الاثنين، 28 مايو، 2012

مقاطع




لحد امتى يا مصر حبي ليكي هيفضل من طرف واحد 
لحد امتى هتحبي الرمرمة 
لحد امتى هتحبي اللي يكرهك و تكرهي اللي بيحبك 
خلي عندك دم بقى و حسي بينا 

مقاطع لحد لما مصر تتوب عن كونها قطة بتاكل عيالها و تحب خناقها 
مقاطع لحد لما مصر تنسى انها قطة عايشة في صفافيح الزبالة 
اخرجي بقى من صفيحة الزبالة و شوفي جمالك اللي مبهدلاه بالرمرمة  
من غير ميك اب انتي ملكة جمال بس محتاجة شوية نضافة 
مقاطع لحد لما مصر تقرر تنضف 
بالرغم من ده كله لسه عندي امل   و لسه متفائل لأني لو فقدت الأمل هموت 

11 التعليقات:

Ramy يقول...

عندك حق يا دكتور مصطفى

...

yosef يقول...

طالما الامل موجود
طالما هناك تفاؤل

هناك نصر مستحق وموعود

الصبر ....الصبر
ومصر ام الدنيا سترتدي الثوب الابيض من جديد
فرحاً بشهدائها ومناضلي حريّتها
الذين لم يتخلوا يوما عن ايمانهم بها

لنرفع شعار
انا مقاطع لاعداء حريّة وكرامة مصر
حتى لو كانوا من ابناء جلدتها العاقين بامهم

haneen nidal يقول...

نعيب زماننا و العيب فينا

مصر زي الفل و المشكله في الانسان مش في الوطن و للاسف !

احنا الي مبهدلين بلادنا مش بلدنا الي مبهدلنا و عمر ربنا ما حيسندنا و لا يغير حالنا غير لما نتغير من اعماق اعمقنا :\

" ان الله لا يغير ما بقوم حتى يغيروا ما بانفسهم "

و عادي يكون في غلط محدش بيتولد متعلم و الشعب المصر ولد من جديد بعد الثورة و كان لازمله فتره يتعلم فيها و يتعلم يوقف على اجره بعد مكان بيزحف ولازمله يشبع و لازمله وعي و ثقافه و انتماء و حب وكل شئ بس انتم اخرجتو من رحم الظلم و الجهل و طلبته منه يطلع لدنيا و يختار مصير و يقرر

العتب على الناس الي شايف نفسها فاهمه و واعيه و عارفه مين الصح و مين الي يصلح ليش ما خرجوا للناس و وعوهم و علموهم الحق ع الناس الي بتدعموهم و المسؤلين عن حملاتهم الانتخابيه ليش ما عملوا مع المؤيدين الهم حملات توعيه و ليش و ليش و ليش ؟؟

و بعدين في لسا طاقه نور في طرف انتم ما جربتهوش ما يمكن ربنا الي عاوزه و هو الي وصله

هي الدوله الاسلاميه و الاسلاميين بقوا يخوفوا ليش ميمكن دا واحد بيخاف ربننا سبوه يجرب و تكلوا على الله و ما تقطعوش علشان الي زي شفيق ما يصلش و ما تضحكوش ع حالك الامم و الاجيال الي جايه

و في الاول و الاخير ندعي ربنا يارب ولي الاصلح

مصر مش ليكم لوحدكم انتم بتحددوا مصير العرب كلهم تنسوش مصر اكبر دوله عربيه و في رقبتكم كمان سوريا الي بيجرالكم بينعكس عليهم و كمان قرارات دوليه كبيره اقلها رفع الحصار عن غزة مش عاوزين مساند لاسرائيل

:

ربنا يقدم الي فيه خير و فكر بالمقاطعه :(
في صوتك يا ترفع في بلدك يا تنزلها لسابع ارض .

دعاء العطار يقول...

انا مش عارفه اخد قرار يادكتور مصطفى .. هل ادى صوتى لاخوان بطمعهم وصلنا للمرحله دى فى سبيل ان واحد زى اللى ربنا ينتقم منه ده مايوصلش للحكم ولا اصلا هو كده كده واصل للحكم والحل ف ثوره من اول وجديد ولا ايه المفروض نعمله

انا بجد مش عارفه افكر ولا عارفه فين الصح

مصطفى سيف الدين يقول...

يا حنين
تصويتي في المرحلة الثانية هو اعتراف ضمني مني بنزاهة المرحلة الاولى
ثانيا المرحل التانية التصويت فيها هيبقى على اساس ديني و هيعمل وقيعة بين المسلمين و المسيحيين و انا مش هاشارك في مهزلة زي دي
ثالثا على موقع الاخوان قبل الانتخابات بيومين نزلوا بوست طلعوا فيه كل اللي مخالفينهم كفرة , مش هانتخب ناس لا يعترفوا بالآخر
رابعا اطمني مرسي مش محتاج صوتي و لا صوت اي حد هيقاطع و هينجح بسهولة و فرق كبير
مقاطعتي للانتخابات بس علشان افضل محترم نفسي و محسش اني اجبرت على الاختيار

;كارولين فاروق يقول...

مش حاقولك غير عدو عدوي صديقي
افهمها وروح انتخب
بالحيله
ممكن اقضي علي عدوي الذي ورائي
بدلا من البحر الذي امامي الذي سيزيد غرقي
ارجوا ان تكون وصلت

ليلى الصباحى.. lolocat يقول...

مش عارفة اقول ايييييييييييييه ؟؟؟؟؟؟؟

لكن لازال عندى امل ولو قليل

اعذرك يامصطفى مع انى بتجن من اى حد يذكر مصر حبيبتى باى كلمة فيها اساءة لكنى عارفة كويس قلبك وقصدك واحساسك اللى كلنا حاسين به واكتر

لكن هو الامل اللى بالفعل هيخلينا نقدر نكمل

ياااااااااارب

ماتفقدش الامل ابدا اخى العزيز ان شاء الله مصر محروسة من اللى خلقها

دمت بخير وازاح الله الغمة وفرج همنا جميعا

سواح في ملك اللــــــــــــــــــه- يقول...

مصطفي المقاطعة غلط

مبارك قعد تلاتين سنة عشان الشعب كان مقاطع الانتخابات

مصطفى سيف الدين يقول...

مبارك قعد تلاتين سنة علشان الانتخابات كانت بتبقى مزورة و الناس مش بتعترض

Tears يقول...

ana kaman moqat3a l2n el etneen aswa2 mn ba3d

el fatra el gaya mesh 7aykon feha ay esteqrar wa el dam 7aykoon keteer awy

Bahaa Talat يقول...

السلام عليكم...
تناقشت معك في هذا الموضوع كثيرا..
لن أزيد إلا أن أقول لك: "ليس عليك هداهم ولكن الله يهدي من يشاء"
فاشتغل بما أنت مكلف به وهو نصرة الحق، واترك الباقي على الله فهو به كفيل.
تقبل تحياتي...