السبت، 7 يناير، 2012

المجلس و الفلول و القضاء ايد واحدة




بالرغم اني مش حابب برضه اتكلم في السياسة و الانتخابات اليومين دول بسنعلق برضه على اللي بيحصل
اقدر اقولكم ان الانتخابات و بالرغم من قيام الثورة على اساس تغيير المفاهيم والاستراتيجية إلا أنه في قنا بالرغم من بعض التغيير الا انه مش تغيير كامل لسه الحسابات القبلية سيدة الموقف
هاتكلم اولا عن دايرتي وهي الاولى فردي والجنوبية قوائم  مقاعد القائمة اربع مقاعد و الدايرة بتمثل مراكز قنا - قفط - قوص - نقادة
اما الدائرة الفردية بتمثل مراكز قنا - قفط
نيجي بقى نحط حاجات في حساباتنا الدائرة دي هادية نسبيا لو في تواجد قضائي الكل بيرتضي بالاشراف القضائي و ده جربناه في انتخابات 2000 وانتخابات 2005 محصلش اي انتهاك في دائرتي قنا و قفط في انتخابات 2000 و 2005 والكل قال تمام اما لما اتلغى الاشراف القضائي في 2010 حصلت مشاكل كتيييييييير مثلا في دائرة قنا القديمة حصلت اختطافات بين قبيلتين  ثم جرائم قتل لأن مادام مفيش اشراف قضائي يبقى اللي يبلطج اكتر يكسب و تبدأ الضغوط من كل قبيلة
اما في دائرة قفط 2010 كان ممكن تحصل الحكاية دي برضه بس ربنا سلم المرشحين كانوا أعقل بالرغم من التزوير والتسويد وانتهاكات أمنية من الأمن مش من العائلات لمرشحين معينين
كل ده خلانا نقول لازم الاشراف القضائي يرجع قبل ما يحصل ما لا يحمد عقباه
المهم ولله الحمد الاشراف القضائي رجع فاضل ايه ؟ فاضل ان اللي افسدوا في البلد يتم عزلهم على الاقل 5 سنين
بس الكلام ده مارضاش اباطرة الفلول في الصعيد و على رأسهم معتز محمد محمود رئيس حزب الحرية وعضو لجنة السياسات في الحزب الوطني المنحل
عمل ايه الاستاذ معتز ؟ عمل مؤتمر للفلول في نجع حمادي
اشمعنا نجع حمادي وهو من قوص؟
لأن اللي يخوف في نجع حمادي حيث الفلول يملكون السلاح و القبليات
طيب كانت ايه نتيجة المؤتمر؟
النتيجة تراجع المجلس العسكري عن قرار العزل والمجلس بقي بيخاف من شوية فلول ازاي هيحمينا من اسرائيل ؟ الله اعلم
طيب نسيبنا بقى من نجع حمادي شوية خلينا في قنا وقفط  وقوص ونقادة حيث الدائرة الجنوبية للقوائم اللي بيتاخد منها اربعة
بالنسبة لدائرة قفط القديمة قبل الثورة هي دائرة قنا القديمة فدول ليهم موقف من قبل الثورة انهم بيغيروا مرشحينهم كل دورة لأن كل مرشح بينزل مستقل ينجح من هنا يروح يوقع للحزب الوطني من هنا و بالتالي مش بيعمل حاجة و زي ما قلت انتخابات 2000 و 2005 اللي انا شاركت فيهم بالتصويت و رحت شفتهم يعني كانوا في قمة النزاهة عندنا فكل ده ادى لزيادة عدد الفلول في دائرة قنا وقفط للفردي اللي رشحوا نفسهم مع زيادة العدد بقى من السهل  يتغلبوا بسهولة و ده اللي حصل عندنا في الفردي دائرتنا في الفردي نظيفة تماما وغالبا هينجح في الاعادة مرشح الحرية و العدالة و مرشح الجماعة الاسلامية مش علشان حاجة غير ان الدايرة كبيرة اوي واللي نازل معاهم في الاعادة ناس غير معروفة غير في منطقتهم بعكس اللي بينتموا لاحزاب و جماعات ليهم انصار اكتر
اما القوائم بقى اولا انا رايي ان النتيجة صحيحة ومفيهاش تزوير بالرغم كنت اتوقع نتيجة افضل للحرية و العدالة بس اللي حصل له تفسيرات .. النتيجة بقى
الحرية و العدالة 30%
النور 20.5% 
 الحرية (فلول )9 %
  الوفد 8%
وبحسبة بسيطة تتوزع الاربع مقاعد على الاربع احزاب بمعدل مقعد لكل حزب
تعالوا نحلل اللي حصل زيادة نسبة الاخوان عن الباقي عندنا مش علشان عدد الناس اللي بتنتمي للاخوان لا ده علشان ان الاخوان عرفوا يختاروا قوائمهم صح اختاروا افضل المرشحين وافضل قائمة و واستنادهم على الافضلية دي مع نجاح الاخوان في سائر المحافظات خلاهم يستكينوا شوية ويقللوا الاهتمام بالدعايا بعكس النور مثلا اللي يقرفك من الالحاح كل دقيقة ويقول شعارات اسلامية ده غير المشايخ اللي بييجوا في التلفزيون اللي ملوا بلادنا تخيل ده الشيخ فلان فارس قناة كذا هييجي يا راجل 
التلفزيون هيدخل البلد؟ مع بلاد مظلومة من كل شيء ده ادى افضلية للنور في الشارع بالرغم انها اسوأ قائمة على الاطلاق اشخاص غير معروفة مجهولين للشارع بس لما ييجي الشيخ فلان يقولك لو بتحب سيدنا ابوبكر وسيدنا عمر ادي دول هتعمل ايه؟
اما بقى الفلول زي ما قلت عددهم كبير جدا وكل فل منهم مسنود بالقبيلة او المنطقة اللي هو فيها

نيجي لحزب الحرية اللي بيترأسه معتز محمد محمود صاحب مصنعين أسمنت وبيصدر اسمنته لاسرائيل لبناء الجدار العازل
تاريخ نضيف بسم الله ما شاء الله خمسة و خميسة
والده النائب السابق المرحوم المهندس محمد محمود عن قوص اللي فضل نائب عدد كبير جدا من الأعوام حتى خسر عام 2005
أخوه ممدوح محمد محمود وده اترشح في انتخابات 2010 ونجح بفلوسه أيوة بفلوسه  و بالتزوير ده شيء معروف ان الانتخابات في قوص السنة اللي فاتت مكنش في مرشح يعرف يوصل للجنة علشان اللجنة مقفولة وبتتسود من جوة و مع ذلك برضه نجح بالاعادة
بعد 25 يناير قام عضو لجنة السياسات السابق معتز محمد محمود بإنشاء حزب الحرية وعمل مؤتمر اتق شر الصعيد اذا غضب واللي فيه هدد هشام الشعيني الفلولي المعروف بعزل الصعيد اذا تم تطبيق قانون العزل
نتكلم عن قوص معقل الاخوان بقنا المرشح الاخواني الوحيد اللي نجح في قنا 2005 كان في قوص ازاي بقى ممكن معتز يجيب 35 الف صوت كلهم من قوص و نقادة علشان قنا وقفط نظيفتان تماما من الفلول مخدش حاجة من عندنا
ازاي قوص تنسى ولائها للاخوان ؟
الاجابة سهلة
1- كسل الاخوان واستنادهم انهم كده كده مكتسحين
2- القبلية نعم القبلية قائمة الاخوان لا تحتوي على قوصة وبالتالي ده معناه ان الناس مش بتنتخب الاخوان علشان مذهب فكري على الاقل نسبة كبيرة كده
3- تكريس الملايين من الجنيهات وآلاف اطنان الاسمنت لاهالي قوص و نقادة  في اشاعة انه اتغرم 30 مليون جنيه علشان ينجح
طيب الانتخابات مش نزيهة؟
لا الانتخابات نزيهة بس مش عادلة
ازاي واحد والده في المجلس له عمر طوييييييييييل و خدمات لناس كتير و فوق ده كله تحت ايده بنك بيصرف منه يتعادل مع شاب او مع حد في مقتبل حياته
انا متكلمتش عن اللي حصل في نجع حمادي والتزوير اللي عيني عينك وصورة اذلالية للمجلس العسكري اللي قال انه هيقدم انتخابات نزيهة
لأن المجلس اصلا اثبت جبنه من الاول لما وافق ان القانون العزل يتلغي وساب واحد زي الغول والشعيني و رسلان يرشحوا نفسهم و بقوة السلاح اللي في ايدهم يكسبوا
لحد امتى هيفضل الظلم
وايه اللي يخلي حد يعمل كده؟
مفيش غير الحصانة 
ايوة الحصانة طول ما في حصانة هيفضل الاقتتال على المقاعد  لازم يشوفوا حل ميخلوش النائب فوق القانون
بالرغم من اني مش مع الناس اللي قطعت السكة الحديد بعد ما كسب الغول ووصل للاعادة بالرغم ان بلده منجحش فيها وبعد مكسب الشعيني و رسلان
الا اني باعذرهم احساس مرير ان تلاقي صوتك بيتغير
هو احنا امتى صوتنا هيوصل صح؟
امتى صوتنا مش هيبقى مبحوح؟

دائرة الدم و النار نجع حمادي (الشمالية بقنا) في كل انتخابات تقدم لنا قتلى هذه المرة يجب ان نشكرها فقد قدمت لنا الدليل ان تلك الانتخابات قابلة للتزوير
الدليل ان المجلس العسكري كائن ضعيف لا يصلح حتى لحماية حدودنا
وان كان ذلك خاطئا وهو اقوى منهم اذا فالفلول ينتمون لجنوده البواسل
شكرا للغول و الشعيني و رسلان كنا نحتاج لاثبات عملي وانتم قدمتموه لنا
المجلس و الفلول ايد واحدة
و النتيجة اعادة بين ثلاثة فلول و اسلامي مع نجاح اثنين من الفلول على قوائم الحرية و الاصلاح و التنمية في الدائرة الشمالية
بينما نجح واحد فقط من الفلول هو معتز محمد محمود في كل مقاعد  الدائرة الجنوبية

من هنـــــــــــا

و من هنـــــــــــا بردو

و كي تعرف أكثر من هنـــــــــا

ان يصبح القضاء أداة في يد المجلس يحركها كيف يشاء فهي سبة في القضاء المصري أن يقوم على تزوير الانتخابات
ماذا ننتظر من القضاء في محاكمة مبارك و هو يعيد إلينا الغول بالتزوير؟




29 التعليقات:

شمس النهار يقول...

ياسنة سوخة ياولاد

:)))))

برغم جدية البوست الا اني كنت عماله اضحك وانا بقراه
تحليلك ممتاز جدااااا
وشرحت الموضوع ببساطة
والاخوان زي ماعملوا في قوص وضيعوا مرشحينهم
هيعملوا كده في المجلس ويضيعوا البلد بغرورهم
انا زعلانة من الاخوان جدا
علشان كنت مستنية منهم كتير
علشان همه الفصيل الوحيد المعتدل المنظم في وسط الهوجة اللي احنا فيها
اصل الغرور وحش
ياله كل انتخابات ومصر بخير
المهم هيعمل ايييييييييييه؟
هذا المجلس المنتخب؟
هو ده السؤال
ونقول يارب خير

ابراهيم رزق يقول...

طول ما فى العصبية و نواب الخدمات
طول ما مصر هيبقى قدامها كثير

يبقى الحل فى ممارسة الديمقراطية فالديمقراطية لا تتعلم الا بالممارسة
تحياتى

مصطفى سيف الدين يقول...

شمس النهار
الاخوان يمكن غلطوا واستهتروا وقالوا انتخابات مضمونة
بس قصاد المال مفيش حاجة مضمونة
اما عن مجلس الشعب فطالما في مجلس عسكري هيبقى مالوش قيمة
يا رب خير

مصطفى سيف الدين يقول...

ابراهيم رزق
و هتفضل العصبيات و القبلية في الصعيد
يمكن اقل من زمان بس هتفضل
اما عن الديمقراطية في ظل احباطي منها بافتكر جملة عمر سليمان مصر غير مهيئة للديمقراطية واضحك
ربنا يستر و نكون فعلا مهيئين ليها

faroukfahmy58 يقول...

تحليل ممتاز من واقع الاحداث وممن شاهدوها ولمسوها وليس ممن سمعوا بأذانهم ونعروها بالسنتهم
تحليل يا مصطفى يستحق الدراسة والعناية والمتابعة واعادة تقييماتنا للجميع

كريمة سندي يقول...

بوست ذا تحليل هادف وعملي وموضوعي بس الأخوان مش واضحة سياستهم بالمرة الله المستعان

تحية ودوتقدير لك زميلي العزيز

أمة الرحمن يقول...

لسه فيه حجات كتير بتحصل تجيب ضغط و ... كفاية ضغط

مكناش متوقعين ان البلد تتصلح مية فى المية خلال شهور دول كانو 30 سنة

لكن تحليل حضرتك رائع وفى كل منطقة او محافظة هتلاقى حجات حصلت

الغريب دلوقتى كمان الاتحادات بين احزاب او بين واحد فردى وحزب مناقض للمبادئ المزعومه طبعا

يمكن بقى فيه شبه اجماع على ان المجلس العسكرى مش زى مكنا متخيلين وهو كمان طلع له اجنداته الخاصه


عندنا بقى فيه واحد كان تبع الحزب الوطنى واترشح فردى انضم دلوقتى لحزب النور !!!!

والاخوان بيضربو فى النور وبيقولوا انهم كانو بيمرو على الناس ويقولولهم اختارو الاخوان رمز الفانوس ::) خداع المشايخ بقى

حجات كتير تنرفز وتضحك من كتر ما بتنرفز

بس واله متفائله اصل البلد دلوقتى عامله زى المسرح واحنا متفرجين خلى كل واحد يطلع يورينا نفسه ونشوف بعد السنادى مين هنختار يمكن المجلس ده ميكنش تمام اوى بس اكيد خطوة للامام


معلش طووووووووووولت
لكن نعمل ايه بقى حضرتك اللى فتحت الموضوع

تحيااااااتى

منجي باكير يقول...

الله يحسّن الاحوال ...
إن شاء الله التضحيات ما تمشيش هدر .

تقديري

محمد نبيل يقول...

أخى مصطفى ..

صحيحٌ أننا كنا نتمنى استبعاد الفاسدين منهم تماماً من الحياة السياسية لفترة ..

ولكن بالرغم من ذلك .. فإن الشعب المصرى الواعى قد طبق عليهم العزل بنفسه إلى حدٍ بعيد دون الحاجة إلى قوانين.

وصحيحٌ أن بعض الفلول قد نجحوا فى المرحلتين الأولى والثانية ..

إلا أن عددهم على مستوى الجمهورية بالكامل ( إذا أضفنا عليهم الفلول المحتمل نجاحهم فى المرحلة الثالثة ) سيتراوح عددهم ما بين 20 : 30 عضو من مجموع 508 عضو فى مجلس الشعب.

فهل تعتقد أن مثل هذا العدد سيكون له أى تأثير داخل المجلس المكون من تيارات سياسية قوية ومتنوعة ؟

هذا إذا شعرنا بوجودهم أصلاً .

أخى الحبيب ..

أرجو ألا تتعجل الأحداث أو تتسرع فى الحكم على النتائج الأولية ..

فما ذكرته عن أن بعض هؤلاء الفلول سيدخلون جولة الإعادة , لا يعنى بالضرورة أنهم فازوا , فمثل هذا حدث تقريباً فى كل دوائر الإنتخابات فى جميع أنحاء الجمهورية فى المرحلتين السابقتين , وحدث عندنا فى دوائر محافظى " أسيوط ", وهذا شىءٌ طبيعىٌ ناتجٌ عن تفتت الأصوات الناجم كثرة عدد المرشحين ..

ولكن الشعب قد حسم جولات الإعادة لصالح استبعاد الفلول أياً كان صاحب التيار المنافس.

فاصبر أخى الكريم .. فالعبرة بالنهاية.

محمد نبيل يقول...

..

صحيحٌ أننا كنا نتمنى استبعاد الفاسدين منهم تماماً من الحياة السياسية لفترة ..

ولكن بالرغم من ذلك .. فإن الشعب المصرى الواعى قد طبق عليهم العزل بنفسه إلى حدٍ بعيد دون الحاجة إلى قوانين.

وصحيحٌ أن بعض الفلول قد نجحوا فى المرحلتين الأولى والثانية ..

إلا أن عددهم على مستوى الجمهورية بالكامل ( إذا أضفنا عليهم الفلول المحتمل نجاحهم فى المرحلة الثالثة ) سيتراوح عددهم ما بين 20 : 30 عضو من مجموع 508 عضو فى مجلس الشعب.

فهل تعتقد أن مثل هذا العدد سيكون له أى تأثير داخل المجلس المكون من تيارات سياسية قوية ومتنوعة ؟

هذا إذا شعرنا بوجودهم أصلاً .

أخى الحبيب ..

أرجو ألا تتعجل الأحداث أو تتسرع فى الحكم على النتائج الأولية ..

فما ذكرته عن أن بعض هؤلاء الفلول سيدخلون جولة الإعادة , لا يعنى بالضرورة أنهم فازوا , فمثل هذا حدث تقريباً فى كل دوائر الإنتخابات فى جميع أنحاء الجمهورية فى المرحلتين السابقتين , وحدث عندنا فى دوائر محافظى " أسيوط ", وهذا شىءٌ طبيعىٌ ناتجٌ عن تفتت الأصوات الناجم كثرة عدد المرشحين ..

ولكن الشعب قد حسم جولات الإعادة لصالح استبعاد الفلول أياً كان صاحب التيار المنافس.

فاصبر أخى الكريم .. فإنما العبرة بالنهاية

♥نبع الغرام♥♪≈ يقول...

والله يا مصطفى انا ماليش انا كمان فى السياسه بس الوضع اللى احنا فيه بيزيد سوء

انا بتمنا ان ربنا يعدى المرحلة القادمه على خير يارب

مصطفى سيف الدين يقول...

فاروق فهمي
اشتاذي العزيز
اشكرك نورتني
يا ريت فعلا نخلص لحقائق واستنتاجات من هذه الانتخابات ربما تفهمنا ما يدور في الشارع

مصطفى سيف الدين يقول...

كريمة سندي
علشان منظلمش حد مفيش اي حد له سياسة واضحة كل السياسات مبنية على الاستنتاجات و مفيش حد بيصرح بالحقيقة
تحياتي

مصطفى سيف الدين يقول...

امة الرحمن
على فكرة احنا عندنا برضه النور عملوا كده فضلوا يقولوا للستات الكبار في السن لو عايزين تدوا الاخوان همه رمز الفانوس ومتنسيش ان الدكتور زهران قالهم التزوير واجب شرعي
هاحاول اتفائل
بس انتي مطولتيش في التعليق ولا حاجة
اشكرك

مصطفى سيف الدين يقول...

منجي باكير
اشكرك يا عزيزي
ان شاء الله بكرة احسن
تحياتي

مصطفى سيف الدين يقول...

استاذ محمد نبيل
ربما كما تقول فعلا حقيقي لو ان الاعادة بين اتنين فلول واتنين غير ذلك
لكن الاعادة في نجع حمادي بين تلاتة فلول يعني على الاقل في كرسي فلول منهم نجح ان مكنوش الاتنين
ده غير ان الغول سقط والنتيجة كانت مروجة بكده في كل الصحف وغير القوائم اللي نتيجتها طالعة غريبة يعني عدد الاصوات اقل من النتيجة ب 2900 صوت
منتهى المهزلة
الانتخابات هناك مزورة

قد نقبل الفلول لكن ان كانت الانتخابات نزيهة
بعد 25 يناير لن نقبل التزوير

مصطفى سيف الدين يقول...

نبع الغرام
شكرا يا ايناس
ان شاء الله القادم افضل

افروديت يقول...

سيف

المجلس العسكري كائن ضعيف لايصلح حتي لحماية حدودنا

المجلس والفلول ايد واحدة

طيب راجع نفسك كده انت لسه في عز شبابك

ههههههه طبعا انامتفقه معاك وشكلي هتحبس برضه معاك

ماهو ده اللي كنا بنقوله من قبل الانتخابات بس الناس رفضته

عمومآ اللي نجح اهلابيه وياريت بقي يسعوا علي قضاء حوائج الناس واولها الثأر للشهداء وإلا يبقوا..........

;كارولين فاروق يقول...

تعرف يا مصطفي
انت من كثره تحليلاتك الصحيحه
والدقيقه لهذا الموضوع انت لا تقل
عن وائل الابراشي في برنامجه الحقيقه
بل في وجه نظري افضل بكثير
استطعت ان تعري الغطاء عن شخصيات
مجهوله عند البعض وبأهتمامك ونظرتك وربطك للأحداث استطعت ان تصل بنا الي
نقطه اننا لم نشفي تماما من جرثومه
فلول النظام السابق ولابد من التطهير
التام حتي نستطيع البدء من جديد
تحياتي لفكرك و لقلمك الرائع

Aya Mohamed يقول...

فعلا يا مصطفى اكتر نتيجة فى ال3 مراحل بان اوى انها مش طبيعة
ونحاج الغول ده كارثة لوحده
ربنا يعدى البلد على خير

أمل م.أ يقول...

ربنا ياخد بيد مصر وتعدي المرحلة
هذه بسلام وامان وديمقراطية حيقيقية
بالتاكيد رقابة القضاء لها
دور مهم واساسي
انا ما فهمتش كتير موضوع المقاعد
الفردية والجماعية وتوزيعها
لاننا هنا في القدس ببساطة لا ننتخب
لذلك معلوماتي شله صفر
لكني استهجن ان يكون المجلس العسكري
يخاف من الفلول وعلى رايك
كيف سيحمينا من بني صهيون اذن!؟
والله يا مصطفى احيانا كثيرة الاوضاع بتصيبنا بالاحباط
كنا فاكرين انه برحيل مبارك
كل شيء سيصبح افضل
لكنه زرع له فاسد .. بل مفسدين
في كل مكان
والموضوع بحاجة الى كم مهول من الجهد والوقت وتكاتف الناس الشرفاء

نتمنى كل الخير للشقيقة مصر
قلوبنا دائما معكم

لك مني كل الود
كن بخير دوما يارب

سكن الليل يقول...

والله يامصطفى مش على حد عندكم بس

وبصراحة لا أثق في مجلس شعب

جا بنتخابات نزيهة شكلا ..دة لو فعلا نزيهة..لكن جوهرها عطب..زائف

شوف نسبة الجهل السياسي كبيرة اد ايه

شوف عدم تكافؤ الفرص

شوف البلد نفسها في قبضة مين
ومين ماسك زمامها ولجامها ومين سجانها

حسبي الله ونعم الوكيل

الواحد كان فرحاااااااااااااان
وقلبه بيدق فرحة وبيخفق سعادة
لما الثورة قامت

دلوقتي فين الثورة؟؟؟

والبلد رايحة لفين؟؟

الله أعلم

لكن أتمنى يكون اللي فات أسوأ حاجة

واللي جاي احسن

غير معرف يقول...

نجاح الفلول فى دائرة قوص يرجع الى الخطأ الكبير للاخوان لانهم لم يرشحوااى واحد من قوص على قائمة الاخوان واتمنى ان يعوا الدرس فى القادم

أم هريرة.. lolocat يقول...

السلام عليكم

انا قرأت البوست قبل اى تعليق لكن بصراحة قلبى وجعنى من السياسة واللى بيحصل الايام دى

مش عارفة يامصطفى اشعر بقلق رغم بشاير الامل لكن فيه ناس بتلعب لنفسها ومش مهم عندها مصلحة البلد وهم دول اللى المفروض نخلى بالنا منهم فى المستقبل والا نرجع تانى نعانى ونفكر بثورة جديدة :)



عدت سنة ولسه البلد بتعانى يارب عجل لنا الفرج وولى علينا الصالحين


نسأل الله النجاح لمن يستحقه

تحياتى سيف المدونين واشكرك على التحليل الاخبارى الاكثر من رائع ومجهود جبار :)ماشاء الله

دمت بخير

أبو حسام الدين يقول...

أسال الله أن يصلح الأحوال، ويرزق مصرا حكاما في مستوى تطلع الشعب المصري.
تحية ودية أخي مصطفى

goulha يقول...

بالتوفيق والسداد
تحيتي ومودتي

AhMeD RaDy يقول...

مصطفى

انا مش عارف ليه كنت متررد اعلق على البوست دا

لكن بعد كم يوم عرفت ليه

اتارى بتوع نجع حمادى طلعوا واعترضوا ازاى الغول ينجح !

ودا كفاية اوى انه يثبت ان الناس زهقت وطهقت من الغول دا !

ونستنى نشوف الجديد

دعاء العطار يقول...

انا والله اتفررررست يادكتور مصطفى من الانتخابات عندنا

الاعاده بين فلول وحريه وعداله

والنور اتحدوا مع الفلول عشان الحريه والعداله ماتكسبش

والنور والحريه والعداله يوم الانتخابات ضربوا بعض

يقوم الجيش يعمل اييييييييه ؟

يقفل البوابه ع نفسه .. ويسيبهم يتخانقوا !!

انا بصراحه ماشفتش انتخابات .. انا اللى شوفته عككككككك

givara يقول...

اللهم ولى من يصلح
تحليل دقيق وعميق لمجريات الأمور
وما يحدث الأن
بوست عبقرى
أماالاخوان اتفقت او اختلفت معهم فهم الأحق الان لأن وببساطه الصناديق هيا اللى جابتهم
بس ربنا يستر