الأحد، 18 ديسمبر، 2011

هل بالفعل كانت هناك ثورة؟



والله ماليش نفس أكتب أي حاجة ولا أتكلم في أي حاجة ولا أقول أي حاجة  لأن أي حاجة مش هترجع بسمة الشيخ عماد ولا براءة علاء ولا طيبة كل شهيد سالت دماؤه اليومين اللي فاتوا
بكرة هتتعمل الانتخابات ونتلهي فيها و ننسى  دايما بيراهنوا ان الشعب المصري زي السمك بينسى بسرعة اوي  شعب نساي
نسي امبارح مين اللي  أحيا جواه الروح الثورية من سبع سنين وبدأوا الطريق في وش النظام لما كان  امن دولة  له جبروته وفشل جورج اسحق وجميلة اسماعيل  والحمد لله ان المستشار الخضيري نجح لأنه لو سقط كمان كان ممكن تجرالي حاجة
الشعب بيشرب وينسى بيشرب المر  وينسى الأمرّ
مفيش أنابيب  .. مفيش بنزين ... مفيش أرز .. مفيش دقيق ... مفيش عيش
لما كل ده مفيش هيفتكر ايه
معقول يعني هيفتكر عشرة  استشهدوا؟ لما مافتكروش  شهداء يناير وبقوا مجرد صور بتتعلق في اغنية عمرو دياب  وبكرة  أولادك يسألوك : بابا  صور مين دول اللي في الكليب 
هتقول ايه : نسيت؟ مش فاكر  ..... 
يمكن تسأل نفسك وتحاول تفتكر مين دول واتقتلوا ليه؟
علشان  يبقالك صوت يتكلم ويقول ويهتف بحرية  علشان يبقالك صوت يتحول لكرسي  ويقعد عليه اللي شايف انه جدير بيه علشان يبقالك صوت  تحترمه البشرية  
عملت ايه بصوتك في عشر شهور 
عشر شهور كل اللي يتكلم فيهم ويعلي صوته بيتحاكم محاكمة عسكرية 
عشر شهور كل اللي له صوت ويهتف بيه محدش بيسمعه ولا بيحترمه
هو احنا فعلا ميتين؟
آه ميتين أكيد ميتين
الميتين بس اللي لما بيتكلموا محدش بيعبرهم 
آه بس الميتين بيموتوا مرة واحدة احنا بنموت في اليوم مليون مرة
مليون مرة وانا شايف  اللي موتتني حاطط رجل على رجل وبيستمتع باشلائي 
مش عارف ليه امبارح افتكرت اعتصام قنا  وافتكرت اللي قالهولي واحد كان هناك افتكرته بيستعبطني لما قالي الكلام ده
قاللي بعد قطع السكة الحديد بيوم جه قائد المنطقة الجنوبية العسكرية ولما شاف الاعتصام  قالهم ايه ده عددكم قليل حاولوا تزيدوا  والا هاضطر اتدخل بالقوة وافض الاعتصام وفعلا زادوا بعد العديد من الشائعات التي انتشرت كالنار في الهشيم
وقتها قلت يمكن الراجل ده بيقولي كده علشان يخليني اروح معاهم  وانه مدعومين من قيادات   الجيش وقتها كبرت دماغي وحتى مكتبتش حرف عن كده وقلت ده هجس مش عارف ليه بقيت مصدق ده دلوقت بالرغم اني مش متأكد انه حصل  او اتقال
نرجع للي حصل اليومين اللي فاتوا  قالوا ان بعض الخونة مش عايزين الانتخابات تتم  او تكمل بعد ما لقيوا الاسلاميين مكتسحين
اوكيه ماعترضناش متفق معاكم بس في حالة واحدة لو كان المتظاهرين هم اللي بدءوا لكن كل الروايات تثبت ان البادىء كان العسكر حتى رواية الجنزوري نفسه اللي قال في حد دخل المجلس علشان يجيب الكورة راحوا الجنود ضربوه ...  لو فرضنا القصة دي صحيحة بالرغم ان مفيش عيل عنده سبع سنين يصدقها بس كونها طالعة من بوء رئيس الوزارة اللي معاه صلاحيات اكبر كبير فيكي يا بلد على حد كلامه  فده معناه ان الجنود لسه بيضربوا المدانين  ومش اي ضرب ده ضرب  يوصل لاكتر من 21 يوم علاج يعني قضية ومحكمة وجنحة  ..
قضية ومحكمة وجنحة؟ لمين .؟ هو انت فين
انت نسيت أصلك انت وهوه اوعى تكونو مصدقين ان كان في ثورة يوم 25 يناير لا ده بس كنا بنعمل شو قدام العالم وخلاص الستارة اتقفلت ومن حقي اضربك واطحنك ومش من حقك حتى تصرخ
الى السيد كمال الجنزوري المقيم في ... ايه؟ والله معرفش حتى مكان شغلك مش قادر تروحه .. المهم بما انك معترف ان في حد ضرب عبودي ضرب مبرح  ليه مقدمتوش للعدالة من امبارح؟
ولا لجنة سيناء ونفق مش عارف ايه اهم  من كرامة مصري اتهان
آسف يا جنزوري  كان نفسي اصدقك
مش هاقول ان المتظاهرين مفيش بينهم بلطجية  ودي حاجة انا موقن بيها والرصاصة اللي اتقتل بيها الشيخ عماد من مدخل ومخرج الرصاصة  دليل انها انضربت من الارض  بس مين اللي ضربها
من القاتل ؟ ومسئولية مين
المجلس العسكري عايز يقول متظاهرين وجابلنا فيديو في بيانه فيه شوية عيال صغيرة بيكسروا المباني
اوكيه تمام بس نسي المجلس ان اللي بيصور كان بيصور من الارض مش من فوق دليل ان في عناصر تابعة للجيش على الارض مما يجعل المجلس مدان ومش برة دايرة الاتهام  وكمان الراجل اللي بيصور قاعد جنب البلطجية ويصورهم ويضحكوله كأنه واحد منهم ( الفيديو بتاعكم يا مجلس  دليل ادانة ضدكم )
احنا عايشين في فترة ضبابية   وانقشاع الضباب لا يتم الا بالايمان  والثبات على المبادىء
3 اسابيع الناس هناك محدش سمعلهم حس وفجأة كل ده حصل
لو قلنا بسبب الانتخابات فالحوارات بدأت قبل ظهور نتيجة المرحلة التانية
لو قلنا الشباب غلطوا رئيس مجلس الوزرا نفى  انهم البادئين
فاضل احتمال واحد ان المجلس العسكري هو نفسه مش عايز الانتخابات تتم  بعد فشل  تمرير وثيقة السلمي  مش عايز حد ياخد منه السلطة  وده برضه جايز  والدليل اللي قدر يحمي انتخابات في تسع محافظات في وقت واحد (علشان ده في وشه قدام العالم) ميقدرش ازاي يحمي شارع واحد
انا باهيب بالجميع قراءة افضل للمستقبل ومحاولة فهم للحقيقة وعدم الانجرار ورا  الشائعات ومحاولة تحكيم العقل
ونفسي  يخيب ظني وميكنش المجلس مدان
مش هاتكلم عن سلفيين واخوان ومسلمين واقباط ومتصوفة وليبراليين وناصرين هاتكلم عن مصر
كل واحد يحكم ضميره ويقرا المشهد زي ما هو شايفه مع وضع في الاعتبار مصلحة البلد
اللي اتحرق مش كتاب وصف مصر ولا المجمع العلمي اللي اتحرق جوانا اكبر
اتحرق احترامنا لبعضنا ولبلدنا وللجيش
واتحرق جوة الجيش مبادئهم بعد ما كان حامي الوطن اصبح حامي  المجلس العسكري
ولك الله يا وطن ولك الله يا غادة  وفي ذمة الله يا شيخ عماد

16 التعليقات:

ابراهيم رزق يقول...

اخى العزيز مصطفى

متفق معاك فى كل كلمة انت قلتها
لو مقدروش يحموا مبنى ازاى نامنهم على حدودنا و بلدنا
يبقى الشيخ عماد الشهيد الطاهر تصدق يا مصطفى انا اعرفه كويس و يوم هجوم الباعة الجائلين على التحرير اتكلمت معاه اكثر من ساعة
لكن اول مرة اعرف اسمه لما استشهد
منتهى انكار الذات من اجل الوطن
تحياتى

أمة الرحمن يقول...

أحيى قلمك د مصطفى لكن زى ما حضرتك قلت كلنا بنتكلم وصوتنا مش مسموع لكن الأكيد مش هنبطل كلام وهو آخر فرصه عشان نفضل عايشين لأجل غير مسمى وبطريقه كمان منعرفهاش ..

اللى بيحصل ينن ويلخبط وكل جهه تقول كلام لعند ما ضاع اليقين والأيام وحدها اللى هتكشف الحقيقه لكن للأسف على ما الأيام دى تيجى يكون الحق راح وراح أصحابه

ربنا وحده القادر على كشف الغمة

بجد بطلت أتابع لأنى تعببببببببت لكن الغريب إنى كل ما غبت أرجع ألاقى نفس الكلام وكأنى مغبتش خالص !!!

معرفش أكتب كتير عن الأحوال دى يمكن لأن الشيئ لما بيزيد أوى جوانا بنهرب أو بنحبط أو بنفشل فى التعبير عنه

لكن تجربه وكلمات متواضعه جدااا يمكن أكون حساها وكتير غيرى يكتبو أحسن لكن ياريت حضرتك تشوفها فى ( رؤى )

سلمت يمينك
وسلمت مصر من كل شر

تقبل مرورى

سواح في ملك اللــــــــــــــــــه- يقول...
أزال المؤلف هذا التعليق.
سواح في ملك اللــــــــــــــــــه- يقول...

اخي مصطفي

في خضم الفوضي

يجب ان تتوقع قتلي وجرحي

في ثورة يناير اخي

لم يقذف مبني حكومي بطوبة

رايي الشخصي

انه يجب تجريم الاعتصامات

لانها تؤدي بنا الي هذا

شمس النهار يقول...

مصره ان احتراق المبني له اكتر من بعد المجمع فيه كنوز
يااتهربت ودي لعبة
يااتباعت وانضرب اكتر من عصفور بحجر واحد
باعوا الكنوز وحرقوا المبني ولفقوه للثوار
عادي

دعاء العطار يقول...

انا كمان يادكتور مصطفى مش جايلى نفس اكتب ولا حتى اعلق حاسه ان اللى بيحصل اكبر من اى تعليق

المجلس العسكرى بيقدر بمزاجه ومابيقدرش بمزاجه

قادر يحمى الانتخابات ... ومش قادر يحمى مجمع علمى المطافى اصلا جنبه .. ايه قمة الاستخفاف بعقول الناس ده ؟

نفس اللعبة الحقيره بتاعة العادلى ياالامان يامبارك

برضه هو يانفض اى اعتصام بالقوة يامصر تتحرق !

حسبى الله ونعم الوكيل

حسبى الله ونعم الوكيل

حسبى الله ونعم الوكيل

انا بجد حزينة على مجلس استامناه فى يوم من الايام علينا وعلى مصرنا

هبة فاروق يقول...

تصدق انا كنت فرحانه بالثوره ونزلت التحرير يوم التنحى وهيصت وزغرطت
..بس دلوقتى حاسه ان الثوره مجرد انتفاضه فقط
..لان احكام الثوره تنص على محاكمه الحاكم واتباعه والقضاء على الفساد واسقاط النظام
وبالصلاه على النبى كده محصلش حاجه لغايه دلوقتى
يبقى فين بقى الثوره ..الثوره بح خلاص
خلص الكلام والسلام ختام
تحياتى

zizi يقول...

ابني الغالي مصطفى ..

احنا للأسف بقى فيه جوانا حاجة اتولدت ومش عارفين حانقدر نعالجها ازاي وامتى ...بقى فيه جوانا تخوين والتخوين ده بيخلي نوع من عدم التصديق للطرف الآخر ...بس كل شهود العيان وحتى زوجة الشهيد عماد اكدت ان الرصاصة جاتله من تحت وليس من فوق ومعنى كده يا مصطفى ان فيه حد تحت مندس وانا مع كده وكمان مع ان اللي كانوا فوق كلهم لازم يتجابوا ويتحقق معاهم ..زواللي خدوا غادة وزميلاتها لازم برضه يتحقق معاهم ومتهيألي انها حاجة يتقدر عليها لو اراد الجيش والا فالجيش كله مدان ...والله يا مصطفى الأحداث دي مش قادرة اقولك عاملة فينا ايه وحتى بنتي اللي مسافرة شايفة الصورة اوضح بكتير مننا ومش عارفة ليه اللي بيحصل ده كله وايه الغرض منه ..ربنا يشيل عننا الكرب يارب ويرفع عننا الغم آمين يارب العالمين ..

ريــــمــــاس يقول...

مساء الغاردينيا أستاذ مصطفى
النهردة الصباح كنت في مدونة أستاذ ابراهيم كنت مش عارفة اكتب حاجة ودا حصلي في مدونتك ومدونة سواح ومدونة لولا وزهراء ونور وغيرهم عارف ليه لان الي بيحصل الفترة الاخيرة في مصر مابقاش يتكتب ولا يتقال ولا عارفين نقول ايه مش بس أنتو المصريين يامصطفى كل انسان بيحب مصر وكل شخص بيتوجع على الي بيحصل مش عارفة ليه اثرت فيا الاحداث الاخيرة كتير مش بس حرق المبنى موت الدكتور علاء والشيخ عماد اثر فيا جداًمش عارفة ليه بصراحة بقيت خايفة اوي على مصر ربنا يحفظها من كل شر ويحميها "
؛؛
؛
لروحك عبق الغاردينيا
كانت هنا
reemaas

وجع البنفسج يقول...

لا حول ولا قوة إلا بالله .. يبدو أن الصورة تزداد قتامة في مصر للاسف الشديد ..

هي فعلا ضبابية شديدة لا تعرف من الصادق ومن الكاذب .. من الضحية ومن الجلاد .. ولكن تبقى دماء الشهداء دليل على وجود خطأ ما صعب التراجع عنه او حتى الاعتذار ..

رحم الله الشهداء جميعا منذ بداية الثورة وحتى آخر لحظة وان شاء الله الانتخابات لاتنسيكم دماء شهدائكم .. فالحياة لا تتوقف عن موت أحد ..

قلوبنا معكم دائما وأبدا ..

د/دودى يقول...

لا طبعا...ثوره ايه و اللى قتل الناس فى موقعه الجمل و التحرير و مسرح البلون و ماسبيرو و محمد محمود و اى حاجه راحت او جت متحكمش؟؟....ثوره ايه و الناس بتتسحل فى الشارع و البنات بتتقلع هدومها...ثوره ايه و نيله ايه؟؟

أمل م.أ يقول...

صدقا مش عارفة شو اكتب
شو اعلق
نفذت الكلمات
وتعبت الانفس من كل ما يجري
الوضع غوغاي للغاية
لا عارفين مين الصادق
مين الحريص على مصر
ومين الي حريص فقط على مصلحته
بس احكيلك شغلة بصراحة
كل مرة بيصير احداث في مصر
بقول في نفسي
انه ثوار ليبيا لما قتلوا القذافي
كان معهم حق
يمكن تكون فلول النظام السابق مش هي السبب الرئيس في كل ما يحدث
ولا اريد دائما تعليق المشاكل على ايدي خفية
فتصبح كانها الشماعة التي نعلق عليها كل الي بيحصل
لكن بالتاكيد هنالك مستفيد
فمن هو.. هذا هو السؤال الصعب
ربنا يتطلف فينا
الواحد صار خايف لسى من الي جاي
الله يفرجها على مصر وشعبها
قلوبنا والله معكم
ندعوا لكم دائما بالامن والسلام

لك مني كل الود
كن بخير دوما يا رب

غير معرف يقول...

"هل بالفعل كانت هناك ثورة؟"

أشك

صعبان عليا جداً إن الدول عملت ثورة وانتصرت وأنتخبت وبتتقدم

ومصر بس بتنتحب

كل اللي أخدناه من الشو

أمهات ثكلى قلوبهم لا تعرف سوى الأنين والبكاء ،
وأصحاب عاهات مستديمة فقدوا ما فقدوا من نور عيونهم ومن أطرافهم
وقائمة من الشهداء تمتلأ بعد كل إعتصام وتتجد بإستمرار فمتى لهذه القائمة بالإنغلاق
متى لنزيف الدماء بالإنتهاء
ومازاد هو فتيات يُنتَهك عَرضَهُن أمام أعيننا
بكينا الجميع في صمت مدقع

وطالما كان الحزب الصامت أغلبية ف لكِ الله يا بلادي ويا أولادي ويا أرضي ويا مصر ويا مصري

بودي لو كل المصريين خرجوا للشارع
بودي لو نبطل نسكت ونصرخ بالحق
حتى لو طالنا الرصاص في يوم هيجي ومصري يدعيلنا بالرحمة بانه عايش في مصر مصر الحقيقة أم الدنيا مش كلام

فيارب من عندك النصر .

محمد الجرايحى يقول...

رحمه الله تعالى وغفر له ولنا

كريمة سندي يقول...

الله المستعان هو حزن صحيح على الأوضاع في كل العالم العربي وفك الله أسر المأسورين وقواهم في طاعته

موضوعك رغم بساطته إ أنه عميق المضمون الله معاكم

;كارولين فاروق يقول...

التخوين اصبح سمه العصر
رحمه الله تعالي
تحياتي