الثلاثاء، 8 مايو، 2012

ليمونة




يعني حتى الليمون بقى الكيلو بتاعه بعشرين جنيه 
اعمل ايه بقى في حالة الغثيان  اللي جيالي  من حال البلد   و من القرف اللي شايفينه 
هو في غثيان من غير ليمون؟ 
حتى المجلس العسكري مش هلاقي لمونة و اعصرها عليه علشان  ابلعه 
اشرب اسبرايت؟
لا احسن يطلعلي حسام من جوة الازازة ما هو متحاكمش من يوم احداث  مجلس الوزرا
مفيش غير حاجة واحدة بس قدامي
اهتف و اقول ( يسقط يسقط حكم العسكر )

34 التعليقات:

خالد أبجيك يقول...

كان الله في عونكم.. وحفظ مصر الحبيبة..

كنت هنا..

سواح في ملك اللــــــــــــــــــه- يقول...

العيب فينا احنا يامصطفي

بنستعل بعضنا

مين اللي بيوصل الانبوبة لخمسين جنيه في السوق السودة

مش بني ادم عايز يتربح من دمنا

وغيره وغيره


الفساد بقي للركب علي رأي السجين زيكا ههههههه

مصطفى سيف الدين يقول...

اللهم امين
شكرا يا خالد

مصطفى سيف الدين يقول...

ايوة مين بقى يا خالد ؟
اه احنا فعلا احنا الوحشين اللي اخدنا البنزين و السولار و رميناهم في الصحرا
و احنا الوحشين اللي بنخزن الانابيب علشان سعرها يزيد
يا سيدي الفاضل احنا عمر ما كان عندنا ازمة في الانابيب في الصيف غير في ظل الحكومة دي و المجلس العسكري ده
هو مكنش في سوق سودة زمان و لا ايه؟
و فعلا الفساد كان و لا زال للركب
و دي غلطة مين؟
مش بسبب الحاكم اللي ماسكها من 15 شهر و لا عمل ايتها حاجة

لبنى أحمد نور يقول...

كيلو الليمون بـ20 جنيه!!!
بسيطة.. احنا كشعب، نلم فلوس مع بعض ونجيب ليمونة واحدة ونعصرها علينا

سواح في ملك اللــــــــــــــــــه- يقول...

http://sawahmasry.blogspot.com/2010/10/blog-post_18.html

خد يامصطفي الرابط القديم ده

مصطفى سيف الدين يقول...

فعلا احنا محتاجين ليمونة كبيرة تتعصر علينا يمكن ساعتها نفوق

منجي باكير يقول...

ورقة لوصف واقع مرّ في جمالية طرح ..

أنا حزين على مصر العروبة !!

الله يصلح الحال يا صديقي


صاحب الزمن الجميل

مصطفى سيف الدين يقول...

طول عمر الناس كده يا خالد
و السوق السودة موجودة دايما
الجديد هي ازمات طاحنة زي ازمة الانابيب في الصيف
دي ازمات مفتعلة

مصطفى سيف الدين يقول...

اللهم امين
اشكرك يا صديقي

ليلى الصباحى.. lolocat يقول...

سمك لبن تمر هندى
ده حال البلد الان يا سيف التدوين :)
والله اخى الحالة محتاجة شربة زيت خروع مش مجرد لمونة ههههه

بس قولى ازاى احنا فى القاهرة اللمون بــ 10 جنية و 12 وعندكم بــ 20 جنية احجزلى 2 كيلو بالله عليك يامصطفى هههههه

ربى ان شاء الله هيصلح الحال و هتمر الازمة يعنى هتمر مصر ابية وصامدة وان شاء الله فرج ربنا قريييييييييب

تحياتى لك اخى العزيز

مصطفى سيف الدين يقول...

عندكم ب10 و 12 جنيه
و تقوليلي احجزلك 2 كيلو ؟
اصلا كان ب16 جنيه امبارح و النهاردة بيقولوا ب 20
مفيش تسعيرة مفيش اي حكومة تظبط المسائل
كل يوم بسعر كل يوم بقرف جديد
يلا ربنا يصلح الحال

Bahaa Talat يقول...

السلام عليكم..
ويا ريتها جت ع الليمون وبس.. كيلو الطماطم تجاوز 5 جنيه في القاهرة أما بالقرب من المزارع في الأقاليم والصعيد فهو أكثر من ذلك ولن تجد إلا البضاعة المضروبة، وعندك من هذا المثال في كل شيء.. بس إنت جرب كدة وانزل السوق..
هل تعتقد أن كل هذا يحدث فينا لمجرد إثبات صحة المقولة الخالدة التي قالها المخلوع "إما أنا وإما الفوضى؟" أم هي لمجرد أن يستفيد شرذمة من البشر من ذلك الفساد الفاحش المستشري في البلد؟ أم أنها لمحاولة عقاب الناس على الثورة، أم لمحاولة فرض توجه سياسي معين؟
أظن أن الموضوع أكبر بكثير، ومن يطالع حال بلدنا وأمتنا كلها خلال السنوات والعقود الأخيرة يلاحظ أن المسألة تسوء من يوم إلى يوم، والهدف في رأيي بعيد عن كل ما قلته!
نظرة صغيرة على حضارات عظيمة كانت تسكن قارات بأكملها في الأمريكتين قبل خمسة قرون وما وصلت إليه الآن وما اتبعه الغرب من سياسات في سبيل ذلك يمكن أن يفسر الموضوع من وجهة نظر مهمة.
ربنا يلطف بنا.

وصف الاحساس يقول...

لمونه تايهة ياولاد الحلال
اي لمونه دي ال هتكفي البلد كلها

أبو حسام الدين يقول...

مؤسف فعلا..
لكن صبرا جميلا أخي مصطفى
أعاد الله الحق لأهله

re7ab.sale7 يقول...

هههههههههههه
والله معاك حق يا دكتور

دعاء العطار يقول...

هى فعلا حاله من القرف .. لكن للاسف القرف اللى احنا حاسين بيه ده مش هينفع معاه ولا عشرين كيلو ليمون

القرف اللى احنا فيه مش هينفع معاه غير اللى انت قولته ف اخر البوست

يسقط يسقط حكم العسكر

محمد الجرايحى يقول...

المشكلة أخى : أننا فى الأيام القادمة سنكون فى أشد الحاجة لليمون لأن حالات الغثيان ستنتشر وتعم أرجاء المحروسة ولنا الله

شمس النهار يقول...

ولا تزعل نفسك يسقط يسقط عسكرون :))
سهله اهي ولا ليمون ولاحاجة

خواطري مع الحياة يقول...

كل حاجة هتيجي بدون اضافات

الانسان الي بيعقدها وعاوز اضافت
كل ماتضيف حاجة تتعقد اكثر

ربنا معاكم وينصركم عليهم ويصلح حال بلادكم وبلادنا

تقبل مروري دكتور مصطفى^_^

كريمة سندي يقول...

أنا أقول الليمون كتير عليهم أحسن نرشهم بالميه .. هاها

اللهم ثبتنا على الحق في ظل الفتن اللهم آمين

نسرين شرباتي "أم سما" يقول...

إحمد ربنا إنك عزابي،، علشان لو كنت متجوز ومراتك حامل وتوحمت على ليمون كانت حتطلع في عين الواد أو إيده أو رجله ليمونة كبيرة صفرا
علينا أن ننظر لنصف الكوب المليان دائما :)

Bent Men ElZman Da !! يقول...

اهو بسبب الليمون ده كانت ماما هتعمل اضراب ومش تدخله البيت
بس بعد نص ساعه من صدور القرار ده خرجت جابت نص كيلو والا ماكنش الاكل هيخلص :(
حكم القوى بجد
ربنا يستر الفتره الجايه عشان هيبقى صعب اوى حكايه الغثيان اللى من غير ليمون دى

zeze يقول...

فعلا ربنا يصلحلنا الحال ،ويصلح حالنا
بارك الله فيك استاذ مصطفي

هيفاء عبده يقول...

ربنا يصلح لكم الحال ويريح البال
تدوينة جميلة ومميزة
تحياتي

rona ali يقول...

بلاش تهتف وريح نفسك لتعطش وتجبر انك تشرب حسام عن جد
او تتاخر علي المحور وتتعصر :))
وفي كل الحالات احنا كلنا نشعر بالاشمئزاز والمشكله ان مافيش مشكله حاجه غريبه اوى الصراحه :))

ريـــمـــاس يقول...

مساء الغاردينيا أستاذ مصطفى
للأسف لالوم عليك وعلى إحساس الغثيان الذي أصاب الشعب المصري الحبيب ولكن كان الله معكم وفي عونكم على القادم من الأيام أتمنى أن تنتهي تلك الأنتخابات على خير وأن ينتهي ذلك الوضع في مصر لتنهض من جديد "
؛؛
؛
لروحك عبق الغاردينيا
كانت هنا
reemaas

♥نبع الغرام♥♪≈ يقول...

ربنا يسترها يارب

رؤى عليوة يقول...

يسقط وسيسقط بإذن الله

ربنا يسترها معانا ويولى حد نثق فيه

آخر العنقــــــود يقول...

نظل متمسكين بالأمل حتى وإن لم يبدو على المدى القريب!

ولاء يقول...

بصراحه حرااام ...

الله يعينكم يارب .

لـــولا وزهـــراء يقول...

ههههههه على رائيك يا دكتور ليطلعلك حسام من جوة الازازة لانه لسة متحاكمش



لولا

صديقة مصرية يقول...

صباح الخير
اول مرة اكتب عندك يا مصطفى .. لكن انا متابعة لمدونتك
انا معجبة جدا بالمدونة ومحتواها واسلوبك في الكتابة وتناغم الافكار فيها
لكن يا مصطفى .. انا مش معاك في اضطهادك لحكومة الجنزوري او للجيش
يا مصطفى انت عايز مين كان يمسك البلد في ظل الظروف دي ؟؟؟ وكنت منتظر ـ سواء من الحكومة الحالية او اللي انت متوقعها ـ منتظر منه يعمل ايه وهو مكانه مؤقت وفقط لتسيير شؤون البلاد والمحافظة عليها قدر الامكان ؟
يا مصطفى .. مصر دلوقتي زي بيت العيلة الكبير اللي بدون كبير وبدون رب اسرة
مفيش حد يحكمه ولا ياخد القرار الصح في الوقت الصح وينفذ قراره
ليه بتهاجم الجيش وهو اللي حامي البلد من اخطار متربصة له في الداخل والخارج ؟
بص للدول اللي حصل فيها ثورات وشوف حالها ايه دلوقتي في غياب رئيس لها وقارن بينها وبين مصر اللي لسه هي كمان مالهاش رئيس
مين اللي بيمسك كل يوم اسلحة ومخدرات وبلطجية وبلاوي سودا ؟
مين اللي مؤمن الحدود مع اسرائيل اللي تعتبر الظروف اللي بنمر بيها دلوقتي انسب الظروف لمهاجمتنا ورغم كدا الحمد لله حدودنا متأمنة ؟ مين يا مصطفى ؟
وبعدين تعالى قولي يا مصطفى .. الجيش اللي بتسميه حكم العسكر عمل لك حاجة سيئة اكتر من اللي حصل في عهد مبارك ؟ نار الاسعار شئ مش جديد علينا
هل هيفضل في الحكم لأجل غير معلوم زي السابق ؟ دا له معاد معين ومحدد لازم هيسيب الحكم فيه ويسلمه للرئيس المتنخب ... طيب ليه نكون عجلوين وماعندناش صبر بالشكل دا ؟ ليه ماكناش عجولين مع الحكومة السابقة ؟
والله لو علي لأدي له جايزة قبل ما يمشي
الجيش دا ضهرنا اللي بنحتمي فيه
الجيش دا سندنا اللي لو حصل لنا حاجة هنجري عليه علشان ينقذنا زي ما بيحصل مع الابناء لو حصل لهم حاجة بيجرو على اباءهم علشان يحموهم حتى ولو كانو مختلفين معاهم
يا مصطفى انت مصري .. والجيش مصري وبيحمي مصر
من صديقة مصرية

مصطفى سيف الدين يقول...

اولا انا مجبتش سيرة الجيش انا بتكلم عن المجلس العسكري و لازم نفرق بين المجلس العسكري كادارة سياسية و الجيش المصري كؤسسة عسكرية
ثانيا بتسألي ان كان المجلس العسكري عمل حاجة اكتر من مبارك اقولك ازمة انابيب و ازمة بنزين مفتعلة قعدت شهور طويلة بدون سبب مفهوم ايام مبارك كان اخرها شهر او اتنين و مستحيلة الازمات دي في الصيف
ثالثا كادارة سياسية لا تقبل الرأي الآخر ده فشل و دليل انهم مفيهموش معنى الثورة
رابعا تساقط الشهداء في محمد محمود و مجلس الوزارا و ماسبيرو كل الدماء دي ملطخة بيها ايديهم
خامسا اصرارهم على اعلان دستوري تكميلي يضمنوا بيه استقلاليتهم عن المحاسبة
سادسا بتسألي ان كان هيفضل حكم العسكر اقدر اقولك في خططهم ايوة هيفضلوا و الدليل شفيق
اهلا بيكي شرفتيني صديقتي المصرية
اختلاف الراي لا يفسد للود قضية