الاثنين، 25 يوليو، 2011

لهذه الاسباب انا ضد المسيرة




قبل ما حد يفهم كلامي غلط فانا افكركم اني اول واحد قلت ان قادة الجيش او المجلس العسكري مجموعة من الفاسدين قلتها من قبل ثورة 25 يناير ولسه باقولها واللي متابع مدونتي من فترة هيلاقي الكلام ده موجود عليها  علشان بس محدش يزايد علىّ في اللي هاقوله
لكن مع ذلك انا ضد المسيرة اللي حصلت قلبا وقالبا  وكانت ممكن المسيرة دي تؤدي لكوارث اكبر بكتير من اللي حصلت هتسالني ازاي هاقولك 
اولا سبب المسيرة غير منطقي بالمرة لما بتسال انتو عايزين ايه من المسيرة يقولوا عايزين نعلي صوتنا علشان المجلس يسمعنا .....اعتقد ان التحرير كان اي صوت بيتسمع فيه  ... حكومة اتغيرت منه وحركة محافظين على آخر الشهر  وعلانية محاكمات .. ايوة انا عارف طبعا ده مش كفاية بس اللي كان كفاية ان اي ضغط قوي من التحرير بيتفق عليه كل القوى السياسية بيتحقق  

ثانيا  مسيرة من التحرير لوزارة الدفاع هتبقى مكسوة بلون التحدي للمجلس العسكري وبتوصل رسالة اصغر طفل يفهمها وهي احنا جايين لحد عندكم احنا خمستلاف واحد لا معانا سلاح  وسلميين وهنهتف ضدكم وهنشيلك يا مجلس يا عسكري ... وتعالوا نتخيل المشهد والسيناريو اللي هيحصل لو المجلس العسكري سابهم يوصلوا لوزارة الدفاع 
الناس واقفين حوالين المجلس  الهتافات شغالة (يسقط يسقط مجلس العسكر)وفجأة حد ابن حلال من وسط الثوار يرمي طوبة على وزارة الدفاع وتبدا المشادات ... او ان المجلس ينزل على رغبة الثوار اللي مبيتعدوش 0.01% من الشعب المصري ويترك الحكم  ... يا ترى حد من اللي خرجوا فكروا في سيناريوهات زي دي ... او سيناريو مين اللي هييجي بعد المجلس العسكري 
اللي بعد المجلس العسكري حاجة من اتنين يا اما مجلس رئاسي واي مجلس رئاسي في الفترة دي اللي الشعب فيها مش طايق بعضه هيبقى طبعا مجلس مشكل شوية اخوان وشوية ليبراليين وشوية اقباط وشوية سلفيين كده يعني ونهاية المجلس ده هتكون زي نهاية مجلس مرتضى منصور ورؤوف جاسر اما النيابة العامة او المخابرات العامة لأن الكل هيخون الكل 
او يكون اللي بعد المجلس العسكري هو فوضى وحرب اهلية وصراع على الكرسي واقتتال لا يعلم الا الله متى ينتهي 

ثالثا : نصف قوة اي جيش في الدنيا هو هيبة الاعداء منه (طبعا مش اقصد بالاعداء 6 ابريل لا سمح الله انا باقصد اللي بيطمع في حدودنا من الدول المجاورة زي اسرائيل مثلا ) علشان كده مسيرة بتوصل رسالة تحدي واجبار للمجلس العسكري عن طريق لوي الدراع 
والمجلس العسكري هو قيادة الجيش هيخلي اي طامع يقول دول فيه خمستلاف واحد عزل اجبروا قادة الجيش وراحوا مقر قيادته وده طبعا بيضيع هيبة الجيش المصري في قلوب اعداؤه ومحدش يقولي  هنا احنا معترضين على المجلس العسكري سياسيا مش عسكريا لأنه في النهاية يمثل القيادة العسكرية للبلد 
رابعا : علشان الاسباب اللي فوق كان متوقع ان الجيش والمجلس العسكري مش هينصاع لتهديد 0.01% من الشعب وانه كانت هتبقى فيه مواجهات قوية  ودحر للمسيرة  
المسيرة كانت هتفشل سواء بالبلطجة او من غيرها سواء اللي طلعوا بلطجية او اهالي المنطقة ده مش المهم الاهم ان اللي اخد قرار خروج المسيرة مفكرش في سلامة الناس اللي خرجت لأن الصورة كانت واضحة زي الشمس 
الشعب المصري بيحب الجيش وشايف انه الدرع الواقي وخروجك عليه بيفقدك تأييد الشعب وانت وفاقد تأييد الشعب وفاقد تأييد اغلب القوى السياسية يبقى رايح تتكلم باسم مين
خامسا طبعا انا ضد مبدا التخوين شكلا وموضوعا وضد اننا كل فريق مننا يعتبر الفريق التاني عصابة 
طبعا انا سمعت كلام الرويني  وافزعني ازاي مسئول يتكلم من غير ادلة ولو معاه ادلة ساكت ليه على 6 ابريل لحد دلوقت ليه مقدمش الادلة للنائب العام 
وكمان 6 ابريل المفروض تبرأ ساحتها دلوقت وتخرج اوراقها كاملة عن تمويلها ومصاريفها واصولها  لازم كل ده يبقى واضح قدام الشعب واللي حصل ميعديش بالساهل 
سادسا اللي حصل يوم 23 يوليو جرس انذار للمصريين علشان يتحدوا علشان يتواصلوا مع بعض تاني علشان تبقى كلمتهم واحدة علشان يفتكروا ان نجاح ثورة 25 يناير سببها ان في 20 مليون مصري على الاقل خرجوا يهتفوا مع بعض كشفوا صدورهم للموت علشان مقتنعين بده اما دلوقت محدش من دعاة المسيرة كلف خاطره يفهمنا ليه وازاي وعلشان ايه وايه اللي هيحصل بعد كده
سابعا بلاش قرارات انفعالية من اي حد لازم نفكر كويس قبل اي قرار ونعرف اسبابه واهدافه وعايزين نوصل منه لايه ولازم ترجع اوراق الضغط تاني متحدة ومن ميان التحرير دون استفزاز وتحدي للمجلس العسكري الفاشل الفاسد 
هو صحيح فاشل وفاسد بس ده آخر مركز للكرة المصرية ولو تم اسقاطه هتضيع مصر في الفضاء لانها هتبقى من غير مركز تدور حواليه  
الرجاء عدم الانصياع للحماسة اللي ممكن تعمي عنينا من اننا نشوف الحجارة في الطريق ونلاقي نفسنا وقعنا على وشنا  والرجاء من الفئة القليلة التي تريد ان تقود 99.99% عدم اعتبارهم مجرد حزب كنبة مش من حقهم يقرروا ويروا في انفسهم انهم هم بس اللي فاهمين ويقدروا يوصلونا لبر الامان لوحدهم لان ده جنون وده ابعد ما يكون عن الديمقراطية اللي يحاولوا يصنعوها 
طبعا انا ضد استعمال القوة والعنف ضد اي مظاهرة سلمية بالرغم من اختلافي الراي مع منظمينها دي حاجة بديهية ومش محتاجة تنويه
في النهاية  عجبتني مقولة لوائل غنيم على تويتر لما قال التويتر تحول لجو منصات التحرير، كل واحد بيطلع يزايد على اللي كان بيتكلم قبله ويطالب بالتصعيد. وصوت الحكمة بقى صوت منبوذ ومرفوض
لأن تويتر اصبح كده فعلا ومش تويتر بس ... لا الساحة السياسية بقت كلها كده والكل رافض يسمع لصوت العقل 
اما عن مبادرة الدكتور عبد المنعم ابو الفتوح وبالرغم انني لست اخوانيا الا انها افرحتني جدا واتمنى من الجميع ان يلتف ويشجع هذه المبادرة حتى تعود روح 25 يناير مرة اخرى 
حفظ الله مصر من كل سوء

53 التعليقات:

حمدى جعوان يقول...

السلام عليكم

احييك على البوست وانا متفق معاك تماما فى رفضك للمسيرة وللاسباب اللى وضحتها
مع اختلافى فى ان قادة الجيش او المجلس العسكري مجموعة من الفاسدين

لازم صوت العقل يكون هو السيد فى الوقت الى احنا فيه
يارب احمى مصر من الفتن

محمد الجرايحى يقول...

أشاركك الرأى ......

شباب الرياضيات wiemm يقول...

حظ موفق

سواح في ملك اللــــــــــــــــــه- يقول...

الي مش قادرين يفهموه يامصطفي

ان لولا المجلس العسكري لما نجحت الثورة

تخيل لو ان المجلس لم يقف في صف الثورة

ماذا كان مصير البلاد الان

ثانيا

تحول الاعلام لنفاق للثوار



ويخشي الاعلام ان يقول كلمة حق حتي

لايتعرض للهجوم

طيب محنا كلنا شاركنا في الثورة

لكن لحد سقوط مبارك ووقفنا

لان ملناش مطامع سياسية

ثالثا هم يصنعون ديكتاتورا

حتي يستطيع السيطرة علي الفوضي الذي

سيخلفونها

يفقدون تاييد الشعب

وسوف يصنعون ايضضا ديكتاتور بتاييد

شعبي لان الشعب اخر مايزهق

مش هايمانع مين ييجي بس يضبط امور البلاد

مصطفى سيف يقول...

استاذ حمدي جعوان
اشكرك اخي العزيز
وما زلت ارى المجلس العسكري فاسدا فهو كان ضمن منظومة الفساد المباركية
تحياتي واشكرك

مصطفى سيف يقول...

استاذ محمد الجرايحي
يشرفني ان اكون مشاركك للراي

مصطفى سيف يقول...

وئام
اشكرك
نورتيني

مصطفى سيف يقول...

سواح في ملك الله
اتفق معك تمامافي ثانيا وثالثا
اما اولا ففيها كلام
المجلس لم يقف في صف الثورة الا بعد ان تأكد من نجاحها وهو لا يمن على الشعب بالوقوف بجواره فهذا واجبه واي فاسد دائما يقف في الصف الرابح
واتفق معك تماما ان كل ما يحدث على الساحة سيؤدي بنا الى وصول ديكتاتور جديد
تحياتي

سواح في ملك اللــــــــــــــــــه- يقول...

اخي مصطفي

الاتفاق والاختلاف وارد

ونحن لانريد محاسبة النيات

السؤال اخي ماذا لو لم يقف المجلس

العسكري في صف الثورة ؟؟

فلدينا نموزجان

ليبيا وسوريا

والسؤال الثاني

المجلس العسكري شريك اساسي في اثورة

وقد كان يستطيع الاستحواذ علي الحكم في خضم الثورة

لان كانت كل غايتنا فقط اسقاط مبارك وعصابته

فلماذا ننكر هذا الدور ؟؟؟

ومن ناحية يمن علينا ام لايمن علينا


فماذا لو امتنع عن هذا الذي ليس منة


ثق صديقي لولا وقوفه جانب الثورة ايا كانت الاسباب

لاصبحت البلاد خربة

ملحوظة

هذه الكلمات لوجه الله وحده

مصطفى سيف يقول...

سواح في ملك الله
اشكرك اخي العزيز على المتابعة
لا انكر دور الجيش في الثورة
ولا انكر انه رفع شعار حماية الثوار
ولكن هذا لا يمنع انه توجد اخطاء كثيرة وقع فيها المجلس العسكري حتى جعل البعض يتخوفون من وقوفهم جوار الثورة وجعل البعض يظن انهم يريدون القفز على الثورة للوصول لكرسي الحكم
اخي العزيز ما كان هناك داعي لان تذكر ان هذه الكلمات لوجه الله وحده فانا اعلم ان كل كلماتك وليس هذه فقط هي لوجه الله وحده

شهر زاد يقول...

اخي مصطفى
رأيك موضوعي ومعقول ولو كنت منكم لاتخدت نفس قرارك
المشكلة اصبحت مشكلة ثقة تزعزعت الثقة وانتشرت رائحة الخيانة في الصفوف وهدا ما يدفع المتريت منا ان يتحمص ويحلل قبل ان يشارك باية خطوة
وفقكم الله لما فيه خير البلاد
تحياتي

جايدا العزيزي يقول...

انا ايضا اتفق معك واؤيدك مصطفى

فى كل حرف

دائما تحمل بين محبرتك الكثير

وجميع طرحك الراقى يروقنى

اللهم احمى مصرنا الغاليه

تحياتى

كريمة سندي يقول...

أسباب منطقية جدا عزيزي الغالي مصطفى سيف ..

فالفساد مازال منتشر بين صفوفهم فهو يسيرون على نفس الوتيرة في النظام السابق .. الله المستعان وربنا معاكم

Bent Men ElZaman Da !! يقول...

صراحه انا مابحاولش اتناقش فى السياسه بقالى فتره عشان زهقت خلاص
بس انت كلامك جاب من الاخر اووووى
مش معنى ان فى ناس هتبقى رافضه المسيره
او حتى ان المجلس العسكرى دلوقتى يمشى
يبقى هما اعداء الثوره
بس المشكله فى بعد كده مش دلوقتى
موافقاك جدا فى كلامك

Tears يقول...

كل الامور ستسير للأسواء

ريــــمــــاس يقول...

مساء الغاردينيا أستاذ مصطفى
رغم انس مش بتكلم في السياسة ومش بفهم فيها اصلاً :)
بس الي فهمته من كلامك أسباب منطقية
ولكن ماأستطيع قوله أنك راقي بكل ماتكتب وحفظ الله مصر الحبيبة مما هو قادم ..ليكتب الله لها ايام اجمل من التي مضت وستبقى قلوبنا ودعواتنا لها "
؛؛
؛
لروحك عبق الغاردينيا
reemaas

شمس النهار يقول...

اهو انا بقا ماهدانيش شوية غير كلام ابو الفتوح
ان شاء الله الاحداث الاخيرة دي تكون السبب في لم الشمل تاني
ماعندكش فكرة يامصطفي انا حزينة قد ايه لدرجة ان كتب كتاب بنتي السبت الجاي ومش عارفة افرح وخصوصا انه اتأجل قبل كده علشان انلاع الثورة في يناير

شهرزاد المصرية يقول...

معاك حق فى كل كلامك
دة وقت العقل و ضبط النفس و إلا الأمور حتسوء أكثر ماهى سيئة دلوقت
تحياتى

مصطفى سيف يقول...

شهرزاد
اشكرك اختي العزيزة
نعم هي مشكلة ثقة
حفظ الله بلدنا الغالية والامة العربية كلها
تحياتي

مصطفى سيف يقول...

جايدا العزيزي
اشكرك اختي الغالية
نورتيني بتعليقك الجميل

مصطفى سيف يقول...

كريمة سندي
نعم الفساد ما زال مستشري نامل في غد افضل
اشكرك اختي العزيزة
نورتيني

مصطفى سيف يقول...

بنت من الزمان ده
في هذه المرحلة لا يجب ان يزايد احد على احد ويجب ان نتحلى جميعا بالترابط وتبادل الافكار
اشكرك اختي العزيزة نورتيني

مصطفى سيف يقول...

تيرز
نأمل في غد افضل
تفائلوا خيرا تجدوه
اشكرك اختي العزيزة نورتيني

مصطفى سيف يقول...

ريماس
اشكرك على كلماتك الطيبة
نورتيني

مصطفى سيف يقول...

شمس النهار
اولا الف مليون مبروك لبنتك وربنا يتمملها بخير
ثانيا افرحي وزئططي محدش واخد منها حاجة ورب ضارة نافعة يمكن ده يكون سبب في لم شملنا تاني ونحقق مبادرة ابوالفتوح
تحياتي

مصطفى سيف يقول...

شهرزاد المصرية
حقا يجب التعقل والتفكير في كل خطوة الآن
اشكرك

ريــــمــــاس يقول...

مساء الغاردينيا أستاذي مصطفى
يعني مش عارفة اقول ايه بس لسى موافقة على تعليقك في مدونتي وطبعاً مش هقدر ارد على التعليقات النهردة وكان لازم اجي وارد على طلبك رغم اني زعلت انك بتستأذني مش لسى قايل اختي الصغيرة يبقى بتستأذن ليه ههههههه بجد بتشرف بكلماتك وشرف ليا الي كتبته والي طلبته وطبعاً موافقة وبـ إبتسامة :)"
؛؛
؛
لروحك عبق الغاردينيا
reemaas

ويكا يقول...

هو ده الكلام يادرش

تسلم

vanilla scent يقول...

انا قلت كدا والله انى ضد المسيرة دي لكن ضد استخدام العنف بكافة اشكاله

.. دلوقت القوى السياسية بتقطع بعضها

امال بعد كدا هتعمل ايه

ربنا يسلم ان شاء الله

faroukfahmy58 يقول...

انا لا شفت ولا هشوف اللى الواحد بيشوفه هذه الايام
طلما ليس لهذه الثورة زعيما واحدا وكل واحد عامل فيها ريس سوف نصل الى لا شئ من اللى انت بتقوله يا مصطفى
ونرجع الىالقرآن(اترضون لله اربابا )
هذا الكون لا بد له من اله واحد يسيره ، ولابد لكل بلد من رئيس واحد يحكمها ، ولابد لكل اسرة من اب واحد يربطها والا اختلت الموازين وكثرت وتعددت الآراء والمضاربات والمطالبات وربنا يستر فى رئيسنا اللى هيكون جديد

Carmen يقول...

بايدك فى كل كلمة يادكنور بس الفرق انى بجد مابقتش عارفة الصح من الغلط :(

ابراهيم رزق يقول...

الموضوع ده اتكلمت فيه مع فاتيما

مفيش حاجة حصلت
و مفيش بديل
يجب الضغط لان التجربة علمتنا ان جميع المطالب لا تاتى الا بالضغط
لكن المواجهة سيخرج منها الكل خسران

انا خلاص داخل على اكتئاب مش طايق اى حاجة او اى كلام
انا بفكر اخد اجازة و اسافر الاقصر

تحياتى

دعاء العطار يقول...

وربنا مابقيت فاهمه أى حاجه فى أى حاجه

أسمع كلام .. أقول اه صح عندهم حق

أسمع كلام تانى ... أقول اه فعلا كلامهم مظبوط

مش بقيت عارفه مين صح وين غلط

بس بصراحه يادكتور مصطفى أنا مش شايفه أى تغيييييييير ... تغيير ظاهرى لكن الفساد هو هو وزى ماهو

طب نفسى أفهم ليه تأجيل المحاكمات ؟

وليه مدنيين بيتحاكموا محاكمات عسكريه ؟ .. فى حين ان قتالين قتله اتنقلت محاكماتهم لشرم الشيخ

مادى كلها اسئله تخللى الواحد هيتشل

ليه مصريين يتعاملوا معانا ع ان مفيش ثوره حصلت

انا مش مع التصعيد بس برضه مش موافقه خالص ع اللى بيحصل ف البلد

وبجد بقى نفسى مسدوووده عن كل حاجه

ع رأى عمنا جاهين

يامين يقولى الصح فين والغلط

دمت ودامت لنا مصر بخير (:

وجع البنفسج يقول...

في ناس مضحوك عليها
وفي ناس غلابة وأي كلمة بتوديهم وبتجبهم
وفي ناس عايزة تخرب البلد وتوديها في داهية ..
وفي ناس بتخاف على البلد وعايزين يعيشوا بأمان..
وفي ناس بتحب البلد بس على طريقتها الخاصة ..
وفي ناس فاكرين انهم صح وغيرهم غلط وعايزين يمشوا البلد على كيفهم ..
الوضع مش متحمل أكثر من هيك ..

عن جد حطوا عينكم على مصر ومصلحة مصر بالاول وبالاخير ، لحسن تصحوا يوم ما تلاقوش مصر ..

يارب تحفظ مصر وأهل مصر ..
يمكرون ويمكر الله والله خير الماكرين .
اللهم رد كيد المؤتمرين على مصر في نحورهم .

مصطفى سيف يقول...

ريماس
اشكرك الف شكر اختي العزيزة لاهتمامك

مصطفى سيف يقول...

ويكا
شكرا يا باشمهندس
نورتني

مصطفى سيف يقول...

vanella scent
اشكرك اختي العزيزة
بس القوى الوطنية بعد احداث العباسية بدات تتحد وده بيديلنا امل
تحياتي

مصطفى سيف يقول...

فاروق فهمي
اتفق معك استاذي الجليل انه يجب ان يكون هناك ابا واحدا يعول الاسرة كي تتحد كلمة الثوار عليه وحتى لا يتشرذموا فيضيعوا
واعتقد بعد احداث العباسية حان الوقت لنلتف على كلمة سواء

مصطفى سيف يقول...

كارمن
كلنا زي بعض محدش فاهم حاجة
اشكرك ونورتيني

مصطفى سيف يقول...

استاذي الفاضل ابراهيم رزق
وهل انا قلت الا نضغط؟
كل ما قلته للذين خرجوا في تلك المسيرة ما هدفكم من الخروج؟ وهل وضعتم سيناريوهات وفكرتم فيما سيحدث بعد ذلك؟
كل ما فعلت انا هو عرض سيناريوهات لو ان الجيش او البلطجية لم يهاجمهم ووصلوا للمجلس العسكري
هو تصور من عندي لا اكثر
اجتهاد شخصي قد يخطىء وقد يصيب
كلنا ذلك الرجل يا عزيزي كلنا في حالة لا نحسد عليها ونريد اجازة
وتنور الاقصر يا صاحبي

مصطفى سيف يقول...

دعاء العطار
هناك وسائل ضغط تؤتي ثمارها فلماذا التصعيد لو توحدت كلمة الثوار فيكفي اعتصام التحرير
كلنا اصبحنا لا نفهم وكأننا نحيا لغزا
تحياتي واشكرك

مصطفى سيف يقول...

وجع البنفسج
اشكرك اختي العزيزة لمؤازرتك لشعبك المصري فانتي مصرية خالصة وانا فلسطيني خالص
وصدقتي هناك الكثير من ينساق وراء حماسه ايمانا انه بالحماس فقط تتحقق الامال
تحياتي

بسنت يقول...

بدايه انا مع اى مبادره ترجع التألف والاتفاق على المبادئ الاساسيه وبعد كدا نختلف على اى حاجه تانيه المهم نرجع نتفق تانى

بالنسبه للمسيره انا معاك انها كانت غلطه بس دايما برجع واقول روح شباب ثائر مافى رأس منظم يقود أو يوجه
ربما دى تكون ميزه فى بدايه الثوره بس دلوقتى بقت سيئه لأن الاراء كترت جدا

بس مايمنعش رفضى للضرب وشغل البلطجيه
وان كنت انت قلت وجهه نظر هنا كانت غايبه عنى شويه
الهيبه- الاعداء- دا تماما لا يتعارض مع رفض بيانات المجلس العسكرى وكلام الروينى والباقين كمان
انا متضامنه تماما مع 6 ابريل الحقيقه

البوست فيه تكمله ممتازه لبعض الجوانب كنت محتجاها
شكرا
ودمت بخير

مصطفى سيف يقول...

بسنت
كلنا متضامنين مع 6 ابريل وضد كلام الرويني
بس انا بقول الناس كلها تطلع الورق علشان يبقى في شفافية قدام الاغلبية الصامتة اللي حاسين بحيرة دلوقت ومش فاهمين ايه اللي بيحصل
البوست كله ضد البلطجة واستخدام العنف
بس الاهم هو حساب الخطوات المستقبلية ورسم سيناريوهات لاي خطوة بنخطوها
اعتقد وجهة نظري واضحة
اشكرك اختي العزيزة ونورتيني

عباس ابن فرناس يقول...

ولهذه الاسباب انا ايضا لست " معا"المسيرة وبتاكيد ليس معنا ذلك اننى ضدها

تحياتى المستعطرة
راقتنى الزيارة

سندباد يقول...

لهذه الاسباب ما زلت مصر علي ان الامر يحتاج قدر من الهدوء سواء من الشعب او من الحكومة او من المجلس العسكري لازم كلنا يبقي لينا هدف واحد عشان نقدر نوصل لبر الامان انما الكل دلوقتي بيحاول يدور علي مصالحه الشخصية دون النظر للمصلحة العامة سواء كانوا سلفيين او اخوان او جماعات او ليبراليون او وفد او عمل او حتي شباب الثورة والهدف العام حاليا تصدير فكرة احترام الثورة للعالم اجمع خاصة اسرائيل اما ما نقوم به حاليا هو اهدار كرامة الثورة كما اهدر مبارك كرامة المصريين
وادعو الله ان يكون القادم افضل

Casper يقول...

متفق معاك تماما يا مصطفى
انت قلت كل ما يجب أن يقال

مجداوية يقول...



السلام عليكم

طبعا حضرتك عارف إني موافقة مليون في المائة على كلامك :)

وعلى فكرة ده رأى ناس كتير ولازم الناس دي تسمع لصوت العقل وتتصرف بفطنة وذكاء

ربنا يحفظ مصر من كل سوء
وكل عام وحضرتك وكل أحبابك بألف خير بمناسبة قدوم رمضان

الاحلام يقول...

بوست غايه فى الروعه والاهميه هذا والله حقيقة ما نرويه فى اذهاننا
سلمت مصر والمصريين جميعا وسلم قلمك الرائع دائما تحياتى الاحــــــلام

د/دودى يقول...

معاك و زى ما بقول دايما احنا خلاص ضهرنا للحيط و مفيش اختيارات تانيه...عدوها بقى اليومين دول و لما يبقى لينا مجلس شعب و ريس يبقى نعمل فيه اللى احنا عايزينه

أبو حسام الدين يقول...

حفظ الله مصر من كل سوء وجميع بلداننا العربية والاسلامية.

أسأل الله أن تكون الكلمة واحدة والهدف واحد.

والله ولي التوفيق

ليس فقيرا من يحب يقول...

مش عارفه اقول حاجه غير ربنا ييسر امورنا

ويحمى مصرنا الواحد بقى بيخاف يفكر اصلا

كل سنه وانت طيب يا دكتور

بعوده الايام

الحــب الجميـــل يقول...

كل عام وانت طيب وبخير يا سيف


۩ رمضان كريم ۩