السبت، 27 أغسطس، 2011

الف مبروك للطفلة الزنانة

اولا كل عام وانتم بخير بمناسبة عيد الفطر المبارك  وربنا يعيده علينا بخير وسعادة
ويا رب اسمع اخبار حلوة كتير
ونصيحة متتقلوش في الكعك ويستحسن متاكلوش خالص ابقى ابعتولي الكعك اللي عندكم :)
ثانيا : تم قبول كتابي في مشروع النشر لمن يستحق عن دار ليلى
ثالثا :طبعا بتسألوا عن عنوان البوست اقولكم بقى
الطفلة الزنانة خلاص هتتجوز يوم الخميس الجاي ده مش هزار ده خبر بجد
اه هي مشهورة بكده طفلة زنانة ومش بتبطل زن واللي يعرف مدونتها اكيد عارف كده كويس
اسم الشهرة بتاعها  سكن الليل  ومدونتها اسمها وغدا (على فكرة وغدا يعني وبكرة احسن حد يقراها غلط هههه )
انا باتكلم جد ان شاء الله فرح سكن الليل الخميس الجاي   
الف مبروك يا اسراء  ده اسعد خبر سمعته الشهر ده
اخيرا هنخلص منك بقى و نرتاح من زنك :)
انا على فكرة اعرف اسراء من 4 سنين كنا مع بعض في منتدى واعرف كويس انها حافظة القرآن ومتدينة جدا وبتتمتع بحس جميل جدا ولها قلم بيعرف ينقل احساسها الطفولي كويس اوي
الف مليون مبروك تاني
وخدي عندك شوية صور تتماشى مع المناسبة السعيدة دي

ده طبعا حسن اكيد هيحاول يطفش :)
يا عيني عليك يا حسن :)

على العموم الف مبروك مش عايز اغتت اكتر من كده  بالرفاء والبنين وفعلا (الطيبات للطيبين والطيبون للطيبات )
معرفش الصراحة هتقدر ترد عليكم ولا لاء انتو عارفين طبعا العرايس  بيبقوا مشغولين ازاي في اسبوع الفرح
ربنا يتمم بخير يا اسراء

اللي ميعرفش اسراء انا هاجيبلكم خاطرة ليها


خاطرة سكن الليل








سكن الليل ؛؛

والسنا لملم ثيابا

وأسدل الستار

عن مشهد من عمري

من حياتي

عن سكوني

عن حلمي وهفواتي

وبقي الدمع في عيني سجين الانتظار

سكن الليل

ثارت شجوني

والآهة المكبوتة في جفوني

وأرق العين سكين الألم

والذكريات تدافعت

تلاحقت

تقاتلت

وكأنها يأجوج كانت

أو مأجوج

أو كلتاهما

هدمت قيودا من فؤادي

رفعت رايات الدمار

غادر النور

حل الظلام

والآن فتحت الستار

وخرج الأبطال

يحيون...ينتظرون أن أرفع يدي

أصفق

أهتف بهم

دمعا ودم

ووردة جارحة

وقذيفة من نار

الآن أعلنت الحصار

أوقفت عقارب الزمن

وركبت بحري

موجي العاتي

ونورسي

وزجاجتي...ورسالتي

والصَدفة الراسية على جزيرتي

تحمل دعائي

..أشواقي

مودتي

ذكرى صباي..ضفيرتي

وعروستي

هدية أمي

وعيون أبي

بسمة أخي

وصديقتي

أرسيت..وسماء من عجب

كوخ خشب

ومكتبي..وأوراقي......وقلمي وألمي

يروون حكايات الزمن

وهمسة الجدران حولي

صرخات وضحكات

رقية الطَيب

و تعويذة الساحرات

ومنديل معطر...

بدمائنا معا

والآن أسدلت الستار

وصوت المؤذن ..يرفع الأذان...أذان الفجر

ويعلن النهار



.


بقلم
سكن الليل
21/12/2007

الأحد، 21 أغسطس، 2011

طلب اجازة

اتقدم بطلب اجازة حتى آخر الشهر الفضيل
اذاكركم بتحري ليلة القدر في تلك الايام الطيبة
كل عام وانتم بخير ولا تنسوني من دعائكم
ولا تنسوني من كحككم :)
بدات الليالي العشر بليلة  الواحد والعشرين بالامس باحداث سعيدة على العرب
امطار بالصومال  وثوار ليبيا على ابواب طرابلس  والعلم المصري يرفرف فوق سماء السفارة الاسرائيلية
كل عام وانتم بخير

السبت، 20 أغسطس، 2011

و ما الدنيا الا...

ابيض و أسود يتباريان
ورمية نرد تحدد من الرابح
حقا ما الدنيا الا طاولة يلعب الجميع فيها دور (المحبوسة)
—————————-
سأراوغه بالوزير والحصان كي اجعل تفكيره ينصب في ذلك الاتجاه بينما انقض عليه بالفيل من الاتجاه الآخر
ولكن ما ادهشه ان الآخر قام بنقلة غير منطقية افسدت خطته وجعلته يعيد تفكيره
حقا ما الدنيا الا نقلة غير منطقية تجعلك تعيد حساباتك
—————————
نظر الى اوراقه التي بيده كانت قطع دومينو جيدة بالفعل فنظر الى عين الآخر لمعرفة ما يفكر به
بينما الآخر لم يكن معه اوراقا جيدة حاول ان يستقرىء ما يجب فعله
وبين حظ الاول وتخطيط الآخر اكتشفا ان اللعبة انتهت بقفلة لم تكن في الحسبان
حقا ما الدنيا الا ضربة قدر
————————————————
سحب انفاس الارجيلة بقوة ليملأ صدره بها كمن يملأ صدره بعبق الماضي
ثم فجأة زفر زفرة قوية كمن يطرد من جوفه هموم الحياة
ويتكلم عن هدف الفريق الذي يشجعه او الفنانة التي ينتقد ادائها او اداء المحافظ
وبين كل موضوع يتكلم فيه وآخر يدفع زفرة قوية تفضح ما بداخله
حقا وما الدنيا الا انفاس تفضحك كلما حاولت ان تخفي ما بداخلك
———————————————-
يحتسي الشاي كمن يستحي الايام تظهر على وجهه معاناة
ولا يتوقف ابدا عن تتابع الرشفات
حقا وما الدنيا الا ايام نحتسيها
———————————————-
راقب الجميع وفي خلسة وضع المخدر على الفحم المتقد في ارجيلته
وقام بسحب انفاسه كي يحلق في سماء وردية هربا من دنيا قاسية
ولكنه استيقظ من احلامه على سيارة الشرطة وهي تقوده بعيدا
وما الدنيا الا حلم يطير بك وفي النهاية يسقطك
———————————————
يأتي هنا يوميا كي يكسر حالة السأم التي يعاني منها
وكل يوم بعد بعض الوقت يقوم بدفع حسابه دون ان يدري لماذا اتى ولماذا يبدد ماله
حقا ما الدنيا الا ازمان مسلوبة واموال منهوبة
———————————-
يقول شكسبير -ولا اراه صائبا- وما الدنيا الا مسرح كبير
لأنه ليس بالدنيا متفرجين الكل منغمس بالدنيا حتى الثمالة
اقول له وبصدق ما الدنيا الا مقهى كبير

الثلاثاء، 16 أغسطس، 2011

لو القضاء مجابش حقنا


يا حللولي يا حللولي ده ايه ده اللي بيحصللي
بيقولك اسماء محفوظ هتتحول لمحاكمة عسكرية قال  يا حلاوة يا ولاد  يعني مش عارف نهني انفسنا ازاي على الحدث العظيم اللي حصل ده
لما جمال مبارك يخرج من المحكمة المدنية وهو رافع ايده بعلامة النصر واسماء محفوظ بتبكي وتعيط علشان هتتحاكم محكمة عسكرية
فعلا كان يوم اسود في تاريخ مصر وربما تناقلته الاجيال وجايز بعد كام سنة كده يتعمل المشهد ده فيلم ويمثل دور جمال مبارك الممثل القدير جيمي عمرو مصطفى (ابن الفنان الكبيرعمرو مصطفى اللي هيبقى نقيب للموسيقيين وبعدها وزير اعلام وكمان وزير اتصالات واللي هيلغي فيسبوك وتويتر واليوتيوب  في عهد الرئيس الفنجري ابوصباع الرئيس السابع لمصر متسالوش عن الخامس والسادس)
ايام سودة عايشينها حاليا
 هل فشلت الثورة المصرية؟
سؤال سألته لنفسي زمان هل احنا عايزين مبارك واعوانه يتحاكمو محاكمة تفتيش ويتم اعدامهم وكده تبقى اشطا فلة شمعة منورة والشعب ينبسط والدنيا تبقى بيس؟
ولا يتحاكم محاكمة عادلة امام قضاء مدني
علطول جاوبت نفسي اننا كعرب اكتر ناس عانت من محاكم التفتيش في الاندلس  وانا ضدها حتى لو مكنش حقي هييجي غير بيها
 وانا مع محاكمة الجميع محاكمات عادلة قدام قضاء مدني حتى العادلي ومبارك من حقهم علينا اننا نحاكمهم محاكمة عادلة بالرغم اننا ماشفناش العدل على ايديهم بس احنا كشعب مش هنعاملهم زي الامعة ان احسنوا احسننا وان اساءوا اسائنا بل هنعمل  بالثوابت اللي مؤمنين بيها
علشان كده فرحت لما مبارك والعادلي اتحولوا للقضاءالمدني
طيب بس دول تعابين صعب نثبت عليهم حاجة واغلب الاوامر شفهية مش ورقية  <<<<. والله نسيبهم للقضاء ونشوف
طيب وبعدين
ولا بعدين ولا قبلين قاعدين مستنين المحاكمات ومنعرفش انها هتتحول لمحاكمات هزلية وسيبك من المحاكمات دلوقت اصل المغرب لسه مادانش واللهم اني صائم
ندخل بقى في الغويط بيقلك قال ان اسماء محفوظ هتتحاكم محاكمة عسكرية علشان بتنبه لو العدل لم يقام هتظهر جماعات مسلحة وتقوم بسلسلة اغتيالات
الغريب في القصة ان اللي اثار المجلس العسكري هو الشق التاني من الجملة مش الشق الاول يعني اللي ضايقهم هو ظهور جماعات مسلحة ومضايقهمش جملتها (لو القضاء مجابش حقنا )
على فكرة انا متفق مع اسماء محفوظ ان عدم اقامة العدل هيعمل فتنة اكبر وقد تكون فتنة مسلحة
بس اللي مستغربله محدش وقف قدام جملتها الاولانية (لو القضاء ماجابش حقنا ) الجملة دي خطيرة واهمالها من المجلس العسكري يخوف جدا او على الاقل خوفني
لما ييجي المجلس العسكري يجيب اسماء محفوظ ويحقق معها ويحولها لمحاكمة يبقى في لعبة ممكن تحصل وميتحققش العدل لأن الطبيعي ان الامور تمشي زي ما هي والقضاء يحكم حكم عادل وبالتالي الامور كلها بيس وزي الفل و مفيش داعي لمحاكمة اسماء محفوظ
يمكن انا مش مع اسماء محفوظ في جملتها (لو القضاء ماجابش حقنا ) لأنني شايفها ضغط على المستشار احمد رفعت قبل المحاكمة علشان يقول الحكم اللي على هوى الناس و ده يوديني لسؤال تاني 
القضاء المفروض يعمل ايه؟
يكون حكمه على هوى الشعب؟
يكون حكمه عادل ؟
يكون حكمه مطابق للقوانين والادلة حتى لو مكنش عادل؟
ده سؤال خطير جدا لأن القضاء عندنا هو تطبيق القانون وبالنسبة لناس مخضرمة زي مبارك ورفاقه نقدر نقول اننا مش عارفين نمسك عليهم ادلة دامغة في ظل كمان وجود محامين الشهداء اللي معرفش جابوهم منين
طيب والحل
قالولنا زمان ان في حاجة اسمها قانون غدر
اشطا زي الفل وكنافة بالمكسرات كمان
خلاص يا حاج يبقى مبارك افسد الحياة السياسية واعدامك المتين فين يا قضاء؟
استنوا استنوا
بس قانون الغدر ده ضد اهم ثابت من ثوابت ثورتنا وهو العدالة ده غير انها ترسيخ لمحاكم التفتيش
طيب ايه الحل؟
والله معرفش شايفها متقفلة طالما المحامين دول متمسكين بالقضية وكل همهم التعويضات مفيش حد فيهم بيدور على ادلة ادانة وكأن مبارك والعادل لو دفعوا دية محترمة يبقى تمام
لو عايزين نرسخ قواعد دولة قوية في المستقبل نشيل من عنينا نضارة الانتقام السوداء علشان نعرف نفكر كويس في طريقة عادلة نقيم بيها الحد والقصاص على قتلة الشهداء بطريقة عادلة
انما طالما اننا شايفين انهم لازم يتعدموا بدون تفكير بمحاكمة تفتيش من غير ادلة ولا نيلة يبقى احنا كده ما قمناش بثورة صحيح هيبقى اعدمنا مبارك بس هييجي بعد مبارك واحد تاني زي مبارك ويمكن اكثر طغيان منه علشان يقدر يوقف قوانين الغابة
يمكن كلامي ميعجبش ناس كتير
بس صدقوني احنا كمصريين جوانا معادن طيبة وجوانا ثوابت قوية لو مشينا ورا المؤمنين بيه بس هنلاقي حاجات كتير توحدنا
هنعرف نجيب حق اسماء محفوظ من المجلس العسكري
هنعرف نلاقي ادلة دامغة تدين الجبابرة
صدقوني لو جوانا بس مصلحة البلد و ينسى كل واحد مننا نه لازم يظهر في الكادر وقتها هنلاقي حلول
لكن طالما احنا دايرين في الساقية مغمضي العيون هنفضل بندور حوالين قشور تافهة وننسى الاصول
هتلاقينا بنقول مدنية ولا اسلامية بالرغم انا لحد هذه اللحظة مش فاهم الفرق بين الاتنين
يعني هل اللي بيقولوا مدنية مش عايزين يطبقوا المادة التانية ؟  .... لا بالعكس دول موافقين عليها
طيب واللي بيقولوا اسلامية  هل هم عايزين يرجعوا زمن الجزية وعدم تجنيد غير المسلمين؟  .... لا بالعكس
طيب ابوس ايديكم حد يفهمني الاختلاف بين المدنية والاسلامية علشان انا زهقت من الموضوع ده وجابلي اكتئاب وشايف انه ترويج لحاجات غريبة وناس عايزة تظهر في الصورة وبتقدم مصلحتها على مصلحة الوطن
اخواني اخشى عليكم من فتنة يكون القاعد فيها خير من القائم والقائم فيها خير من الماشي فارجو منكم التعقل والثبات
كان نفسي افضفض اكتر بس مش عايز اطول عليكم 
اتمنى مايجيش العيد الا لما تكون الامور احسن
باتمنى الاقي في نفسي القدرة على التفاؤل



السبت، 13 أغسطس، 2011

انا فاسد يا أمًَاا

حالة من القرف والاكتئاب جايالي مخلياني مش عايز اكتب اي حاجة في اي حاجة والاكتئاب زاد بعد ما ضغطت على نفسي وكتبت بوست طوييييييييييييل وبعدين ضاع بغلطة زر :( كنت مقرر مكتبوش تاني بس قلت اجرب لو باظ تاني مش هاكتبه
بمناسبة اننا في رمضان يبقى لازم ولا بد نسلي صيامنا
سلي صيامك يا بيه سلي صيامك يا استاذ
عندنا سبعين مسلسل يا باشا خليك معانا وستجد كل ما يسرك
بس انا ماليش في المسلسلات انا عندي زهايمر بانسى فطرت ايه  افتكر ازاي سبعين حلقة لسبعين مسلسل
خلاص حلك عندنا يا باشا انت ممكن تتابع مسلسل واحد وتتفرج على ست كوم او مسلسل حلقاته منفصلة .. اوك يا باشا رمضان كريم
وسليت الصيام واختارت اشوف مسلسل الحسن والحسين قلت اشوف المسلسل اللي قناتي التحرير والحياة (المصريتين) اتحدت بيهم قرار الازهر بمنعه وعدم جواز تجسيد الصحابة المبشرين بالجنة  و الحسن والحسين رضي الله عنهم اجمعين وبغض النظر عن صحة قرار الازهر اللي انا متفق معاه الا ان انا كصاحب قناة حتى لو مش متفق مع الازهر لازم ارضخ لتعليماته لأن الازهر لما بيعلا انا كمصري باعلى معاه ولما انا كمصري محترمش الازهر محدش برة هيحترمه (وجهة نظري وصلت؟)
المهم علشان مطولش عليكم اكتشفت في الاخر ان المسلسل ضعيف اخراجيا وسيناريو لأن اللي كتبه حاول استمالة قلوب الشيعة والسنة على حساب التاريخ  في احداث تغاضى عنها علشان ميجرحش حد من الطرفين ودي مصيبة
بعدين ندخل على مسلسل كوميدي ومادام كوميدي يبقى لازم بيتريق على الصعايدة في ظل الركود الفكري لكل كاتبي المسلسلات عندنا يبقى لازم يكون كده سواء في مسلسل الكبير او مسلسل  الزناتي مجاهد

آه الزناتي مجاهد مسلسل كاد ان يسبب لي عقدة نفسية  فهو توضيح وترسيخ لفكرة الصعيدي الغبي  الاهبل العبيط الساذج اللي ينزل العاصمة والكل يضحك عليه والمصيبة الاكبر انه مش لوحده العبيط لا ده كل بلده مجموعة من الاغبياء السذج وكأن الصعيد مافيهاش بني آدم عنده شوية مخ
المسلسل بعيد عن الاحساس بالعنصرية فهو يمكن ان يوضع في قائمة التفاهة واللي يتفرج عليه يبقى تافه والغريب ان انا برضه اكتشفت اني تافه علشان بتفرج عليه والاعجب اني باضحك كمان لحد حلقة الحزب الوطني لما اقتنع ان الفساد مصلحة للبلد واللي في الحزب بيحوشولنا فلوسنا في بلاد برة ولما اقتنع مجاهد ان الفساد هو الحل
وفرح انه فاسد واتصل بامه وقالها (انا فاسد يا اما )
وقتها مقدرتش اضحك معرفش ليه واتضايقت جدا وكنت ناوي اكتب بوست فيه تهزيء للمسلسل  ونقد كبير لكن اكتشفت فعلا ان مجاهد معاه حق
لما حصل اللي حصل لممدوح حمزة في مؤتمره بقنا و واحد سلفي كان بيشوف هل مقاس جزمته هو نفس مقاس وش ممدوح حمزة ولا لاء؟ مالقيش طريقة غير انه يسدد جزمته بقوة (تقولش كابتن ماجد) في اتجاه وش ممدوح حمزة
وقتها استغربت انا قناوي وعارف لما يكون عندنا ضيف حتى لو تقيل بنعمل ايه معاه
لكن عمرنا ما كنا قللات الاصل او قللات الادب 
يكونش التيار السلفي رسخ جوة الناس ان اي حد يعارضك تضربه بالجزمة؟
ماعتقدش ان دي اخلاق السلف الصالح  وانا اعرف سلفيين كتير باجادلهم ويجادلوني بس في بيننا احترام
طيب ايه
طيب آه
الاخ ده جه منين وتبع مين؟
ممدوح حمزة قال ان الراجل ده فجأة دخل  المؤتمر ورفع الحذاء ورماه طيب جه منين وتبع مين ده؟ محدش يعرف
طيب وهو ليه المؤتمر ده محدش سمع بيه واغلب اللي حضروه سلفيين بالرغم ان ممدوح حمزة من اكتر معارضيهم؟ هو المؤتمر سري وبس للسلفيين؟ محدش يعرف
وفي ظل كل  الحاجات دي اللي محدش يعرفها واحد صاحبي قاللي ان الواد اللي رمى الحذاء ده مختل عقليا
قلتله اشطا كده الحمد لله بدون اي مجال للشك اكتشفنا ان النظام القديم قاعد زي ما هو وان اي مصيبة بيلبسوها المختلين عقليا
المهم ان ممدوح حمزة قال ان ده مأثرش على المؤتمر وكمله قال
 فبلاش نجيب في سيرة الناس احنا في رمضان
وقالك ايه قالك آه
قرب يا استاذ قربي يا آنسة
بيقولك في قنا بلد المفاجآت رجع القائد المغوار سيادة اللواء ذو السيف البتار عادل بن لبيب الجبار
انا مش هاتكلم واقول المفروض ييجي او ما يجيش انا هاتكلم بلسان الناس اللي في الشارع
الناس اللي من حقها تتكلم بلسانها هي بدون النظر لأي تيارات او احزاب
علشان كده يمكن تتفاجئوا بكلامي بس انا هاقول اللي بيتقال ووجهات نظر الشارع مش وجهة نظري خالص
رجل الشارع القنائي متأكد تماما ان عادل لبيب فاسد  وشارك في افساد الحياة السياسية وتزوير الانتخابات 
لكن مع عادل لبيب مش هتقدر تغمض عينيك   كل يوم جديد 
النهاردة هنعمل كورنيش بكرة هنوسع مسجد سيدي عبد الرحيم بعد بكرة هنعمل بانوراما بعد بعده هنعمل صرف صحي بعد بعد بعد بعده قطر مخصوص آخره قنا علشان القنائي يلاقيله مكان في قطر وهو راجع من القاهرة (كان اسم القطر قطر عادل لبيب) بعد بعد بعد بعده هناخد جايزة من الامم المتحدة وقنا توصل للعالمية  
يعني كل يوم جديد وكل يوم شغل صحيح الحاجات دي بتبقى رسوم على فواتير الكهربا بس على الاقل انت شايف بالرسوم دي انجازات قصاد عينك
يكونش الراجل مش نزيه؟ سؤال بيسأله الشارع لنفسه دايما لكن عادل لبيب ذكي شال اي شك من البداية  في قنا لما اتعرض عليه من اكبر مطاعم قنا المجاور لمسجد سيدي عبد الرحيم القنائي رشوة كبيرة علشان يوقف التوسعات اللي هتقفل على المطعم الشارع وعادل لبيب بمنتهى الذكاء اخد الرشوة وحطها في ميزانية المحافظة وبعت جواب شكر لصاحب المطعم باسم المحافظة واكمل التوسعات زي ما كان مقرر ليها
بعد الموقف ده بقت في ثقة جبارة بين عادل لبيب والشارع مش بالساهل تتزعزع غير ان الراجل مش بيقعد في مكتبه ابدا في اي وقت ممكن تلاقيه في وشك بعكس اللي كان قائم باعمال المحافظة من بعد الثورة اللي منزلش من مكتبه يشوف الشارع  وده خلى المواطن القنائي البسيط يسأل نفسه
هل انا عايز محافظ نزيه ومش شايف شغله؟
ولا محافظ فاسد وشايف شغله؟
طبعا في حاجة تالتة محافظ فاسد ومش شايف شغله (زي مجدي ايوب اللي كان مقضيها خمرة اليوم كله)
اما المحافظ النزيه اللي بيشوف شغله فالمواطن القنائي يراه زي الغول والعنقاء موجودين في نفس صفحة الكتاب ان لم يكن مستحيلا فهو نادرا ومادام نادر يبقى محافظة هي منفى للجميع لا يمكن ان يأتيها مثل ذلك الرجل
طبعا في ناس معارضين كتير لعادل لبيب زي ائتلاف شباب الثورة وكمان قبيلة من اكبر قبائل قنا هي الاشراف اللي كانت بتمني نفسها بمحافظ منها ولكن طبعا لو اي محافظ جه من اي قبيلة قنائية كانت هتحصل مشاكل كبيرة
في النهاية عادل لبيب يحصل على تأييد اكبر من معارضته 
بالنسبالي انا قررت الصبر
هاصبر على الحكومة الجديدة لما نشوف اخرتها وهاصبر على عادل لبيب لما اشوف اخره
كفاياكم نكد
معلش رمضان  السنادي كنت اتمنى يكون بداية وفاق واتفاق  ووحدة واتحاد على كلمة واحدة هي مصر
لكن للاسف مش شايف اي حاجة تخليني اتفائل
رمضان كريم

انا آسف لتقصيري في متابعة التدوينات وزملائي المدونين
بس حالة احباط ان شاء الله تروح
غير ان رمضان وقته ضيق

الخميس، 4 أغسطس، 2011

تمبلريات

 الاكاونت الخاص بي على تمبلر يصيبني بالهذيان ويثير في نفسي بعض الخواطرويجعلني دوما كأنني احدث نفسي قررت ان اعرض بعضا منها هنا كي تشاركوني اياها


مركب شراعه متهتك يقاوم بحر هادر 
وقلب كالاشواك غادر 
يدمي الروح بمبضع ماهر
وحدي الوم الاهواء والبحر الزاخر 
والاهواء هي  من تقودني للباطن والظاهر
واسال نفسي قليلا هل انا حي ام انني بالموت داثر
فيا شراع الموت ارتفع ولا تدعني في البحر عابر 
فلن اصل ابدا لمبتغاي به ولن يعذرني به عاذر
فانا استسلمت لموجه تقودني لشاطىء الموت الخاسر
ولن ينقذني من غدر تقلباته الا ربا حليما قادر
فلا تدعني الهي غارقا فانت اله كريم صابر
وانا ادعوك في سريرتي وما جهر اليك جاهر
مركب شراعه متهتك يقاوم بحر هادر
وقلب كالاشواك غادر
يدمي الروح بمبضع ماهر
وحدي الوم الاهواء والبحر الزاخر
والاهواء هي من تقودني للباطن والظاهر
واسال نفسي قليلا هل انا حي ام انني بالموت داثر
فيا شراع الموت ارتفع ولا تدعني في البحر عابر
فلن اصل ابدا لمبتغاي به ولن يعذرني به عاذر
فانا استسلمت لموجة تقودني لشاطىء الموت الخاسر
ولن ينقذني من غدر تقلباته الا رب حليم قادر
فلا تدعني الهي غارقا فانت اله رحيم صابر
وانا ادعوك في سريرتي وما جهر اليك جاهر
---------------------------------------------------------
امطرت السماء في هذا اليوم احلاما كثيرة تتساقط على الارض لتطأها الاقدام فتحت مظلتي كي اجمع احلاما متساقطة فتوقفت الامطار وانتهت الاحلام

-------------------------------------------------

مومياء فرعونية جسد بلا روح هذا ما خلفتيه ورائك... فلا تسأليني يوما لماذا انا صامت؟
فصمتي لأنك حين رحلتي اخذتي حاجتي للكلام

----------------------------------------------
عمري يسقط يوم وراء يوم 
ومذكراتي ما زالت بيضاء ورقة وراء ورقة
اين ذكرياتي؟. اتراها سقطت هي الاخرى؟
هناك شيء ما وقع مني 
شيء ما ضاع مني
ابحث عنه اسفل المكتب فوق الارفف 
هناك صندوق بعيد في اعلى الرفوف 
اضع الكرسي فوق المكتب لاصعد عليه حتى اصل للصندوق 
افتح الصندوق المغلق بعد معاناة 
لا اجد الا تفاهات
سحقا لصندوق حوى التفاهة ولم يحويني
عمري يمر يوم وراء يوم
ومذكراتي ما زالت بيضاء ورقة تلو ورقة
اين ذكرياتي؟. اتراها سقطت هي الاخرى؟
هناك شيء ما وقع مني
شيء ما ضاع مني
ابحث عنه اسفل المكتب فوق الارفف
هناك صندوق بعيد في اعلى الرفوف
اضع الكرسي فوق المكتب لاصعد عليه حتى اصل للصندوق
افتح الصندوق المغلق بعد معاناة
لا اجد الا تفاهات
سحقا لصندوق حوى التفاهة ولم يحويني
-----------------------------------------------------
افكار جمة اثقلت رأسي فلم يتحملها
فسقط على صدري
وما مرت افكاري لقلبي
اصبحت حبيسة راسي المتدلل
فكنت مطأطىء الرأس كلما مررت بهم
---------------------------------------------
على اناملك نمت اجنحتي وخرجت حياتي من شرنقتي احيا حين اتنسم رحيقك 
انتي من علمتيني الطيران فحلقت معك الى السماء كي نحيل الغيوم الى اجمل الازهار
حبيبتي لا تكوني نارا 
فحتى ان كنتي نارا فلن امنع نفسي من الهلاك بك
احرقيني ان اردتي بانامل نمت عليها اجنحتي 
ولا تحرقيني بشوق يسقطني من سلم الوصول اليكي
على اناملك نمت اجنحتي وخرجت حياتي من شرنقتي احيا حين اتنسم رحيقك
انتِ من علمتيني الطيران فحلقت معك الى السماء كي نحيل الغيوم الى اجمل الازهار
حبيبتي لا تكوني نارا
فحتى ان كنتِ نارا فلن امنع نفسي عن الهلاك بك
احرقيني ان اردتي بانامل نمت عليها اجنحتي
ولا تحرقيني بشوق يسقطني من سلم الوصول اليكِ
---------------------------------------------------
تسولت بعض الحنان من تمثال حجري فاكتشفت انني اضعت في السراب اياما واياما متساقطة كتلك الورقة الشجرية المرتعشة التي سقطت حين لامست اناملها دون مبالاة منها ورحلت كي تسقط اوراقا اخرى في شجرة اخرى