الاثنين، 28 مايو، 2012

مش قلة مندسة



من يومين انا في طريقي للقاهرة أخدت تاكسي من قفط لقنا و قلت اجر شكل السواق خصوصا ان سواقين العربيات اكتر ناس ساخطة على الثورةو حاسين انها هي السبب في ازمة البنزين و الجاز و غيره 
بيني و بين نفسي قلت اكيد الراجل ده من الخمسة مليون اللي ادوا شفيق , المهم سألته ايه رأيك في الانتخابات 
قاللي خلاص هيجيبوا رئيس الآخر ساعتين
قلتله : يعني ايه آخر ساعتين 
قاللي : حضرتك الظاهر مش فاهم اللعبة  , القصة ان كل اللجان اتقفلت الساعة تسعة و بدأ الفرز و التليفونات اشتغلت تيجي من لجان اسكندرية , حمدين معدي طلع قرار من اللجنة القضائية بمد التصويت في 3 محافظات لحد 12 بالليل الشرقية و القاهرة و الجيزة , و في الفترة دي صوت ما يقرب من 2 مليون واحد تقدر تقولي ازاي 2 مليون صوتوا بالطريقة دي
قلتله : يا راجل ده في نواب  و مندوبين للمرشحين في كل لجنة ازاي يعني تخيل عليهم حكاية زي دي و ناس تيجي من تحت الارض تصوت 
قاللي يا باشا الناس دي اساميها موجودة و جاهزة للخطة (ب) لو حست ان الدنيا هتتاخد من تحت رجلهم فينزل بالخطة دي افتح الصندوق الاسود و طلع البواكي و قبض الناس المعلوم و كله معاك 
بعدين سكت شوية و قاللي : محدش كان يفهم حاجة في كل اللي نزلوا غير اتنين حمدين و ابو الفتوح هم بس اللي عرفوا معنى الأمن الباقيين مش فاهمين حاجة , سمعتهم لما قالوا الأمن انك متخليش فيها جعان , لو شبعت الناس هتسرق ليه 
بغض النظر من الخطة (ب) اللي اتكلم عنها و اللي مدخلتش نافوخي الا ان اللي عجبني انه مش بس مؤمن بالثورة لا ده بيدور و يحاول يعمل تحليلات علشان يوصل لسبب التزوير   
اعتقد ان الناس اغلبها مؤمنة بالثورة ايمان شديد   
ده اللي اداني امل خلاني اعرف اد ايه الناس البسيطة بتحب الثورة و الامل ده اللي خلاني بعد ما نزلت من التاكسي اتصل بابراهيم رزق و اقوله  متتضايقش و لا تحبطش  انا حاسس ان حمدين في الاعادة  يا ريت نجهز للاحتمال ده  
بعد ما وصلت القاهرة اخدت تاكسي تاني هناك  المرة دي محاولتش جر شكل لأن الراجل كان واضح عليه الحزن الشديد و هو بيتكلم عن شفيق  و نجاحه قال انه من كام يوم  كان معدي جنب مؤتمر لشفيق جاله واحد  قدمله 100 جنيه قاله علق البوستر ده على عربيتك  علشان تحل البركة
السواق رد عليه : تحل البركة؟ ده على اساس انه من اولياء الله الصالحين
التاني قاله : بطل لماضة و خد ال 100 جنيه عيالك اولى بيها
بعد ما حكى القصة السواق بصلي و قال  : انا احوج لعشرة جنيه مش 100 جنيه لكن مش هابيع الدم ب 100 جنيه علشان كده قلتله انا سواق على العربية و مش بتاعتي  و مشيت
ده حال الناس في البلد الكل مذهول من اللي حصل 
و محدش عارف منين جت الضربة بس اللي فرحني اني اكتشفت ان احنا مش قلة مندسة لا ده صوت الشعب الحقيقي اللي بيخرسوه او عايزين يخرسوه بس مش هيقدروا , الوعي زاد و الناس عرفت و شوية شوية هنوصل 
حمدين هيعيد مالهاش حل تاني معاهم عارفين ليه . علشان احنا مبقيناش زي زمان بنشوف التزوير قدام عنينا و نسكت  
دلوقت كل واحد فينا بيحاول يحلل و يوصل و يعرف الدنيا جاية منين و رايحة فين 
حمدين هيعيد علشان احنا مش قلة مندسة  و مجموع ابو الفتوح و حمدين  من الاصوات اكبر دليل 
احنا مش بعيد عن الشارع  علشان اكبر مدن في الجمهورية كانت اصواتها للثورة
حمدين هيعيد قلبي قال كده و انا مصدقه 

8 التعليقات:

خالد أبجيك يقول...

أتمنى أن يتم قبول طعون السيد صباحي، وتعاد الانتخابات

كنت هنا

;كارولين فاروق يقول...

قرأت تعليق لا اتذكر مِن مَن
كأن مات عزيز ولا نصدق وفاته
فنتخيل انه سيحيا من تاني
كلها أماني
ولكن الواقع واقع

رؤى عليوة يقول...

انا صحيح متضايقه لكن مش هفقد الامل ان ربنا حامينا وحامى الثورة وحامى مصر كلها

لازم كنا نتوقع ان الفلول لايمكن يستسلموا بسهوله

ربنا يكتب لنا الخير والطعون فعلا تجيب نتيجة او هيكون الحل هو مرسى

صحيح الاخوان مش تمام اوى بس على الاقل مش فلول ومعظم المخاوف منهم جاية من انهم كانوا فزاعه بيستخدمها الحزب الوطنى والحقيقه انهم مش وحشين اوى


ربنا يولى الاصلح

دمت بخير د مصطفى

Tarkieb يقول...

الجعان يحلم بسوق العيش ..شفيق جاي شئنا او لم نشأ

لـــولا وزهـــراء يقول...

يارب يعيد تاني
ويارب منسكتش تاني ع التزوير لو سكتنا يبقى لسانا هيتقطع طول العمر


لولا

ليلى الصباحى.. lolocat يقول...

همووووووووووووووت لو شفيق بقى رئيس
ربنا يستر علينا يامصطفى

بس اللى انا متأكده منه ان الشعب طيب ولكنه مش عبيط ولا ساذج
كلنا فاهمين وعارفين الحقيقة .. لكن للاسف ايد الشر لازالت طويلة وممكنة فينا وبتحكم من تحت لتحت

وبرغم هذا لازال الامل ينبض فى قلبى
يااااااارب هون علينا اللى فاضل بقى وطمن قلوبنا وولى علينا الصالحين

والله يامصطفى كأنى مستنية نتيجة الثانوية العامة من جديد :)

نسأل الله السلامة لمصر وشعبها

تحياتى لك سيف المدونين

rona ali يقول...

انا لسه قارئه البوست بعد اعلان النتيجه النهائيه
بس متفائله ان ابو الفتوح وحمدين مكملين ومش هيسكتوا
عموما خييييييييير ان شاء الله
مش قادره ارغي بقي انا تعبت من الموضوع دة اوى :(

ريبال بيهس يقول...

مساء الورد يا مصطفى

لست بمصري ولكن كنت أرقب الإنتخابات فوطننا واحد على

إمتداده وكنت أنتظر الخبر الأجمل اليوم في قبول طعون صباحي

او على الأقل موسى ولكن قدر الله وماشاء فعل وتأهل لجولة الإعادة

مرسي وشفيق وصدقاً لا أعرف من منهما الاسوء ومن الافضل لكن كلي امل أن

يحفظ الله مصر ويرقى لكرسي الرئاسة الأفضل ...

تحياتي وإحترامي