السبت، 26 مايو 2012

علمتني الانتخابات



وقف في وسط الطابور قعد يزعق و يهاتي و يقول  للناس
حسبي الله و نعم الوكيل فيك يا مبارك ياللي سرقت مليارات البلد , 67 مليار يا مفتري مش مكفيك مليار او اتنين  الله يخرب بيتك انت و كل اللي كان بيساعدك 
بيني و بينكم  فرحت قلت كويس ان الوعي وصل لحد عم احمد الانسان البسيط 
لكن الناس سألته : هو انت هتدي مين يا احمد ؟
قال و بكل ثقة : طبعا عمرو موسى 
اتصدمت
----------------------
أنا ممكن اتفهم ان الناس تتعاطف مع عمرو موسى و معاهم ذكريات كتير وانطباعات عنه وثقتها اغنية شعبان عبد الرحيم و بالذات بسبب موقفه رغم اختلافي معاه مقدرش انكره يوم أزمة الصعايدة في خيطان بالكويت  و احتلالهم لخيطان و اعلان أنها مقاطعة صعيدية ,  
القصة مش تشبيه رمزي , لا ده حصل فعلا  رغم ان القصة اتكتم عليها علشان متأثرش على العلاقة المصرية الكويتية من ناحية و من ناحية تاني كان في مصيبة اكبر و هي سقوط طيارة البطوطي  في نفس التوقيت فالاعلام كان يتوجه الى امريكا لمعرفة سبب سقوط الطائرة  بينما كان هناك في الكويت صعيدي من سوهاج  يأكل في أحد المطاعم الكويتية  ايده كان فيها أثر للدهن فاتزحلق الطبق من ايده و سقط على الأرض و اتكسر  , الراجل بكل ذوق و أدب  راح لصاحب المطعم الكويتي و قاله بكام الطبق اللي كسرته و اعتذرله و انه كان غصب عنه , بتناحة الدنيا و تعالي قارون قام الكويتي شتمه و قاله : أنت يا .... عايز تدفعلي هاستنى منك عوض 
السوهاجي مقبلش الشتيمة و كلمة من هنا و كلمة من هنا حصلت الخناقة , الكويتي نادى على كل العمال الهنود و البنغال و ضربوا الصعيدي . و دي كانت السبب في اللي حصل  , السوهاجي رجع لاهله و اصحابه و منطقة الفروانية و خيطان بالذات مشهورين بالعمالة الصعيدية الكثيفة  , الصعايدة  اللي من اسيوط و قنا و الاقصر و سوهاج لموا نفسهم و قالوا لازم تأديب الراجل ده  و قد كان 
أخدوا بقى العصي و الشوم و ناس استنت في أول الشارع و ناس بقى في آخر الشارع و دخلوا بقى المطعم جابوا عاليه واطيه  , و علشان عارفين اللي هتعمله الشرطة الكويتية مسمحولهمش بدخول الشارع و حصلت خناقة رهيبة بين الصعايدة و الشرطة الكويتية و الغلبة كانت للصعايدة اللي استطاعوا احتلال المنطقة بالكامل وقت طويل يوصل لشهر و طردوا السكان الكوايتة من منطقتهم  قالوا لنفسهم كده كده هيطردونا و يرجعونا بلدنا يبقى نخلص من دلوقت و ناخد حقنا كامل لرد اهانة صاحبنا احتلوا المنطقة بالشوم و العصي و اي سلاح يلاقوه في وشهم و أخدوا اتاوات بقى من اي حد و قطعوا الطريق  اللي من الكويت ميعديش غير بعد ما يبهدلوه لو صعيدي اللي هيعدي يطالبوه ينزل و ينضم ليهم لو من اي دولة تاني يعدي عادي
الكويت حاولت في الطريق السلمي و وزارة الخارجية بقيادة عمرو موسى  في الوقت ده وصلت لحل سلمي بين الصعايدة و الشرطة الكويتية و هو ان الناس دي مش هتتحاكم و هترجع و ارضاء ليهم كل واحد يختار حد من عيلته اخوه ابنه ابن خالته اي حد ييجي يشتغل هناك بداله و فعلا هو ده الحل اللي حصل و تمت القصة على خير  , صحيح لما راحوا الجدد استلمتهم الحكومة الكويتية بالتفريق مخلتهمش يجتمعوا في خيطان بالكثافة نفسها ووزعتهم على مناطق الكويت (و دي نفس الاستراتيجية اللي بيعاملونا بيها دلوقت  -التفريق- كفاية يخليك تسيب التحرير و تنسى احاجات اللي بنتوحد عليها) لكن هو حل منطقي منسيهوش اهل بلدي اللي كان في منهم كتير هناك اشتركوا في القصة دي و حسوا انه حللهم المشكلة بطريقة مرضية علشان كده عم احمد قال لكل اللي في الطابور بثقة جامدة طبعا عمرو موسى 
من هنا انا كنت متوقع ان بلدنا تصوت لعمرو موسى و فعلا ده اللي حصل و أخد الغالبية رغم محاولاتنا كشباب توعية ان موقف واحد لعمرو موسى غلط تبني عليه  قرارك لكن الانطباع الاول يدوم 
علشان كده انا ممكن اقتنع ان في ناس ممكن تصوت لعمرو موسى لخلفية مواقف قديمة و ميراث قديم , لكن الزفت شفيق ده يصوتوله بناء على ايه؟
ايه تاريخه النضالي بقى  ده واحد اول مرة اشوفه عن نفسي كان بعد خمسة و عشرين يناير لما وكلوا له عمل الحكومة و بعدها بكام يوم كانت موقعة الجمل  
و بعدين فضل زي التنح رئيس وزراء  يقولوله انخلع يقول و انا ماليها  
لحد ما حصل اللي حصل و بعد 3 مليونيات و برنامج و علاء الاسواني انزاح 
نقوم نرجعه بالصناديق 
بصراحة احنا شعب غريب 

---------------------
علمتني الانتخابات 
أنه يمكن أن تبيع أي شيء من أجل لا شيء 
أنه يجب تطبيق الشريعة الاسلامية بحذافيرها و أولها عدم الأخذ بشهادة العبيد 
أن اتصالات كان معاها حق لما قالت الدنيا لسه فيها اكتر  (ماسبيرو و مجلس الوزرا و العباسية و محمد محمود مش كل حاجة و البقية تأتي )
أن هناك من أمنوا بالثورة و أهدافها للمصلحة العامة و هناك من كفروا بالثورة تماما و الأكثرية هم من يظهرون ايمانهم بالثورة لأهدافهم و مصالحهم الخاصة

17 التعليقات:

شيرين سامي يقول...

مصطفى العزيز
فعلاً الدنيا لسه فيها أكتر
أنا حزينه و محبطه و مقهوره
مش ممكن يكون ده رأي المصريين
إحنا مش عبيد أوي كده
و لا بننسى دمنا بالسرعه دي
قد كده مبارك خلى الناس يشعروا من داخلهم بالدونيه
ده غير موقف الأقباط المخزي
بجد مش عارفه أقول إيه و لا إيه
أشكرك إنك عرفتنا قصة خيطان أول مره اسمعها

تحياتي أخي و صديقي العزيز

سواح في ملك اللــــــــــــــــــه- يقول...

مصطفي سيف

صديقي الغالي

ارجوا منك اعدة قراءة هذا المقال

http://sawahmasry.blogspot.com/2012/02/blog-post.html

تحيتي

;كارولين فاروق يقول...

انا انتخبت حمدين
وزعلانه من النتيجه جدا
وكل ما اقول لحد انا انتخبت حمدين
يقولي ليه كده بس
احنا عايزين البلد تقوم من تاني
مش عارفه ايه اللي بيحصل
ولا حد فاهم حاجه
واصبحنا منقسمين
ربنا يستر

ابراهيم رزق يقول...

محبط احباط السنيين

لو كان الاحباط رجلا لقتلته

لاول مرة فى حياتى
انا ابراهيم رزق الغلبان صاحب الميول اليسارية
فى طريقى للكفر بالشعب او قد اكون كفرت به

Tarkieb يقول...

العدد في الليمون ناس كتيره مش فاهمة حاجة وبتضر اللي فاهم...بس رغم كدة مش ممكن يكون العدد ده لشفيق أكيد في إن....الراجل واثق من فوزه من قبلها وربنا في سر

AhMeD RaDy يقول...

رغم كل اللى حصل الا ان فى حاجة بسيطة اتمنى انها تحصل

يا عم شفشق يجبلى تأشيرة برة الخرابة اللى اسمها مصر

يا يخلص علينا بقى ونخلص

وحسبى الله ونعم الوكيل فى ضيع دم ! وبيشارك فى ضياع الحق

زينة زيدان يقول...

من أجل طبق انكسر كانت أصوات الصعيد تتجه نحو موسى


فما بالك في صاحب المطار


لكِ الله يا مصر

نود اعلام اهلنا الأعزاء في مصر
أننا نحن هنا في فلسطين ننتظر
نتيجة تصويتكم على أحر من الجمر
فنحن نرتبط بكم ارتباط كلي
وكذلك كل قضايا العرب
من وجهة نظري ورغم كل المآخذ
الحكمة تقتضي وتحتم التصويت لمرسي
حتى لا تضيع الثورة
ونعود للوراء ثلاثين عام + عام
وفي الرجوع ندم
وذل

كلنا أمل بكم
أرجو ألا تضيعوا مصر
وفلسطين

rona ali يقول...

انا خلاص فقد النطق والتفكير ومش عارفه اعمل ايه بقي :((

yosef يقول...

السبت، مايو 26، 2012
حقائق حول نتائج الانتخابات المصريّة

نتائج الانتخابات المصريّة اثبتت العديد من الحقائق :
1- الشعب المصري شعب عظيم يتوق للحريّة وينتمي للامة الاسلاميّة والعربيّة ...رغم كل ما حصل معه
2-احمد شفيق هو مرشح مؤسسة النظام المخلوع بكل مكوناته وهيّ مؤسسة لا زالت تملك القدرة على العمل المنظم .
3- قصر نظر كل القوى السيّاسيّة وعدم فهمها للعمل المشترك واهميّته في بناء مصر الحديثة
4-الاخوان وحزب الحريّة والعدالة يتحملوا المسؤوليّة الكاملة عن وصول احمد شفيق للمرحلة النهائيّة
5-عمرو موسى لم يكن الا ( ارنب السباق ) الذي استغل للتمويه واستحوذ على جهد الكثيرين لاعطاء الفرصة لاحمد شفيق للوصول الى المرحلة النهائيّة .
6-عبد المنعم ابو الفتوح ساهم في اضاعة فرصة حمدين صباحي للمرحلة النهائيّة .
7-نتيجة حمدين صباحي اكدت ان شباب الثورة قد استعادوا شبابهم واصبح لديهم القدرة على ان يكون لهم دور مؤثر في الحيّاة السيّاسيّة المصريّة .
8-نتيجة الاخوان وحزب الحريّة اكدت تراجع قوتهم خلال فترة قليلة وانهم لم يعودوا الا 25% من اصوات من مارسوا حقهم الانتخابيّ و10% فقط من اصوات من يحق لهم التصويت .
9-غيّاب 50% ممن يحق لهم الانتخاب تحت مبرر ( ما فيش فايّدة ) هو عمل سلبيّ وممارسة 10% منهم كانت كفيلة بتغيّير النتائج .
10-الاعلام الرسميّ واستطلاعات الراي التي قام بها لم تكن الا محاولة للتأثير على الناخبين وتضليل مرشحي الشباب والثورة.

الآن وقد اصبح الخيّار الوحيد المتاح امام المصريّين هو اما التصويت للدكتور محمد مرسي او للفريق احمد شفيق فلم يعد امام القوى السيّاسيّة الوطنيّة وشباب الثورة الا خيار واحد ..
ارسال رسالة واضحة للاخوان وحزب الحريّة والعدالة مضمونها اما ان تجلسوا معنا لنتفق على تفاصيل المرحلة المقبلة وضمن برنامج عمل واضح يتضمن المشاركة الكاملة في الحيّاة السيّاسيّة وضمن شروط واضحة ليس اهمها منصب نائب الرئيس ...وقد يكون اهمها منصب رئيس الوزراء واعتقد انه من المناسب ان يّرشح له السيد حمدين صباحي على ان تضم الوزارة معظم مرشحي الرئاسة من حملة لواء التغيّير والاصلاح ...
وعلى الجميع ان يُّدرك ان موافقة الاخوان على ذلك ليس هبة او منحة منهم ولا حتى تنازلا انما حق لقوى الثورة عليّهم وهم بحاجة لتلك القوى اكثر من حاجة تلك القوى لهم .
ان عدم موافقة الاخوان على مشاركة قوى الثورة في الحيّاة السيّاسيّة سيؤدي الى فشل مرشحهم امام مرشح النظام السابق وبالتالي ستكون تلك النتيجة هيّ شرارة استكمال الثورة وسقوط فلول النظام والاخوان معاً .
رغم كل شيء انا مُتفائل وارى مُستقبل مصر ونهضتها بيد شبابها ولا خوف لان الله والايّام والزمن معهم وفي صالحهم .

يوسف
26/5/2012

ريـــمـــاس يقول...

مساء الغاردينيا أستاذ مصطفى
رغم أنني لم أكن يوماً ملمه ب السياسة ومنعطفاتها ودهاليزها
التي غالباً ماكنت كذب وتدليس إلا أنني من أجل مصر ومن أجلكم
لأحبتي وأصدقائي كنت أتابع بترقب وخوف وحب
ولكن ألمني جداً ماألت إليه الإنتخابات وماصولت إليه من أحداث
لم أشعر أنها حافظت على الثورة بل أصبحت هدر لدماء الشهداء
لازالت أحمل بعض من أمل أن أن تؤل الاحداث للأفضل والأصلح لمصر
أستاذي لاتجعل اليأس يتمكن منك ومن كل مصري حمل وطنيته وظميره
وهو يخطو لصناديق الإقتراع ..
كان الله في عونكم وسدد خطاكم ..
اللهم إني أستودعتك مصر وشعبها وآ مانها "
؛؛
؛
لروحك عبق الغاردينيا
كانت هنا
Reemaas

yosef يقول...

مساء الخير

لا تقلق ابدا
فرج الله قريب
والشعوب ستنتصر ان شاء الله
http://yosefstranger.blogspot.com/2012/05/blog-post_26.html

منجي باكير يقول...

للنّاس اتجاهاتهم و اعذارهم و قناعاتهم

و الصندوق هو الفيصل بين الكلّ !

أرى أن السواد الأعظم من سكّان المحروسة قادرون

على اجتياز المرحلة و بنتائج طيبة

و اختيار صائب بإذن الله .



صاحب الزمن الجميل

Days and Nights يقول...

الأخ العزيز / مصطفى

خلاصة القول .. إحنا أتضحك علينا

المجلس لعبها صح

ولسة اللى جاى أدهش

كان نفسى الذكاء ده يكون فى الخير

لأ وأيه شكًة دبوس

ويمكرون ويمكر الله والله خير الماكرين

تحياتى لروحك الطيبة

تامر

ستيتة يقول...

محدش بيتعلم ببلاش
والشعب ناقص تربية سياسية
مشيها سياسية
باتكلم كده وقلبي يقطر دما ومحتارة حيرة سحلية عايشة في غابة ديناصورات بعقول قد الترمسة
بس ها نستفيد ايه من كده؟
بص مؤكد فيه فايدة بس اعمارنا القصيرة نسبة لعمر الأرض بتخلينا قاصرين عن رؤية كل جوانب الأمر
في كل خير
دماء البشر عند ربنا غالية
مؤكد هي تمن وعي في يوم ما
بعيد علينا قريب لعيالنا واحفادنا
لازم نصبر نفسنا
احنا ها نمر بالتجربة علشان عيالنا ميجيش مورساااااااه تاني جاهل غبي يقعد يكلم ام شهيد عن ابنه المخطوف ولا تزايدي يا ابلتي لست اكثر منا شهداء
ربنا يجيب المخبي لطيف ويلهمنا الصبر والسلوان وانا لله وانا إليه راجعون

لـــولا وزهـــراء يقول...

والدنيا لسة فيها اكتر

لولا

Tears يقول...

mesh moqtan3a en el aswat de kolha ra7t le Shafeeq fe3lan bas 7ata lawo naga7 7ayb2a be 5 aw 6 millions mn 51 millions ya3ny ra2es dedo a3'lab elsha3b wa nehayto soda en sha2 Allah

دعاء العطار يقول...

والله الواحد هيمشى يكلم نفسه بالللى بيحصل ده

ده كان السيناريو اللى مكنتش بحب حتى اتخيله يقوم يحصل !!!!!

حسبى الله ونعم الوكيل