنبها
- هو إيا القلقاس ده يختي؟
- ده الباين كده حاجة زي اللفت  بتتخلل

ناداهم التمرجي  :
- انتي يا حاجة تعالي خدي فلوسك
- مش هنعمل رسم مخ
- لا يا ستي الضكتور مش جاي بس لو عاوزة رايي  خلي الواد بكهربته يمكن لما يكبر ميلاقيش كهربا خالص
- على قولك
الكل مشى و التمرجي قفل العيادة و روح
رجع الراجل العصبي من على القهوة للعيادة مكنش يعرف ان الدكتور مش جاي و اشتغل يخبط على باب العيادة
- افتح يا ضاكتور , افتح يا هليك انتا و هوه , إيا طرش مش سامعين ده كله
و عمال يخبط و يخبط
- طاب رجعولي فلوسي معاوزش اكشف
الغريب ان الراجل اللي طلع السلم في شقته محاولش ينزل يقوله مفيش دكتور و لا حتى حاول يهديه و يقوله روح و انسى

7 التعليقات:

nana يقول...

يعجبني في قلمك المتواضع أنه يُباغت الشعور ..فيجعله يعيش معك وينسى انه في قارة أخرى بعيدا عن أحيائك العامرة بالضجيج الجميل المُخيف في كومة من الأفكار تعبت من حملها وحدك فطفقت توزّعها تارة عِبر وتارة عَبرات ..وغالبا ما يكون صوتك كأصوات الموج في ليلة شتوية يُطارد الورقة ..تضع بصمتك وتُطلقها في وجه الريح ..
دمت رائدا للقلم الحر الأصيل .. دمت مبدعا يا طير من الرماد يصيح ..
nana

ابراهيم رزق يقول...

بجد يا درش مش عارف اعلق
اعلق على ايه و لا ايه

نحن فى بلد مجانين يعانوا اهلها من الصم

تحياتى

Lobna Ahmed Nour يقول...

كلنا بنتلولو
عجبني الحكي بالصعيدي :)

فيديو يقول...

تسلم الايادي

زينة زيدان يقول...

لغة احتجاجية جميلة بلهجة عامية
تبع من عمق الأصالة
تصف حال ناس يعيشون المعانة أكثر من غيرهم..لكن لا أحد يسمعهم ..رغم بساطتهم هم الأقدر على فهم الواقع الذي يلخصونه بألفاظ بسيطة صادقة

تحيتي لابداعك

P A S H A يقول...

عجبني استخدامك للهجة جداً بصراحة
:))
تسلم يا معلم

السيارات يقول...

يعطيك العافية