الأحد، 25 ديسمبر، 2011

آه يا مجلس حسام




هاسلم دماغي للاغلبية الصامتة وهاصدق ان المجلس العسكري بريء بس لو جاوبوني عن اسئلتي 
 الاخت غادة كمال قالت ان في ضابط صاعقة  توعدها وقال بالنص الليلة هاعمل عليكي حفلة والاخت غادة تفضلت وقالت ان اسم ضابط الصاعقة حسام
سؤالي بقى للمجلس عملتوا ايه مع المدعو حسام هل حدثت تحقيقات معاه؟ الاجابة لا ... طيب يمكن مفيش حد اسمه حسام عندهم هل المجلس العسكري نفى ان في ضابط صاعقة كان في محيط مجلس الوزراء اسمه حسام؟ الاجابة لا قاطعة جازمة
حساااااااااااااااااام .. من أنت ؟
وفي ظل الصمت الصادر من المجلس الموقر  تجاه المدعو حسام  يبقى لدينا بعض الاستنتاجات
1- اما ان حسام  ماسك عليهم ذلة
2- ان  حسام كاسر عينهم
3- حسام  تربيتهم ونقاوة ايديهم  وقاصدين يجيبوه في المكان ده بالذات علشان يتعامل بالطريقة السادية اللي اتعامل بيها
ولما اتفضح امره واتعرف اسمه هتف احد ضباط المجلس : شايف مين اللي في الازازة ؟ مين ؟ حسااااااااااااام حسااااااااام
وهنا شرب الجميع اسبرايت وروقوا نفسهم وصار حسام  يجري في عروق  جميع اعضاء المجلس وصار الكل حسام وضحك الجميع وسحلوا الشباب وعروا مصر 
الغريب في الأمر اللي نزلوا العباسية امبارح .. وسموا نفسهم الاغلبية الصامتة 

اوكشن حق دستوري لكل واحد ينزل يعبر عن رأيه وحق دستوري لكل مجموعة تسمي نفسها زي ما هي عايزة  اوكشن هنصدق انهم بيدعوا للاستقرار وعدم التخريب اوكشن هنتغاضى عن مولد سيدي العريان اللي كان في العباسية امبارح وهنقول ان اللي خرجوا كان بسبب خوفهم وقلقهم على مصر ولنصرة الحق  وبما انهم حقانين اوي يقدروا يقولولي بقى حصل ايه لمبارك وجمال وعلاء والشريف وسرور والعادلي وكل اللي قتلوا الثوار في 25 يناير  ... الاجابة ؟ مفيش
طيب نقول ده كله في القضاء والقضاء بتاعنا يومه بسنة مش مشكلة خالص  طيب نسأل المجلس العسكري اللي بتدافعوا عنه  بالاستماتة دي عمل ايه للمتسببين في احداث البالون وماسبيرو ومحمد محمود ومجلس الوزراء  ؟ هل حاكم حد  في اللي قتلوا المصريين وضيعوا عيونهم؟
احمد حرارة نور عيونه اتطفت  بينما  ملازم اول شناوي في طريقه للبراءة بلاش يمكن الشناوي بريء  طيب مين اللي طفى نور عيون حرارة؟
مينا دانيال  .. تم دهسه في ماسبيرو والحمد لله عرفنا الفاعل اخيرا المجلس عمل حاجة .. آه الفاعل علاء عبد الفتاح
يا راجل بقى علاء قتل مينا شوف ياخي الناس ده كان عامل صاحبه .. معلش بقى اصله كان منفسن منه
يا مجلس سايب الظالم وبتقبض على مظلوم جديد انا ممكن اوافق ان علاء يتقدم لمحاكمة  بس تكون اولا محاكمة مدنية ثانيا معاه في نفس القضية اللي دهس مينا دانيال وغيره وغيره
مش هاتكلم عن الشيخ عماد عفت بس انا مبكيتش يوم وفاة والدي اد اللي بكيته يوم  استشهاده بجد حسيت انا أد ايه صغير اوي وانا شايف حد بيعمل كل حاجة لوجه الله ويفضل بعيد عن الصورة غريب امر ذلك الرجل  الذي ناصر الحق و صنع اجيال مثل الهضيبي و اهتم بامور المسلمين والعرب في شتى بقاع الارض بينما لا يعرفه احد او هو يباهي بذلك
هو لسه في ناس مش بترائي؟ الشيخ عماد عفت  اخلص النية لله علشان كده لما رفع ايده للسما وطلب الشهادة نالها في نفس الشهر سبحان الله
في الوقت اللي كان فيه الشيخ عماد خلف الستار في المنطقة المظلمة كان هناك من هو أقل شأنا وعلما تسلط عليه الاضواء و هو يقذف المحصنات باسم الدين
ونقطة صمت طويلة نقف عندها

 في الوقت اللي الشيخ عماد مكنش مستني شكر من اي مصري كان المجلس بيسحلنا ويضربنا ويقول رصيدنا لديكم يسمح آآآآآآآه يا مجلس حسام
ونيجي بقى للي حصل يوم المجمع العلمي  طبعا مهزلة وحسرة كبيرة لأي مصري ويبقى سؤال المجمع فضل والع فترة طويلة ليه مجتش المطافي 
الحمد لله جاتلنا الاجابة من مصادرنا الموثوقة ان المتظاهرين قذفوا عربيات المطافي بالطوب وقنابل المولوتوف ... يا راااجل  .. ايوة يا عم دول فعلا وحوش
اوكيه تمام يا عم مصدقك بس تعرف ان من فترة قريبة كانت  منطقة اسرائيلية بتتحرق ومصر ساهمت في اطفاء الحرائق بالطيارات؟  يا راجل هي مصر عندها اصلا طيارات ؟ وكما يقول منصور العيسوي دائما مصر مفيهاش طيارات
طيب بلاش اسرائيل يمكن تقول ان منطقة غابات والدنيا واسعة هناك  علشان كده قدروا يستخدموا الطيران خلينا في نفس المنطقة ونفس الشارع

شايف مجلس الشورى اللي هناك ده؟ اهو المجلس ده بقى ولع من سنتين عارف اتطفت الحريقة بايه؟ باستخدام الطيران يعني الطيارة فوق وبترش المية على المبنى لحد ما تطفيه ليه بقى معملوش كده مع المجمع العلمي
ياتيك الجواب الشافي .. ان  مجلس الشورى متحرقش قبل كده علشان مصر مفيهاش مجلس شورى اساسا
المجلس العسكري بيتعامل معانا بغموض شديد يدعو الجميع الى التشكيك في نواياه
يا من رقصتم  بالامس على شرف الاطهار .. يا من لطختم دمائهم باقدامكم الملوثة ... يا من ضحكتم وسخرتم من كل ام ثكلى ... يا من تعتلون المنصات لوأد ما تبقى في المجتمع من مبادىء ... غدا ستدور الدوائر وسيتشفى فيكم الجميع وحينها لا تلومون الا انفسكم

  
مقال مهم يجب قرائته بتروي من هنــــــــا

25 التعليقات:

EMA يقول...

و الله مش عارفة أقول ايه..خلاص الكلام ما بقاش يكفي ليصف حجم المأساة اللى بتحصل قلبنا بيتقسم مع كل روح تزهق و كل صرخة أم و زوجة مش عارفة لحد امتى هيبقى الوضع على ما هو عليه ..الحل الوحيد هو السرعة في كل حاجة التباطؤ هو اللى وصلنا للى احنا فيه ..و فى النهاية تتضارب الآراء و تختلف التوجهات و كل واحد عايز يخفى التاني عشان ما يتكلمش ..يا رب نعدي كل الأمور على خير و يا رب ما يروح دم كل شهيد ضحى عشان البلد دي هدر و يا رب احفظ بلدنا ..و اللهم ولي أمورنا خيارنا يا رب


تحياتي لك أخى الموضوع بجد لا تكفيه كلمة ..ربنا يسلم

;كارولين فاروق يقول...

معاك حق يا مصطفي
انا فعلا مستغربه حاجات كتير
من ساعه تنحي الريس المفروض اان الفاسدين
مشيوا خلاص فين الفرق
الحال كما هو الحال
والمحاكمه كما ذكرت فين لحد دلوقتي مافيش تطور مافيش محاكمه
نظام مبارك مستمر لحددلوقتي
بصراحه انا حاسه بيأس
مساءك طيب

أمة الرحمن يقول...

قلوبنا وجعتنا بجد وتعبنا كل واحد عنده اللى كان مكفيه والدنيا بقت غريبه اوى مبقاش يوم ويوم زى ما كانوا بيقولوا

يقال ان أشد الظلم الذى يأتى ممن إنتظرت منه العدل والشعب كله حط الامل على الجيش لكن للاسف

معقول كل الكلام ده مأثرش فيهم ... معقول اهدافهم كانت اغلى من دم ودموع المصريين امهات واباء !!!

متهيألى انهم كسرو بخاطرنا !! ربنا يورينا يوم فيهم فى الخاين صعب نقول فى جيشنا اللى بيحمينا لان دايما هيفضل الامل ان فيه فى كل مكان فى مصر ناس تستحق الشكر

شكرا لك ولكلماتك المعبره رغم الالم

نقول يارب السنة الجاية تحمل كل الخير

zizi يقول...

والله يا مصطفى كل اللي اقدر اقوله ان

اكثر ساعات الليل حلكة هي اقربها للفجر..ولم ارى مصر في حلكة اكثر مما هي فيه الآن فلعل ذلك ينبيء بقرب الفجر ان شاء الله ..تحياتي لقلمك المبدع ..

لـــولا وزهـــراء يقول...

مازلت اؤكد ان المتسلق عكاشة توفيق اصبح خطر بجد على توجيه عقول الشعب وخاصاً من كبار السن

بمناسبة ضابط الصاعقة اسمه حسام الدين مصطفى واسمه موجود وصوره موجودة ومعرفش متحاكمش ليه وكمأن الموضوع فص ملح وداب

عجبني الفيديو بتاع الشيخ السلفي الذي هاجم الشيخ خالد عبد الله بعد موضوع سحل الفتاة وتعريتها بقت هناك اراء مستفزة بشكل ينرفز بيخليك تطلع من شعورك

اختيار جميل لقصيدة من قصائد الابنودي

لولا

أم هريرة.. lolocat يقول...

السلام عليكم

اخى سيف انا اشعر بك وباحساسك ومشاعرك وصلتنى
كلنا مثلك تمام موجوعين و فى منتهى الحزن والأسى

الامر اصبح محتاج ثورة داخلية تانية تخلصنا من ديول النظام اللى باقيين

ما اعتقد ان هناك حد صامت الكل الان على الاقل بيتكلم وده افضل من الصمت التام

الصورة اصبحت واضحة امام كل ذى عقل و فهم

مصر كلها هى المقصودة ياسيف
ولازم نخلى بالنا الايام القادمة
قلبى مش مطمئن


ربى يسلم
ربى يسلم



تحياتى لك دمت اخى بكل خير وامان
فرج الله الهم عن بلدنا يااااااااااارب

دعاء العطار يقول...

شكراً يادكتور مصطفى ع المقال ده

شكراً لانه قال كلام كتييييييير نفسى اقوله

سؤال واحد بس نفسى اساله :

هو المجلس العسكرى مش مكسوف لما يقول معرفناش نطفى المجمع والمفروض المفروض يعنى ان هما دول اللى هيحمونا لو اسرائيل بجلالة قدرها فكرت تحاربنا ؟

ولا هيعملوا زى ايام احداث ماسبيرو وهيطلعوا ف التليفزيون يعيطوا ويقولوا تعالوا والنبى انجدونا اصل الاسرائيلين بيموتوا فينا

العااااااار ع ده مجلس بجد

هبة فاروق يقول...

اكيد بعد اللى قولته مفيش كلام يتقال غير عوضنا على الله فى الشهداء وفى حياتنا
تحياتى اخى مصطفى

مدونة رحلة حياه يقول...

السلام عليكم
عارف يا صاحبى
انا زهقت من الفيلم والمسلسل الرخم اللى احداثه مكرره دايما دا
بتمنى السنة دى تخلص بقى وترحل بكل شئ
حفظ الله مصر واهلها أمنا وامانا وسائر البلاد
دومت بخير

faroukfahmy58 يقول...

سيف
حسام اللى عملته مش حرام
حسام مش خجلان انتولا ندمان
حسام جبت لنفسك اخزى كلام
حسام جردت سيفك من كل حشام
اما البقية فعاوزه قاعده كمان
اعذرتى يا مصطفى مش لاقى كلام بعد كلا مك

faroukfahmy58 يقول...

سيف
حسام اللى عملته مش حرام
حسام مش خجلان انتولا ندمان
حسام جبت لنفسك اخزى كلام
حسام جردت سيفك من كل حشام
اما البقية فعاوزه قاعده كمان
اعذرتى يا مصطفى مش لاقى كلام بعد كلا مك

Bahaa Talat يقول...

السلام عليكم..
السلطة إذا لم تكن تستطيع أن تمنع وقوع الجريمة، فلابد أن تمتلك الأدوات التي تمكنها من معرفة المتسبب فيها، فإذا لم يتوفر هذا ولا ذاك فأخشى أن السلطة تكون قد فقدت سيطرتها على الأمور!
لست مع مهاجمة المجلس العسكري على طول الخط (اعذرني) على الرغم من اعتراضي على كم كبير جدا من التصرفات والأحداث والتصريحات، ربما لوجود قدر (يتضاءل مع الزمن) من المواقف المشرفة لهم.
كلمة أخيرة: من حقنا أن نرفض التصرفات وقد نثور عليها، أما الانتقال في الحديث من مرحلة التكهنات إلى مرحلة اليقين فلابد أن يكون له دلائل ثابتة وقوية، وأن يكون ذلك مستمدا من جهة محايدة كالقضاء مثلا.
تقبل تحياتي..

د/دودى يقول...

يبقى حسام ماسك عليهم ذله زى ما قلت ...حسام ماسك عليهم سيدهات زى مرتضى منصور...و بما ان حسام ده قوى قوى تلاقيه ماسك سيدهات على مرتضى منصور نفسه

احنا هنروح بعيد ليه...فاكر موضوع التعذيب بتاع الفيديو الشهير...وصل التحقيق فيه لايه؟؟؟

Casper يقول...

رغم تصرفات المجلس الغير مبررة لاغلبنا لكن في رايي مضطرين نستحمله الكام شهر اللى فاضلين ):

تقبل مروري
Casper

Tears يقول...
أزال المؤلف هذا التعليق.
Tears يقول...

مافياش نفس اكتب بشكل دبلوماسى بس قرفانة اوى من العسكر عموما و سقطوا من نظرى اما المتأسلمين فلم افاجىء بيهم...عادتهم ولا ح يشتروها!

أمل م.أ يقول...

عزيزي سيف
كنت هنا
قرأت
ثم قرأت
واستمعت
وانتهيت مع كلمات الابنودي
بصمت قاتل
ولم اجد ما اعلق به
اعذرني فقد خانني قلمي

كن بخير دوما يارب

صبح يقول...

السلام عليكم

انا حقلك بيحصل ايه؟

الناس زهقت...

هي دي المحصلة و هي دي حقيقة اللي حاصل

الشعوب العربية مجملا مابقاش نفسها طويل في الحق

انما الرقص و التنطيط ليهم فيه حيل طبعا

الثورة في اول الامر كانت حلوة اعلام و هتافات و كوميديا و كنتاكي و صور و الجزيرة ووو حجات حلوة انضربنا مات كام واحد خرج مبارك و انتهت الحكاية

انما دلوقتي الموضوع مختلف...جيش شرس و عنين بتروح و ضرب و سحل و موت بالرصاص الحي ...كده مينفعش كتير طبعا

الشعب مش حمل كده ..فعشان كده بيلف حوالين نفسو و بيلاقي لنفسو اعذار ...اللي يقلك هي مكنتش لابسة و اللي يقلك الاهم الانتخابات و انتقال الثروة

واللي يقلك ده جيشنا حبيبنا يا مهشتكنا يا مبشتكنا...

كلهخا اعذار لان الناس زي ماقال الشاعر الكبير الشعب عايز ينام ...
مش حمل ثورات و بعدين انتو عاويزن ايه عاوزين يحصلنا زي ليبيا و نحارب الجيش لا سمح الله ..

بصراحة التحليل سهل بس الحلول ...تخوف ,,,ده جيش و متواطئ قيادة و جنودا,,لو عاوزين تخلوهم يشيلو ايدهم ..اعتقد لازم يتحاربو و ربنا يستر و يسلم..

على فكرة بقول للناس اللي زعلانه على مليونية التحرير اللي راحلها كام الف...انتظرو مليونيات عيد راس السنة..و رقصني يا حسام ..

AhMeD RaDy يقول...

مصطفى

الغريب فى اللى بيحصل اليومين دول هو الحالة !! ايوة بالظبط الحالة !

نفسى اعرف ايه اللى بيدور فى عقلية المشير !! ايه اللى مخليه يتردد اوى كدا .. ليه ما فيش قرار شجاع يحسم الدنيا .. العسكرية المفروض ما فيهاش تردد قرار او لا قرر ...لان فى حياة يمكن انقذها او عرض لابد من حمايته !


غريب موضوع الصمت بقى والحالة اللى احنا فيها اقصد هنا ايه اللى حصل .. عارف لما تكون مدمن سجاير .. والدكتور خلاص قرب معك للوصول للعلاج هوب تلاقى كل اصحاب السوء .. واهلك اللى شايفين انهم بيدفعوا الفلوس ! يقوللو لك يا عم دا السجاير اوفر من تمن العلاج .. مع انك لو شفيت من الادمان هتعوض دا الالف المرات !!

لكن هنعمل ايه بقى اذا كان الدمتور فاتح القلب وشغال والناس برة بصرخ .. اقفل على كدا كدا اشطة اوى !

الخاسرون هم اهل الثورة ... يموتون ويصابون ..
ثم يتبعهم المتضامنون ..! واللى بيتهموا انهم عايزين يخربوا البلد

يا ترى هتفضل الحالة دى لغاية امتى !! الله اعلم

ريــــمــــاس يقول...

مساء الغاردينيا أستاذ مصطفى
بجد بقيت اخجل من نفسي لما بتأخر عن هنا بس صدقني مافيش كلام ممكن يترد على اي بوست بقراه عن مصر وعن الي بيحصل مش بلاقي غير دعوات من قلبي ربنا يحفظ مصر ويحميها وزي ماقالت ماما زيزي يارب بعد السواد المظلم والعتمة فجر "
؛؛
؛
لروحك عبق الغاردينيا
كانت هنا
reemaas

ابراهيم رزق يقول...

مصطفى اخى العزيز

تسمح لى ان اقول لك بدون تعليق
فقد تعبت فعلا و عقلى يكاد ينفجر
حسام لم تذكره غادة فقط
بل ذكره نور ايمن نور
الدكتورة فريد
منى سيف
ثناء سيف
ظابط سادى

سلملى على المجلس العسكرى

كريمة سندي يقول...

الله المستعان ربنا يهدي سركم وسر حسام

غير معرف يقول...

ثقافة الهزيمة .. مرجانة‏

"لن أتسول علاجى لأستعادة بصرى.. وحسين سالم هو «رأفت الهجان» بتاع إسرائيل" حوار مع البدرى فرغلى (عضو مجلس الشعب السابق عن بورسعيد من 1990 ـ 2005 ) جاء فيه
ماذا عن علاقتك بالرئيس السابق حسنى مبارك؟

تحدث معى تليفونيا، بعد أن تحدث إلى قيادات التجمع أوائل عام 2005، وقال لهم: «الولد ده لسانه طويل، وهاقطع له لسانه»، وأستدعتنى قيادة الحزب وسألتنى: «أنت اتكلمت عن إيه؟»، فقلت إننى تحدثت عن الفرق بين إيراد قناة السويس المعلن بنحو 24 مليار جنيه، والمسجل فى الموازنة العامة 9 ملياراً فقط، !!! وإيرادات البترول المعلنة نحو 70 مليار جنيه، والمسجل فى الميزانية حوالى 20 ملياراً فقط، !!! ولم يعقب على حديثى أحد.

بعدها أرسلوا لى مسؤولا كبيرا ليقول لى أن فروق دخل القناة والبترول ننفقها لدعم حركات التحرر، فقلت له دلنى على حركة تحرر واحدة موجودة الأن فى العالم، أو تتلقى منكم دعما؟!!!

...باقى المقال ضمن مجموعة مقالات ثقافة الهزيمة ( بقلم غريب المنسى ) بالرابط التالى www.ouregypt.us

Bent Men ElZman Da !! يقول...

كلنا جوانا نفس الاسئله دى وللاسف مش لاقين ليها اجابه
الغريب فى ده كله
ان بردو لسه الشعب مختلف رغم ان كل حاجه واضحه وضوح الشمس
بس لما احنا لحد دلوقتى مختلفين اومال هنعمل ايه بعد كده !!
ربنا يستر فى اللى جاى

افروديت يقول...

هو فعلآ مجلس حسام
ومتهيألي كمان إنه مجلس سوزان

والباقي إنت عارفه بقي ياسيف

لو مامتي مش هتحزن عليه كنت كملتلك
إنت عارف اناخوافه جدآآآ
ههههههههههه ربنا يرحمنا من سوزان ثابت واشكالهابتوع بورتوطره