الأحد، 20 مايو، 2012

اصمتوا يرحمكم الله



اللي بيعمله البعض اللي بيسموا نفسهم بالنشطاء حاليا يثير الغثيان 
تلوين الكلام و تحويره و اعادة صياغته , مهاجمة المرشحين الآخرين علشان  ألمع  المرشح بتاعي  بالرغم ان المرشح التاني من يومين كنت باقول فيه شعرو غيره و غيره و غيره
كل ده ادى الى /
 لما سألت واحد أعرفه هتصوت لمين  ؟
قاللي و بكل ثقة : أحمد شفيق طبعا
قلتله  : ليه؟
قاللي لا اخوان و لا سلفيين تاني 
قلتله : طيب فيه حمدين 
قاللي كلهم منافقين مفيهمش حد مش منافق 
قلتله : يعني شفيق اللي مش منافق 
قالللي : لا شفيق ضلالي  بس , و انا انتخب واحد ضلالي  و لا انتخب واحد منافق 

----------------------
شكرا لكل النشطاء اللي بالفعل بيعبروا عن الثورة و مستعدين بأن يبذلوا الرخيص و الغالي في تشويه كل من كان معهم في الثورة  
شكرا لكل النشطاء اللي بيحوروا و يلونوا و يهبلوا في الكلام و ميعرفوش ان رجل الشارع البسيط بيوصلوا التهبيل ده و بياخد انطباع ان كل من كانوا في التحرير منافقين , و حسب المصلحة امدح فيك و لما تديني ضهرك ادبحك 
------------------------------
و ده السبب الرئيسي  اللي هيخليني أدي صوتي لابوالفتوح 
علشان اللي شفته الايام اللي فاتت من تحوير اي تصريح يقوله
مثلا قال  انا هارجع هتاف الجيش و الشعب ايد واحدة بعد ما المجلس العسكري قام بتشويهه في الفترة الانتقالية
يقوموا البهوات يقولوا ده بيقول الجيش و الشعب ايد واحدة
الراجل يقول : اي حد تخطى السن القانوني في اي مؤسسة حتى المؤسسة العسكرية هنقولوا شكرا ووسع للشباب 
يقولوا ده قال هاستعين بالمشير
الراجل يقول : هاقفل مصانع الخمور 
يقولوا ده ضد الليبرالية
يا بهوات اي مرشح هيتسئل عن مصانع الخمور و حتى ان مكنش اسلامي هيجاوب نفس الاجابة  
هنفضل نحور و ندور و نلون في الكلام  لحد امتى
يمكن ابو الفتوح مش الاصلح و مش الاحسن في الموجودين لكن هو الوحيد اللي قدر يجمع حواليه ناس مختلفين الطوائف فيهم الليبرالي و المسيحي و الاخواني و السلفي و اليساري و الصوفي 
قالوا عليه اخواني و تابع للمرشد بالرغم ان الاخوان لما قالوا عن اللي في محمد محمود بلطجية  هو كان هناك و ابنه اصيب  
وده يتنسي عادي جدا 
زي ما كل حاجة بتتنسي 
زي ما دم الشهدا اللي سال علشان نتجمع على كلمة واحدة اتنسى 
للاسف البعض من النشطاء هو اسوء من يعبروا عن الثورة بل تركوا  انطباع سيء جدا لدى البسطاء

15 التعليقات:

خالد أبجيك يقول...

أسأل الله تعالى أن يوفقكم لاختيار الرئيس الأصلح للبلد..

انتظرني في تدوينة في هذا الصدد، تحت عنوان "من سيكون رئيسا لمصر؟"

كنت هنا..

Bent Men ElZman Da !! يقول...

السبب الوحيد للتحوير والف والدوران ده
ان احنااصلا مجتمع ماتعلمش يعنى ايه يحترم الاختلاف فى الرأى
عمرك سمعت ان رئيس اجنبى طلع كلام على المنافس ليه عشان يكسب هو!
عشان احنا للاسف هنا المرشحين بيلعبوا على حته تشويه صوره باقى المرشحين المنافسين
عشان فى ناس كتير اصلا كلمه توديهم وكلمه تجبهم
واوقات بيبقوا مستنين للواحد على غلطه

ليلى الصباحى.. lolocat يقول...

الله يبارك فيك ياسيف
سلم لسانك وقلمك

اوافقك فى كل حرف

(( الخلل ) الواضح فى احترام رأى الغير
يمكن ده اللى خلانى بعيد عن الكتابة فى السياسة
شىء مزعج واسلوب مرفووووووووووض جدا

نسأل الله ان تمر الايام القادمة على خير ويولى علينا الصالح

على الهامش : انا مع ابو الفتوح من البداية :) واتمنى ان يكون رأيى صحيح ....ياااااااااااااارب

تحياتى وتقديرى

مدونة رحلة حياه يقول...

السلام عليكم
صديقى
أرى قطرات الألم تتساقط من فم كلماتك من الدوامة التى نحياها
قدر الله لمصر الخير

لـــولا وزهـــراء يقول...

انا محتارة بين حمدين وابو الفتوح وبدعي ربنا يولي الاصلح حتى لو مكنش بين لاتنين دول
وانا مستاءة من تردي الاحوال اللي وصللنالها كل واحد عايز مرشح ميهموش يلمعه بشرف لأ بيختار وسائل غير شريفة وبيخوض في المرشحين الاخرين دون وجه حق

لولا

رؤى عليوة يقول...

والله عندك حق يا دكتور

الواحد بيسمع كلام بجد غريييييييييب

معاك طبعا مع ابو الفتوح وبجد كل اللى بيتقال ضده بسبب الاخوان اللى بيحوروا كل الكلام ويطلعوا اشاعات
والعسكرى لانه مش فى جيبه
حتى الاخوان العسكرى مش خايف منهم لانهم ورا مصلحتهم

ربنا يكتب لمصر الخير يارب


دمت بخير

شمس النهار يقول...

كلامك صح الصح
موافقة عليه ميه مية

Days and Nights يقول...

الأخ الغالى / مصطفى

ربنا يعًدى الأيام الجايه على خير

وأنا عن نفسى مش ح أنتخب خالص

تحياتى لروحك الطيبة

خالص مودتى

تامر

Bahaa Talat يقول...

صديقي الغالي...
عندما يكون هناك منافسة، ويلجأ أحد المتنافسين (أو المتعصبين له) للتجريح في المنافسين الآخرين فإن ذلك لا يعبر سوى عن ضعف الثقة في قدرات هذا المتنافس، فيلجأ ويلجأ أشياعه لإحراز التفوق بكسر شوكة المنافسين وإجبارهم على الدفاع عن النفس وإلهاؤهم بذلك عن تقديم مميزاتهم، وهذا هو أسلوب الضعفاء.
في رأيي أن تأييدي لأي مرشح لا يجب أن يكون مبنيا على عيوب ونقاط الضعف في الآخرين، بل على نقاط القوة في المرشح الذي أدعمه أنا.
وأهم شيء هو عدم التعصب، فرأيي خطأ يحتمل الصواب ورأي غيري صواب يحتمل الخطأ..
أما ما ابتلانا الله به هذه الأيام من فتن وانحرافات فكرية وآراء شاذة، فأرجو الله أن نخرج من هذا الابتلاء بعافية تصلح مستقبلنا وتجعله أكثر إشراقا..
تحياتي لك يا صديقي الغالي..

ابراهيم رزق يقول...

اخى مصطفى

و هو ده اللى خلانى اهاجم بلال فضل
لانه تحول من مؤيد لابوالفتوح الى مجرح فى حمدين
و هاقولك على سر انا كنت محتار بين ابو الفتوح و حمدين
لانى اراهم اكثر اثنين معبرين عن التحرير
بلال فضل جعلنى اختار حمدين بدون تردد

تحياتى

mohammad nabiel يقول...

مع الأسف الشديد ..

لقد نجح النظام البائد فى زرع ثقافة الخلاف الهمجى بين نسبة كبيرة من أبناء الشعب بدلاً من ثقافة الاختلاف الحضارى.

وهى مشكلة ستأخذ وقتاً - ليس بالقصير - لحلها.

وفى النهاية ..

لا نملك إلا أن ندعو الله أن يولى علينا من يتقيه فينا.

اقبل تحيتى أخى مصطفى.

ستيتة يقول...

كلامك مضبوط بس انت متناسي حاجة واحدة بس
إحنا في مرحلة زخم وتخبط وخوف على أمل
وكل ده يبرر إن الناس تقوم تقوم تقوم وتاني يوم ينسوا ويقوموا على حاجة تانية وهكذا
المشهد عامر مزدحم وعن قصد وتبييت نية
محدش ناسي الناس اللي بتناضل ضد حاكم ظالم من قبل 25 يناير 2011
لكن بجد وعن صدق وبأمااااااااااااااااااااااااااانة
كل البشر خايفة من فرعون رابع
ليه؟
لأن لو وصلوا فرعون ما لمنصب الفراعين السابقين ها يكون عارف ان الشعب بيثور
والشعب ده من زمان لم يثور
ولما تيجي لشعب بيثور وكنت تظنه غاز خامل
وحط على ده انك فرعون
ها تعمل فيه اللي ما يُعمل ولا ذذكره التاريخ إلا لتشاوشيسكو وسيلاسي وثلة من آكلي لحوم البشر
هو ده اللي مخوف اللي بيفكروا
أما اللي عايشين بلا حسابات فهم ولا يعنيهم كل ده
هم كانوا ماشيين جنب الحيط
وسيستمروا جنب الحيط
ويطمحوا في الخطة الخمسية القادمة يدخلوا في الحيط
وعليه هم كل طموحهم حد ينغنغ النغانيغ وينعنش النعانيش
ولأن - في تاريخهم كله - عمر ما حد دلعهم ولا ريحهم ولا أكلهم المحمر والمشمر والإسينشيال أمينو اسيدس
تلاقيهم برضه متلخبطين وحالهم طين

اعذر الناس
هم لم ينسوا
ومش زي ما يروج اوغاد "مش بيعرفوا يختلفوا"
مفيش شيء اسمه اختلف بأدب وبابا والكبير ولا ها نرجع لكلام اعتبره ابوك يا أخي؟
الزمن ها يطور الإختلاف ان شاء الله وها يطور تقبل هذا الإختلاف
ها يطور المرسل والمستقبل
ده لو فيه اساسا مستقبل للمواضيع دي كلها

الناس حصلوا على حرية بسيطة قصيرة ونفسهم النعمة متزولش
ده اولا
ويا سلام لو عليها كمالة عدالة اجتماعية وكرامة انسانية

والله يرحم اللي مات اهو ارتاح وسابنا وأهله لما نستحق
تحياتي

;كارولين فاروق يقول...

ازيك يا مصطفي عامل ايه
بص يا سيدي
انا مش مقتنعه بحد ابدا بالامانه والله
بس انا مش حانتخب غير المجهول بالنسبه لي
علشان لما اختاره ويطلع مش كويس بعد كده ماندمش
اقولك علي شيئا
هو احسنهما مرا او افضلهما مرا
والسلام ختام
تحياتي

مصطفى سيف الدين يقول...

متفق معاكي جدا يا دكتورة
احنا فعلا اخطر تحدي بنواجهه هل هنقدر ننسي الناس عهد الفراعين و بناء اصنام جديدة؟
انا قلت في البوست ان ابو الفتوح مش الاحسن و لا الاصلح و مش بدافع عنه ايمانا بيه على اد خوفي من عدم المصداقية اللي بتواجهها الثورة لما نسبة كبيرة بتهاجم هجوم عشوائي مرشح لكونه فقط على خلاف معاهم
و ساعات بيبقى نقد و مهاجمة مالهاش اساس
ربنا يرحم اللي مات يا بختهم

ريـــمـــاس يقول...

مساء الغاردينيا أستاذ مصطفى
ومتى كانت السياسة صادقة ؟؟!!
للأسف أستاذي إن لم يكن هناك دس وكذب وإفتراء
فلن تكون سياسة وخاصة في مجتمعاتنا العربية
أعلم جيداً أن ماتمر به مصر حالياً وضع صعب جداً
وأنها على مفترق طرق خطير ..
ولكن لن أقول سوى كتب الله لكم الأصلح للنهوض بـ أم الدنيا ستبقى دعواتي وقلبي معكم ..
حفظكم الله وحماكم من كل شر "
؛؛
؛
لروحك عبق الغاردينيا
كانت هنا
reemaas